Die Suid-Afrikaanse inkomstedienskommisaris Pravin Gordhan kan dalk moontlik ekspolisiehoof Jackie Selebi voor die einde van Junie vervang.
Dit is nou as binnegevegte in die ANC oor die vervanging nie sy kanse bederf nie.
Gordhan word ook skynbaar oorweeg as die volgende minister van Veiligheid en Sekuriteit in 'n Zumakabinet.
Gerugte het verlede Desember begin toe die sakemagnaat Johann Rupert die man wat die inkomstediens in 'n geoliede organisasie omskep het, voorgestel het.
Gordhan het 'n geskiedenis van noue bande met die Zuma-faksie, die Operasie Vula-netwerk, wat Zuma se leierskapsaanspraak ondersteun
Twee mense van 'n kerkgroep is dood in die Drakensberg naby Witsieshoek oor die naweek. Die groep het na Mont-aux-Sources vertrek op Werkersdag vir 'n bidsessie op die berg.
Volgens 'n polisiewoordvoerder word vier mense steeds in die Phuthaditjhabahospitaal behandel. Die groep het uit nege individue bestaan, almal lede van die Universal Church in Phuthaditjhaba.
Die jong mans en vroue by die geestelike byeenkoms was tussen 17 en 22 jaar oud. Dit is nie duidelik wanneer presies die twee mense oorlede is nie, maar volgens 'n veiligheidswag by die parkeerterrein, het hulle buite geslaap.
Die jong pastoor wat die groep gelei het, het die beproewing oorleef.
Die Zimbabwiese opposisieparty, die Beweging vir Demokratiese Verandering, kon nie oor die naweek besluit of hy aan die tweede ronde van die presidentsverkiesing in dié land gaan deelneem of nie. In die party se binnekringe heers intense verdeeldheid oor die kwessie.
Boonop bevind sy leier, Morgan Tsvangirai, hom tans buite Zimbabwe uit vrese vir sy veiligheid. Gerugte dat lede van die weermag Tsvangirai en ander MDC-leiers met skerpskutters sou teiken, is ook in omloop.
In die eerste ronde van die presidentsverkiesing het Tsvangirai 47,9% van die stemme op hom verenig, net meer as twee persent onder die 50% wat nodig is vir 'n algehele meerderheid. Volgens die opposisieleier is hy deur stembedrog van 'n meerderheid beroof, maar intussen gaan die verkiesingskommissie voort met 'n uitklopverkiesing om die presidentskap waarin president Robett Mugabe weereens kandidaat sal wees.
Die programmatuurreus van Seattle het drie maande gelede vir Yahoo! begin bie deur $31 per aandeel aan te bied. Die huidige aanbod is $33 per aandeel, maar Yahoo! verlang $37.
Volgens Steve Ballmer, die hoofuitvoerendebeampte van Microsoft, maak die ekonomie van Yahoo! se eise nie sin nie en daarom is dit in die beste belang van aandeelhouers en werknemers om die aanbod terug te trek.
Volgens ontleders het Yahoo! sy hand oorspeel en kan die aandeelprys vandag met tot 30% daal. Vrydag het dit nog 7% gestyg in die hoop dat 'n ooreenkoms tussen Microsoft en Yahoo! bereik sou word.
In Turkye, die Filippyne en Indonesië het werkers byeengekom om te protesteer teen skerpstygende voedselpryse op Werkersdag wat wêreldwyd gevier is. Die groeiende aanvraag na rys, die stapelvoedsel van Asië, het heelwat regerings bekommerd.
Die byeenkomste is deur ‘n aansienlike polisieteenwoordigheid gekenmerk. In Jakarta is 10 000 polisiebeamptes ontplooi en 50 000 is op gereedheidsgrondslag ontbied om regeringsgeboue te bewaak.
Betogings is ook in Tokio, Singapoer en Bangkok gehou. Die Asiese Ontwikkelingsbank sê dat meer as een miljard mense in Asië nou ernstig geraak word deur hemelhoë voedselpryse.
Die Suid-Afrikaanse departement van Binnelandse Sake bly onwrikbaar: Geen vingerafdrukke, geen identiteitsdokument.
Die wet, glo die departement, vereis dat vingerafdrukke aan die owerhede gelewer moet word en geen verskoning sal aanvaar word nie.
Menseregteaktiviste is ontsteld oor die aangeleentheid. Suid-Afrika het in die verlede dikwels onder kritiek moes deurloop omdat daar nie behoorlik na gestremdes omgesien word nie.
Die president van die ANC, Jacob Zuma, sê dat grondhervorming vinniger moet plaasvind. Zuma het gister by ‘n Werkersdagbyeenkoms op Klerksdorp ‘n vurige toespraak gemaak waarin hy gekla het dat veral vroue op die platteland teen ‘n hongerloon moet werk.
Volgens hom het die ANC tydens sy Pietersburgkonferensie besluit dat alle ANC-takke met die regering sal saamwerk om die regte van plaaswerkers en -bewoners te bevorder.
Hy het ook beklemtoon dat die teiken vir grondhervorming behaal moet word. Hiervolgens moet dertig persent van alle landbougrond teen 2014 aan swartes oorgedra word om bestaansboerdery en voedselsekuriteit te verseker.
Zuma het verder na die energiekrisis verwys en gemeen dit moet as ‘n geleentheid en nie as ‘n terugslag beskou word nie. Dis ‘n geleentheid vir die land om elektrisiteit op ‘n meer kostedoeltreffende manier te gebruik.
Die departement van landbou in die Limpopoprovinsie het blykbaar R300 miljoen uitgegee op besproeiingskemas met slegs ‘n tweepersentsuksessyfer.
Nou word ‘n forensiese oudit aangevra. Volgens mnr. Rudolph Phala, die ANC-voorsitter van die provinsie se staande komitee oor openbare rekeninge, oftewel Skoor, moet ons weet waarom miljoene rande vermors is op goed wat nie werk nie.
Blykbaar het hoëvlak-amptenare in die landboudepartement bande met die maatskappye wat die tenders ontvang het om die besproeiingstoerusting te verskaf en te installeer.
Mnr. Dries Joubert, president van die landbou-unie, TLU SA Noord, sê dat die belastingbetaler se geld gemors word.
Eskom gaan vanaf Maandag 5 Mei sy beurtkragbeleid opskort. Hierdie aankondiging is gister deur die nutsmaatskappy se hoofuitvoerendebeampte, Jacob Maroga, gemaak.
Volgens hom is daar getuienis van toenemende energiebesparing deur munisipaliteite en daarom is Eskom optimisties dat ‘n verdere afname in kragverbruik hom in staat sal stel om die 10%-besparingsteiken te bereik.
Geskeduleerde kragonderbrekings is vandeesweek opgeskort vanweë die aantal vakansiedae en die laer vraag wat gewoonlik gedurende sulke tye ervaar word.
Eskom gaan aanstaande week met senior beamptes van munisipaliteite vergader ten einde verdere energiebesparing te bespreek.
David Blaine, ‘n kulkunstenaar wat ‘n wêreldrekord wou breek, het Woensdag daarin geslaag. Hy het sy asem vir ‘n hele 17 minute en 4 sekondes opgehou.
Die vorige rekord was 16 minute en 32 sekondes.
Blaine het suiwer suurstof ingeasem voordat hy in die sfeer wat met water gevul was, ingegaan het.
