Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Oorskot van kerkrampslagoffers uit Nigerië verwag

Die oorskot van 85 persone van Suid-Afrika wat in Nigerië gesterf het toe ‘n gebou by TB Joshua se Synagogue Church of All Nations ineengestort het, sal na verwagting hierdie naweek huis toe gebring word.

Die minister in die Presidensie, Jeff Readebe sê lede van die weermag, polisie en die department van gesondheid is in Nigierië om bystand te verleen.

Radebe is in Nigerië om die proses te probeer bespoedig, twee maande nadat die ramp plaasgevind het weens ontevredenheid wat opgelaai het onder oorlewendes en naasbestaandes oor die gesloer.

Hy sê die liggame van die 81 Suid-Afrikaners kan reeds teen Vrydag of Saterdag in Suid-Afrika wees.

Radebe sê president Goodluck Jonathan van Nigerië het hom daartoe verbind om te verseker dat al die liggame so gou as moontlik teruggebring word.

“As alles goed verloop, sal dit hierdie naweek gebeur,” het Jeff Radebe, minister in die presidensie, Dinsdagaand tydens ʼn perskonferensie in Lagos gesê.

Die gastehuis het op 12 September ineengestort. Altesaam 116 mense is oorlede, waarvan 81 Suid-Afrikaners, asook drie Zimbabwiërs en een persoon van die DRK wat Suid-Afrikaanse paspoorte gebruik het.

Geld begin praat in Cosatu

Cosatu sal meer as R1 miljoen per maand aan ledegeld moet inboet nadat die sentrale uitvoerende komitee besluit het om Numsa te skors.

Numsa se geraamde bydrae is R1 022 000 per maand uit ‘n affiliasiefooi van R2.92 wat elk van sy nagenoeg 350 000 lede maandeliks betaal. Dit beteken Cosatu kan meer as R12 miljoen jaarliks verloor sonder Numsa.

Cosatu se uitvoerende komitee het Numsa Saterdagoggend met 33 stemme teenoor 24 geskors.

“Numsa het ook R38 000 vir die verteenwoordigerstydskrif betaal,” het Mphumzi Maqungo, tesourier van die National Union of Metalworkers of SA, gesê.

Patric Craven, woordvoerder vir die vakbondfederasie het gesê finansies is een van knelpunte.

Zwelinzima Vavi, het intussen gesê hy kan nie die besluit  verdedig om Numsa te skors nie. Vavi, die vakbond se uitvoerende hoof, is verlede jaar geskors.

Vavi het sy afwesigheid per brief uiteengesit oor waarom hy nie by die naweek se historiese nuuskonferensie opgedaag het nie. Sy weergawe verskil van die amptelike verduideliking.

Vavi het in ‘n brief wat deur die SABC bekom is, gesê die toekoms van die federasie is op die spel. Hy het gesê die federasie stuur op ‘n totale ramp af.

Die skorsing van Numsa en die besluit deur nog sewe filiale om hulle deelname aan Cosatu op te skort, maak Vavi kwesbaar vir optrede deur die komitee.

Volgens ingeligte bronne was NUM vermoedelik Cosatu se grootste finansiële bydraer vóór Marikana.

NUM-lede het egter na die Marikana-slagting in hul honderde by die mededinger-unie Association of Mineworkers and Construction Union (Amcu) aangesluit, en dié vakbond is nou die meerderheidvakbond by Lonmin.

Sewe ander Cosatu-filiale, die Food and Allied Workers Union, die Democratic Nurses Organisation of SA (Denosa), die SA Commercial Clothing and Allied Workers Union (Saccawu), die Communication Workers Union (CWU), die SA State and Allied Workers Union, die Public and Allied Workers Union of SA en die SA Football Players Union ondersteun almal Numsa en het onderneem om die skorsing teen te staan.

Slegs Denosa, CWU en Saccawu dra maandeliks noemenswaardige by tot Cosatu. “Maar indien dié maandelikse bydraes bymekaar getel word, is dit moontlik minstens R3 miljoen per maand, ” het ‘n arbeidskenner gesê.

DA kla oor EFF se swaar straf

Die Parlement se Komitee oor Bevoegdhede en Voorregte het die verslag aanvaar wat strafmaatreëls aanbeveel teen 20 EFF-parlementslede.

Die DA maak egter beswaar teen die verslag én die strafmaatreëls.

DA-lid van die komitee, Annelie Lotriet, sê die rede waarom die DA die aanvaarding van die verslag en die strafmaatreëls teenstaan, is omdat daar soveel gebreke in die hele proses was.

Sy meen die strawwe teen die EFF is te swaar.

Die LP’s van die EFF is skuldig bevind aan minagting van die parlement nadat hulle president Jacob Zuma se mondelinge antwoordsessie in die Parlement meer as twee maande gelede ontwrig het.

Sy sê geregtigheid ontbreek en die DA is van mening dat dit baie onregverdig is om so ‘n swaar straf op te lê waar die hele komitee en die prosedures problematies was.

Die komitee het die verslag oorweeg met al die bevindinge en aanbevelings wat by die Nasionale Vergadering ingedien moet word.

Die komitee het strafmaatreëls aanbeveel insluitende skorsing vir 30 dae sonder salaris.

Die voorsitter van die komitee, Lemias Mashile, sê hulle het sekere wysigings aan die verslag aangebring wat nou by die parlement ingedien sal word.

 

Vermeende swart plaasaanvaller voor

Die vermeende swart moordenaar  wat daarvan aangekla word dat hy ‘n 69-jarige boer vermoor en ‘n minderjarige meisie verkrag het, het vlugtig verskyn.

Die borgtogaansoek in die landdroshof op Odendaalsrus is tot 21 November uitgestel.

Die polisiewoordvoerder, Stephen Thakeng sê van die 31-jarige verdagte, Pule Motsamai word aangekla van moord, verkragting en huisroof.

Die verdagte en sy medepligtiges het Willie Jansen van Vuuren op die 30 Oktober doodgeskiet en wit meisie verkrag.

Die aanvallers het die kluis oopgesny en ‘n geld en ‘n vuurwapen geroof.

Van Vuuren is drie keer geskiet en is onderweg na die hospitaal dood.

Die aanvallers het met die boer se bakkie gevlug. Nog vier verdagtes is op vrye voet.

Die Transvaal Landbou-unie het vroeër sy syfers vir plaasmoorde en –aanvalle tot en met die einde van Julie bekend gemaak. Die voorsitter van die organisasie se veiligheidskomitee en adjunk-president, mnr. Henry Geldenhuys het opgemerk: “Net in die eerste nege dae van Augustus is daar reeds tien aanvalle en drie moorde waarvan ons weet”.

TLU SA het gesê daar was tot einde Julie 42 plaasmoorde. Die getal plaasaanvalle het van 142 in dieselfde tydperk verlede jaar, tot 158 sover (einde Julie) hierdie jaar gestyg.

“Dis skrikwekkend, en steeds is daar geen reaksie van die regering nie,” het hy gesê.

Die ANC wat plaasbeveiliging afgeskaf en strenger wapenbeheer ingestel het reeds onder Thabo Mbeki, staan steeds afsydig teenoor die ysingwekkende aantal moorde op blankes.

Twee swart boere vas vir veediefstal

Twee swart boere het Maandag in die Excelsior-landdroshof in Ladybrand, Vrystaat, in die hof verskyn op aanklag van veediefstal.

“Lazarus Thekiso (61) en Petrus Sithole (61) is Saterdagaand voor middernag in hegtenis geneem toe hulle met sewe skape betrap is en nie bewys van eienaarskap van die vee kon lewer nie,” het sers. Martin Xuma, woordvoerder van die polisie, in ʼn verklaring gesê.

“Ao Moabi Thekiso en konstabel Ikanyeng Sebitloane het op 8 November die R709-pad tussen Excelsior en Tweespruit gepatrolleer toe hulle ʼn verdagte Hyundai-bakkie opgemerk het,” het Xuma gesê. “Die bakkie het die spoedgrens verontagsaam en die beamptes het die voertuig voorgekeer. Die verdagtes het sewe merinoskape agterop die bakkie vervoer.”

Die skape, ter waarde van ongeveer R10 500, is glo op ʼn plaas naby Phillip Sanders-oord, sowat 20 km buite Bloemfontein, gesteel.

Die polisie het ook die Hyundai-bakkie ter waarde van R100 000 gekonfiskeer. Die skape sal aan die regmatige eienaar terugbesorg word.

Die twee mans boer op buurplase. Hulle moet weer op 17 November in die hof verskyn om formeel aansoek te doen om borgtog. Hulle bly in aanhouding. Die ondersoek duur voort.

Cosatu moet geskille intern besleg sê ANC

Die ANC se sekretaris-generaal Gwede Mantashe het in Johannesburg aan die media gesê Cosatu behoort onderlinge geskille intern by te lê.

Hy het gesê die vakbondfederasie moet nie in die openbaar verskille probeer besleg nie.

Cosatu het Numsa die naweek geskors.

Mantashe het Cosatu-vakbonde se reg erken om aan te dring op ‘n spesiale kongres, maar gemaan dat kwessies wat op die sakelys kom, eers vooraf ooreengekom moet word.

Mantashe het vroeër gesê die skorsing van Numsa uit Cosatu is ‘n terugslag vir die Cosatu asook die drieparty-alliansie.

Hy het ook gesê ander “progressiewe” stuwinge in die land sal daaronder ly.

Maandag het nog sewe vakbonde hulle betrokkenheid by Cosatu opgeskort en onderneem om Numsa se skorsing te beveg.

Numsa het egter gesê hulle is steeds deel van Cosatu en erken nie die skorsing nie.

 

Mantashe het gesê adjunkpresident Cyril Ramaphosa wou namens die ANC die skeuring tot elke prys voorkom.

Swart ma martel kind dood

‘n Swart ma van Mpumalanga is Maandag in Nelspruit skuldig bevind aan sy moord nadat sy haar driejarige kind só erg aangerand het dat sy lewer gebars het,

Mawanda Nokwanda Matsebula (23) van Barberton is skuldig bevind aan kinderverwaarlosing en moord, het Sapa berig. Sy is in Oktober 2010 in hegtenis geneem ná Siphosethu Mhlanga se dood.

Matsebula het onskuldig gepleit en haar ma Kholiwe Mhlanga, wat in Swaziland bly, en haar verhuurder, Netty Mavuso, beskuldig van die moord.

Regter Peter Mabuse het Maandag gesê die seuntjie is dood as gevolg van bloedverlies weens sy beserings. “Dr. Gantsjo Prodanof Gantsjef, ʼn staatspatoloog, het getuig dat die kind aan verskeie beserings beswyk het. Hy het skedel- en ribfrakture gehad en breinskade opgedoen tydens die aanranding,” het Mabuse gesê. “Dit was ‘n skop of ‘n vuishou wat veroorsaak het dat sy lewer gebars en hy dood gebloei het.”

Foto’s wat tydens die hofsaak vertoon is, het die skop- en slaanmerke getoon.

Die kind is moontlik ook met ‘n sambok of ‘n tou aangerand.

“Hy sou nie langer as vier ure bly leef het ná die aanval op 6 Oktober 2010 nie.”

Mavuso, wat die kamer aan Matsebula verhuur het, het getuig dat die ma die kind alleen in die huis toegesluit het terwyl sy sake bedryf het. “Die seuntjie het homself bevuil wanneer hy alleen was, en dit is een van die redes waarom sy hom aangerand het,” het Mavuso gesê. Sy het op die dag van die kind se dood harde musiek uit die kamer gehoor en die beskuldigde het haar later kom roep om te sê die seuntjie gooi op. Hy het op die vloer gelê met ʼn kombers langs hom toe hulle by die kamer aangekom het. ‘n Verpleegster is ontbied en die kind is dood verklaar.

Volgens Matsebula het die kind van ʼn sekuriteitshek afgeval en hy het van Swaziland af teruggekom met die beserings. Mabuse het dié bewerings verwerp.

Matsebula moet weer op 19 Januarie in die hof verskyn vir ʼn voorvonnisverslag.

Geweld breek uit by Jeugliga-verkiesingskonferensie

Talle beseerdes is in Oos-Londen na hospitale geneem nadat geweld oornag by die ANC-jeugliga se Oos-Kaapse verkiesingskonferensie uitgebreek het, het RSG berig.

Gevegte het begin toe verskillende groepe nie oor die kwalifiserende vereistes kon ooreenkom voor die provinsiale leierskap verkies is nie.

Honderde ondersteuners van Sicelo Mdletshe is na die konfrontasie uit die saal verwyder.

Streke soos Makana en die Nelson Mandela Metro het nie aan die verkiessing deelgeneem nie. Hulle het die saal verlaat nadat die gevegte uitgebreek het.

Die konferensie het uiteindelik Nhathi Nqoko en Zolani Khabae as die voorsitter en ondervoorsitter gekies.

Van Nkandla na spioenasiebande

Die DA het bevestig dat hulle regstappe weens die sogenaamde spioenasiebande sal neem, nadat hul veldtog teen Nkandla nie veel opgelewer het nie.

Die party het vroeër gesê dat hy ‘n regshersiening gaan vra rakende die korrupsieaanklagte wat teen President Jacob Zuma laat vaar is.

Die Nasionale Vervolgingsgesag (NVG) wou, in navolging van die Presidensie nie kommentaar lewer oor die beweerde spioenasiebande nie.

Die DA sê daar is geen geldige redes vervat in die bykans 600 bladsye wat die besluit regverdig om die aanklagte te laat vaar nie.

Die DA se federale voorsitter, James Selfe sê die party sal met regsoptrede voortgaan om die besluit omgekeer te kry.

Selfe sê hulle is van mening dat die aanklagte laat vaar is vanweë ‘n politieke agenda.

Die Nasionale Vervolgingsgesag het die spioenasiebande reeds aan die DA oorhandig.

ANC-alliansie steier onder Numsa se skorsing

Cosatu se eenheid en die stabiliteit van die regerende alliansie is ‘n swaar slag toegedien na die uitsetting van Numsa, die vakbondfederasie se grootste vennoot.

Numsa is die naweek by ‘n vergadering van Cosatu se sentrale uitvoerende komitee uit die vakbondfederasie geskors.

Die stap, wat in die vroeë oggendure Saterdag besluit is, plaas die ANC-eenheid ook in gevaar.

Die skorsing volg nadat Numsa besluit het om nie die ANC in vanjaar se verkiesings te steun nie, om werkers van buite die vakbond se tradisionele steunbasis te werf, en ‘n beroep op Cosatu om van die drieparty-alliansie weg te breek.

Cosatu se bondgenote kon egter nie duidelik uitspel wat die implikasies van die federasie se skuif teen Numsa is nie.

Die ANC het intussen ‘n oproep gedoen vir die “beginselvaste eenheid van die werkersklas.”

Sekretaris-generaal Gwede Mantashe het gesê “enige verdeeldheid onderling of tussen van die alliansie-vennote is sleg vir die ANC en die samelewing”.

Een van die gevolge is onder meer dat ander vakbonde wat Numsa ondersteun, ook uit Cosatu sal stap.

Dit sal gebeur as die dominante faksie wat verantwoordelik is vir die besluit, van sekretaris-generaal Zwelinzima Vavi volgende ontslae raak.

Die hoofsekretaris van die mynwerkersvakbond NUM, Frans Baleni het die leierskap van die metaalwerkersvakbond Numsa gevra om binnegevegte te staak en op eenheid onder werkers te fokus.

Baleni het vroeër openlik sy spyt uitgespreek met Numsa se skorsing uit Cosatu.

Numsa se hoofsekretaris, Irvin Jim het dit egter verwerp. Hy het Baleni van skynheiligheid beskuldig en sê hy was onder diegene wat Numsa se skorsing voorgestaan het.

Baleni sê Numsa is die slagoffer van sy eie omstandighede.

Die ANC sal Maandag ‘n nuuskonferensie in Johannesburg hou oor die jongste verwikkelinge.

Die ANC het Numsa se skorsing vroeër as ‘n tragedie bestempel. Die ANC woordvoerder, Zizi Kodwa sê ‘n verswakte en verdeelde Cosatu maak werkers kwesbaar.

Volgens Kodwa sal die ANC aanhou om in gesprek te tree met alle rolspelers.

Die Suid-Afrikaanse Kommunisteparty het ook sy kommer oor die skorsing uitgespreek.