Mandela se dogter vaar uit teen die rassistiese buitelandse media

Oudpres. Nelson Mandela se dogter, Makaziwe Mandela, het in ‘n televisie-onderhoud met die SABC se Vuyo Mvoko gesê daar is ‘n rassistiese element teenwoordig by die buitelandse media.

Sy het ook uitgevaar teen die media, en gesê hulle teenwoordigheid en verslagdoening toon dat hulle nie die Mandela-gesin respekteer nie.

Sy het gesê wanneer die gesin by die hospitaal aankom, maak hulle geen moeite om aan hulle voorkeurbehandeling te gee nie.

“Weet jy, ek wil dit nie sê nie, maar ek gaan dit sê. Daar is soort van ‘n rassistiese element met baie van die buitelandse media, waar hulle net grense oorsteek. Jy het geen idee wat gebeur by die hospitaal nie. Hulle staan net daar in die middel van die straat in Parkstraat – jy kan nie in of uit by die hospitaal nie… hulle is werklik soos aasvoëls.”

Makaziwe het ook gesê die media respekteer nie Mandela se privaatheid nie en vra te veel indringende vrae oor sy toestand. Sy sê hulle sou dit nooit vir Margaret Thatcher of Ronald Reagan gedoen het nie.

Sy het aan Mvoko gesê wat aangaan by die graf en wat in Qunu bespreek is, het niks met die media uit te waai nie en dit is privaat.

“Die feit dat my pa ‘n wêreldwye ikoon is, een van die 25 invloedrykste mense van die 21ste eeu… dit beteken nie mense hoef nie sy privaatheid en waardigheid respekteer nie,” het sy gesê.

Familielede van Mandela is vroeër glo ontbied na die hospitaal in Pretoria waar hy behandel word.

“Dis veilig om te sê, ja, Tata se toestand is kritiek,” het sy gesê.

“Hy lyk nie goed nie, Vuyo, ek gaan nie jok nie.”

Sy het gesê Mandela reageer nog op sy kinders se aanraking. Hy maak soms sy oë oop as hulle by hom is, het sy gesê.

“Vir ons, as sy kinders, solank as wat hy reageer wanneer ons aan hom raak, gee dit ons hoop.”

Makaziwe het ook uitgevaar teen partye wat Mandela se beeld probeer kaap, alhoewel sy nie die DA by name genoem het nie. Sy het gesê Mandela sou nooit enige ander party as die ANC ondersteun het nie

Die DA-woordvoerder Mmusi Maimane het ‘n ruiker en blomme by die hospitaal se ingang gelê. Vroeër het die ANC ondersteuners ingebus en T-hemde met Zuma se gesig voor die hospitaal uitgedeel.

Maimane het gesê hy wil sy dankbaarheid duidelik maak vir wat Mandela gedoen het, en vir die mediese span wat hom versorg.

“Nelson Mandela is nie net die voormalige president, die bevryder nie. Daar is ‘n oorweldigende gevoel in die land wanneer almal van ons dink aan wat hier gebeur.

Zuma sal Mandela wéér besoek

Pres. Jacob Zuma sal Vrydag glo weer vir die derde keer in drie dae besoek bring aan oudpres. Nelson Mandela, het Eyewitness News berig.

Madiba se toestand is steeds kritiek, maar stabiel, het die presidensie Donderdagmiddag in ‘n verklaring gesê.

“Pres. Jacob Zuma het oudpresident Nelson Mandela vandag, 27 Junie, in die hospitaal in Pretoria besoek, en die mediese span het hom ingelig dat Madiba se toestand gedurende die nag verbeter het.

“Sy toestand is steeds kritiek, maar is tans stabiel,” het die jongste verklaring oor Mandela se toestand gelui.

Volgens Zuma het Mandela baie beter gelyk gister as toe hy hom die vorige aand gesien het.

Mandela lyk beter sê Zuma

Oudpres. Nelson Mandela se toestand het verbeter, het die presidensie Donderdag gesê.

“Pres. Jacob Zuma het oudpresident Nelson Mandela vandag, 27 Junie, in die hospitaal in Pretoria besoek, en is deur die mediese span ingelig dat Madiba se toestand deur die nag verbeter het.

“Sy toestand is steeds kritiek, maar is nou stabiel,” het ‘n verklaring deur die presidensie gelui.

Zuma het bygevoeg: “Ek het my besoek na Mosambiek vadag gekanselleer sodat ek hom kan sien en met die dokters kan praat. Hy is vandag baie beter as toe ek hom gisteraand gesien het.”

Dié uitlating was in skrille kontras met die woorde van Mandela se dogter, Makaziwe, wat Donderdag in ‘n televisie-onderhoud met die SABC se Vuyo Mvoko gesê haar pa “lyk nie goed nie”.

“Dis veilig om te sê, ja, Tata se toestand is kritiek,” het sy gesê.

“Hy lyk nie goed nie, Vuyo, ek gaan nie jok nie.”

Sy het gesê Mandela reageer nog op sy kinders se aanraking. Hy maak soms sy oë oop as hulle by hom is, het sy gesê.

“Vir ons, as sy kinders, solank as wat hy reageer wanneer ons aan hom raak, gee dit ons hoop.”

Pres. Barack Obama het oudpres. Nelson Mandela Donderdag tydens ‘n toespraak in Dakar, Senegal as ‘n “held vir die wêreld” beskryf.

Die Amerikaanse president het bygevoeg dat Mandela se nalatenskap deur die eeue sal voortleef.

“Hy is ‘n persoonlike held. Ek dink hy is ‘n held vir die wêreld,” het Obama in Dakar, Senegal gesê.

“Een ding wat ek weet is sy nalatenskap sal voortleef deur die eeue.”

Obama is tans op ‘n week lange besoek aan Afrika. Hy sal Vrydag in Suid-Afrika aankom.

Mandela kritiek, toestand versleg

Oud-president Nelson Mandela se oudste dogter, Makaziwe Mandela sê haar pa se toestand is kritiek.

Sy is deel van ‘n groot groep familielede wat by die Mediclinic Hart-hospitaal in Pretoria is waar die 94-jarige staatsman behandel word. Talle van sy kleinkinders en agterkleinkinders het ‘n rukkie gelede by die hospitaal uitgekom en die blomme en kaartjies wat deur die publiek gelaat is, opgetel en in hul motors gaan bêre.

Hulle het die publiek bedank vir die steun en aanmoediging en is daarna weer die hospitaal binne. Intussen kom al meer mense by die hospitaal aan om blomme te bring, te sing en te bid.

Boodskappe word ook geskryf op die muur by die ingang na die hospitaal. President Jacob Zuma het vroeër sy besoek aan Mosambiek afgestel weens Madiba se verslegtende toestand.

Rooi tapyt vir Obama

Suid-Afrika is gereed om die VSA se Nommer Een en sy gesin te ontvang.

Barack Obama sal in Suid-Afrika aankom en President Jacob Zuma die volgende dag ontmoet.

‘n Woordvoerder van die polisie brig. Sally de Beer het gesê dat indien paaie gesluit word, die publiek gewaarsku sal word.

“Ons sal ‘n aankondiging maak nader aan die tyd. Maar ons sal beslis probeer om alles te doen op ‘n manier wat sal veroorsaak dat daar so min ongerief as moontlik is,” sê De Beer.

Sy het gesê die polisie werk saam met Obama se sekuriteitsmense.

Gister het die Universiteit van Johannesburg berigte in die media reggestel wat aangedui het dat Obama ‘n eredoktersgraad sal ontvang.

“Die toekenning van ‘n eregraad aan President Obama nie sal plaasvind tydens Saterdag se byeenkoms nie en dit is nie op die program nie,” het die universiteit gesê.

Sommige van die universiteit se studente is van plan om te betoog teen Obama se besoek aan die Soweto-kampus van die Universiteit.

‘n Moslem-organisasie het die Amerikaanse president van “misdade teen die mensdom” beskuldig.

Sondag, sal die Obamas die Kaapstadse been van hul besoek begin deur te reis na Robbeneiland.

Dit is berig dat die voormalige Robbeneiland-gevange en ANC-veteraan Ahmed Kathrada Obama en sy gesin sal neem op ‘n toer van die gevangenis.

Maar die Ahmed Kathrada-stigting het gesê hulle is nie bewus hiervan nie.

Obama sal afgetrede Anglikaanse aartsbiskop Desmond Tutu ontmoet.

Hy sal die Masiphumeleleterrein teen MIV-Vigs, in Noordhoek, Kaapstad besoek.

Obama sal praat by die Universiteit van Kaapstad teen omstreeks 18:00 op Sondag.

Dit sal “sy hooftoespraak van die reis wees oor ons Afrika-beleid,” sê Ben Rhodes, Obama se adjunk-nasionale veiligheidsadviseur.

Lasbriewe vir Obama se inhegtenisname aangevra

Twee Suid-Afrikaanse groepe het Woensdag probeer om lasbriewe vir die inhegtenisneming van pres. Barack Obama, wat later die week die land besoek, te verkry.

Mohamed Hussain Vawda, van die Vereniging vir die Beskerming van ons Grondwet, voer aan dat Obama skuldig is aan misdade teen die mensdom.

Vawda het in ‘n beëdigde verklaring wat deur die Barberton-polisie gestempel is, gesê dat Obama direk en indirek verantwoordelik is vir die dood van meer as 3 000 mense, insluitend vroue en kinders, in lande wat “‘n bedreiging vir die VSA” is.

Hy het ook gevra dat Obama vervolg moet word weens die Amerikaanse regering se beleid oor onbemande tuie.

“Hierdie aanvalle is nie deur ‘n hof gemagtig nie,” het hy gesê.

“Daar is geen geregtelike oorsig om vas te stel of die mense inderdaad skuldig is aan enige misdade nie. Hulle word van ‘n verhoor ontneem.”

Vawda het gesê die meeste van dié slagoffers is Moslems.

Hy het nog nie ‘n reaksie van die nasionale vervolgingsgesag (NPA) ontvang nie.

Intussen het die Moslem Prokureursvereniging (MLA) ‘n dringende aansoek by die hooggeregshof in Pretoria vir Obama se inhegtenisneming ingedien.

Eyewitness News het berig dat die hof die MLA se aansoek verwerp het, omdat die saak nie werklik dringend is nie.

Die hof het nie oor die meriete van die saak ‘n uitspraak gelewer nie.

Obama sal Pretoria, Johannesburg en Kaapstad besoek. Hy sal na verwagting Vrydag in die land aankom.

Ban Ki-moon: Wêreld bid vir Mandela

Ban Ki-moon, sekretaris-generaal van die VN, het Woensdag gesê die wêreld bid vir Nelson Mandela terwyl hy om sy lewe veg.

Ban het Mandela “een van die reuse van die 20ste eeu” genoem by ‘n dinee in New York vir die 50ste herdenking van die sameroeping van die Organisasie vir Afrika-eenheid, wat ook ‘n rol in die stryd teen apartheid gespeel het.

“Ek weet ons gedagtes en gebede is met Nelson Mandela, sy familie en geliefdes [en] alle Suid-Afrikaners en mense oor die wêreld heen wat geïnspireer is deur sy merkwaardige lewe en voorbeeld,” het Ban gesê.

“Laat ons vandag almal dieselfde sin van doelgerigtheid hê terwyl ons werk om die welstand en geleenthede van alle Afrikane te verbeter,” het die sekretaris-generaal gesê.

Lewensondersteuningsmasjiene word gebruik om Mandela, 94, te help om asem te haal.

Swart jeug steun Malema

Een uit elke vier jong Suid-Afrikaners sal vir Julius Malema stem, die geskorste leier van die ANC-jeugliga, het ‘n opname Woensdag bevind.

“Dit is duidelik dat ‘n beduidende aantal jongmense ontevrede is met die ANC en na Julius Malema sal draai as ‘n alternatief indien hy ‘n nuwe politieke party sou stig,” het Shirley Wakefield van die navorsingsmaatskappy Pondering Panda gesê.

Altesaam 3 585 mense tussen die ouderdom van 18 en 34 het aan die opname deelgeneem.

Altesaam 35% van respondente het gesê hulle sal vir die ANC stem; 26% het gesê hulle sal vir Malema se party stem en 15% het gesê hulle sal vir die DA stem.

Altesaam 14% het egter gesê hulle sal nie stem nie, terwyl 6% vir ‘n ander party sal stem.

Sowat 35% van die mans wat aan die opname deelgeneem het, het gesê hulle sal vir Malema stem, terwyl net 18% van vroue gesê het hulle sal.

Die meeste van Malema se ondersteuning kom van jong swartes.

In ‘n aparte opname is die jeug gevra of hulle dink dit is ‘n goeie idee vir Malema om ‘n politieke party te stig.

Altesaam 40% het gesê hulle dink dit is ‘n goeie idee.

Respondente glo Malema sal meer doen om arm mense te help.

“Dit is treffend dat die mense wat Malema ondersteun voel hy sal meer regverdig as die ANC vir die mense van Suid-Afrika optree,” het Wakefield gesê.

Malema het vroeër die maand sy nuwe politieke platform, die Economic Freedom Fighters, bekend gestel.

Mandela aan ondersteuningsmasjiene gekoppel

Oudpres. Nelson Mandela word glo dmv ondersteuningsmasjiene aan die lewe gehou, het die The Citizen Woensdag berig. Sy familie is glo die keuse gegee om die masjiene te laat afskakel.

Dié berigte kon nie die deur familielede of die presidensie bevestig word nie.

Die laaste amptelike verklaring oor Mandela se toestand is Dinsdagmiddag uitgereik wat Mandela se toestand as “onveranderd” beskryf het. Dit volg op ‘n verklaring vroeër wat die voormalige staatshoof se toestand as kritiek bestempel het.

The Citizen het met “vyf hooggeplaaste bronne na aan die familie gepraat,” en hulle het bevestig dat Mandela “asem haal met die hulp van ‘n lewensondersteuning-ventilator”. Twee van dié bronne, wie se identiteit nie onthul is nie, het hom kort gelede in die hospitaal besoek.

Die voormalige president ondergaan glo ook dialise, weens sy nierversaking.

“Hy is op ‘n lewensondersteunende-ventileerder en sy nierfunksie is baie swak. Hy is in ‘n kritieke toestand, maar ‘n hele span dokters, wat ‘n hartspesialis, longspesialis, nierspesialis en ‘n hoofkonsultant insluit, versorg hom,” het die bron aan The Citizen gesê.

 

Zuma kanselleer Mosambiek-besoek

Pres. Jacob Zuma het sy beplande besoek aan Mosambiek gekanselleer, het die presidensie Woensdag gesê.

Zuma het oudpres. Nelson Mandela Woensdag omstreeks 22:00 in die hospitaal in Pretoria besoek waar hy behandel word, en het by monde van sy woordvoerder, Mac Maharaj, gesê sy toestand is steeds kritiek.

“Pres. Zuma is deur dokters ingelig en hulle doen steeds alles wat hulle kan om sy [Mandela se] welstand te verseker.

“Pres. Zuma het besluit om sy besoek aan Maputo, Mosambiek vir môre, 27 Junie, te kanselleer, waar hy ‘n beraad van die Suider-Afrikaanse Ontwikkelingsgemeenskap oor streeks-infrastruktuurbeleggings moes bywoon.”

Mandela, 94, is op 8 Junie in die Mediclinic-harthospitaal in Pretoria opgeneem.