Kategorie: Suider-Afrika

Oud-president Nelson Mandela nader die einde van sy lang pad na vryheid, het mede-oud-president FW de Klerk Donderdag sonder ironie gesê, met verwysing na die titel van Mandela se outobiografie, Long walk to freedom.

“Op sy verjaarsdag, moet ons die merkwaardige bydrae wat hy in Suid-Afrika en aan al sy mense gemaak het, gedenk,” het De Klerk gesê.

“Vandag moet ‘n tyd vir stilte en respekvolle oorsig wees, en nie vir ‘n onbehoorlike gekibbel oor die eienaarskap van mnr Mandela se erfenis nie.”

Mandela verkeer steeds in die hospitaal. Hy het Donderdag sy 95ste verjaardag gevier.

De Klerk het gesê dat ten spyte daarvan dat Mandela ‘n lojale lid en staatmaker van African National Congress is, moet alle Suid-Afrikaners hom trots hul eie kan noem.

Hy het Mandela se rol in die nasionale versoening en die opkoms van ‘n demokratiese nasie geprys.

“Nelson Mandela se plek in Suid-Afrika se geskiedenis is verseker.

Sy nalatenskap van moed, deursettingsvermoë en grootmoedigheid sal voortgaan om ons te inspireer – en mense regoor die wêreld – vir generasies om te kom.”

Die Valke het vier vermeende wildstropers op Pongola in KwaZulu-Natal vasgetrek. ‘n Woordvoerder, Paul Ramoloko, sê die verdagtes is onkant gevang deur die weer en kon nie hulle planne uitvoer nie.

Hy sê twee is Mosambiekse burgers en die ander twee Suid-Afrikaners. Hulle is by die Pongola-wildreservaat aangekeer.

Ramoloko sê die mans was in besit van ‘n jaggeweer, patrone en twee knaldempers. Hy sê hulle soek nou na nog vermeende stropers in die gebied.

Die mans sal na verwagting vandag in die landdroshof op Ubombo verskyn. Hulle staan tereg op aanklagte van die besit van ‘n ongelisensieerde vuurwapen en ammunisie.

Die vuurwapen sal vir ballistiese toetse gestuur word om vas te stel of dit met enige ander sake van renosterstropery verbind kan word.

Die miljardêrsakeman, Mark Shuttleworth, se poging om die land se hele valutabeheerstelsel as ongrondwetlik verklaar te kry, het misluk.

Die Suid-Gautengse Hooggeregshof in Johannesburg het Shuttleworth se aansoek om die hele deel 9 van die wet op Wisselkoerse en Valutabeheer en al die beheerregulasies te skrap, as ongrondwetlik verwerp.

Regter Francis Legodi het Shuttleworth se aansoek van die hand gewys dat die heffing van R250 miljoen wat hy moes betaal om van sy bates uit die land te neem, aan hom terugbetaal word.

Die hof het ook sy aansoek van die hand gewys om die Reserwebank se beleid ongeldig te verklaar om nie regstreeks met lede van die publiek sake te doen nie, maar daarop aan te dring om deur bankhandelaars te kommunikeer.

Shuttleworth wat nou op die eiland Man woon, het die bestaande stelsel van valutabeheer in Suid-Afrika die skuld gegee omdat dit hom gedwing het om in 2001 uit Suid-Afrika te emigreer.

Hy het destyds bates van meer as R4,7miljard in die land gehad. Hy het egter die bates in 2008 en 2009 uit die land geneem, en elke keer moes hy ‘n tien persent heffing opdok.

Die regering het die heffing afgeskaf ‘n jaar nadat Shuttleworth die oorblywende deel van sy bates uit die land verskuif het.

Trevor Manuel, minister in die presidensie, het gesê ANC-lede moet introspeksie hou oor hoekom daar ‘n gaping tussen hulle en die land se inwoners is, het die Cape Times Donderdag berig.

“Dit is fundamenteel belangrik dat ons dit verstaan. Blameer ons die mense of blameer ons onsself? Vra ons hoe ons so verwyderd geraak het van ons mense?” het Manuel Woensdagaand op ‘n gedenklesing in Kaapstad gevra.

Manuel het gesê ANC-lede moet betrokke raak in hul gemeenskappe en ‘n ledegemeenskap bou wat die party se waardes verstaan.

Hy het gesê hoop moet ingeboesem word by die jeug en ouer mense, wat aan die opstande deelgeneem het en hulle moet nie vergeet word nie.

“Ons moet geloof in onsself uitbou. Ons moet terugkeer na ons mense.”

Oudpres. Nelson Mandela lyk goed en hy reageer het Nosiviwe Mapisa-Nqakula, minister van verdediging, Donderdag gesê.

“Hy maak sy oë oop en hy knik amper asof om te sê: ‘ek is hier met julle en waardeer wat julle doen,” het die minister buite die Harthospitaal in Pretoria gesê.

Mandela het Donderdag sy 95ste verjaardag gevier.

Mapisa-Nqakula het Mandela se dokters geprys vir die werk wat hulle tot dusver gedoen het.

Op die vraag of Mandela binnekort ontslaan kan word, het sy gesê: “Dit is vir die dokters om te sê wanneer hulle voel hy is gereed om huis toe te gaan.”

Verskeie kerkleiers het by die hospitaal byeengekom om Mandela geluk te wens op sy verjaardag.

Mac Maharaj, presidensiële woordvoerder, het vroeër in ‘n verklaring gesê Mandela se toestand verbeter.

Die voormalige staatshoof is op 8 Junie vir ‘n wederkerende longinfeksie in die hospitaal opgeneem.

Die Verenigde Nasies neem vandag die voortou om oudpresident Nelson Mandela saam met miljoene Suid-Afrikaners en wêreldburgers met sy 95ste verjaardag geluk te wens.

Die wêreldliggaam het in 2009 18 Julie as Internasionale Mandeladag verklaar. Ledestate van die VN sal later vandag hulde aan Mandela bring tydens ‘n spesiale informele sitting van die algemene vergadering in New York.

Mandela se vriend en medegevangene op Robbeneiland, Andrew Mlangeni, wat gister in New York aangekom het, sal hulde aan die voormalige president te bring.

Die Amerikaanse oud-president Bill Clinton en musikant en maatskaplike aktivis Harry Belafonte sal ook toesprake lewer. In Washington sal kongresleiers op Capitol Hill die huldeblyke van minstens 15 Amerikaanse stede voorhou.

In Suid-Afrika sal leerders regoor die land vanoggend hulde aan Mandela bring. Die meer as 12 miljoen skoliere sal vanoggend tydens saalopening ‘n verjaardaglied vir Mandela sing.

Die minister van Basiese Onderwys, Angie Motshekga sê die gesamentlike verjaardaglied word om kart voor agt vanoggend gesing.

President Jacob Zuma het vroeër mense gevra om te onthou om 67 minute van hul tyd aan liefdadigheid af te staan.

Mandela vier vandag sy 95ste verjaardag in die Mediclinic Harthospitaal in Pretoria waar sy toestand steeds kritiek maar bestendig is.

Nelson Mandela het “dramatiese vordering” gemaak en mag “binnekort” by die huis wees sê sy dogter Zindzi op die vooraand van sy 95ste verjaardag.

“Ek het hom gister besoek en hy was besig om televisie te kyk met oorfone,” het Zindzi Mandela in ‘n onderhoud met Brittanje se Sky TV gesê. “Hy het vir ons ‘n groot geglimlag en sy hand gelig… Hy reageer met sy oë en sy hande.”

Mandela is besig om “energie en krag” te skep sê sy dogter. “Ek meen hy sal binnekort huis toe gaan.”

Die nuutste beskrywing deur Zindzi – wat een van Mandela se dogters by sy tweede vrou, Winnie Madikizela-Mandela is – toon ‘n aansienlike verbetering van die beskrywing in hofdokumente ingedien deur die familie vroeër hierdie maand. Daarin is aangedui dat hy was op lewensondersteuning is en naby die dood.

Mandela is in ‘n Pretoriase hospitaal opgeneem op 8 Junie en amptenare sê sy toestand is kritiek, maar stabiel.

Die nuus van die verbetering in Mandela se gesondheid sal sy ondersteuners in Suid-Afrika en regoor die wêreld met sy 95ste verjaarsdag Donderdag ‘n hupstoot gee. Dié dag is deur die Verenigde Nasies afgekondig as ‘n manier om die Nobelpryswenner se bydrae tot versoening te erken.

Belangstelling in Nelson Mandela Internasionale Dag het as gevolg van die voormalige Suid-Afrikaanse president se hospitalisasie in Pretoria vlam gevat.

President Jacob Zuma sal Mandela se verjaardag vier deur die skenking van huise aan arm wit gesinne in die Pretoria-gebied, om saam te val met sy Kabinet se tema hierdie jaar wat fokus op voedselsekuriteit, skuiling en geletterdheid.

In Kaapstad, sal arbeidaktiviste by die St George-katedraal byeenkom “ter nagedagtenis van Mandela se diens aan die gemeenskap” en om mense aan te moedig om kos te skenk aan liefdadigheid.

Die regering het die nuus verwelkom dat Johan Kotzé, die sogenaamde Modimolle-monster, twee lewenslange vonnisse in die Pretoriase hooggeregshof opgelê is.

Dié naam Modimolle-monster is aan Kotzé gegee deur Beeld wat die nuus van die wit wreedaard deurentyd breedvoerig op die hoofblad gedra het.

“Hierdie wrede dade is vernederend, minagtend en het Ina Bonnette se regte geskend,” het Nebo Legoabe, waarnemende hoof van die regering se kommunikasie- en inligtingstelsel, Woensdag in ‘n verklaring gesê.

“Dit stuur ‘n sterk boodskap dat die regering onwrikbaar is in sy verbintenis om seksuele geweld te beveg.”

Kotzé en sy mede-beskuldigde, Andries Sithole, is Woensdag tot lewenslange tronkstraf gevonnis vir die moord op die 19-jarige Conrad Bonnette.

Conrad was Kotzé se gewese vrou, Ina Bonnette, se seun.

Albei is ook 10 jaar gevangenisstraf opgelê vir ontvoering.

Legoabe het gesê dié strawwe is ‘n duidelike aanwysing dat die mense wat hulle skuldig maak aan geweld teenoor vroue en kinders, vervolg sal word.

Die Suider-Afrikaanse Ontwikkelingsgemeenskap se waarnemer-sending in Zimbabwe het dié land gemaan om omstrede kwessies voor die verkiesing op die 31ste van die maand op te los, eerder as om daarmee te wag tot ná die verkiesing.

Daar is reeds probleme ervaar toe die polisie en militêre personeel gestem het en talle is nie toegelaat om Sondag en Maandag te stem nie.

Die voorsitter van die SAOG se waarnemer-sending, Bernard Membe sê rolspelers moet toesien dat landsburgers toegang tot stembusse het en ongehinderd kan stem.

Die VSA is ook bekommerd oor ‘n gebrek aan deursigtigheid in die aanloop tot die Zimbabwiese verkiesing wat op die 31e van die maand gehou word.

‘n Beroep is opnuut op die regering gedoen om te verseker dat die verkiesings vreedsaam, regverdig en geloofwaardig gehou sal word.

‘n Woordvoerder van die Amerikaanse regering – Patrick Ventrell – het daarop gesinspeel dat die VSA sy sanksies teen Zimbabwe kan behou, of verskerp, indien die verkiesing deur geweld en onreëlmatighede gekenmerk word.

Waarnemers sê die aanloop sover is swak beplan met te min geld wat beskikbaar gestel is. Dit is ook deurspek van ongerymdhede. Dit laat vrese ontstaan dat dieselfde tipe geweld van die 2008 verkiesings kan kop-uitsteek.