Kategorie: Suider-Afrika

“Lulu Johnson, voorsitter van die portefeuljekomitee oor landbou in die parlement, se stelling dat niemand in die verlede uit Europa hier aangekom het met grond op ‘n skip nie, kan nie onaangeveg gelaat word nie,” sê mnr. Werner Weber, die VF Plus se woordvoerder oor grondsake en provinsiale leier in Mpumalanga.

Volgens Weber is die voor die hand liggende teenvraag aan Johnson: Watter grond die swart mense oor die Limpoporivier saamgebring het toe hulle vanaf die groot mere gebied oor die Limpoporivier suidwaarts migreer het. Het hulle die grond met kruiwaens aangery of op pakesels gelaai? Soos die wittes, is die swart mense tog ook nie inheems van Suid-Afrika nie.

Selfs nou nog maak die ANC ‘n gerieflike verskil tussen swart mense en die Khoi-San in hul aanstellings in die departement van korrektiewe dienste in die Wes-Kaap. Geskiedkundig is slegs die Khoi-San inheems aan Suid-Afrika.

Volgens Weber behoort Johnson tereggewys te word vir ‘n uitlating wat onnodig emosies opjaag en wat tot haatspraak kan lei.

Weber het ook gepleit vir die behoud van Nelspruit se naam. “Die VF Plus in Mpumalanga ondersteun die Lowveld Chamber of Business and Tourism (LCBT) se veldtog om die naam van Mpumalanga se hoofstad, Nelspruit te behou,” sê hy.

Volgens Weber bestaan daar geen basis vir ‘n naamsverandering nie. Toe Andries Hendrik Potgieter en sy trekkers in 1845 in die gebied aangekom het, was die hele gebied totaal onbewoon. Slegs een Swazi het ‘n uitkykpos in die gebied beman.

Daarna het Potgieter daardie hele gebied in 1846 van die Swazi koning Mswati die eerste vir 100 beeste gekoop en ook ‘n ooreenkoms met die Pedi-opperhoof Sekwati aangegaan. Die ooreenkoms is met ‘n bindende getekende traktaat bevestig.

Die wittes het daarna die dorp gebou. Die ANC het geen reg of aanspraak om die naam te verander nie. Dit is om hierdie rede dat die VF Plus die LCBT heelhartig steun om die naam Nelspruit te behou. Weber het die LCBT sterkte en sukses toegewens in sy geregverdigde regstryd.

Cyril Ramaphosa, adjunk-president van die ANC, het ‘n beroep op Suid-Afrikaners gedoen om op te hou kla oor die probleme in die land, het die Sunday Times berig.

“Suid-Afrikaners moet daarvan wegskram om die grootste klakouse te wees,” het hy die naweek in ‘n toespraak aan die Black Management Forum (BMF) gesê.

Ramaphosa sê Suid-Afrikaners het die reg om te kritiseer, maar hy meen landsburgers moet ook oplossings aanbied wanneer hulle kritiek lewer.

“Moenie ‘n gemakstoelkritikus word nie; sak in die skrum en wys wat jy kan doen.”

Ramaphosa sê groot ondernemings kla dikwels oor sake soos die huidige onrus in die mynbedryf, maar hulle erken nie hul aandeel daaraan nie.

Die regerende party se adjunk-president meen verder dis nie nét die regering se verantwoordelikheid om dié tipe probleme op te los nie.

‘n Vrou is die naweek op ‘n plaas naby Gravelotte in Limpopo doodgeskiet.

Kol. Ronel Otto sê Melinda Bam (30) en haar vriend het in die bed gelê toe drie of vier mans die kamer binnegestap het. Die voorval het Saterdagoggend net ná 01:00 plaasgevind.

Die aanvallers het die vrou doodgeskiet, terwyl die man in die been en lies gewond is.

Otto sê vier tot vyf kinders was ook ten tyde van die aanval in die huis. Hulle het hulself in ‘n kamer toegesluit en is ongedeerd.

Die aanvallers het selfone en kontant gesteel.

“Die polisie ondersoek nog die motief vir die skietery. Niemand is tot dusver in hegtenis geneem nie,” het die polisiewoordvoerder gesê.

Oudpresident Nelson Mandela het vir ‘n derde nag in ‘n hospitaal in Pretoria deurgebring sonder dat enige verdere inligting oor sy toestand bekendgemaak is.

Volgens berigte het Mandela se mediese span aangedui dat hulle verkies om slegs bekend te maak as daar ‘n belangrike verandering in sy toestand is.

Die oudpresident sukkel weer met ‘n terugkerende longinfeksie. Hy is Saterdagoggend in die vroeë oggendure na die hospitaal geneem.

Verskeie familielede was gister by die hospitaal opgemerk waar honderde joernaliste toegesak het vir nuus oor die bejaarde staatshoof.

Boodskappe van bemoediging stroom van regoor die wêreld in. Die presidensie het Saterdag gesê Mandela se toestand is ernstig maar stabiel.

Suid-Afrikaanse landbouers se kundigheid en bydrae in Georgië word steeds waardeer nieteenstaande die nuwe regering daar.

So het dr Pieter Mulder, adjunkminister van landbou, bosbou en visserye na afloop van ‘n bilaterale vergadering met die nuwe adjunkminister van landbou van Georgië, mnr. David Natroshvili gesê.

“In Oktober 2012 het ‘n nuwe regering in Georgië aan bewind gekom. Onder druk van kiesers het die nuwe regering belowe om die wetgewing wat grondbesit deur buitelanders bepaal, te herformuleer. Van die voorstelle is dat buitelanders slegs 2,5 hektaar grond mag besit. So ‘n besluit sal die huidige Suid-Afrikaanse landbouers in Georgie regstreeks raak. Dit is dus belangrik om die Suid-Afrikaanse boere wat reeds daar is en wat beplan om eersdaags daarheen uit te brei, by te staan deur amptelik met Georgië te onderhandel,” het dr Mulder gesê.

Gedurende 2010 is daar ‘n memorandum van verstandhouding tussen die Transvaalse Landbou Unie (TLU) en die vorige regering van Georgië geteken. Die doel van die ooreenkoms was om Georgië by te staan met die ontwikkeling van hul kommersiële landbou en om meer Suid-Afrikaanse landbouers na Georgië te trek. Meer as 90 Suid-Afrikaanse boere het reeds Georgië besoek en vyf het reeds grond in die land aangekoop en daar begin boer. Met ‘n nuwe regering mag dit hierdie landbouers se situasie raak.

Mnr. Natroshvili is tans in Suid-Afrika op ‘n amptelike besoek om formele diplomatieke bande tussen Georgië en Suid-Afrika te versterk.

Die vergadering se doel was om ‘n wedersyds voordelige inter-regerings en kommersiële vennootskap en samewerking met betrekking tot die landbousektor tussen Suid-Afrika en Georgië te bespreek. Tydens die gesprek is ook spesifiek oor die Suid-Afrikaanse landbouers se posisie in Georgie gepraat.

Waar vorige ooreenkomste nie op regeringsvlak was nie, is ooreengekom om aan so ‘n ooreenkoms te begin werk. Dit kan uitloop op ‘n amptelike ooreenkoms oor samewerking op landbougebied wat tussen Georgie en Suid-Afrika geteken word.

Die versterking van handelsverhoudinge met lande anders as Suid-Afrika se tradisionele handelsvennote is in die huidige ekonomiese klimaat van kardinale belang, het dr. Mulder gesê.

Die burgemeester van die Cederberg-munisipaliteit, Jonas White, is uit die ANC geskors nadat ‘n tugkomitee bevind het hy is ongeskik om die pos te beklee, het die Sowetan Vrydag berig.

Fezile Calana, voorsitter van die ANC se tugkomitee in die Wes-Kaap, het gesê White het die adjunk-burgemeester, Lorna Scheepers, seksueel geteister.

White het tussen Augustus 2011 en Oktober verlede jaar “herhaaldelik en aanhoudend boodskappe van ‘n eksplisiete aard” aan Scheepers gestuur.

Volgens die berig sluit die boodskappe foto’s van White se geslagsdele in.

Die komitee het ook bevind dat hy Scheepers verbaal en emosioneel aangerand het tydens vergaderings.

White het ook na bewering boodskappe van ‘n seksuele aard aan ‘n 15- en 16-jarige meisie gestuur.

Calana het gesê die komitee het White skuldig bevind op aanklag dat hy omkoopgeld van R60 000 van ‘n kontrakteur aanvaar het.

Die polisie ondersoek die bewerings van seksuele teistering.

White het 21 dae kans om te appelleer en sal by die volgende raadsvergadering na verwagting uit sy pos as burgemeester onthef word.

Die komitee het bevind White moet vyf jaar uit die party geskors word, het The Star berig.

Suid-Afrika sou ‘n beter land wees indien Nelson Mandela vir ‘n tweede termyn as president gedien het, het dr. Mamphela Ramphele, Agang-leier, Donderdag gesê.

“Ek dink as ons die goeie geluk van Mandela vir twee termyne gehad het, sou ons ‘n beter kans gehad het, want hy was ‘n toegewyde demokraat,” het sy gesê.

“Ek is nie seker dat sy opvolgers so toegewyd is soos wat hy was nie.”

Ramphele is besig om voorbereidings om haar politieke party, Agang, amptelik bekend te stel, wat in volgende jaar se verkiesing teen die ANC te staan sal kom.

Sy het ook haar kommer uitgespreek oor menseregte, swak opvoeding en gesondheid en polisie vergrype.

“Die reis na demokratiese politiek is ‘n reis wat ons as land nie verstaan het ons moet ondergaan nie,” het Ramphele gesê.

Die ANC regeer die land sedert 1994, maar is onder druk omdat hy nie sy beloftes nakom nie.

“Wat ontmoedigend is, is die sin van gelatenheid wat so baie mense voel. Wat aangaan is sleg, maar mense sien nie ‘n alternatief nie,” het sy verder gesê.

Ná sowat 20 jaar van demokrasie is die land “heeltemal op die verkeerde spoor”.

Twee broers is in hegtenis geneem nadat hulle na bewering ‘n metropolisiebeampte van Germiston aangerand het, het die Ekurhuleni-metropolisie gesê.

Hoofsupt. Wilfred Kgasago het gesê die beampte is Woensdagaand aangeval toe hy die mans in hegtenis wou neem. Dwelms is glo in hul besit gevind.

“Metropolisiebeamptes het ‘n man buite ‘n internetkafee genader. Dwelms is in die man se besit gevind.”

Die man het by die internetkafee ingehardloop toe die beampte hom in hegtenis wou neem. ‘n Tweede man het toe die beampte aangerand.

“Die metropolisiebeampte het ‘n gebreekte neus en ‘n gebreektee oogkas,” het Kgasago gesê.

‘n Ander metropolisiebeampte is beseer en het Donderdagaand ‘n operasie by die Union-hospitaal in Alberton ondergaan.

Die twee mans, wat broers is, is in hegtenis geneem en staan tereg op aanklagte van die besit van dwelms en die aanranding van ‘n polisiebeampte.

Hulle verskyn Vrydag in die Germiston-landdroshof.

Suid-Afrikaners se lewensgehalte het met die koms van demokrasie geweldig verbeter, het pres. Jacob Zuma Donderdag aan buitelandse diplomate gesê.

“Ons het ons belofte nagekom om ‘n beter lewe vir almal te skep. Ons het die lewensgehalte van ons mense verbeter,” het Zuma gesê nadat hy briewe van geloofwaardigheid van ambassadeurs en hoëkommissarisse ontvang het.

Die geleentheid is by die Sefako Makgatho- presidensiële gastehuis in Pretoria gehou.

Vyf ambassasdeurs, wat Kenia, Malawië, Frankryk, Saoedi-Arabië en Pole het dokumente aan die president oorhandig en foto’s met hom geneem.

“Ons het meer werksgeleenthede geskep, die vlakke van armoede en werkloosheid verminder, maar dit het ons nie alleen bereik nie. Julle lande was daar toe ons beter geleenthede vir ons mense gesoek het,” het Zuma gesê.

Hy het die internasionale gemeenskap, veral Afrika-lande, bedank vir hul bydrae tot die stryd teen apartheid.

Zuma het gesê dit is te danke aan dié hulpverlening wat Suid-Afrika “anders is as wat dit 20 jaar gelede was”.

Hy het gesê 2013 was ‘n jaar van oorsig in Suid-Afrika voor die volgende nasionale verkiesing.