Kategorie: Internasionale nuus

Kenners wat China se dodelike H7N9-voëlgriepvirus internasionaal ondersoek, het Woensdag gesê dit is “een van die dodelikste griepvirusse” wat hulle tot dusver gesien het.

Die eerste geval buite China is Woensdag in Taiwan bevestig.

China het 108 gevalle en 22 sterftes bevestig sedert die eerste infeksies op 31 Maart aangemeld is. Taiwan het Woensdag sy eerste infeksie bevestig by ‘n man wat onlangs teruggekeer het nadat hy in die ooste van China, waar die meeste gevalle aangemeld is, gewerk het.

“Hierdie is vir seker een van die dodelikste griepvirusse wat ons tot dusver gesien het,” het Keiji Fukuda, een van die voorste griepkenners van die Wêreldgesondheidsorganisasie (WGO), gesê.

Fukuda het aan ‘n nuuskonferensie gesê dat die H7N9-virus makliker oorgedra word as die meer algemene H5N1-stam van die voëlgriepvirus.

“Ons dink hierdie virus is makliker oordraagbaar na mense as H5N1,” het hy gesê in verwysing na die stam wat volgens die WGO sedert 2003 meer as 360 mense wêreldwyd geëis het.

“Wanneer ons na griepvirusse kyk, is hierdie ‘n ongewoon gevaarlike virus,” het hy gesê, maar het bygevoeg: “Ons is regtig nog in die beginstadium.”

Taiwannese gesondheidsbeamptes het gesê hul eerste geval, ‘n 53-jarige man wat in die oostelike Chinese stad Suzhou gewerk het, het drie dae nadat hy via Sjanghai na Taiwan teruggekeer het simptome getoon.

Chiu Wen-ta, China se minister van gesondheid, het aan verslaggewers gesê die pasiënt het beweer dat hy nie in kontak was met pluimvee nie en dat hy nie halfgaar voëls of eiers geëet het terwyl hy in Suzhou was nie.

Vroeg Dinsdagmiddag, is die geverifieerde Twitterrekening van die Associated Press gekraak. Die nuustwiet het beweer dat President Obama beseer is as gevolg van “twee ontploffings“ in die Withuis.

Die twiet het uitgegaan na die AP se 1,9 miljoen volgelinge.

Sien verder.

Duitse kanselier Angela Merkel het Maandag gesê Eurosonelidlande moet bereid wees om beheer oor sekere beleidskwessies te sedeer aan die EU sodat die blok werklik sy skuldkrisis te bowe kan kom en buitelandse beleggers kan teruglok.

Merkel het ook haar benadering tot die krisis teen kritici verdedig wat beweer sy het te veel klem geplaas op soberheid, en gesê Europa moet ‘n manier vind om groei en soliede finansies te kweek.

Die kommentaar het gekom twee maande voor die Europese leiers in Brussel ‘n sogenaamde “fiskale unie” sal bespreek.

“Ons moet gemeenskaplike oplossings vind wanneer ons oor die afgrond staar,” het Merkel gesê. “Maar so gou as die druk verlig, sê mense weer hulle wil hul eie gang gaan.

“Ons moet bereid wees om te aanvaar dat Europa die laaste woord oor sekere aangeleenthede is. Anders sal ons nie in staat wees om voort te gaan om Europa te bou nie,” het sy bygevoeg.

“Ons hoef nie ons nasionale praktyke op te gee nie, maar ons moet versoenbaar wees,” het Merkel gesê. “Dit is nou chaos.”

“Ons moet bereid wees om te breek met die verlede om vorentoe te beweeg en ek is gereed om dit te doen,”hetsy afgelsuit.

Die oorlewende verdagte in die Boston-marathon bomaanvalle is formeel aangekla. Die Amerikaanse departement van Justisie sê die 19-jarige Dzhokhar Tsarnaef is daarvan aangekla dat hy wapens van massa-vernietiging gebruik het.

Hy kan die doodstraf opgelê word indien hy skuldig bevind word. Hy is Vrydagaand gewond en gevange geneem ná ‘n uitgebreide soektog waarin sy ouer broer en vermeende medepligtige, Tamerlan Tsarnaef dood is.

‘n Woordvoerder van die Withuis sê Tsarnaef sal nie as ‘n sogenaamde “landsvyand” behandel word soos wat sommige Republikeine in die Kongres voorgestel het nie.

Dié status vir verdagtes het na vore gekom ná die terreuraanvalle op 11 September 2001. Dit het beteken dat verdagtes minder regte as gewoonlik het. Drie mense is in die Boston marathon-ontploffings dood en meer as 180 is beseer.

‘n Groep wat ‘n Islamitiese opstand teen Rusland stook, het gister gesê hulle is nie in ‘n oorlog teen die Verenigde State van Amerika gewikkel nie, en hulself gedistansieer van die Boston-bomme.

“Ons veg met Rusland, wat verantwoordelik is nie net vir die besetting van die Kaukasus nie, maar vir monsteragtige misdade teen Moslems,” lui ‘n verklaring van die Kaukasus Emirate militante in Dagestan.

Die opstand is gewortel in twee separatiste oorloë wat Rusland teen Tsjetsjeense separatiste na die val van die Sowjet-Unie gevoer het.

Die Tsarnaevgesin wat oor ‘n dekade gelede na die Verenigde State van Amerika geëmigreer het, kom uit ‘n klein gemeenskap van Tsjetsjene in die Sentraal-Asiatiese land van Kirgisië, ‘n hoofsaaklik Moslemland van 5,5 miljoen mense.

Hulle het in 2001 na ‘n suidelike Russiese provinsie waar hul ouers nou woon, verhuis.

Bure het gesê hulle het niks ongewoon opgemerk by die Tsarnaevs nie, wat hierdie somer gehelp het om hul vader se woonstel in Makhachkala op te knap, ‘n besige stad in Dagestan.

“Hulle sê hy was fanaties. Ek het nie dit gesien nie, “sê Madina Abdoelajewa, 45, wat die klein kruideniersware winkel besit waar een seun dikwels gekoop het. “Ons is almal Moslems hier. Ons is almal deel van Islam. Ons almal bid.”

Die Associated Press, Reuters, en talle ander media- en nuusbronne het skielik hul terminologie verander na die bomaanvalle en na die Tsjetsjene verwys as ‘n “jihadistiese bedreiging van plekke soos Tsjetsjenië” waar “selfmoordaanvalle, bloedvetes, en ‘n gyselaarkrisis” alledaags is.

Voorheen is na die Tsjetsjene verwys as “rebelle” en “vryheidsvegters”. Die voormalige CIA-hoof James Woolsey, het homself beskryf as ‘n “vriend” van Tsjetsjnië.

Die Carnegie-stigting se Moskousentrum, befonds deur die New Yorkse hoofkantoor, ‘n invloedryke dinkskrum, het tot onlangs in tandem met die militêr-politieke Rand Corporation gewerk om Amerikaanse beleidsvoorstelle oor Rusland se rol in die “Groter Midde-Ooste” te ondersoek.

Die Stigting het Poetin toe vir die Tsjetsjeense gruweldade van byna ‘n dekade gelede blameer. Die sentrum het voorheen volhard daarin om Moskou se eise dat daar ‘n skakel tussen die Tsjetsjene en Al Kaida is, te weerlê.

Al Kaida-rebelle wat die bloedige opstand in Sirië lei, word tans deur NAVO opgelei en bygestaan.

Die Boston-bomverdagte, Dzhokhar Tsarnaev, is steeds in ‘n ernstige toestand in ‘n hospitaal in Boston en volgens die polisie nie in staat om vrae te beantwoord nie.

Tsarnaev is dié naweek deur die polisie in hegtenis geneem nadat hulle hom in ‘n boot agter in ‘n erf gekry het.

Hy word daarvan verdink dat hy verantwoordelik was vir verlede naweek se bomaanval tydens die Boston-marathon, waarin drie mense dood en meer as 170 beseer is.

Sy ouer broer is vroeër deur die polisie doodgeskiet.

Afgevaardigdes van die Afrika-Unie (AU) en die Verenigde Nasies (VN), sowel as van die Europese Unie, die VSA en Frankryk het Donderdag ‘n vergadering in Tsjad bygewoon waar President Jacob Zuma “vir meer as agt ure”  gesmeek  is om troepe terug te bring na die Sentraal-Afrikaanse Republiek, sê Minister van Internasionale Betrekkinge en Samewerking Maite Nkoana-Mashabane.

Die versoek om hulp kom ná ‘n buitengewone vergadering van die lande in die ekonomiese ontwikkelingsgemeenskap van Sentraal-Afrika (ECCAS) Donderdag in Tsjad.

Die Sunday Times het gister berig dat die regering die versoek oorweeg, maar dat indien gestuur, die troepe sal dien as vredesmagte, ter ondersteuning van die multinasionale mag (Fomac) in die streek.

Die minister het gesê die vergadering het met Zuma saamgestem dat geen selfopgelegde leier sal ondersteun word in die SAR nie.

Sy het gesê Suid-Afrika sou uit die vergadering geloop het indien daar geen ooreenkoms oor hierdie kwessie was nie.

“Ons het gesê Suid-Afrika word gelei deur ‘n vry en demokraties verkose president, en die mense van die SAR behoort dit ook te hê… hulle het minerale, maar hulle is die armste in die wêreld, omdat hulle altyd deur huursoldate en rebelle gelei word. Hulle verdien ook hul dag in die son,” het sy gesê.

“Selfs die man wat verklaar het dat hy die leier [in die SAR] is het gesê:” Die mense wat hier vanuit Suid-Afrika was het vir ons ‘n wonderwerk gewys, ons vermoor 13 van hulle, maar 600 van ons het gesneuwel’,” het sy gesê. Michel Djotodia, die Seleka-rebelleleier, is tans tussentydse staatshoof.

Nkoana-Mashabane het beloof dat Suid-Afrika die Afrika-kontinent polities sal bevry en, indien nodig, sal Pretoria die bevryding verdedig.

Mashabane het bygevoeg dat ander Afrika-lande hulself na Suid-Afrika wend wanneer daar moeilikheid is, en sê dit is omdat Suid-Afrika deur die oudste politieke beweging in die kontinent gelei word, wat geïnspireer is deur leiers soos Ghana se bevrydingsheld en president Kwame Nkrumah.

Sedert die Seleka-rebelle die beheer in die land oorgeneem het, heers chaos in Bangui.

Eccas het aanvanklik gesê het Djotodia sal nie as leier erken word nie, maar die oorgangsregering het verlede week sy posisie as tussentydse staatshoof bekragtig.

Djotodia en Nicolas Tiangaye, premier van die SAR, mag hulleself egter nie in die presidensiële verkiesings binne die volgende 18 maande verkiesbaar stel nie.

Die pa van die twee verdagtes in die ontploffings by die Boston-marathon het Saterdag gesê sy seuns in ‘n lokval gelei.

Anzor Tsarnaev het aan Rusland se Interfax-nuusgagentskap gesê die geheimediens het sy seuns geteiken omdat hulle Moslems is.

Anzor is woedend oor die aantygings wat teen sy seuns, Dzhokhar en Tamerlan gemaak is.

“Iemand het hulle in ‘n lokval gelei. Ek weet nie presies wie nie, maar iemand het en deur lafaarde te wees het hulle die kind doodgeskiet. Daar is polisiebeamptes soos die.”

Meer as 100 mense wat gewond is in die aanvalle is intussen uit hospitale in Boston ontslaan en minder as 10 is in ‘n kritieke toestand.

Die polisie het Vrydagaand ná ‘n grootskaalse soektog die tweede verdagte vasgetrek in verband met Maandag se ontploffings.

Die polisie het op ‘n wenk van ‘n plaaslike inwoner reageer en die 19-jarige Dzhokhar op ‘n boot in ‘n agterplaas in Watertown gevind, waar hy weggekruip het. Tsarnaev is gewond in ‘n skietgeveg waarin sy broer en medepligte, Tamerlan, dood is.

Dzhokhar is in ‘n ernstige toestand in die hospitaal.

Intussen het pres. Barack Obama die polisie en wetstoepassingsagentskappe geloof.

Drie mense is dood en meer as 170 ander mense is gewond in die ontploffings wat naby die eindstreep van die Boston-marathon plaasgevind het.

Die Boston-bomverdagtes Dzhokhar en Tamerlan Tsarnaev is Moslems van Tsjetsjeense herkoms wat ‘n dekade gelede na die Verenigde State geimmigreer het, maar steeds noue bande met hul oorloggeteisterde geboorteland gehad het.

Dzhokhar, wat Vrydagaand in hegtenis geneem is, was ‘n stoeier op hoërskool en ‘n student aan die Universiteit van Massachusetts. Sy Twitter-profiel is tipies dié van die gemiddelde Amerikaanse tiener.

Bure en vriende het hom beskryf as hardwerkend en goedhartig en het hul skok uitgespreek oor sy beweerde betrokkenheid by Maandag se bomontploffings wat die lewe van drie mense geëis en meer as 180 ander gewond het.

“Hy was ‘n lieflike, lieflike kind,” het Larry Aaronson, ‘n buurman aan CNN gesê oor Dzhokhar.

“Jy kry mense wat sê ‘O, ek ken hom. Hy is nie instaat tot so iets nie.’ Dit is wat ek vir jou sê. Ek is net een van daardie mense.”

Terwyl Dzhokhar aktief was op Twitter en honderde boodskappe oor sy lewe en gedagtes met die wêreld gedeel het, is baie min bekend oor sy ouer broer, Tamerlan, wat dood is in ‘n skietgeveg met die polisie.

Tamerlan, ‘n 26-jarige ingenieurstudent wat ‘n boksliefhebber was, het by ‘n vorige geleentheid Amerikaanse owerhede se aandag getrek.

Die FBI het gesê agente het hom in 2011 ondervra op versoek van ‘n buitelandse regering, maar kon geen inligting bekom nie.

‘n Blad op die sosiale netwerk VKontakte, Rusland se weergawe van Facebook, sê Dzhokhar het vanaf 1999 tot 2001 ‘n laerskool in die stad van Makhachkala in Dagestan, suidelike Rusland bygewoon.

Dagestan grens aan die streek Noord-Kaukasus van Tsjetsjenië, wat sedert 1994 geteister word deur twee oorloë tussen Rusland se weermag en rebelle.

Die Tsarnaev-gesin het intussen die plofbare Kaukasus-streek verlaat.

“Ons is Moslems. Ons is Tsjetsjene, ons is etniese Tsjetsjene,” het Ruslan Tsarni, ‘n oom van die broers, aan die Amerikaanse media gesê.

“Iemand het hulle geradikaliseer. Dit is nie my broer nie.”

Tsarni het gesê sy broerskinders het in 2003 vanaf Kirgisië in Amerika aangekom en het asiel gekry. Hy het gesê hulle is “lafaards” wat nie by die Amerikaanse lewenswyse kon aanpas nie.

Op die vraag oor hoekom hulle terreur oorweeg het, het hy gesê die enigste rede waaraan hy kan dink is dat hulle nie aangepas het nie.

Volgens die jongste berigte istussen 60 tot 70 mense is dood toe ‘n reuse-ontploffing ‘n kunsmisaanleg naby Waco, Texas geruk het, sê plaaslike mediabronne.

Inwoners vrees ook dat ‘n tweede tenk by die aanleg in die dorp West, Texas, kan ontplof.

Tientalle huise in die gebied is in puin gelê en ‘n ouetehuis met meer as 130 mense is ontruim.

Minstens 100 pasiënte is in plaaslike hospitale opgeneem ná die ontploffing.

“Dit was soos ‘n atoombom wat ontplof het,” het Tommy Muska, burgemeester van West, aan die nuusnetwerk CNN gesê.

Berigte oor die aantal sterftes het in die minute ná die ontploffing verskil. ‘n Dodetal van ongeveer 60 tot 70 is deur ‘n plaaslike stasie, KWTX, gegee. Dié syfer is volgens die stasie deur die direkteur van nooddienste in West, George Smith, gegee.

Keith Hopkins, verbonde aan die Providence-hospitaal in Waco, het aan die nuusagentskap AFP gesê nooddienspersoneel in West het ook die sterftesyfer op 60 to 70 geraam.

DL Wilson, ‘n woordvoerder vir Texas se departement van openbare veiligheid, het egter aan verslaggewers gesê hy kan nie die sterftesyfer bevestig nie

“Ons het bevestiging van sterftes. Die getal is nog nie duidelik nie. Dit kan elke minuut styg.”