Sekspes-burgemeester geskors

Die burgemeester van die Cederberg-munisipaliteit, Jonas White, is uit die ANC geskors nadat ‘n tugkomitee bevind het hy is ongeskik om die pos te beklee, het die Sowetan Vrydag berig.

Fezile Calana, voorsitter van die ANC se tugkomitee in die Wes-Kaap, het gesê White het die adjunk-burgemeester, Lorna Scheepers, seksueel geteister.

White het tussen Augustus 2011 en Oktober verlede jaar “herhaaldelik en aanhoudend boodskappe van ‘n eksplisiete aard” aan Scheepers gestuur.

Volgens die berig sluit die boodskappe foto’s van White se geslagsdele in.

Die komitee het ook bevind dat hy Scheepers verbaal en emosioneel aangerand het tydens vergaderings.

White het ook na bewering boodskappe van ‘n seksuele aard aan ‘n 15- en 16-jarige meisie gestuur.

Calana het gesê die komitee het White skuldig bevind op aanklag dat hy omkoopgeld van R60 000 van ‘n kontrakteur aanvaar het.

Die polisie ondersoek die bewerings van seksuele teistering.

White het 21 dae kans om te appelleer en sal by die volgende raadsvergadering na verwagting uit sy pos as burgemeester onthef word.

Die komitee het bevind White moet vyf jaar uit die party geskors word, het The Star berig.

Ramphele: Mandela moes 2 termyne dien

Suid-Afrika sou ‘n beter land wees indien Nelson Mandela vir ‘n tweede termyn as president gedien het, het dr. Mamphela Ramphele, Agang-leier, Donderdag gesê.

“Ek dink as ons die goeie geluk van Mandela vir twee termyne gehad het, sou ons ‘n beter kans gehad het, want hy was ‘n toegewyde demokraat,” het sy gesê.

“Ek is nie seker dat sy opvolgers so toegewyd is soos wat hy was nie.”

Ramphele is besig om voorbereidings om haar politieke party, Agang, amptelik bekend te stel, wat in volgende jaar se verkiesing teen die ANC te staan sal kom.

Sy het ook haar kommer uitgespreek oor menseregte, swak opvoeding en gesondheid en polisie vergrype.

“Die reis na demokratiese politiek is ‘n reis wat ons as land nie verstaan het ons moet ondergaan nie,” het Ramphele gesê.

Die ANC regeer die land sedert 1994, maar is onder druk omdat hy nie sy beloftes nakom nie.

“Wat ontmoedigend is, is die sin van gelatenheid wat so baie mense voel. Wat aangaan is sleg, maar mense sien nie ‘n alternatief nie,” het sy verder gesê.

Ná sowat 20 jaar van demokrasie is die land “heeltemal op die verkeerde spoor”.

Twee rand metropolisielid aan

Twee broers is in hegtenis geneem nadat hulle na bewering ‘n metropolisiebeampte van Germiston aangerand het, het die Ekurhuleni-metropolisie gesê.

Hoofsupt. Wilfred Kgasago het gesê die beampte is Woensdagaand aangeval toe hy die mans in hegtenis wou neem. Dwelms is glo in hul besit gevind.

“Metropolisiebeamptes het ‘n man buite ‘n internetkafee genader. Dwelms is in die man se besit gevind.”

Die man het by die internetkafee ingehardloop toe die beampte hom in hegtenis wou neem. ‘n Tweede man het toe die beampte aangerand.

“Die metropolisiebeampte het ‘n gebreekte neus en ‘n gebreektee oogkas,” het Kgasago gesê.

‘n Ander metropolisiebeampte is beseer en het Donderdagaand ‘n operasie by die Union-hospitaal in Alberton ondergaan.

Die twee mans, wat broers is, is in hegtenis geneem en staan tereg op aanklagte van die besit van dwelms en die aanranding van ‘n polisiebeampte.

Hulle verskyn Vrydag in die Germiston-landdroshof.

SA se lewensgehalte beter sê Zuma

Suid-Afrikaners se lewensgehalte het met die koms van demokrasie geweldig verbeter, het pres. Jacob Zuma Donderdag aan buitelandse diplomate gesê.

“Ons het ons belofte nagekom om ‘n beter lewe vir almal te skep. Ons het die lewensgehalte van ons mense verbeter,” het Zuma gesê nadat hy briewe van geloofwaardigheid van ambassadeurs en hoëkommissarisse ontvang het.

Die geleentheid is by die Sefako Makgatho- presidensiële gastehuis in Pretoria gehou.

Vyf ambassasdeurs, wat Kenia, Malawië, Frankryk, Saoedi-Arabië en Pole het dokumente aan die president oorhandig en foto’s met hom geneem.

“Ons het meer werksgeleenthede geskep, die vlakke van armoede en werkloosheid verminder, maar dit het ons nie alleen bereik nie. Julle lande was daar toe ons beter geleenthede vir ons mense gesoek het,” het Zuma gesê.

Hy het die internasionale gemeenskap, veral Afrika-lande, bedank vir hul bydrae tot die stryd teen apartheid.

Zuma het gesê dit is te danke aan dié hulpverlening wat Suid-Afrika “anders is as wat dit 20 jaar gelede was”.

Hy het gesê 2013 was ‘n jaar van oorsig in Suid-Afrika voor die volgende nasionale verkiesing.

 

Onderwyser wat Malema langs bobbejane uitstal, geskors

‘n Onderwyser by ‘n Bloemfonteinse skool is geskors ná gerugte van rassisme het RSG Donderdag berig.

Die bewering teen die onderwyser, by Wilgehof Primêre Skool, is gemaak deur Craig Thiem, die pa van twee kinders, tussen die ouderdomme van 12 en 13, wat die enigste wit leerlinge by die skool is.

Amptenare van die departement van onderwys het die laerskool Wilgehof vroeër die week besoek, waar hulle op die ou Suid-Afrikaanse vlag en ‘n foto van die geskorste leier van die ANC-jeugliga, Julius Malema, langs bobbejane afgekom het.

Die onderwyser en die skoolhoof is aangesê om die items onmiddellik te verwyder.

Die Menseregtekommissie het ook ondersoek ingestel, en die waarnemende bestuurder van die kommissie, Buang Jones, het gesê die aantygings teen die onderwyser is baie ernstig.

Jones het gesê hulle wag op ‘n verslag van die departement van onderwys in die provinsie.

Amcu staak vir meerderheidsvakbond-plek

Die mynwerkersvakbond AMCU sal Woensdag met ‘n beskermde staking begin, indien Lonmin hom nie tot die meerderheidsvakbond by die myn verklaar nie.

Die besluit is Woensdagaand op ‘n massavergadering geneem wat deur die president van die vakbond, Joseph Mathunjwa, bygewoon is.

Mthunjwa sê hulle sal Lonmin oor hulle besluit inlig, en hulle 48 uur tyd gee om op die griewe te reageer.

Indien dit nie gebeur nie, sal alle produksie tot stilstand gebring word.

Hy het ook hulle versoek herhaal dat die ander mynvakbond die NUM sy kantore by die myn ontruim, maar het daarop gewys dat dit ‘n afsonderlike kwessie is.

Burgemeester vas vir dronkbestuur

Mahole Simon Mofokeng, burgemeester van Sedibeng, is in hegtenis geneem ná hy na bewering onder die invloed van drank bestuur het.

Mofokeng het glo in ‘n ander motor vasgery terwyl hy ‘n hotel in Vanderbijlpark verlaat het, het The Star Donderdag berig.

Mofokeng het volgens die berig Dinsdagaand agter tralies deurgebring.

Brig. Neville Malila, woordvoerder vir die Gautengse polisie, het bevestig dat ‘n bloedmonster van Mofokeng by ‘n hospitaal geneem is.

“Hy is eers [Woensdag-] oggend vrygelaat, op borgtog van R1 000.

“Hy is uit polisie-aanhouding vrygelaat en moes nie in die hof verskyn nie.”

Die saak is uitgestel tot 5 September.

Mofokeng se woordvoerder, Dan Manoeli, het ook vrae oor ‘n geval van ‘n soortgelyke aard beantwoord. Mofokeng het in Februarie in ‘n kroeg in Vanderbijlpark geval, en moes gehelp word om op sy voete te bly. Manoeli het gesê Mofokeng se drankie was in daardie geval gedokter.

Boer se lyk in vrieskas gevind

Die lyk van ‘n boer van Queenstown is in ‘n vrieskas gevind, het die polisie in die Oos-Kaap Dinsdag gesê.

Lt. kol. Pumzile Makaula het gesê die 67-jarige man se lyk is Maandag in sy winkel gevind.

Die man se werknemers het bekommerd geraak toe hy nie die hek vir hulle oopgemaak het nie. Hulle het toe na hom gaan soek en op sy lyk afgekom.

Makaula het gesê ‘n nadoodse ondersoek sal die oorsaak van die boer se dood bepaal.

Niemand is in hegtenis geneem nie.

Polisie wat man doodslaan, intern verhoor

Vyf polisiebeamptes van Limpopo wat daarvan aangekla is dat hulle ‘n Nigeriese man doodgeslaan het, sal binnekort intern dissiplinêr verhoor word, het die polisie Dinsdag gesê.

“Die verhoor sal binnekort begin,” het brig. Hangwani Mulaudzi gesê.

Een van die polisiemans, Clement Tsotsane, is Dinsdag borgtog deur die Polokwane-landdroshof geweier. Hy sal Woensdag saam met die ander polisiebeamptes ‘n formele borgaansoek bring.

Die beamptes word daarvan beskuldig dat hulle Onyechiabi Iwuaka aangerand het terwyl hy verlede Sondag ‘n vriend besoek het. Sy vriend kon daarin slaag om weg te kom. Iwuaka is op pad na die Polokwane-polisiestasie dood.

Die onafhanklike polisie-ondersoekdirektoraat (Opod) het gesê die polisiebeamptes het na die huis gegaan om ‘n saak van gewapende roof in Mokopane te ondersoek.

Absa-bankroof: Vyf vas

Vyf mense is in hegtenis geneem na hulle ‘n Absa-tak Dinsdag in Joubertina beroof het, het die polisie in die Oos-Kaap gesê.

“‘n Groep van meer as 10 rowers was vermoedelik betrokke in die rooftog en die polisie is nog op soek na minstens vyf verdagtes,” het brig. Marinda Mills, polisiewoordvoerder, gesê.

Mills het gesê die verdagtes het by ‘n padblokkade tussen Uniondale en George losgebrand op die polisie. Die polisie het teruggevuur en een van die rowers gewond.

Vyf mans is in hegtenis geneem en beamptes het beslag gelê op drie gesteelde voertuie.

Mills het gesê ‘n teller by die bank is tydens die rooftog met ‘n vuurwapen geslaan, maar die polisie het nie vuurwapens of geld gevind by die mans wat in hegtenis geneem is nie.