Die premier van Noordwes, Thandi Modise, het haar skok uitgespreek oor die moord op ‘n bekende hondeteler buite Rustenburg.
Eric Labuschane is Donderdag dood in sy huis aangetref.
Sy bejaarde ma, wat aan Alzheimer se siekte ly, is gevind waar sy in die badkamer toegesluit was.
Modise het ‘n beroep op die polisie gedoen om geen steen onaangeroer te laat om die moordenaars vas te trek nie.
Sy het ook gesê boere moet ‘n doeltreffende kommunikasienetwerk hê om plaas-aanvalle te help voorkom.
Volgens berigte is die Duitse kanselierAngela Merkel woedend oor die houding van Ciprus wat weier om met die EU te skakel en eerder stilweg planne bedink om die pensioenfondse van hul bewoners te plunder. Duitse regeringsamptenare het die Cipriote se houding as byna “outisties” beskryf.
Die Cipriese president, Nicos Anastasiades, en partyleiers sal Saterdag na Brussel reis vir samesprekings met die Europese Unie oor maatreëls om die eiland se dreigende bankrotskap af te weer, berig die staatsmedia.
Die afvaardiging sal omstreeks 12:00 vertrek en laat Saterdag of Sondag na Ciprus terugkeer. Dit is ‘n dag voor die sperdatum om maatreëls in werking te stel, wat daarop gemik is om €5,8 miljard (sowat R69 miljard) in te samel om ‘n reddingspakket te verseker, het die CNA-nuusagentskap berig.
Die Europese owerhede het verlede naweek ingestem om €10 miljard (sowat R119 miljard) aan Ciprus beskikbaar te stel, maar in ruil daarvoor is ‘n belasting van 10% op alle banksaldo’s gehef. Dit beteken dat spaarders 10% van hulle spaargeld aan die EU moes betaal. Dit het vrese gestook dat banke in ander lande getref word en dat verbruikers hul geld gaan onttrek.
Merkel het die eenmalige belasting op die spaargeld verdedig en gesê dit maak sin omdat die rentekoerse hoër is in Ciprus as elders in die EU.
Familielede van pres. Francois Bozize van die Sentraal-Afrikaanse Republiek (SAR) soek skuiling in die Demokratiese Republiek van die Kongo, het ‘n bron in Kinshasa gesê.
Dit is egter nie bekend waar Bozize hom bevind nie. Bozize word sedert Vrydag – ná ‘n vlugtige besoek aan Suid-Afrika – vermis.
Sowat 25 familielede bly in ‘n hotel of in kerke in die stad van Zongo, aan die ander kant van die Oubangui-rivier wat die SAR van die DRK begrens, het die bron gesê.
Die bron kon nie sê of die president saam met sy familie gevlug het nadat rebelle Sondag beheer oor die hoofstad, Bangui, geneem het nie.
Lambert Mende, regeringswoordvoerder, het Sondag aan AFP gesê Bozize “het nie gevra om na die DRK te kom nie… Hy het nie hier aangekom nie”.
Mende het gesê hy het ook met die burgemeester van Zongo gepraat, wat gesê het ‘n groot aantal vlugtelinge van SAR het in die stad aangekom.
Die staking by verskeie Exxaro-aanlegte beëindig toe die werkers ingestem het om volgende week terug te keer na hul poste, het OFM Saterdag berig.
“Kragtens die ooreenkoms sal stakende werknemers by die Matla, Arnot, Grootegeluk, Leeuwpan, Inyanda en Reductants-aanlegte Maandag terugkeer werk toe,” het Retha Piater, hoof van menslike hulpbronne, gesê.
Sy het gesê werknemers sal ‘n minimum van R2 800 ontvang vir die eerste kwartaal van die maatskappy se 2013 korttermynaansporingsbonus.
Die staking het op 5 Maart in Mpumalanga begin en na die res van die aanlegte in Limpopo uitgebrei.
Werknemers het onwettig gestaak oor prestasiebonusse wat nie betaal is nie. Die maatskappy het in 2012 nie sy prestasiedoelwitte bereik nie.
Minstens nege Suid-Afrikaanse soldate is gedood in die Sentraal-Afrikaanse Republiek in die botsings met die rebelle.
‘n Suid-Afrikaanse militêre kenner het gesê “niemand kon dink dat die operasie só verskriklik sou skeefloop nie”.
Rebelle het Sondag die hoofstad Bangui ingeneem en die bewind van President Francois Bozize omvergewerp, het ‘n ooggetuie aan Reuters gesê.
Hy het eers ses lyke en later drie liggame van Suid-Afrikaanse soldat by die uitgebrande voertuie gesien.
“Ek het die liggame van ses Suid-Afrikaanse soldate gesien. Hulle is almal geskiet. Hul voertuie is ook vernietig. Ander Suid-Afrikaanse soldate het gekom om die liggame te kom haal,” het een ooggetuie gesê.
Sowat 600 Suid-Afrikaanse soldate is sonder lugsteun in die land ontplooi. SANW het intussen bevestig dat van sy soldate dood en gewond is, maar kon nie besonderhede oor die aantal dooies en gewondes verstrek nie.
Volgens gerugte kan daar tot 40 gewondes wees. Dit is nie seker of van die soldate vermis of gevange geneem is nie.
Twee Suid-Afrikaanse Hercules C-130-vragvliegtuie is na Entebbe, Uganda, onderweg om die gewondes en dooies na Suid-Afrika terug te bring.
Die SAR is ‘n mineraalryke land met neerslae van uraan, goud en diamante
Frankryk het aansienlike ekonomiese belange in die onstuimige land. Die Franse kernreus Areva het sy Bakouma uraanprojek vir twee jaar in 2011 egter opgeskort as gevolg van ‘n daling in uraanpryse na die Fukushima-ramp.
Die aanval op die Suid-Afrikaners is ‘n terugslag vir die land se pogings om deur vredesendings groter invloed op die kontinent te verkry. Frankryk het 250 soldate reeds in die SAR en het inderhaas 300 uit Gaboen ingevlieg.
Die AU het die aanval veroordeel.
“Die plundery is sleg. Beide die bevolking en Seleka [die rebelle-alliansie] is betrokke,” sê ‘n senior VN-amptenaar in die hoofstad Bangui. “Ons is nie seker wie in beheer is nie, ek dink nie dit is al duidelik nie.”
Vergeet wat Eskom, die regering en die media sê: Hier volg ‘n verslag deureen van die wit kontrakteurs by Medupi, uit Ellisras.
Ek werk op Medupi kragstasie projek nou al vir 2 jaar. Ons het nou al die perseel ‘n allemintige 11 keer in hierdie laaste 2 jaar ontruim! As die klomp werkers ongelukkig is oor iets, staak hulle, gooi klippe en brand af. Soos ek nou hier sit en tik, sit ons buite die Medupi-perseel omdat daar weer omtrent 2000 van die ontevredenes staan en dans, almal met stokke en konstruksiepype wat hulle rondswaai.
Einde verlede jaar is heelwat skade aangerig. Hierdie jaar is daar “net” ‘n hele spul voertuie se ruite uitgegooi. Vandat ons in Januarie oopgemaak het, was daar nog nie een dag se produksie gelewer nie. Ons moes al twee keer die jaarlikse induksie doen. Elke keer wat ons op die punt staan om te begin werk, gooi die blikslaers klip en dan moet ons hardloop. Die media berig dat als in orde is en dat produksie weer op koers is. Dit is een groot leuen.
Ons staan al amper einde Maart se kant toe, en hier was nog absoluut niks gedoen aan die kragstasie nie. Hulle kry elke week ‘n nuwe rede om te staak. Dit wissel van bonusse wat hulle glo nie reg was nie, die Project Labour Agreement wat hulle wil uit hê, alle waarskuwings wat moet verval, ens, ens.
Verlede week het die polisie rubberkoeëls geskiet, en een van die werkers wat getref is, is ‘n paar dae gelede oorlede. Nou staak hulle weer want hulle soek 10 af om te “rou”. Elke week is daar ‘n ander rede. En Eskom sit terug en maak asof niks gebeur nie. Hulle het sekuriteitsheinings om hulle kantore gespan en ‘n hele klomp sekuriteitspersoneel en tegnologie wat hulle beskerm. Maar die kontrakteurs is aan hulle eie lot oorgelaat. Ons is die ape wat elke keer moet hardloop as die geweld opvlam.
Eskom verkoop 9% van sy totale krag onder kosprys aan BHP Billiton se twee aluminiumsmelters terwyl gewone verbruikers onder peperduur tariewe gebuk gaan, het Beeld berig.
BHP Billiton sal egter na ‘n hofbeslissing dié tot nog toe geheime tariewe moet bekend te maak.
Terwyl gewone mense sowat R1,40 per kilowatt-uur betaal, betaal BHP Billiton by sy Hillside-smelter by Richardsbaai net 22,65c per kilowatt-uur.
Die hoogs geheime formule wat Billiton by Hillside betaal vir twee derdes van die 1 200 megawatt wat dié smelter verbruik, is reeds in 1992 gesluit toe Eskom ‘n surplus elektrisiteit gehad het. Die kontrak strek tot 2028.
Die voorkeurtariewe vir Hillside en Billiton se tweede smelter, Mozal in Maputo, wys hoe die twee verliesmakende smelters aan die gang gehou word met die hoë elektrisiteitstariewe wat die res van die land se verbruikers – huishoudelike en nywerheidsverbruikers – vir krag betaal.
Lees hier verder.
China is tans besig om genetiese ingenieurswese te ondersoek, en is baie verder as die Weste gevorder daarmee.
By BGI Shenzhen, het wetenskaplikes DNS-monsters versamel van 2000 van die wêreld se slimste mense in ‘n poging om die boustene van menslike intelligensie te identifiseer. Blykbaar het hulle reeds ver gevorder daarmee, en binnekort sal embrio-sifting meebring dat ouers hul beste sigoot kan uitkies en potensieel elke generasie se intelligensie met vyf tot 15 IK-punte sal kan opstoot.
Geoffrey Miller, ‘n evolusionêre sielkundige en dosent by NYU, is een van die 2000 slimkoppe wat hul DNS geskenk het.
China het ‘n geskiedenis van eugenetika want nadat Deng Xiaoping oorgeneem het in die laat 70s, het hy die hele fokus van die Chinese regering van ekonomiese bestuur na menslike kwaliteits- en kwantiteitsbestuur verander. In die 90s, het hulle begin met wydverspreide voorgeboortelike toetse om geboortedefekte uit te skakel en meer onlangs, het hulle ‘n klomp geld spandeer op navorsing oor menslike genetika om uit te vind watter gene mense slimmer maak.
BGI Shenzhen is die grootste genetiese navorsingsentrum in China, asook in die wêreld. Hulle is ook besig met plantgenetika, dieregenetika, en enigiets wat ekonomies relevant is of wetenskaplik interessant.
Hulle is veral geïnteresseerd in mense van Chinese en Europese afkoms.
Die embrio-analise sal binnekort gereed wees om op ‘n groot skaal geïmplementeer te word. Enige ander eienskap as intelligensie sal selfs makliker wees om te selekteer, omdat intelligensie van baie gene afhang, terwyl fisiese eienskappe soos hare of oëkleur net van ‘n paar gene afhang.
Dinge soos liggaamsvorm is bietjie makliker as fisiese aantreklikheid om te selekteer. En persoonlikheidseienskappe is weer ‘n bietjie makliker as intelligensie: Hoe hardwerkend iemand is, hoe impulsief, hoe polities liberaal of konserwatief asook hoe religieus, kan beïnvloed word deur gene tot ‘n sekere mate.
Westerse navorsing is redelik ver agter. Ons het dieselfde tegniese vermoëns asook dieselfde statistiese vermoëns om die data te analiseer, maar Westerlinge het ‘n stel ideologiese en godsdienstige vooroordele wat hulle verhoed om sulke doelwitte na te streef.
Die Vryheidsfront Plus het gisteraand reeds afgeskop met sy veldtog in aanloop tot die algemene verkiesing aanstaande jaar met ‘n vergadering by die Jan Krielskool op Kuilsrivier.
Dr. Corné Mulder, hoofsweep en provinsiale leier van die VF Plus in die Wes-Kaap en mnr. André Fourie, raadslid en onderleier in die provinsie, het die vergadering toegespreek waarna ‘n nuwe tak vir die Oostenberg-subraad gestig is.
Mnr. Piet Batt is aangewys as voorsitter van die tak, en mnr. Jean Yslie as sekretaris.
Dr. Mulder het in sy toespraak onder meer gevra of daar ‘n toekoms vir die Afrikaner en sy kinders in Suid-Afrika is en het aktuele sake soos regstellende aksie, onregverdige tersiêre toelatingsvereistes, plaasaanvalle, die aanslag op Afrikaans en grondherverdeling bespreek.
Hy het gesê die ANC wil die land transformer tot sy denke, terwyl staatsdepartemente al minder in staat is om basiese dienste te lewer.
“Dis nie in Suid-Afrika se belang dat die ANC aan bewind bly nie. Hy het wel groot steun, behalwe in die Wes-Kaap, maar net ‘n elite groepie mense trek hieruit voordeel. Die meeste swart mense sit steeds werkloos in hul plakkershutte,” het hy gesê.
Die proporsionele kiesstelsel is ook weer verduidelik en dr. Mulder het dit duidelik gestel dat elke wegblystem van moedelose kiesers in werklikheid ‘n stem vir die ANC beteken aangesien dit sy meerderheidspersentasie verhoog.
Hy het gewys op die belangrikheid vir opposisiepartye met dieselfde doelwitte om saam te werk sonder om ‘n eie identiteit prys te gee.
“Die ANC gee homself voor as ‘n groot, demokratiese beweging, maar sy werklike toets oor demokrasie sal kom die dag as hy uiteindelik mag verloor. Ons bly optimisties, daardie dag kom. Ek sal nooit aanvaar ons het in 1652 na die land gekom net om te verdwyn nie,” het dr. Mulder gesê.
Mnr. André Fourie, VF Plus-raadslid, het onder meer oor die situasie in die Stad Kaapstad gepraat en het na metrorade as ‘n ‘monster’ verwys wat swak dienslewering aan die hand werk.
“Munisipale waardasies is chaoties. Eiendomsbelasting het in die laaste sewe jaar met 73% gestyg en elektrisiteit met 224%. Die stad is besig om ons mense uit hul huise te belas,” het mnr. Fourie gesê.
Die Wes-Kaapse regering in samewerking met die privaatsektor soek glo na maniere om 45 groenteboere te ondersteun, maar die boere bly skepties oor die belofte nadat die McCain-fabriek hul sluiting in George aangekondig het.
Philip Terblanche, voorsitter van die Outeniqua-boerevereniging, het aan Sake 24 gesê die sluiting van die groentefabriek in George gaan verskaffers van kunsmis, saad en vervoer raak, asook ongeveer 500 seisoenale werkers.
McCain sluit eerder die fabriek as om dit te verkoop omdat hy nie ‘n mededinger wil hê nie, sê boere.
Groenteboere wat aan die George-fabriek lewer, het gediversifiseer, maar hulle gaan die knyp voel. “As ons regering enigsins iets vir landbou voel, kan hulle regtigwaar kyk hoe McCain gehelp kan word deur minstens die invoer van bevrore groente te beperk, sê een vooraanstaande boer.
Mededinging van goedkoop ingevoerde bevrore groente, veral uit China, het oor die afgelope drie jaar toegeneem. Daar was ook ‘n skerp toename in die invoer van bevrore groente uit Wes-Europa.
“Wes-Europese boere kry landbou-subsidies en boonop is die klimaat vir die verbouing van groente, danksy die nodige konstante reënval, daar beter as in Suid-Afrika. Die meeste van ons produsente se groente, veral bone, word besproei wat gepaardgaande water- en elektrisiteitskoste meebring,” sê Louis Wolthers, besturende direkteur van McCain Foods SA.
Hy het gesê dat mededinging deur ingevoerde groente die rede is vir die sluiting van die fabriek. Gebiede in Limpopo en op die Hoëveld onder besproeiing voorsien voorts aan die behoefte.
Wolthers sê elektrisiteit is ‘n groot koste want die verkoelingsaanleg moet teen volle krag werk, al is dit nie vol nie. Vervoerkoste speel ook ‘n rol weens lang afstande tussen produsente en die George-verwerkingsaanleg.
