Slegs op PRAAG. Hier kry u 'n omvattende beeld van alle nuusgebeure rondom Afrikaans en Afrikaners, die enigste volksnuusblad op die web!
Die Vryheidsfront Plus sal more, Woensdag 9 Desember 2009, om 11:00 ‘n mediakonferensie hou waartydens die party sy jaarlikse evaluering van die ANC-regering bekend sal maak. Dr. Pieter Mulder, VF Plus-leier en adjunk-minister van Landbou, Bosbou en Visserye, sal die party se evaluering aan die media bekend maak by die party se hoofkantoor in Pretoria. Hy sal daarna meer besonderhede gee oor die rede vir die toekenning van spesifieke punte vir die ANC-regering se bestuur van die land.
Joernaliste, skrywers, aktiviste vir Afrikaans en gewone Afrikaners gaan môre Saterdag 5 Desember vanaf 16.00 in die “Colonial Room” (ironiese benaming!) by Markspark in Johannesburg byeenkom om hulde aan die ontslape joernalis Chris Louw te bring. RSG, Beeld, praag.co.za en ander publikasies en media sal daar verteenwoordig wees.
Lede van die publiek en lesers van Chris Louw se rubrieke en artikels is insgelyks welkom om die geleentheid by te woon. Verversings sal bedien word en daar sal ‘n kontantkroeg beskikbaar wees.
Elkeen wat Louw geken het, sal die geleentheid hê om oor ‘n luidsprekerstelsel te praat en aan hom hulde te betoon of hul sê te sê. Louw se selfmoord te midde van die bestaanskrisis wat Afrikaners ervaar, het ‘n ongekende reaksie veroorsaak en ‘n behoefte onder Afrikaanse mediamense en skrywers ontketen om rondom Louw se dood met mekaar te assosieer en te besin.
Van die bekendes wat die geleentheid gaan bywoon, benewens dr. Dan Roodt van PRAAG, is Foeta Krige, uitvoerende regisseur van Monitor op RSG, Tim du Plessis, redakteur van Beeld, Andriette Stofberg, redaktrise van die nasionale bylaag “By” wat in Beeld, Burger en Volksblad versprei word. Dr. Frederik van Zyl Slabbert, voorsitter van die Caxton-groep en voormalige politikus, ry spesiaal van Swaziland af om die geleentheid by te woon.
‘n Groep Afrikaanse skrywers onder die afgetrede akademikus, dr. Charles Malan, gaan insgeslyks by Markspark te siene wees.
Die verwagting is dat die gesprek, besinning en kuier tot middernag sal duur en diegene wat eers later as 16.00 wil of kan opdaag, sal steeds welkom wees.
Uitgewery Praag gaan honderd-en-twintig eksemplare van die volledige “Ope brief aan Willem de Klerk”, die sogenaamde “Boetmanbrief” by die byeenkoms uitdeel. ‘n Kameraspan van www.praag.co.za sal ook die gebeure op video vaslê vir latere verspreiding op die internet.
Markspark is die sportsgronde tussen Emmarentiadam en Melvillekoppies in Johannesburg. Dit kan vanaf die ou DF Malanrylaan (tans Beyers Naudé Drive) bereik word. Indien enigiemand navraag wil doen of aanwysings wil hê, stuur ‘n e-pos aan inlig@praag.org.
Joernalis Chris Louw, is met ‘n kopwond gevind wat dui op selfmoord, het die Noordwespolisie gesê.
“Hy het sy vrou beveel om in die huis te bly, en toe na buite gegaan. Daar is ‘n plek waar hy blomme geplant het, wat ‘n spesiale plek vir hom was soos ons verstaan. En by daardie plek het hy homself met ‘n AK47-aanvalsgeweer geskiet,” het sup. Lesego Metsi, ‘n polisiewoordvoerder gesê het nadat sy lyk op sy plaas naby die Hartbeespoortdam in Noordwes gevind is.
Louw, 56, het sy eie lewe geneem terwyl sy vrou en dogter in die huis was. Sy seun het na die woning teruggekeer toe hy van die voorval in kennis gestel is.
‘n Selfmoordnota is langs Louw se liggaam gevind en nóg een is op sy rekenaar gevind.
“Hy het ‘n selfmoordnota op die 29ste (November) geskryf, maar die datum daarna verander na die 30ste omdat hy nie toe sy lewe kon neem nie,” het Metsi gesê.
Die polisie het ook ‘n harde kopie van die nota gekry wat die datum van die 30ste dra.
Metsi het gesê die polisie het ‘n ondersoek geloods om vas te stel waar Louw die AK47 vandaan kon kry.
“Ons ondersoek ook waar die aanvalsgeweer vandaan kom want Louw se vrou het bevestig dat hy nie die eienaar van die AK47 was nie. Die aanvalsgeweer het roes op gehad, so dit lyk asof dit iewers weggesteek was voor hy selfmoord gepleeg het,” het Metsi gesê.
Familie en vriende het vroeër by Louw se plaas naby die Hartebeespoortdam in Noordwes bymekaargekom om hul meegevoel te toon.
“Dit is altyd ‘n skok en natuurlik was hy ‘n oud-kollega én vriend,” het Foeta Krige gesê, wat Louw se lyk gevind het.
Krige het gesê Louw het Maandagmiddag kort na 14:00 vermis geraak. Die plaaslike buurtwag het gesoek maar kon hom nie vind nie.
Krige het gesê Louw, wat sy voormalige baas by Radio Sonder Grense was, het onlangs ‘n boekkontrak losgeslaan.
Krige sê Louw het die gesig van hedendaagse Afrikaanse debatte verander toe hy uitvoerende regisseur van RSG was en dat hy ‘n “baie liberale Afrikaner” was. Krige is tans die regisseur van Monitor.
Hy het ook die afgelope tyd gereeld oor ‘n vlaag misdade in die gebied vir Beeld geskryf en het sy kommer oor die toestand in die land te kenne gegee.
“In sy laaste artikels het hy die ontnugtering van baie Suid-Afrikaners, wat se verwagting van die nuwe Suid-Afrika nie ‘n werklikheid geraak het nie, uitgebeeld,” het Pieter Mulder van die Vryheidsfront Plus, oor Louw gesê.
Louw het bekendheid verwerf met sy opspraakwekkende “Ope brief aan Willem de Klerk, Boetman is die bliksem in”, wat deur PRAAG uitgegee is. Die ope brief is net gedeeltelik in Media24 weergegee.
Die ope brief het aanleiding gegee tot die Boetmandebat. Hy het in sy brief aan de Klerk die ouer generasie Nasionale Partyleiers daarvan beskuldig dat hulle papbroekige verraaiers was wat bereid was om jong lewens vir hulle ideaal van apartheid op te offer maar daarna eenvoudig oorgestap het na die ANC.
Louw was deel van ‘n sending Afrikaners wat in 1987 met die toe-nog-verbode ANC ontmoet het in Senegal. Hy het eerstehandse kennis gedra van die oorgawe en verraad van die Nasionale Party. Hy gee ‘n omvattende beskrywing daarvan in sy opvolgboek “Boetman en die swanesang van die verligtes”.
Hy was ‘n joernalis vir verskeie publikasies soos Mail & Guardian, Die Landbouweekblad, Vaderland en Oggendblad en het baie artikels vir Beeld geskryf.
Louw word deur sy vrou, seun en dogter oorleef.
Mulder het Louw se eerlikheid geprys. “Ek het groot waardering gehad vir die eerlike wyse waarop hy ander gekritiseer het, ook homself. Die vreeslose manier waarop hy alles en almal gestorm het wat hy as oneerlik beskou het, sal sy groot bydra tot die Suid-Afrikaanse debat bly.”
Dit is met groot skok dat ek verneem het van Chris Louw se skielike dood. Ek het deur die loop van jare talle sinvolle gesprekke met hom gehad as mediapersoonlikheid maar ook as vriend.
Die uitgesproke wyse waarop Chris Louw met Suid-Afrika se probleme geworstel het, het gemaak dat niemand koud teenoor hom kon staan nie. In sy laaste artikels het hy as oud-Dakar-ganger die ontnugtering van baie Suid-Afrikaners, wie se hoë verwagtinge van die nuwe Suid-Afrika nie gerealiseer het nie, verwoord.
Ek het groot waardering gehad vir die eerlike manier waarop hy andere, maar ook homself gekritiseer het. Die onverskrokke wyse waarop hy alles en almal wat hy as oneerlik beleef het, gestorm het, bly sy groot bydrae tot die Suid-Afrikaanse openbare debat.
My opregte simpatie gaan uit aan sy vrou en familie.
Volgens kollegas en vriende van die veteraanjoernalis Chris Louw het hy selfmoord gepleeg deur hom met ‘n AK-47 op die dak van sy huis te skiet. Blykbaar het Louw, ‘n voormalige redakteur van RSG se aktualiteitsprogramme Monitor en Spektrum, finansiële probleme gehad en is daar die afgelope tyd ook 40 keer by sy huis op ‘n kleinhoewe by Silkaatsnek tussen die Hartebeespoortdam en Brits ingebreek.
Louw het in die jaar 2000 vir ‘n opskudding gesorg toe hy ‘n ope brief aan Willem de Klerk, broer van FW de Klerk, geskryf het wat aanstons as die “Boetman”-brief bekendgestaan het. PRAAG het die volledige brief van 5 000 woorde in boekvorm uitgegee.
In die onlangse tyd het Louw meer en meer krities oor die huidige bestel begin raak, ook as gevolg van sy werk as vryskutlandbouskrywer en die toenemende inbrake en aanvalle op sy eie plasie by Silkaatsnek. Hy het skerp kritiek op prof. Jonathan Jansen, nuut aangestelde bruin rektor van die Vrystaatse Universiteit, gelewer in artikels wat in Rapport en in Beeld gepubliseer is. Onder andere het hy Jansen as ‘n “wolf in skaapsklere” bestempel wat beplan om Kovsies stelselmatig te transformeer en te verengels.
Hy laat sy vrou Johanita en twee kinders, ‘n seun en ‘n dogter, agter.
Mnr. Jannie Fourie het aangehou veg teen twee gewapende swart aanvallers nadat hy nege keer geskiet is. Drie gewapende swartes het in die vroeë oggendure op 15 April 2008 by die Fouries se huis in Pretoruispark, Pretoria ingebreek.
Fourie is deur die gille van sy vrou Bernice wakker gemaak. Die volgende oomblik sien hy hoe twee swartes poog om die slaapkamerdeur van sy oudste seuntjie oop te forseer, met sy vrou wat dit aan die ander kant probeer toedruk om haar en die kind te beskerm.
Mnr. Fourie het gister in die Pretoriase streekhof getuig: “Hulle het my vrou deur die deur geskiet. Toe hardloop ek na die eerste, korter figuur, en slaan hom ‘n hele paar keer. Toe hy ineen sak, het ek my na die ander man gewend.”
Volgens Fourie was een van hulle gewapen met ‘n semi-outomatiese pistool en die ander met ‘n rewolwer. Self was hy ongewapen.
Jonas Masemola (27) en Romeo Maota Nkwagatse (24) pleit onskuldig op aanklagte van poging tot moorde, roof met verswarende omstandighede, die rig van ‘n vuurwapen en die onwettige besit van vuurwapens en ammunisie. ‘n Derde verdagte het ontkom.
“Hulle het op my gevuur,” het Fourie voortgegaan. “Ek kon voel toe hulle my middelvinger afskiet. Ek het die een agterna gesit toe hy by die gang af hardloop op pad na ons eenjarige baba se slaapkamer. Ek het gevoel daar is iets fout met my knie, maar ek het hom beetgekry en geslaan, terwyl hy aangehou het om skote teen my af te trek.”
Terwyl hy sy aanvallers met die vuis bygedam het en hulle op hom gevuur het, het “die lafaards soos maervarke geskree”.
As gevolg van die skoot deur sy knie en erge bloedverlies, het Fourie egter by die babakamer se ingang geval. Sy eenjarige seuntjie het regop in die bed gesit en van angs geskree. Hierna het die swart aanvaller tussen Fourie se bene kom staan om hom die doodskoot te gee. Die koeël het hom net onder sy hart getref.
Teen dié tyd het Jannie Fourie gevoel hy gaan dalk sterf. In die hof het hy gesê: “Ek is ‘n Christen. Ek glo dat die Here Jesus Christus daardie nag met my was. As ek moes doodgaan, het ek geweet ek gaan hemel toe. Hierdie aanvallers is kinders van Satan. Hulle was daar om te moor, nie om te steel nie. Dus het ek hulle weer aangeval, met die besluit om een laaste hou te slaan.”
Daarom het hy opgestaan om die swarte wat intussen na die slaapkamer gegaan het waar sy vreesbevange, gewonde vrou in ‘n kas weggekruip het. Mev. Fourie het in die hof gesê: “Ek het gedink dat my gesin besig was om uitgemoor te word en ek kon niks doen nie omdat ek besig was om my een seun vas te hou. Ek het hardop gebid.”
Volgens Fourie, het hy “geweet dat ek nog ‘n bietjie bloed in my oor gehad het en ek was bereid om dit alles te gee om my gesin te red. Ek het opgestaan en hom weer gejaag. Die lafaard het weggehardloop.”
Hierna het Fourie inmekaar gesak. Slegs sy selfoon en beursie met R90 daarin was weg.
Volgens mev. Fourie “was die hele gang van ons huis met bloed bedek. Dit het soos ‘n slaghuis gelyk. Die bloed het uit Jannie gepomp. Ek was vreesbevange.”
Die dapper vegter het twee weke in die intensiewe eenheid deurgebring, voordat hy op krukke huis toe is. Hy wou so gou moontlik terugkom by die huis omdat sy twee seuns in sy afwesigheid nagmerries gehad het.
“Ek het vir my gesin gebid, dat ons heel word en dat daar vergifnis kom. Ek het vrede gemaak, met die wete dat die Here die laaste regter is. Die aanvallers sal gestraf word en ek is vandag lewendig hier om oor die wonderwerk van ons oorlewing te getuig,” het hy verder getuig.
Die saak sal in Februarie 2010 voortgaan.
Dr. Pieter Mulder, adjunkminister van Landbou, Bosbou en Visserye, is die naweek eenparig as leier van die VF Plus herkies.
Alle leiersposisies in die VF Plus word op ’n tweejaarlikse basis deur die party se Federale Raad oor gekies. Die Federale Raad is die VF Plus se hoogste gesagsliggaam en bestaan uit afgevaardigdes uit al nege provinsies. Die naweek se Federale Raadsvergadering was die grootste Federale Raadsvergadering wat nog gehou is, met talle nuwe afgevaardigdes uit alle provinsies.
Mnr. Abrie Oosthuizen, Vrystaatse leier van die party, is as die Voorsitter van die party herkies.
Na sy eenparige verkiesing het dr. Mulder die afgevaardigdes bedank vir hulle vertroue in hom en sy tevredenheid uitgespreek met die entoesiasme en voltallige bywoning van die vergadering. Hy het daarop gewys hoe oorhaastige transformasie en regstelling tot krisisse in staatsondersteunde instellings soos Eskom, SAL, Transnet, SABC en Krygkor gelei het. By al hierdie instellings is die hoofde die afgelope jaar afgedank. Om te kritiseer en te kla alleen gaan egter nie help nie. “Wat lê anderkant kla?” het dr. Mulder gevra. Volgens dr. Mulder lê die VF Plus se beleid en antwoorde anderkant kla.
Dr. Corné Mulder (Wes-Kaapse leier en LP), mnr. Pieter Groenewald (Noordwes-leier en LP), adv. Anton Alberts (VF Plus Parlementslid), mnr. Andrew Gerber (voormalige Noordwes-LPW) asook mnr. Jaco Mulder (Gautengse leier en LPW) is as lede van die VF Plus se Uitvoerende Dagbestuur verkies.
“Die vernuwing van die party was duidelik uit die feit dat soveel jong mense die vergadering bygewoon het en dat twee van die provinsies nuwe provinsiale leiers verkies het,” het dr. Mulder gesê.
Noord-Kaap en Limpopo het nuwe provinsiale leiers aangewys. Mnr. Wollie Burger is as nuwe provinsiale leier vir die Noord-Kaap gekies in die plek van mnr. Carel Boshoff IV wat nie weer beskikbaar was nie. In Limpopo is mnr. Louis Trichardt as provinsiale leier verkies in die plek van dr. Willie Snyman wat uitgetree het.
Die oudste Afrikaanse koerant in die land, Die Volksblad, kry van aanstaande jaar af ‘n bruin redakteur, mnr. Ainsley Moos. Hy sal vanaf Januarie 2010 die leisels by mnr. Jonathan Crowther oorneem wat ná 36 jaar in die joernalistiek aftree.
Crowther was tien jaar lank Die Volksblad se redakteur. Die koerant behoort aan die land se grootste mediagroep, Nasionale Pers, wat ‘n beleid van regstellende aksie en transformasie toepas.
Moos is slegs 31 jaar oud en waarskynlik een van die jongste redakteurs in die land. Hy is tans redakteur van Die Landbouweekblad, wat insgelyks ‘n Nasperspublikasie is.
Van die vier groot Nasperskoerante in Afrikaans (die ander is Beeld, Die Burger en Rapport), was Die Volksblad tot dusver die koerant wat konserwatiefste politieke beleid gevolg het en ook heelwat kritiek teen die ANC van lesersbriewe en gasrubriekskrywers toegelaat het.
Dis tans nog onduidelik of Moos hieraan gaan verander en die blad dalk in ‘n meer liberale en ANC-simpatieke rigting gaan stuur.
Die Volksblad bestaan reeds sedert 1904, toe dit deur die Nederlandse drukker Hendrik die Graaf in Potchefstroom in Nederlands as “Het Westen” opgerig is. Die naam is in 1917 na Die Volksblad verander, waarna die koerant ook in Afrikaans begin verskyn het.
Ainsley Moos is oorspronklik van Oudtshoorn in die Weskaap. ‘n Ander Kaapse bruine, prof. Jonathan Jansen, is onlangs as rektor van die Vrystaatse Universiteit aangestel, wat beteken dat Kapenaars nou twee van die invloedrykste posisies in Bloemfontein beklee.
Die Reitz-vier kan nie verskoning vir hul optrede vra sonder vrywaring van verdere vervolging nie, het Christo Dippenaar, hul regsverteenwoordiger, aan Die Burger gesê.
Hy het gesê om verskoning aan te bied, sal ’n implisiete skulderkening beteken wat tot ’n skuldigbevinding kan lei.
Dippenaar het gereageer op ’n onlangse toespraak van prof. Jonathan Jansen, rektor van die Universiteit van die Vrystaat (UV), voor die Kaapse Persklub waarin hy te kenne gegee het dat die vier waarskynlik binne die volgende twee weke verskoning vir hul optrede kan vra.
Jansen het gesê hulle sal in ’n onafhanklike “proses”, wat deur ’n instelling buite die UV bestuur word, verhoor word.
Dippenaar sê die politieke uitlatings in die media plaas geweldige druk op die verhoorlanddros om die vier skuldig te bevind, wat hulle ‘n kans op ’n billike verhoor ontneem.
Hy het pas aanvullende vertoë aan die direkteur van openbare vervolging (DOV) in die Vrystaat gerig waarin hy vra dat die aanklag van crimen injuria teen die vier laat vaar word.
Daarin is ‘n verweer vervat wat aantoon hoedat die skoonmakers in die video gelag het toe hulle hulself sien.
Volksblad het Woensdag berig die studente voer in die verklaring aan dat dit nooit voorgekom het asof die werkers tydens die verfilming van die video beledig gevoel het nie.
Die werknemers van die Universiteit van die Vrystaat (UV) het uit vrye wil deelgeneem en kon op enige oomblik opgehou het indien hulle wou, het die studente se verklaring gelees.
Die vier beskuldigdes is RC Malherbe, Schalk van der Merwe, Johnny Roberts en Danie Grobler.
Prof. Jonathan Jansen, rektor van die Universiteit van die Vrystaat, sê die sogenaamde Reitz-4 gaan voor die einde van die maand in die openbaar verskoning aanteken.
Jansen het Vrydag tydens ‘n noenmaal by die Kaapse Persklub op die vraag gereageer of die studente nie berou moes toon voor hulle weer tot die kampus toegelaat word nie.
“Ek dink dit sou ideaal wees as hulle berou toon en om verskoning vra,” het Jansen gesê.
“En ek glo dit gaan binne die volgende twee weke gebeur. Jy gaan ‘n proses sien wat die land geweldig gaan transformeer.”
Hy het gesê die proses het baie min met hom te doen, maar dat hy bevoorreg is om deel daarvan te wees.
Jansen is geloof en gekritiseer toe hy aangekondig het dat die vier studente vergewe is en weer aan die universiteit kon studeer.
Die vier studente, wat inwoners van die Reitz-koshuis was, is geskors nadat hulle ‘n satiriese video gemaak het waarin swart skoonmaaksters aan die universiteit kos geëet het waarin daar na bewering geürineer is. Dit het agterna geblyk dat dit aanmaaklemoensap was, maar dié feit is deur sowel plaaslike as buitelandse media geïgnoreer.
Terwyl die wêreld se oë op die sterftesyfer in die konflikteater in Afghanistan gerig is, het ‘n meer opspraakwekkende dodetal aan die lig gekom in ‘n land wat veronderstel is om voorspoed en vrede te beleef.
Uit statistieke van die landbou-organisasie TLU SA blyk dit dat 91 Britse soldate vanjaar in die oorloggeteisterde Afganistan dood is, terwyl minstens 111 mense in dieselfde tydperk in plaasmoorde in Suid-Afrika dood is.
“Omdat die polisie nie amptelike statistieke bekend wil maak nie, is ons afhanklik van mediaberigte om ons syfers op datum te hou,” het Chris van Zyl, assistent-hoofbestuurder van TLU SA, Woensdag aan Beeld gesê.
Die afgelope agt jaar het 232 Britse soldate in Afganistan gesterf, terwyl 292 mense in net vier jaar in plaasaanvalle in Suid-Afrika dood is.
Die voorsitter van Agri-SA veiligheidskomitee, André Botha, sê onverantwoordelike uitsprake deur politici en senior staatsamptenare is die oorsaak van plaasaanvalle.
Botha sê huisrooftogte, kapings, verkragtings en veral veediefstal het aansienlik toegeneem.
Volgens Botha is TLU SA se syfers “konserwatief”.
Die polisie het Agri-SA se nasionale veiligheidskomitee vandeesweek op ’n vergadering in Centurion blykbaar versoek om nie die statistieke bekend te maak wat die polisie aan hulle gegee het nie.
Die ANC in die Vrystaat het Dinsdag gesê hulle ondersteun die Universiteit van die Vrystaat se transformasieprogram.
Ace Magashule, voorsitter van die ANC in dié provinsie en ook die provinsiale premier, het gesê die party ondersteun rektor Jonathan Jansen en die ANC-jeugliga se proses ten volle.
Die transformasieproses is verlede week op ‘n vergadering gepen.
“Ons wil egter daarop aandring dat die proses inklusief vir alle belanghebbendes moet wees, want dit is baie belangrik.”
Magashule het na afloop van ‘n vergadering met Jansen gesê die ANC wil praktiese ondersteuning aan die UV se transformasieproses verleen.
Jansen het onlangs wye reaksie en kritiek ontlok nadat hy die aanklagte teen die sogenaamde Reitz-vier laat vaar het. Hy het die studente teruggenooi na die kampus om hul studies te voltooi.
Die vier seuns is aangekla oor ‘n grap ‘ontgroeningsvideo’, wat nasionaal en internasionaal opslae gemaak het. Die video is deur die voormalige wit, Afrikaanse rektor, Frederik Fourie, aan die media gelek in ‘n poging om klaarblyklik sy eie persoonlike bedingingsposisie te versterk teenoor mededingers.
Twee swart mans is in hegtenis geneem nadat hulle glo ‘n bejaarde egpaar in Limpopo aangeval het ná afloop van ‘n kerkdiens.
Izak en Mariaan Jansen van Vuuren is Sondagoggend op hulle plaas in Marken, naby Swartwater, aangeval toe hulle ná afloop van ‘n kerkdiens by hulle plaashek stilgehou het.
Volgens Anél Jansen van Vuuren het haar ma en pa met hulle bakkie tot by die hek gery.
Mariaan Jansen van Vuuren het uitgeklim om die hek oop te maak.
“My ma het gesukkel om die hek oop te kry. My pa het uitgeklim om haar te help. Terwyl hulle besig was, het twee mans hulle genader wat glo werk gesoek het.
“My pa het hulle gevra om te loop. Die mans het egter nader geloop en my pa deur die gesig geslaan,” het sy gesê.
Die mans het glo ‘n hamer, stok en byl in hulle besit gehad. Hulle het Izak Jansen van Vuuren begin slaan.
“My ma het in die bakkie gespring en my pa het vir haar gesê sy moet wegry. Sy het gevlug, maar die mans het haar ingehaal en weer teruggeneem na die hek, waar my pa op die grond gelê het.
“Hulle het my pa vasgebind en agter op die bakkie gegooi. Beide mans het voor in die bakkie langs my ma gaan sit en weggery. ‘n Paar kilometer verder het hulle beheer oor die voertuig verloor en in ‘n heining vasgejaag,” het sy gesê.
Izak Jansen van Vuuren het losgekom en begin hardloop. Die verdagtes het hom agternagesit en hy het hulle met klippe bestook. Hy het by plaaswerkers se huise hulp ontbied.
Voor die polisie opgedaag het, het die Jansen van Vuuren-egpaar se bure reeds met ‘n soektog begin om die mans vas te trek.
Izak Jansen van Vuuren is na die Moropong-hospitaal geneem en later na die HF Verwoerd-hospitaal in Pretoria oorgeplaas.
Die beserings aan sy gesig is van so ‘n aard dat hy plastiese chirurgie sal moet ondergaan.
Die twee verdagtes sal binnekort in die plaaslike hof in Lephalale verskyn.
Die Vryheidsfront Plus het die tydelike skorsing van die Stadsbestuurder van die “Tshwane”-metroraad verwelkom, maar het gesê dat die probleme met die stad se finansies baie dieper strek as net die stadsbestuurder.
Die VF Plus het dit ook verwelkom dat die stadsraad die burgemeester gedwing het om ‘n onafhanklike ondersoek oor talle bewerings van wanbestuur en onreëlmatighede te loods. Dit het onlangs in raadstukke aan die lig gekom dat daar grootskaalse vermorsing van belastinggeld gedurende die 2008/2009 finansiële jaar was.
Volgens dr. Conrad Beyers, VF Plus-raadslid, strek die probleme met die stad se finansies baie dieper as net die stadsbestuurder. Daar is ‘n kultuur in ANC-kringe van totale onverskilligheid teenoor belastingbetalers se fondse.
Tydens 2008/2009 was daar ongeveer R150 miljoen spandeer aan goedere en dienste waar die normale tenderproses nie gevolg is nie. Dit maak die deur baie wyd oop vir vergrype soos korrupsie en nepotisme.
Die VF Plus het tydens die raadsvergadering van Donderdag, 20 Oktober, voorgestel dat hierdie uitgawes ondersoek moet word sodat beter oorsig en kontrole oor sulke uitgawes uitgeoefen moet word. Al die opposisiepartye in die raad het die VF Plus ondersteun, maar die ANC het die voorstel teengestaan.
“Ons moet by die kern van die stad se finansiële probleme uitkom, maar die ANC blokkeer dit. Wat het hulle om weg te steek?” het Beyers gevra.
