Wit bejaarde by pensioenuitkering verneder

Die Vryheidsfront Plus gaan ‘n klag by die Suid-Afrikaanse Menseregtekommissie (MRK) indien na die voorval waarin ‘n 84-jarige vrou van Newcastle, mev. Ria van Straaten, gedwing is om te sing voordat amptenare haar ouderdomspensioen aan haar uitbetaal het.

Die party eis ook die onmiddellike afdanking van al die personeel wat by die voorval betrokke was en dring daarop aan dat die betrokke persone deur die MRK beveel word om mev. Van Straaten te vergoed vir die trauma en vernedering wat sy deurgegaan het.

Adv. Anton Alberts, die VF Plus se woordvoerder oor maatskaplike aangeleenthede, sê mev. Van Straaten is steeds so getraumatiseerd en vernederd dat sy nie oor die voorval wil praat nie.

“Ons gaan ‘n klag by die Menseregtekommissie en die Staatsdienskommissie indien teen die personeel en bestuurder van die betrokke kantoor.

“Die Staatsdienskommissie moet dit ondersoek en ons dring daarop aan dat die skuldiges nooit weer in enige pos in die staatsdiens aangestel word nie.

“Dit is ‘n skande dat ‘n bejaarde vrou wat net haar pensioen wou gaan haal, so verneder is. Dit is ‘n bewys daarvan dat die regering net lippediens lewer wanneer dit by die gelyke behandeling van minderhede kom,” sê adv. Alberts.

Afrikaanse regter pleit vir Engels

‘n Afrikaanssprekende regter wil Engels as enigste hoftaal in Suid-Afrika hoor.

Regter Cynthia Pretorius, van die hooggeregshof in Pretoria, het gesê sy dink nie Afrikaans moet ‘n besondere plek hê nie.

“Ek dink die hoftaal moet Engels wees,” het sy gesê en bygevoeg dat die meeste hofgeskrifte in Engels is en die meeste mense Engels magtig is.

Pretorius hoop kennelik dat die Regterlike Dienskommissie (RDK) haar as een van drie kandidate vir die pos van adjunk-regter-president van Noord-Gauteng sal oorweeg as sy haarself teen Afrikaans uitspreek.

Madala Masuku, Mpumalanga se LUR vir finansies, het haar uitgevra oor ‘n versoek dat sy onttrek aan ‘n onlangse saak omdat sy Afrikaans is en aan die Universiteit van Pretoria gestudeer het.

“Ek dink nie die feit dat ek Afrikaanssprekend is, kan teen my gehou word nie. Dit is hoe ek gebore is. Ek dink nie dit kan teen my gehou word dat ek ‘n wit Afrikaanse vrou is nie,” het sy gesê.

Masuku het gevra hoe sy haar verbintenis tot Afrikaans gaan hanteer. Pretorius het dit baie duidelik gemaak dat sy ‘n hele minderheidsgemeenskap se reg om in hul taal verdedig te word, sal opoffer vir haar ambisie.

“Ek dink ‘n moeilike politieke besluit moet geneem word om Engels die hoftaal te maak,” het sy verklaar. Sy het ook gesê baie Afrikaanse mense hou nie van haar nie omdat sy “liberaal” is.

Regters Audrey Ledwaba en Lettie Molopa-Sethosa is saam met Pretorius kandidate vir die pos.

Pretorius se gunstige uitspraak in die dronkbestuursaak teen Robert McBride, het onlangs wenkbroue laat lig.

SA-wapensmous in SAR vasgekeer

Dit is onthul dat die Suid-Afrikaanse wapensmous Paramount die Sentraal-Afrikaanse Republikeinse hoofstad, Bangui, besoek het om ‘n wapentransaksie met François Bozizé op die vooraand van die staatsgreep te bespreek.

Paramount se werknemers, Miles Chambers en Clement Salanga, het in die land se hoofstad aangekom op Vrydag 22 Maart om die Fransman Emmanuel Rutman uit Parys te ontmoet, het timeslive.co.za berig.

Op 23 Maart, oppad om die president te ontmoet, is die Paramount-span egter naby Bozizé se paleis vir vyf uur lank aangehou.

Terwyl rebelle in ‘n geveg met Suid-Afrikaanse troepe op die buitewyke van die stad die middag gewikkel was, het Bozizé se soldate gevlug. Die Paramount-span het na ‘n diplomaat se huis gehardloop en weggekruip vir twee dae lank voordat hulle deur Franse troepe gered is en terug na Suid-Afrika gevlieg is in ‘n Paramount-jet.

“Ons het hul Suid-Afrikaanse paspoorte in die tuin weggesteek,” het die diplomaat gesê. “Ons was bang die Seleka ouens sou kom en ons doodmaak.”

Paramount behoort aan Ivor Ichikowitz, uitvoerende hoof, en hy is ‘n goeie vriend van die oud-NP-minister Pik Botha. Hy het sy fortuin gemaak daaruit om die vorige bedeling se weermagtoerusting in Afrika en die Midde-Ooste te gaan verkoop deur Botha se bemiddeling, het die M&G vroeër berig.

Dieselfde Ichikowitz is ook daarvoor verantwoordelik dat Suid-Afrikaanse verbruikers hopeloos te veel vir Apple-produkte betaal.

“Daar was geen [wapen]handelsooreenkoms nie. Daar was ‘n formele brief van uitnodiging van die president om ‘n aanbieding te maak, maar dit was so ver onder in die voedselketting, ek was nie eens daarvan bewus nie.” het Ichikowitz by navraag gesê.

Gerugte dat die Franse verantwoordelik was vir die snelle opmars van die Seleka-rebelle na die hoofstad Bangui, is intussen bevestig deur die militêre kenner Helmut Römer-Heitmann in sy boek The Battle of Bangui: The untold inside story.

Die VN se top-amptenaar in die Sentraal Afrikaanse Republiek sê sy is nie in ‘n posisie om te verduidelik watter rol Suid-Afrikaanse soldate in die land gespeel het nie.

Margaret Vogt sê sy kan ook nie lig werp op hoekom hulle in die kruisvuur beland het toe Seleka-rebelle verlede maand die hoofstad Bangui oorgeneem het nie. Sy het met joernaliste gepraat na ‘n geslote inligtingsessie van die VN Veiligheidsraad.

Sy sê sy kan nie bevestig hoeveel Suid-Afrikaners dood is nie. Volgens Vogt het sy nooit Suid-Afrikaanse soldate raakgeloop op besoeke aan die presidensiële paleis van die voormalige president Francois Bozize nie en daarmee gerugte dat Suid-Afrika die president opgepas het, die nek ingeslaan.

Vogt sê die veiligheid situasie in die SAR is baie gespanne, en die onttrekking van die Suid-Afrikaanse soldate los ‘n verdere leemte.

Dit sal waarskynlik verdere menseregteskendings – soos die werwing van kindersoldate deur die Seleka-rebelle – lei.

 

Twee van Misdaadintelligensie voor vir korrupsie

Twee polisiebeamptes wat daarvan beskuldig word dat hulle geld van misdaadintelligensie gesteel het, sal Donderdag in die Pretoria-landdroshof verskyn.

Maj.genl. Solly Lazarus, geskorste finansiële hoof van die misdaadintelligensie-eenheid, en kol. Hein Barnard, logistieke hoof, staan tereg op aanklagte van diefstal, bedrog en korrupsie van sowat R1,1 miljoen.

Hulle is verlede jaar Desember op borgtog van R10 000 elk vrygelaat, en is uit die polisie geskors.

“Die beskuldigdes het gedurende die periode van 2006 tot Desember 2011 naby Pretoria… verkeerdelik en wederegtelik, direk of indirek betalings ter waarde van R1 144 086 ontvang, of daartoe ingestem,” luidens die klagstaat, het City Press berig.

Pasgebore baba doodgeskop

‘n Pasgebore baba is in Mqanduli naby Mthatha doodgeskop, het die polisie in die Oos-Kaap Woensdag gesê.

Maj. Zamukulungisa Jozana, polisiewoordvoerder, het gesê ‘n vrou het Sondag na haar bure se huis gegaan toe sy begin kraam.

“Met haar aankoms by die bure se huis is die baba gebore.

“Kort daarna het die eienaar van die huis ingekom en die kind, wat in ‘n baadjie toegedraai was, begin skop. Die kind het onmiddellik gesterf.”

Volgens die polisie het die man weggehardloop toe hy besef die kind is dood. Die motief vir die voorval is nie bekend nie en niemand is in hegtenis geneem nie.

‘Die heks is dood’ topverkoper op Amazon

“Ding Dong! The Witch is Dead,” soos vertolk deur Judy Garland in The Wizard of Oz, was Dinsdag die gewildste liedjie op Amazon se aanlynverkope in Brittanje.

Dié lied het op topverkopers gehaal ‘n dag na die dood van die voormalige premier, Margaret Thatcher.

‘n Ander weergawe van die liedjie, gesing deur die jazz-legende Ella Fitzgerald, is die vierde meeste afgelaai, en is ook die meeste op iTunes in Brittanje afgelaai.

Dié lied word as ‘n draakstekery oor die afsterwe van die 87-jarige Thatcher gesien.

Thatcher, die eerste vroulike premier van Brittanje, wat destyds ‘n hoogs omstrede figuur was, is Maandag aan ‘n beroerte oorlede.

DA prys Hani se stryd teen apartheid

Chris Hani, die SAKP-leier, het gelewe en gesterf vir dit waarin hy glo, het die DA Woensdag gesê.

Mmusi Maimane, woordvoerder van die Demokratiese Alliansie, het by die 20ste herdenking van Hani se dood gesê hy was ‘n inspirerende persoon.

“Ongeag sy ideologiese neigings kan ons almal erken dat hy ‘n beginselvaste en vasbeslote leier was,” het Maimane gesê.

“Hy het geleef en gesterf vir dit waarin hy glo en het ‘n groot bydrae gemaak in die geveg teen apartheid. Hiervoor verdien hy om geprys te word.”

“Ons kan net hoop dat die volle waarheid oor sy sluipmoord uiteindelik sal uitkom in die belang van versoening,” het Maimane gesê.

Hani is op 10 April 1993 buite sy huis in Boksburg deur die Poolse immigrant Janusz Walus doodgeskiet met ‘n vuurwapen wat deur Clive Derby-Lewis verskaf is.

Die land kan dankbaarheid betoon deur ‘n verbintenis tot die gemeenskap, het pres. Jacob Zuma tydens ‘n kransleggingseremonie ter herdenking van Hani se dood by die Thomas Titus Nkobi-gedenkpark in Elspark, oos van Johannesburg, gesê.

“Ons moet vinnig werk om die soort samelewing te skep waarvoor kameraad Chris gelewe en gesterf het,” het Zuma gesê.

“Ons moet kameraad Chris se nagedagtenis herdenk deur ‘n beter lewe vir almal te skep, waarin hy geglo het.”

Zuma het gesê dis onmoontlik om in slegs 20 jaar algehele verandering te bring.

Die skade wat deur apartheid veroorsaak is, sal nog lank in die land sigbaar wees, het hy gesê.

“Ek dink dis ‘n fout om te sê ons kan nie apartheid blameer vir wat nou in die land gebeur nie, om die minste te sê.

“Ons hoef nie te sê presies wat apartheid gedoen het nie. Die feit is die land is twee in een; jy gaan na enige stad en daar is ‘n pragtige deel, en plakkers aan die ander kant. Dit is nie die begin van ‘n demokrasie nie, en ons kan nie ophou om die mense wat dit veroorsaak het, te blameer nie,” het Zuma gesê.

Afrikaans verloor ‘n groot gees

Die SA Akademie vir Wetenskap en Kuns se Taalkommissie onder leiding van Tom McLachlan het hulde gebring aan een van Afrikaans se groot taalkundiges, die bekende prof. F.F. Odendal, wat op Saterdag 6 April in Kaapstad oorlede is.

Baie mense sal die naam F.F. Odendal herken omdat dit al so lank prominent op die omslag van die wyd gebruikte Verklarende handwoordeboek van die Afrikaanse taal, ofte wel die HAT, pryk. Hy was trouens van 1971 tot 2005 die hoofredakteur van hierdie gewilde Afrikaanse handwoordeboek.

Prof. Odendal was egter nie net ‘n leksikograaf van formaat nie. Hy was ook dekades lank lid, en later voorsitter, van die Taalkommissie, die liggaam wat verantwoordelik is vir die opstel van die Afrikaanse woordelys en spelreëls. In 1984 het die Taalkommissie onder sy voorsitterskap ook die vertalende Lys klassieke eiename gepubliseer.

Honderde studente van die destydse Randse Afrikaanse Universiteit sal hom ook onthou as uitnemende dosent. Hy was trouens die eerste hoogleraar in Afrikaanse taalkunde aan die RAU.

Hy het ook 25 jaar lank gedien in die destydse komitee vir taaladvies van die SAUK, waar hy ‘n onmisbare bydrae gelewer het, onder meer tot nuutskepping.

Sy nalatenskap op soveel terreine van die Afrikaanse taalkunde is enorm, en die Taalkommissie eer sy nagedagtenis en sy nalatenskap.

Afrikaans het ‘n groot gees verloor, het voorsitter McLachlan gesê.

Swart aanbieder sê AWB-klag is nie aandagsoekery nie

‘n Politieke ontleder het haar humeur verloor nadat sy beskuldig is daarvan dat sy ‘n insident met die AWB vir ‘n publisiteitsfoefie wil gebruik.

Liepollo Pheko het ‘n klag van intimidasie gelê, ‘n hele drie jaar na ‘n onderonsie in ‘n televisie-ateljee, het eNCA Dinsdag berig.

In April 2010 Pheko en die Afrikaner Weerstandsbeweging se sekretaris-generaal Andre Visagie ‘n debat oor rasseverhoudinge in post-apartheid Suid-Afrika gehou op die stel van Africa 360.

Visagie het sy humeur verloor omdat sy hom nie wou laat praat nie, sy mikrofoon uitgeruk en van die stel af gestorm. Hy het omgedraai, na haar gestap en gesê: “… en jy sal nie waag, sal jy nie waag om my te onderbreek nie… “.

Aanbieder Chris Maroleng het ingegryp, waartydens hy die nou beroemde brabbelsin “do not touch me on my studio” geuiter het. Dié sin het tot ‘n spottery gelei.

Visagie het aan Pheko gesê: “Ek is nie klaar met jou nie.” Pheko het gesê dat sy die aanklag uit beginsel gelê het.

“Die drie jaar vir my is byna onbelangrik. Dit is die beginsel.” Sy dit doen vir haar kinders, het sy bygevoeg.

Sy het ontsteld geraak toe sy gevra word of sy besig is om publisiteit te soek vir haar “platform” op die Gauteng radiostasie Power FM.

“Hoekom op aarde sou ek iets so pynlik as ‘n goedkoop publisiteitsfoefie doen? … Dit het niks te doen met Power FM nie.”

Hou Hani se weduwee Mbeki verantwoordelik?

Die weduwee van die vermoorde Chris Hani, Limpho Hani, sê twintig jaar na die sluipmoordaanval op haar man, is sy nog steeds op soek na die waarheid sodat sy berusting kan kry.

Hani wat ten tye van sy dood die sekretaris-generaal van die ANC was, is in 1993 voor sy huis doodgeskiet. ‘n Poolse immigrant, Januz Waluz en ‘n parlementslid vir die Konserwatiewe Party, Clive Derby-Lewis, dien lewenslange tronkstraf vir die moord uit.

Derby-Lewis het reeds om verskoning gevra aan Hani se weduwee en weer vir mediese parool aansoek gedoen. Dit is onlangs geweier.

Limpho Hani sê getuienis voor die Waarheid- en Versoeningskommissie dui daarop dat meer mense by Hani se dood betrokke was.

Sy sê sy kan nie die moordenaars vergewe voordat hulle nie die volle waarheid bekendmaak nie.

In die hitte van die stryd tussen Mbeki en Jacob Zuma in 2007, is ‘n lied by SAKP-konferensies gesing wat soos ‘n veldbrand in die Zuma-kamp versprei het. “Thabo Mbeki siyabuza ubani owabulala uChris Hani Simthanda”, wat beteken “Thabo Mbeki, vertel ons wie Chris Hani vermoor het”.

Afleidings dat die voormalige president het iets te doen gehad het met die moord of kennis oor die voorval dra, wat hy nie deel nie, is gemaak.

In die 2009-verkiesingsveldtog, het die SAKP T-hemde gedruk om lede vir die ANC te werf, wat verkondig “Doen dit vir Chris”. Dit was ‘n baie gesogte item onder lede.

Die SAKP hou egter niks daarvan dat Hani se dood deur ander gebruik word nie, soos byvoorbeeld die ANC-jeugliga, wat Hani se naam en beeld gebruik het om hul eie agenda te bevorder.

Geskorsde ANC-jeugliga president Julius Malema het graag T-hemde aangetrek met Hani as ‘n verklaring van die militantheid en as ‘n subliminale boodskap teen die huidige ANC-en SAKP-leierskap.

Malema se keuse het doelbewus ‘n korrelasie tussen sy eie dissiplinêre probleme en Hani se legendariese gevegte met die ANC-leierskap in ballingskap probeer skep.