Dit is met groot skok dat ek verneem het van Chris Louw se skielike dood. Ek het deur die loop van jare talle sinvolle gesprekke met hom gehad as mediapersoonlikheid maar ook as vriend.
Die uitgesproke wyse waarop Chris Louw met Suid-Afrika se probleme geworstel het, het gemaak dat niemand koud teenoor hom kon staan nie. In sy laaste artikels het hy as oud-Dakar-ganger die ontnugtering van baie Suid-Afrikaners, wie se hoë verwagtinge van die nuwe Suid-Afrika nie gerealiseer het nie, verwoord.
Ek het groot waardering gehad vir die eerlike manier waarop hy andere, maar ook homself gekritiseer het. Die onverskrokke wyse waarop hy alles en almal wat hy as oneerlik beleef het, gestorm het, bly sy groot bydrae tot die Suid-Afrikaanse openbare debat.
My opregte simpatie gaan uit aan sy vrou en familie.