Kategorie: Suider-Afrika

Die Nasionale Energiereguleerder van Suid-Afrika (Nersa) het ‘n lisensie vir Eskom se Sere-windplaas in die Wes-Kaap goedgekeur.

“Hierdie is ‘n opwindende mylpaal in Eskom se dryf na skoner energie-opwekking,” het Brian Dames, uitvoerende hoof van Eskom, Maandag in ‘n verklaring gesê.

“Sere is ons eerste, grootskaalse projek vir hernieubare energie. Dit is ‘n bewys van ons verbintenis tot die vermindering van ons koolstofvoetspoor en tot beleggings in ‘n toekoms van volhoubare energie.”

Die lisensie sal Eskom toelaat om te begin met konstruksiewerk vir die projek van R2,4 miljard, wat na verwagting al in die eerste helfte van 2014 sy eerste krag aan die nasionale netwerk kan lewer. Die aanleg sal teen die einde van 2014 ten volle operasioneel wees.

Sere is die Nama-woord vir “koel bries”.

Eskom het gesê die windplaas, wat naby Koekenaap geleë sal wees, sal tot 100 MW krag lewer vir die nasionale kragnetwerk, en kan oor 20 jaar die vrystelling van sowat 4,7 miljoen ton se koolstofdioksied verhoed.

Die projek het ‘n operasionele lewensduur van sowat 20 jaar, en kan jaarliks krag voorsien vir sowat 97 000 gemiddelde wonings.

‘n Man wat kokaïen met ‘n geraamde straatwaarde van R18 miljoen oor die Beitbrug-grenspos wou smokkel, is in hegtenis geneem, het die polisie in Limpopo Sondag gesê.

“Die dwelms is gevind toe die man se sakke deursoek is,” het kol. Ronel Otto, polisiewoordvoerder, in ‘n verklaring gesê.

Sy het gesê die polisie het rolle met gare in die man se sak gevind. Die rolle was “baie swaar” en ‘n snuffelhond is ingeroep.

“Die hond het positief gereageer.”

Die gare is van die rolle verwyder en plastieksakkies met kokaïen is toe uitgehaal.

“Die kokaïen wat gevind is, weeg ‘n totaal van 10,8 kg en het ‘n geraamde straatwaarde van R12 miljoen,” het Otto gesê.

Otto het gesê nóg kokaïen, wat 5,2 kg weeg en ‘n geraamde straatwaarde het van R6,4 miljoen, is in ‘n valse kompartement in die sak gevind.

Die 36-jarige man sal Maandag op aanklagte van dwelmhandel en die besit van dwelms in die Musina-landdroshof verskyn.

Pres. Jacob Zuma en sy kabinet was nie betrokke by die besluit ivm die Gupta-landing by die Waterkloof-lugmagbasis nie, het Jeff Radebe, minister van justisie, Sondag gesê.

Radebe het gesê Bruce Koloane, hoof van staatsprotokol, wat op verpligte verlof geplaas is, het ‘n verklaring gegee van almal wat betrokke was by die toestemming vir die vliegtuig op 29 April om te land.

“Dit is hoekom ons sonder enige vrees van teenstrydigheid sê geen minister was betrokke in die saak nie. Die president was nie betrokke in die saak nie.

“Die president is nie betrokke in die goedkeuring van die landing of geen landing by ‘n lugmagbasis nie. Die besluit lê by die departement van verdediging, veral die lugmagbeheer daar.”

Die Guptas se privaatstraler het 270 trougaste vervoer.

Die gaste het die troue van Vega Gupta en Aakash Jahajgarhia bygewoon. Die landing van die vliegtuig het wydverspreide kritiek ontlok.

Die regering het gevra dat ‘n ondersoek gedoen na ‘n moontlike verontagsaming van diplomatieke protokol. Radebe het die voorlopige bevindings van dié ondersoek bekend gemaak.

Een van die bevindings was dat die landing van ‘n kommersiële vliegtuig ‘n direkte gevolg was van die manipulasie van prosesse en dat name “genoem” is deur die loop van die gebeure.

“Wie se naam is genoem? Dit was nie ‘n naam nie, dit was name. Die minister van verdediging [Nosiviwe Mapisa-Nqakula], die minister van vervoer [Ben Martins] en die naam van die president.”

Die ministers het hul direkteurs-generaal gevra om onmiddellik te reageer or die voorstelle van die verslag.

Die departemente wat geraak word moet so gou as moontlik hul eie ondersoeke doen om te verseker dat tugstappe, waar nodig, gedoen word.

Verskeie aanklagte is reeds by die Sun City-polisiekantoor in die Noordwes aanhangig gemaak.

Die aanklagte hou verband met ondermeer die oortreding van die Wet op Vuurwapenbeheer en die Wet op Nasionale Padverkeer.

‘n Saak van die oortreding van die wet op polisie is by die Lyttleton-polisiekantoor in Gauteng aanhangig gemaak.

‘n Volledige verslag sal volgende week bekend gemaak word.

Begrotingsbeperkings verhoed die Suid-Afrikaanse Weermag om nasionale en internasionale verpligtinge na te kom, het lt.genl. Vusimuzi Masondo, weermaghoof, Donderdag gesê.

Masondo het gesê met die toename in die vraag na die weermag se dienste plaaslik en op die kontinent, is die nasionale mag onder druk om sy mandaat na te kom.

“Met ‘n beperkte mediumtermyn-begroting sal ons ‘n manier moet vind om nie net onsself te regenereer nie, maar ook om onsself te posisioneer om te voldoen aan toekomstige eise op ons hulpbronne.”

“Op die oomblik is die Suid-Afrikaanse Weermag onder druk om sy nasionale en internasionale verpligtinge na te kom omdat die vraag na ons magte groter is.”

Masondo het gesê lang tydperke van ontplooiing – langer as die internasionale norm – deur die Suid-Afrikaanse weermag op lang buitelandse sendings, dra ook by tot die probleem.

“Daar is ‘n toename in versoeke vir interne en eksterne ondersteuning, wat veroorsaak het dat die weermag beskikbare hulpbronne vir lang tydperke ontplooi en wat as die internasionale norm geag word, oorskry.

Masondo het gesê lesse wat uit die operasie in die Sentraal-Afrikaanse Republiek (SAR) geleer is, sal by komende sendings ingewerk word.

“Hoewel alles moontlik gedoen word om beserings op die slagveld te verhoed, gebeur dit ongelukkig. Dit is die feit wat baie magte wat in die Verenigde Nasies se vredesendings ontplooi is, aanvaar het.

Altesaam 14 Suid-Afrikaanse soldate is op dood en 27 gewond in ‘n skietgeveg met rebelle in die SAR.

‘n ANC-lid is buite sy huis in Westonaria aan die Wes-Rand doodgeskiet, het die party Donderdag gesê.

“Die ANC is geskok en verslae oor die dood van Jackson Mafika, wat Woensdag deur onbekende gewapende mans by sy huis doodgeskiet is,” het die party in ‘n verklaring gesê.

“Die ANC het ‘n wonderlike leier verloor, wat toegewy was daaraan om die mense te dien.”

Konst. Elsie Tshonte het bevestig dat ‘n man Woensdag geskiet is, maar kon nie verdere inligting verskaf nie.

Die ANC het gesê Mafika was besig om voorbereidings te tref vir sy broer, wat verlede week doodgesteek is, se begrafnis.

Die party het sy medelye betuig met Mafika se familie.

Swak bestuur is besig om Suid-Afrika duur te kos in terme van wetenskaplike- en tegnologiese vooruitgang, en veral die verlies aan top-kundiges op die gebied, wat deur ander lande opgeraap word, is ‘uiters kommerwekkend’.

Adv. Anton Alberts, die Vryheidsfront Plus se woordvoerder oor wetenskap en tegnologie, het vandag met die begrotingposdebat van die department van wetenskap en tegnologie ook gepraat oor die Sunspace-program wat weens kortsigtigheid en swak besluitneming aan regeringskant deels ten gronde gegaan het.

“Sunspace, ‘n satellietvervaardigingsmaatskappy wat reeds groot sukses met die bou van ‘n satelliet behaal het, se geldelike steun van die regering is ingekort. Die ‘enigste private ruimtevaartmaatskappy’ sal nou met Denel moet saamsmelt in ‘n poging om hom van ondergang te red,” sê adv. Alberts.

“Dit is kommerwekkend om te sien dat die intellektuele kapitaal of menslike hulpbronne rondom die gestaakte korrelbedkernreaktor-program nou ook privaat voortgaan met die projek in die VSA. Dit laat die vraag ontstaan of daar ooit probeer is om die talent vir Suid-Afrika te behou.

“Hierdie departement speel ‘n groot rol om te sorg dat Suid-Afrika deel bly van hierdie breë beweging van wetenskap en tegnologie wat aan ons kennis bring oor die aard van ons bestaan asook hoe ons die toekoms kan bestuur tot voordeel van almal op aarde.

“Hy moet ook die volle potensiaal van wetenskap en tegnologie realiseer in sosiale en ekonomiese ontwikkeling deur menslike hulpbronne, navorsing en innovasie.

“Wat met Sunspace gebeur het, en die feit dat die land van sy voorste wetenskaplikes en tegnoloë weens die regering se stiksienigheid verloor, is ‘n terugslag vir die land.

“Die minister kan ingryp om oplossings te vind. Een van die belangrikste dinge is om Sunspace van ondergang te red,” het adv. Alberts gesê.

Die regering sal in Februarie aanstaande jaar begin om entstowwe teen servikale kanker by skole toe te dien.

Die minister van gesondheid, Aaron Motsoaledi sê die regering hoop om te onderhandel oor laer pryse vir die entstof teen die menslike papilloomvirus, wat servikale kanker veroorsaak.

Die entstof sal toegedien word aan nege- en tienjarige meisies, aangesien die entstof slegs doeltreffend is voordat meisies seksueel aktief begin raak.

Motsoaledi het ‘n beroep op mediese fondse gedoen om vir die entstowwe te betaal. Hy sê servikale kanker raak sesduisend Suid-Afrikaanse vroue per jaar, en bykans die helfte van hulle sterf jaarliks daaraan.

Werk by al 13 skagte van Lonminmyn in Marikana in die Noordwes is hervat.

Die stakende werkers het laat Woensdag ‘n onwettige staking van twee dae beëindig en bedrywighede is dieselfde aand hervat.

Die staking het tot ‘n einde gekom nadat Joseph Mathunjwa, president van die Association of Mineworkers and Construction Union (Amcu), Woensdag meer as 5 000 werkers by die Wonderkop-stadion toegespreek het.

“Daar is kanale wat gevolg moet word… gaan terug werk toe sodat jul vyande nie voordeel uit hierdie situasie trek nie,” het Mathunjwa aan die werkers gesê.

Amcu, die mynbestuur en die Kommissie vir Versoening, Bemiddeling en Arbitrasie (KVBA) sal Donderdag vergader om Amcu se erkenning as meerderheidsvakbond te bespreek, berig RSG.

Mathunjwa het vroeër aangedui dat ‘n staking kan volg indien die vakbond nie tevrede is met die uitslag van dié samesprekings nie.

Die mynwerkers het Dinsdag begin staak en eis dat die National Union of Mineworkers se kantore by Lonmin onmiddellik gesluit word.

Die rand het tot sy swakste vlak sedert middel-April gedaal en verhandel tans teen R9,22 teenoor die dollar, berig RSG.

Die nuwe vrese oor arbeidsonrus in Marikana in die Noordwes het opgevlam na die onwettige staking begin het.

Die stakers was kwaad oor die dood van ‘n vakbondleier die afgelope naweek in Nkaneng. Hulle eis dat die vakbond, die NUM se kantore by Lonmin gesluit word.

Lonmin se aandeleprys het Dinsdag byna 7% laer gesluit.

Die ministers van justisie, misdaadvoorkoming- en veiligheid sal binnekort ‘n nuuskonferensie hou om die uitslag van die ondersoek na die ongemagtigde landing van ‘n private straler op die Waterkloof-lugmagbasis bekend te maak.

Phumla Williams, woordvoerder van die regering, het gesê die groepering is daartoe verbind om te verseker dat streng maatreëls getref word om ‘n herhaling daarvan te voorkom, het RSG berig.

‘n Straler, wat deur die skatryk Gupta-familie gehuur is, het op 29 April met 270 bruilofgaste aan boord by die lugmagbasis geland.

Gaste het die troue van Vega Gupta by Sun City bygewoon. Die landing by ‘n nasionale sleutelpunt het groot kritiek uitgelok.

Intussen is daar nog nie ‘n besluit geneem oor of ‘n klag by Indië gelê gaan word oor die landing nie.

Die adjunkminister van internasionale betrekkinge en samewerking, Ebrahim Ebrahim, het Dinsdag gesê besluite sal eers geneem word nadat ‘n ondersoek in die saak afgehandel is.

“In hierdie stadium was daar geen klagtes aan die Indiese regering gemaak oor die Indiese hoë-kommissaris (Virendra Gupta) nie. Ons wag vir die bevindinge van daardie kommissie,” het hy aan verslaggewers in Pretoria gesê.

“Afhangende van die kommissie se bevindinge sal ons sien watter besluite geneem word,” het hy gesê.

Virendra Gupta is nie familie van die ryk Gupta-familie nie.

Die Guptas besit die New Age-koerant, sowel as Sahara Computers.

Twee mans is in hegtenis geneem in verband met die aanranding van adv. Dali Mpofu in Oos-Londen, het die polisie in die Oos-Kaap Woensdag gesê.

Die twee, wat beide 23 jaar oud is, is Dinsdag in Cambridge in hegtenis geneem, het brig. Phuti Setati gesê.

Die polisie het daarin geslaag om beslag op die [beweerde] wapen te lê… sowel as die selfoon wat gesteel is,” het hy gesê.

Mpofu, wat die mynwerkers verteenwoordig wat in verlede jaar se skietery met die polisie in Marikana betrokke was, is op 11 April beroof en met ‘n mes gesteek terwyl hy op ‘n strand in Oos-Londen gestap het.

Die voormalige uitvoerende hoof van die SABC is drie dae later uit die hospitaal ontslaan en was aangeraai om nie per vliegtuig te reis nie weens die skade aan sy longe.

Setati het gesê die polisie het vasgestel dat beide die verdagtes uit was op R500 se borgtog vir ‘n beweerde rooftog in Oktober.

In daardie voorval is ‘n toeris en polisiereservis van hul selfone beroof. Die twee beskuldigdes sal op 24 Mei weer in die landdroshof in Oos-Londen verskyn in verband met die roofsaak.

Hulle sal Vrydag in dieselfde hof verskyn in verband met die aanval op Mpofu. Hulle staan tereg op aanklagte van aanranding met die doel om ernstig te beseer en roof.