Kategorie: Suider-Afrika

Pres. Jacob Zuma het die onlangse rits gewelddadige misdaad, spesifiek teen vroue en kinders, veroordeel.

“… Ons moenie vergeet dat die meerderheid van die 52 miljoen Suid-Afrikaners vredeliewende, goeie, wetsgehoorsame burgers is nie,” het hy in die parlement gesê.

Hy het die geweldskultuur aan apartheid se nalatenskap toegeskryf, asook aan swart vaders wat nie na hulle kinders omsien nie.

“Die stelsel van apartheid kon net volgehou word deur middel van geweld, en geweld het verskans geraak in apartheid Suid-Afrika,” het Zuma gesê.

“Swart kinders het die laagste persentasie van huidige vadertoesig op 31,1%, terwyl Indiërkinders die hoogste het op 83,0%, met wit kinders agter op 80,8% en vir gekleurde kinders is die verhouding 53%.”

“[Suid-Afrikaners] is lief vir hul land. Hulle doen elke dag hul bes om Suid-Afrika ‘n beter plek te maak… Wanneer ‘n mens wil uitvaar, moet ons versigtig wees om nie alle Suid-Afrikaners as gewelddadig en brutaal uit te beeld nie. Ons moet versigtig wees om nie ons land sleg te sê nie.”

Zuma het bygevoeg dat burgers nie vertroue in hul eie menslikheid moet verloor nie.

“Ons moet ook nie ons pragtige land uitbeeld as ‘n inherente gewelddadige plek om te woon nie,” het die president gesê.

Hy meen die land moet “soos alle lande” vir oplossings soek.

Volgens hom is mense geregtig om teen die onlangse geweld in die land uit te vaar. Zuma meen dit dui aan dat burgers nie hul sin vir reg en verkeerd verloor het nie.

“Ons moet nou saam werk om oplossings te vind.”

President Jacob Zuma sê Suid-Afrika is nie ‘n gewelddadige land nie.

Daar is egter sekere elemente wat op ‘n skokkende wyse optree. Zuma het die Huis van Tradisionele Leiers in die Parlement in Kaapstad toegespreek.

Hy sê mense moet nie alle Suid-Afrikaners as gewelddadig en wreed skets nie.

Zuma se opmerkings kom te midde van ‘n vlaag protesoptredes, misdade en beweerde polisiewreedheid die afgelope tyd in die land.

Hy sê Suid-Afrikaners moet nie vertroue verloor in hul eie menswees en bevoegdheid om dit wat verkeerd is in die land, reg te maak nie.

Die Paralimpiese atleet en moordverdagte Oscar Pistorius en sy familie het besluit om nie meer die dienste van die beeldpoetser te gebruik wat namens hom opgetree het nie, het ‘n berig Donderdag gelui.

Die maatskappy, Vuma Reputation Management, het egter volgens The New Age ontken dat die besluit verband hou net onlangse uitlatings van Pistorius se pa in ‘n onderhoud met ‘n Britse koerant. Henke Pistorius het in dié onderhoud gesê die ANC-regering doen nie genoeg om wit mense te beskerm nie.

“Absoluut nie, dit het niks te doen met die uitlatings nie. Ons is in die proses om alles aan die familie te oorhandig want ons kontrak met hulle was vir slegs twee weke,” het Lunice Johnson, woordvoerder vir die maatskappy, gesê.

Die maatskappy het ‘n dag ná die skietdood op 14 Februarie van Pistorius se vriendin, Reeva Steenkamp, begin om die atleet se sake in die media behartig.

Johnson het gesê hoewel die familie steeds in rou is, en hoewel Pistorius nog sukkel om te verwerk wat gebeur het, glo hulle die familie kan nou self medianavrae hanteer.

Die groep van 21 Kongolese mans wat aangekla word vir die beplanning van ‘n staatsgreep teen die regering van die Demokratiese Republiek van die Kongo het Maandag in die Pretoria Landdroshof waar die borgverhoor plaasvind, verskyn.

Staatsaanklaer Shaun Abrahamson het gesê lede van die groep behoort agter tralies gehou te word.

In die verklaring van die ondersoekbeampte, luitenant-kolonel Noel Zeeman, is talle redes vervat waarom borg geweier behoort te word, het Abrahamson gesê.

Hy het aan landdros Solly Mkhabela verduidelik dat daar 3000 rebelle binne-in die DRK ontplooi is en ‘n verdere 4000 mense in Rwanda en Uganda, sowel as lojale ondersteuners in ander buitelandse moondhede, insluitende die Verenigde State State, Kanada en Frankryk.

Lede van die rebelle-groep het ook aan die polisie-agente wat die groep geïnfiltreer het, vertel dat hulle die M23-groep in die Demokratiese Republiek van die Kongo as vyande beskou omdat hulle ondersteun word deur die Ugandese regering.

Die beweerde staatsgreepbeplanners is verlede maand in hegtenis geneem in ‘n klopjag op ‘n wildsplaas in Limpopo. Die arrestasies kom na ‘n ses-maande lange geheime operasie deur die Suid-Afrikaanse Polisiediens se misdaad intelligensie teen-terrorisme-afdeling.

Abrahamson het aan die hof gesê die rebelle het nie belangestel in enige onderhandelinge met die regering van president Joseph Kabila nie en was vasbeslote dat die president in hegtenis geneem moet word en ​​verhoor word. “As hy deur ‘n dwaalkoeël getref word, laat dit so wees,” het die rebelle glo aan een van die agente gesê.

“‘n Volskaalse oorlog was hul enigste oplossing,” sê Abrahamson. “Hulle wou die DRK binne 90 dae oorneem.”

Abrahamson het gesê die rebelle het geweet waar ‘n arsenaal van wapens weggesteek lê in die Groot Mere-gebied en het te kenne gegee dat hulle toegang gehad het tot wapenopslagplekke van Viktor Bout.

Bout, ‘n Rus, is in 2012 in die Verenigde State tot 25 jaar tronkstraf veroordeel, ná sy skuldigbevinding op aanklagte van terrorisme na ‘n Amerikaanse lokvaloperasie.

Die berugte wapenhandelaar is ‘n paar jaar gelede deur Nicholas Cage in die Hollywood-film, Lord of War, gespeel. Alhoewel die produsente nooit amptelik erken het dat die film Bout se lewensverhaal uitbeeld nie, is dit algemene kennis.

Die Vrystaatse provinsiale regering gaan vasstel of hy waarde vir sy geld gekry het in ‘n ooreenkoms vir sy multimiljoenrand-webwerf, het premier Ace Magashule Woensdag gesê.

Magashule het dié aankondiging Woensdag op ‘n sake-ontbyt gemaak.

Volgens berigte betaal die Vrystaatse regering R40 miljoen vir die ontwikkeling van ‘n regeringswebwerf.

Olley Mlamleli, LUR vir samewerkende regering, het op dieselfde geleentheid gesê die provinsie het R47 miljoen spandeer op die herontwerp en ontwikkeling van die 38 provinsiale regeringswebwerwe. Sy het gesê die ooreenkoms sluit in navorsing, ontwerp en ontwikkeling.

Die provinsie het gesê die projek, wat 38 webwerwe insluit, het R24 miljoen gekos in die 2011/12-boekjaar en sal R23,8 miljoen in die 2012/13-boekjaar kos.

Die Vrystaatse premier se departement het sowat R14,8 miljoen aan die projek bestee sedert dit in 2011 begin is.

Dít vorm deel van die R23,8 miljoen waarvoor daar in 2012/13 begroot is. Die provinsiale departement van samewerkende regering sal die res van die R23,8 miljoen betaal.

Twee van die maatskappye in die konsortium, Cherry Online Design en Ikamva, behoort aan die Bloemfonteinse sakeman Tumi Ntsele, eienaar van Letlaka Communications. Die maatskappye Jugganaut is die ander aandeelhouer in die konsortium.

Sowat 18 vuurwapens – meestal bewysstukke in misdade – is uit die polisiekantoor in KwaMhlanga, Mpumalanga, gesteel, het Beeld berig.

Die diefstal is Maandag ontdek toe die polisie se logistieke afdeling inspeksie daar gedoen het.

Meer as 12 pistole, verskeie rewolwers en selfs ‘n R5-geweer is uit die bewysstukstoor gesteel.

Kol. Leonard Hlathi, polisiewoordvoerder, het bevestig dat die diefstal ondersoek word.

Volgens die koerant was daar soortgelyke oortredings in die provinsie.

In Februarie 2010 is tydens ‘n interne oudit by die voormalige onluste-eenheid in Hazyview ontdek dat minstens 32 R5-gewere, 30 12-boor-haelgewere, verskeie Z88-pistole en 48 000 patrone weg is.

Verlede jaar is ‘n trommel vol wapens wat met misdaad verbind word by die Mhluzi-polisiekantoor in Middelburg gesteel.

“Die ANC Mangaung kongres van Desember 2012 is besig om sy tol in Pretoria te eis”. So sê die streeksleier en leier in die raad van die VF Plus, raadslid Philip Van Staden.

Dit volg nadat die burgemeester se stadsrede, wat gister sou plaasvind, skielik verlede week in die raadsvergadering uitgestel is na 04 April 2013 en na verskeie berigte in die media dat die uitvoerende burgemeester, Kgosientso Ramokgopa, op pad uit is nadat hy openlik die Motlanthe-kamp by Mangaung ondersteun het.

Van Staden meen dat Ramakgopa eerder oop kaarte met die inwoners van Pretoria moet speel oor sy moontlike vertrek en dat sy volgehoue ontkenning in die verband dui op swak leierskap.

“Die VF Plus is van mening dat hierdie situasie tot gevolg kan hê dat die stad se bestuur erg daaronder kan lei en dat politieke kampe binne die ANC kan veroorsaak dat dienslewering nog net verder hierdeur belemmer kan word”.

Van Staden sê dat Ramakgopa net ‘n proporsionele aanstelling is en dat sy onguns by die Zuma-kamp die einde van sy politieke loopbaan kan beteken ten koste van die stad se inwoners.

“Geen stad kan voldoende bestuur word indien daar in die administrasie politieke verdeling voorkom nie. So ‘n situasie kan tot gevolg hê dat die twee kampe mekaar wil vernietig en kommunikasie binne departemente heeltemal gaan vernietig wat tot gevolg gaan hê dat die stad se administrasie tot ‘n stilstand geruk gaan word”.

Die VF Plus dring daarop aan dat die burgemeester dadelik moet bekend maak wat die stand van sake is en wanneer hy sy nuwe moontlike pos by MTN sal aanvaar.

Hiermee gee die VF Plus kennis dat die grootste regseis in die geskiedenis van Suid-Afrika tot die bedrag van R90 miljard binnekort ingestel gaan word teen Transnet, die departement van openbare ondernemings en die tesourie in die vorm van ‘n klasaksie namens die duisende verarmde pensioenarisse van die Transnet Tweede Vastevoordeelfonds en die Transport Pensioenfonds.

Hierdie eis spruit voort uit die nie-nakoming en minagting van die parlementêre opdrag deur die uitvoerende gesag en Transnet om R1.9 miljard aan die fondse uit te betaal. Die latere in diepte ondersoek na die finansiële status van die fondse het aangetoon dat ‘n statutêre skuld nooit deur die regering aan die fondse oorbetaal is nie, dat Transnet wederregtelik wins vir homself geneem het uit die verkoop van die V&A Waterfront en dat bates in die vorm van T011-effekte uit die fondse gehaal is en dieselfde waarde nooit teruggeplaas is nie. Die gevolg is dat in plaas daarvan om bloot R1.9 miljard te betaal soos deur die parlement voorgestel, sal die staat en Transnet nou aanspreeklik wees vir R90 miljard se skuld en vergoeding aan die verwese pensioenarisse.

“There lies a great irony in all of this. If only Transnet and/or Treasury abided themselves to pay the recommended R1.9 billion, then we would not have embarked on a forensic investigation of the funds and would not have discovered the far greater claims due to the pensioners. There is also a lesson in this. If you commit to perform your responsibility diligently and fairly, then damages cannot accrue. If you kick the can down the road, a greater problem will meet and challenge you.This is what we call penny wise and pound foolish,” het adv. Anton Alberts in sy Ledeverklaring in die Parlement gesê.

Munisipaliteite word minstens R81 miljard geskuld vir dienste, het die Suid-Afrikaanse Plaaslike Regeringsvereniging (Salga) Dinsdag gesê.

“Dit verander elke jaar en die rente-faktor beïnvloed dit,” het Xolile George, uitvoerende hoof van Salga, aan joernaliste in Midrand gesê.

“Dit groei eksponensieel en maatreëls word in plek gestel.”

George het gesê daar is dispute oor geld en ander komplikasies. In sommige sake is daar oplossings gevind.

“Waar daar geen dispuut is nie, moet die geld betaal word.”

Hy het gesê werkloosheid en afleggings is ‘n probleem.

“Sommige mense kan nie bekostig om vir dienste te betaal nie, omdat hulle nie genoeg geld het nie. Dit is ‘n groot bekommernis.”

Die moordbeskuldigde atleet Oscar Pistorius, se pa, Henke, was rassisties toe hy gesê het die regering is nie bereid om wit mense te beskerm nie, het die ANC Dinsdag gesê.

“Die stelling is nie net ontbloot van die waarheid nie, dit is ook rassisties,” het Jackson Mthembu, woordvoerder van die ANC, gesê.

“Dit is hartseer dat hy gekies het om ‘n tragiese voorval, wat nog vars is in die geheue van diegene wat geraak word en die publiek, te politiseer.

“Die tragiese voorval het twee families geraak wat nog sukkel om te verwerk wat gebeur het en die jongste rassistiese uitlatings help nie dié families nie,” het Mthembu gesê.

Henke het in ‘n onderhoud met ‘n Britse koerant gesê die ANC-regering se onvermoë om gewelddadige misdaad te verminder is die oorsaak dat talle Suid-Afrikaners vuurwapens besit.

Hy het ook misdaad teen wit Suid-Afrikaners uitgesonder. Sy kommentaar volg nadat dit aan die lig gekom het dat hy, sy pa en broers tussen hulle 55 vuurwapens besit.

Henke het gesê die familie is versamelaars van vuurwapens en jagters, maar benodig ook wapens vir selfverdediging.

Oscar se oom, Arnold, het die atleet en sy familie van die uitlatings gedistansieer.

“Die Pistorius-familie besit slegs wapens vir jag- en sportdoeleindes,” het Arnold, woordvoerder van die familie, in ‘n verklaring gesê.

“Oscar en die res van die Pistorius-familie distansieer hulle van die uitlatings,” lui ‘n verklaring wat deur Vuma ­Reputation Management, Pistorius se beeldpoetsers, uitgereik is.

Mthembu het gesê die Pistorius en Reeva Steenkamp-saak is in die hande van bevoegde howe, wat die saak objektief en in ooreenstemming van die land se wette sal hanteer.

“Enige bespiegeling kan slegs die saak benadeel.”

Die ANC het die verklaring wat deur die Pistorius-familie uitgereik is, verwelkom.

Pistorius staan tereg op aanklag van moord nadat hy Steenkamp op Valentynsdag in sy huis in die ooste van Pretoria doodgeskiet het. Hy is verlede maand borgtog van R1 miljoen toegestaan en sal op 4 Junie weer in die hof verskyn.