Werkers is besig om massagrafte teen ‘n heuwel noord van die hoofstad Port-au-Prince in Haïti te grawe vir duisende slagoffers van die verwoestende aardbewing.
Na bewering sal sowat 10 000 lyke per dag in die grafte gegooi word.
Tydelike klinieke kan skaars byhou en sukkel om al die beseerdes te help. Volgens kundiges is daar ‘n groot risiko dat siektes nou kan uitbreek.
“Die volgende gesondheidsrisiko is iets soos diarree kan uitbreek. Daar bestaan ook ‘n gevaar dat verskeie persone lugweginfeksie kan opdoen as gevolg van die haglike lewensomstandighede,” het dr. Greg Elder, ‘n verteenwoordiger van Dokters-sonder-grense in Haïti gesê.
Werkers wat verantwoordelik is vir die grawe van die grafte beskryf die situasie as “baie traumaties”. Lyke word sonder ophou aangery om begrawe te word.
“Ek het soveel kinders gesien, so baie kinders. Ek kan nie in die aand slaap nie en as ek doen kry ek nagmerries,” het Foultone Fequiert (38) vertel terwyl hy sy gesig met sy T-hemp bedek het teen die stank.
Die werkers kry glo ook nie kans om die oorledenes behoorlik te begrawe nie. Hulle word eenvoudig net in die grafte gegooi en met grond toegegooi.
Volgens die plaaslike regering word die dodetal geskat op 200 000 met sowat 80 000 wat in die massagrafte begrawe word. Na bewering is sowat 2 miljoen mense haweloos gelaat en het sowat 250 000 mense dringend hulp en bystand nodig.
Die grondwetlike bepaling in Duitsland dat staatskole godsdiensonderrig moet aanbied, word nou op ‘n proefgrondslag na die land se sowat 90 000 Moslem-skoolkinders uitgebrei.