Kategorie: Nuus

Die stigter van die politieke forum Agang, Mamphela Ramphele sê die doel van die organisasie is om fragmentering in opposisiegeledere te verminder en die politieke landskap te herskik.

Ramphele het gister haar tuisdorp naby Polokwane besoek. Sy sê sy sal samesprekings voer met ander partye oor kwessies van gemeenskaplike belang.

Sy sê dis nie koalisievorming as sodanig nie, omdat daar verskeie maniere van samewerking uit gesprekke kan voortvloei. Ramphele sê gesprekke kan nie met vooropgestelde idees gevoer word nie.

‘n Sestien-jarige meisie is tydens ‘n gewelddadige oproer op Mayflower naby Ermelo in Mpumalanga deur die polisie raakgeskiet.

Die oproermakers het die kantore van die Albert Luthuli munisipaliteit aan die brand gesteek, die munisipale bestuurder as gyselaar aangehou en sy motor aan die brand gesteek.

Volgens die Departement van Gemeenskapsveiligheid is die meisie getref toe hulle die woedende betogers uiteen gejaag het. Die LUR, Vusi Shongwe het die geweld veroordeel.

Betogers het Maandag in die noordweste van Johannesburg klippe na motoriste gegooi op die R114, tussen Malibongwe-rylaan en Cedarweg.

Volgens die Johannesburgse metropolisie is dit nie veilig om daar te ry nie en word verkeer herlei.

Vroeër is die N14 en in Malibongwe-rylaan vir verkeer gesluit weens die oproer en later weer vir verkeer oopgestel.

Hoofsupt. Wayne Minnaar het Maandagoggend gesê daar was ‘n groep oproermakers op Malibongwe-rylaan naby Cosmo City en nog ‘n groep op die N14 naby Diepsloot.

“Die rede vir die protesoptrede is nie in hierdie stadium bekend nie,” het Minnaar gesê.

Metropolisiebeamptes is ontplooi om die situasie te monitor.

Voormalige Mail & Guardian-joernalis Mandy Rossouw is op die ouderdom van 33 jaar in haar woonstel in Bryanston, Johannesburg oorlede.

Volgens Beeld is Rossouw in die hospitaal opgeneem oor die naweek met pyn op die bors, maar is ‘n paar uur later ontslaan.

‘n Kennis het haar liggaam gevind by haar woonstel toe sy versuim het om ‘n ete-afspraak na te kom. Die oorsaak van haar dood is nog onbekend.

Redakteur Nic Dawes het gesê: “Mandy was ‘n buitengewone teenwoordigheid in ons nuuskantoor en op ons bladsye, lewendig, gefokus, en vasbeslote om die storie te breek Ons gedagtes is met haar familie, haar Media24-kollegas en haar baie vriende oor die wêreld van die joernalistiek, politiek en diplomasie heen.”

Rossouw was die internasionale korrespondent vir die Media24-groep, politieke verslaggewer vir die City Press en was ook ‘n verslaggewer vir Eyewitness News.

Sy het voorheen gewerk as ‘n politieke joernalis vir Beeld en die Mail & Guardian.

Verlede jaar het sy haar boek Kings en Kingmakers voor die ANC se nasionale konferensie in Mangaung in die Vrystaat vrygestel.

“Haar dood is ‘n groot verlies vir ons,” sê Tim du Plessis, hoof van Afrikaanse koerante by Media24.

Landdroshowe oor die land heen kan heeltemal tot stilstand kom ná landdroste gedreig het om te staak as hulle salarisse nie binnekort aangepas word nie, het die Dispatch Online Maandag berig.

Die nasionale uitvoerende raad van die Vereniging van Regterlike Beamptes van Suid-Afrika (Joasa) het die naweek ná ‘n vergadering in Port Elizabeth bevestig dat hulle sal staak indien daar nie aan hulle salariseise gehoor gegee word nie, het die koerant berig.

Landdroste het die voorgestelde verhoging van 5% wat deur die onafhanklike vergoedingskommissie gemaak is, verwerp, en gesê die kommissie het nie die knelpunte wat uitgewys is, opgelos nie.

Die staking sal na verwagting op 18 Maart begin.

Die optrese kan ernstige gevolge vir die land se strafregstelsel inhou. Landdroste moet byvoorbeeld verhoorafwagtende gevangenes se J7-vorms teken sodat hulle in aanhouding kan bly. Sonder die nodige handtekening, kan verhoorafwagtendes huis toe gestuur word.

Mthunzi Mhaga, woordvoerder vir die departement van justisie, het egter aan die Dispatch Online gesê die departement verwag dat samesprekings met landdroste tot oplossings sal lei.

Slegs nege areas in Suid-Afrika het ‘n internetspoed hoër as die nasionale gemiddeld, volgens ‘n berig.

Beeld het Maandag berig Ookla se Net Index het aangedui dat die gemiddelde nasionale spoed vir breëband-internet 3,82 megagrepe per sekonde (Mbps) is.

Randfontein het die vinnigste breëbandttoegang in Suid-Afrika, met ‘n aflaaispoed van 11,3 mbps, gevolg deur Bryanston, Midrand en Randburg.

Die spoed is vasgestel met die hulp van plaaslike internetgebruikers, wat Ookla se webwerf en toepassing gebruik het om hulle internetspoed te toets.

Ookla het 1,7 miljoen breëbandgebruikers se spoed tussen 6 Februarie en verlede Donderdag altesaam 5,05 miljoen keer getoets. Altesaam 451 47 van die toetse is gebruik om die indeks saam te stel.

Slegs twee van die gebiede in die land met ‘n buitengewoon hoë aflaaispoed val buite Gauteng – Secunda in Mpumalanga (5,72 Mbps) en Worcester in die Wes-Kaap (3,84 Mbps).

Dié spoed is egter nog heelwat stadiger as wat in baie ander lande beskikbaar is. Vilnius in Litoue spog byvoorbeeld met ‘n spoed van 49 Mbps, terwyl HongKong ‘n spoed van 45,43 Mbps meet.

Daar is toekomshoop vir jong Afrikaanssprekendes in Suid-Afrika. Dit gaan egter nie op ‘n skinkbord aangedra word nie en die tyd het aangebreek om hande te vat, vernuwend te dink en saam te werk om vir die Afrikaner ‘n plek in sy geboorteland te waarborg.

Dit was die boodskap van dr. Pieter Mulder, leier van die Vryheidsfront Plus, aan studente van die Juventus-jeugvereniging in Pretoria. Juventis is ‘n instansie wat christelike leierskap en waardes onder Afrikaanssprekende jong mense bevorder.

Dr. Mulder het gesê die Afrikaner is by verre die minderheid in hul land van geboorte en nie net sy taal en kultuur nie, maar sy oorlewing is onder druk. Die realiteit is dat hy alle werklike politieke mag verloor het.

Die destydse Nasionale Party se onderhandelings-uitgangspunt was slegs die beskerming van individuele regte en geen grondregtelike waarborge is ingebou vir die beskerming van minderheidsgroepe nie.

Om hierdie redes het die tyd aangebreek dat veral jong Afrikaners moet soek na oplossings en daar is talle internasionale voorbeelde waar wel oplossings gevind kan word om minderheidsgroepe se voortbestaan en die handhawing van hul taal en kultuur te verseker.

“Die moderne tendens wêreldwyd is die erkenning van minderhede en hul regte. Lande soos Indië, Israel en Pakistan het onlangs selfs ministeries gestig om minderheidsgroepe se belange te behartig.

“Ons hoef nie die wiel van voor af te ontwerp nie, maar kan lesse leer van lande met soortgelyke probleme. Oplossings wat op ons van toepassing kan wees, kan ons oorneem en aanpas vir ons eie omstandighede.

“Die Afrikaner sal sy eie toekoms moet skep en kan nie sy hoop op die regering of ander groepe plaas om hom te red nie.

“Genoeg mense moet opstaan vir minderheids- en selfbeskikkingsregte en hulle uitspreek teen druk en verswelging van die meerderheid voordat ‘n regering aandag daaraan sal gee,” het dr. Mulder gesê.

Volgens hom is daar organisasies binne en buite die parlement nodig om druk op die regering te plaas. Dit sluit in ‘n politieke partye asook ‘n verskeidenheid burgerlike organisasies.

Dr. Mulder het verskeie voorbeelde genoem waar direkte gesprek op parlementêre vlak reeds ‘n belangrike bydrae tot die Afrikaner se saak gelewer het.

Hy het gewys op die belangrikheid om ‘n koalisie te vorm met ander opposisie politieke partye en om so deel te wees van ‘n koalisie wat ‘n verkiesing kan wen.

“Ons vra ‘n toekoms vir ons kinders en ‘n regverdige bedeling vir almal in die land. Om passief daarop te wag, gaan nie werk nie. Ons het nie ‘n keuse as om nederlae te gebruik as basis vir die bou van ‘n beter toekoms nie,” het dr. Mulder gesê.

Die oorblyfsels van twee of meer jeugaktiviste wat na bewering vermoor is deur lede van die berugte Mandela United Football Club word opgegrawe by die Avalon-begraafplaas in Soweto.

Die polisie en die Nasionale Vervolgingsgesag se ondersoekers glo twee grafte van aktiviste wat vermoor is deur die klub se lede kan getuienis bevat waarby ANC-veteraan Winnie Madikizela-Mandela betrokke is.

Die klub het internasionale nuusvoorblaaie gehaal toe sy lede Stompie Moeketsi, 14, in Januarie 1989 vernoor het.

Madikizela-Mandela is skuldig bevind in 1991 aan ontvoering en medepligtige. Haar ses jaar tronkstraf is tot ‘n boete en ‘n twee-jaar opgeskorte vonnis op appèl verminder.

Stompie is vermoor omdat hy na bewering ‘n polisie-informant was. Hy was nie die enigste aktivis wat verdwyn het nie. Dokumente in besit van ondersoekers wys dat ‘n dubbele moordsaak op 15 November 1988 geopen is.

CR392 en CR393 kan oorskot wees van die  twee aktiviste wat as armlastiges begrawe is.

Inligting het aan die einde van verlede jaar aan die lig gekom dat die grafte die liggame Lolo Corlette Sono, 21, en Siboniso Tshabalala, 19, beide koeriers vir die ANC se gewapende vleuel Umkhonto we Sizwe, bevat.

Hul liggame is gevind in ‘n veld in Diepkloof, Soweto, met verskeie steekwonde. Albei is na bewering daarvan beskuldig deur Madikizela-Mandela dat hulle polisie informante was.

Hulle het verdwyn minder as twee maande voor Stompie vermoor is.

Madikizela-Mandela het voortdurend betrokkenheid in die moord ontken, ten spyte van Sono se pa dat Lolo, wat erg aangerand is, saam met haar die dag was toe hy verdwyn het.

“Dit is ‘n hoë-profielsaak. Die president word op hoogte gehou van die ondersoek,” het ‘n polisieman naby aan die ondersoek gesê.

Hy het gesê Suid-Afrikaanse en Argentynse argeoloë en die polisie se forensiese deskundiges sal betrokke wees tydens die opgrawing.

Die Federale Vryheidsparty wil die besoek van die Nuwe Black Panther Party se afvaardiging aan Suid-Afrika van 19 tot 27 Maart 2013 stop. Hul ontslape leier Khalid Mohammed het meer as een keer in sy toesprake in die VSA gesê “Moor alle Blankes uit”. In Augustus 2012 het die party sy radioprogram geopen met ‘n oproep vir die moord van alle wit mense in Suid-Afrika. Met die boodskap het hul leier Khalid Mohammed gese dat : “We give them 24 hours in South Africa to get out of town by sundown. I say, if they don’t get out of town, we kill the men, we kill the women, we kill the children, we kill the babies, we kill the blind, we kill the cripple, we kill the crazy, we kill the fagg**ots, we kill the lesbians, I say god damnitt we kill them all.” Die huidige leier Malik Zulu Shabazz het bygevoeg “if it’s white kill it.” . Malik Zulu Shabazz het ook soortgelyke dreigemente oor die Joodse volk gemaak.

Die besoek van die Nuwe Black Panther Party is op uitnodiging van die Pan African Congress of Azania of beter bekend as die PAC.

Die Federale Vryheidsparty sê dat ons as ‘n demokratiese samelewing nie kan toelaat dat ‘n organisasie wat openlik vyandig is en volksmoord op grond van ras, etniese oorsprong en seksuele oriëntasie aanhits, om die land te besoek nie. Die Suid-Afrikaanse regering weier die toegang van ‘n vreedsame wêreld leier soos die Dalai Lama, maar laat toe dat ‘n ​​ groep soos die Black Panther Party ons land besoek. Die FVP blameer die Suid-Afrikaanse regering vir die toestaan ​​van visums aan hierdie beweging se lede juis as gevolg van die rassensitiwiteit daarvan.

Die FVP beplan om die Verenigde State van Amerika se ambassade te besoek om hulle hulp te vra om die besoek van die radikale New Black Panther Party te stop.