{jathumbnail off}
Skrywer: Dan Roodt
Afrikanerorganisasies
Daar word deesdae heelwat debatte gevoer oor die verskeie Afrikanerorganisasies en die sake waarmee hulle hulself besig hou. Heelwat kritiek word ook gelewer teenoor die organisasies en ek dink dit is tyd dat dinge in perspektief gestel word.
‘n Organisasie is soos ‘n stuk gereedskap. Hy word geskep vir ‘n sekere doel, en verrig dan ‘n take om daardie doel te bereik. Geen bestaande groot organisasie gaan die ‘draad en tang’ oplossing vir al die Afrikaner se probleme wees nie.
Solidariteit doen baie goeie werk vir ons Afrikaners. Hulle is ‘n vakbond, en staan hulle lede by deur die werkgewers hof toe te sleep as hulle onregverdig optree. Dit is ‘n baie belangrike funksie, en bitter nodig vir ‘n minderheidsgroep soos die Afrikaner. Hulle gee hulp aan arm en werklose Afrikaners wat ook uitstekend is, asook opleiding ens.
Afriforum is ‘n inisiatief van Solidariteit om die minderheids en siviele regte van die Afrikaner te beskerm ens. Ek sien dit as hulle uitreiking na die Afrikaners wat nie aan ‘n vakbond behoort nie.
Die Vryheidsfront+ verteenwoordig die Afrikaner op plaaslike en nasionale regeringsvlakke. Dit is ‘n baie belangrike taak wat hulle verrig. Indien hulle nie daar was nie, sou dit baie slegter met ons gegaan het as wat dit nou gaan.
Die Landbou Unie staan boere by met grondeise, beveiliging en onderhandel vir hulp in tye van droogte en rampe ens.
Al die bogenoemde (en ander) organisasies is daarop gefokus om die Afrikaner se regte binne die verband van die Nuwe Suid-Afrika te beskerm. Dit het egter nodig geword vir die Afrikaner om sy voortbestaan te verseker deur buite die verband van die NSA sy eie grondgebied af te baken en te beset.
Nadat ek mooi daaroor gaan dink het, het ek besef dat nie een van die huidige groot Afrikanerorganisasies hulle werk nou kan neersit en begin fokus op die nuwe grondgebied en volkstaat nie. Die voltydse werk wat hulle doen is te belangrik om tersyde te stel. Hulle funksie is om vandag te doen wat hulle kan vir die Afrikaner. Hulle is ook nie gerat om die Afrikaner na die volgende vlak te neem nie.
Dit is egter waar die VVK inkom. Dit is ‘n nuwe organisasie met ‘n nuwe doel wat nou op die regte tyd geskep is en die ondersteuning van die volk geniet. Die Volksraad is (hopelik) die begin van die Afrikanerowerheid wat nodig is om namens die Afrikaner op ‘n Internasionale vlak te beding. Dit is die demokraties verkiesde leiers wat ons volk uit Egipte (NSA) moet lei na die beloofde land (Volkstaat).
Daarom kan julle maar gerus die Afrikanerorganisasies ondersteun. Hulle hou baie Afrikanergesinne aan die lewe, beskerm hulle grond en sit brieke aan die buite-beheer soustrein wat op die afgrond afpyl. Hulle kan egter nie ons hoofprobleem oplos nie, en daarom moet ons almal die VVK ondersteun. Die VVK is geskep vir die doel om ons eie grondgebied ‘n werklikheid te maak.
Die hoender of die eier oor dienslewering
Wanneer blaam vir brouwerk uitgedeel word, word die skuld dikwels op vreemde plekke gepak.
Die regering se jongste juweeltjie is om die skuld vir gebrekkige dienslewering op die sowat 180 belastingbetalersverenigings landswyd te pak. Omdat hierdie verenigings se lede hul dienstegeld in trustrekenings inbetaal, argumenteer die minister van samewerkende regering, is daar nie geld om dienslewering mee te verrig nie.
Minister Sicelo Shiceka speel oudergewoonte die rassekaart deur wit landsburgers uit te sonder.
Nie lank gelede nie het Shiceka se regering aangekondig dat beoog word om van die stelsel van uitvoerende burgemeesters ontslae te raak omdat misbruike in hierdie stelsel tot die probleme lei wat nou op die belastingbetalersverenigings gepak word.
Die minister versuim om te meld dat die dorpe waar belastingbetalersverenigings aktief is, voor die trustrekeningsstelsel ook weens geldtekorte min of geen dienste gelewer het nie. ‘n Deel van die probleem was dat selfs piepklein munisipaliteite in die Karoo nie geld vir dienslewering gehad het nie, maar dat raadslede op strepe amptelike besoeke oorsee gaan bring het.
‘n Ellelange lys van vreemdhede wat tot geldtekorte gelei het, kan opgestel word. Die Sol Plaatjie-munisipalietit wat jaar op jaar teenspoed by die Ouditeur-generaal gekry het, het byvoorbeeld ‘n afgedankte amptenaar van die Ontvanger as finansiële hoof aangestel. Talle munisipale bestuurders wat vir ongerymdhede ondersoek is, is voor die afhandeling van die verhore by ander munisipaliteite aangestel. Die oorspronklike munisipaliteit skort dan die ondersoek op. Wanneer die aanstelling bevraagteken word, word skynheilig genoem daar is geen ondersoek nie, sonder om te vermeld hoekom en wanneer daardie ondersoek opgeskort is.
Onder die vuurwaens wat aangeskaf is, tel talle wat ingeboude drankkabinette het, maar ander lawwighede soos ‘n satelliet-navigasiestelsel en selfs koeëlvaste motors. In minstens een geval is ‘n ampsmotor vir ‘n onderburgemeester gehuur terwyl hy steeds sy vervoertoelaag gekry het, en dit is nie eens ‘n ANC-beheerde munisipaliteit nie.
Boonop word die trustrekening eers ingespan wanneer samesprekings misluk het, en ‘n dispuut behoorlik verklaar is. In verskeie gevalle is die dispute verklaar nadat die munisipale rade volstrek geweier het om samesprekings met die belastingbetalersverenigings te voer.
In verskeie dorpe was daar voor die dispuutverlaring geen munisipale dienste nie, maar daarna wel deurdat die belastingbetalersverenigings die fondse doeltreffend vir dienslewering aanwend.
Die minister hoef bloot na die OG se verslae te gaan kyk, en hy sal gou merk dat die oorgrote aantal munisipaliteite, met of sonder aktiewe belastingbetalersverenigings, onverbiddelik die kreeftegang gaan. Selfs sommige provinsiale hoofstede is erg in die knyp, en in die geval van Mangaung wat Bloemfontein bestuur, is daar geen belastingbetalersvereniging wat die blaam kan kry nie.
Deur die skuld te verplaas na waar dit nie is nie, los niks op nie. Voor die algemene verkiesing het mnr. Ace Magashule, toe aangewese Vrystaatse premier, by ‘n SALGA-kongres gesê onbekwame en korrupte burgemeesters en raadslede gaan afgedank word. Hy is toe uitgelag.
Dié gelag, so klink dit, duur voort.
Rassediskriminasie teister SA
“Dit lyk of rassediskriminasie soos nou deur die regering en sy agentskappe toegepas word, selfs verder strek as tydens apartheidsera, en geen poging om dit te probeer regverdig soos om ongelykhede van die verlede uit te wis is aanvaarbaar vir die volharding daarmee nie. Dit is tyd vir regstellende aksie om die trekpas te kry,” sê ds. Theunis Botha, leier van die Christen-demokratiese party (CDP) en waarnemende voorsitter van die Christen-Demokratiese Alliansie (CDA).
Botha het gereageer op die nuus dat die SAPD gaan appelleer teen ‘n bevinding van die Arbeidshof oor kapt. Renate Barnard. Dié hof het bevind die weerhouding van haar bevordering het op onbillike rassediskriminasie neergekom.
“Die voortgesette onvoldoende vertoning van die SAPD in sy poging om ‘n doeltreffende misdaadbekampingseenheid te bedryf kan grootliks toegeskryf word aan die gebrek aan bestuursvaardighede wat weer die regstreekse gevolg van onervare en ongekwalifiseerde mense is wat in verantwoordelike poste geplaas word en dan nie daarin slaag om die mas op te kom nie.
“Regstellende aksie het van sy inwerkingtreding ‘n negatiewe impak op ons land gehad en die land betaal duur daarvoor. Baie opgeleide burgers is uit die land gedryf en werk en woon nou in ander lande waar hul waardevolle bydraes ongeag hul velkleur waardeer word.
Malema is ‘toekomstige president’
Julius Malema, die uiters gewilde leier van die ANC-jeugliga, het Woensdag sy 29ste verjaardag gevier en is by die geleentheid ook as “ons toekomstige president” beskryf.
Hy het die 15 000-sitplek Seshego-stadion in sy tuisdorp, Polokwane, Limpopo gehuur vir die geleentheid.
Hy is met vreugdekrete en lofsange begroet.
Cassel Mathale, premier van Limpopo, het ook geleentheid bygewoon. Mathale het onder luide toejuiging na Malema verwys as “ons toekomstige president van die republiek”.
Lofsangers het Malema geloof en gebid dat hy die volgende president van die land sal word.
Die mense het staande hul hande uitgestrek na Malema wat met ’n geboë hoof op ’n stoel op die verhoog gesit het.
Skares het tydens die verrigtinge na die verhoog gestroom in die hoop om van die komberse en selfone wat uitgedeel is te kry, maar moes met leë hande omdraai.
Bejaardes, wat met busse vir die viering aangery is, het volgens Beeld net vrugte en water te ete en drinke gekry, terwyl die gaste aan duur drank, biltong en sjampanje in die markiestent gesmul het.
Malema, het aan sy gehoor gesê hy het “in armoede grootgeword”.
“Ek het nie deel van die struggle geword om my self te verryk nie,” het hy in Sepedi gesê.
Meyerton kalm
Meyerton was Donderdagoggend stil nadat die inwoners deur die nag aangehou het om bande aan die brand te steek, het die Gautengse polisie gesê.
Polisiewoordvoerder konstabel Tikoane Sonopo het gesê: “Dinge lyk beter vanoggend in Meyerton. Die kinders gaan skool toe en voertuie beweeg deur Johan le Rouxweg. Daar is nie oproer nie.”
Inwoners het betoog omdat hulle besittings gekonfiskeer is vir onbetaalde diensbelasting.
Volgens Sonopo is hulle besittings weer Woensdag aan hulle teruggegee.
“Verteenwoordigers van die gemeenskap en die munisipaliteit het gaan sit en onderhandel oor hoe hulle die probleem gaan oplos,” het hy gesê.
“Woensdagnag het hulle nog bande gebrand, maar nou i8s alles onder beheer.”
Die polisie moes Woensdag van rubberkoeëls gebruik maak toe oproermakers klippe en petrolbomme na amptenare geslinger het.
Grondhervormingsrealisme verwelkom
Dit is noodsaaklik dat die spanning wat bestaan tussen die ANC se Polokwane-doelwitte vir voedselsekuriteit en die ANC se grondhervormingsdoelwitte, opgelos word.
Dit is teen hierdie agtergrond dat die VF Plus mnr. Gugile Nkwinti, minister van Landelike Ontwikkeling en Grondhervorming, se erkenning tydens ’n inligtingsessie in die parlement van die probleme wat met grondhervorming ervaar word, verwelkom.
Die Minister het onder andere gesê: “Ons jaag nie meer hektaar nie, maar wil eerder ’n balans skep tussen hoeveel grond herverdeel is en hoe volhoubaar dit bewerk word”.
Die Minister het verder daarop gewys dat 90% van die 5,9 miljoen hektaar landbougrond wat die staat sedert 1994 vir grondhervorming gekoop het, braak lê. “Die beginsel van gebruik-of-verloor-dit gaan nou eers van toepassing wees,” het minister Nkwinti gesê.
Volgens die VF Plus getuig hierdie benadering van ’n nuwe realisme wat tot die werklike oplossing van hierdie probleme kan lei. Tot op datum het ondeurdagte en ideologies gemotiveerde grondhervorming voedselsekuriteit in Suid-Afrika bedreig.
Die VF Plus stem saam dat die vestiging van bestaansboere belangrik is, maar enigiemand wat in Suid-Afrika oor voedselsekuriteit praat en die rol van die kommersiële landbouers daarin ignoreer, is onrealisties. Onsekerheid oor die grondkwessie plaas tans baie druk op hierdie kommersiële boere.
Dit is dalk nou die tyd om opnuut na die hele grondhervormings-aangeleentheid te kyk. Die doel met grondhervorming kan tog nooit wees om voedselsekuriteit in Suid-Afrika te benadeel of die ontvangers van grond daardeur terug te plaas na ’n armoede bestaan soos tans die geval is nie.
‘Blankes ondermyn munisipaliteite’
Die minister van samewerkende regering en tradisionele sake, Sicelo Shiceka, het gister gesê dat blanke belastingbetalersunies die vermoëns van munisipaliteite om dienste te lewer, ondermyn.
In ‘n klaarblyklike verwysing na mnr. Jaap Kelder se Nasionale Belastingbetalersunie, het Shiceka aan die media in Kaapstad gesê dat blanke belastingbetalers hul gelde vir munisipale dienste in private trustrekenings inbetaal.
“Ons het ontdek dat 280 belastinbetalersverenigings in Suid-Afrika, wat ongelukkig almal wit is, ‘n parallelle regering geskep het,” het hy gesê.
Hulle neem die geld en pleks van vir dienste aan munisipaliteite te betaal, plaas hulle dit in ‘n trustrekening. Dit ondermyn die vermoë van munisipaliteite om dienste te lewer.”
Schiceka het gesê die regering wil met almal in gesprek tree om munisipale probleme op te los.
“Almal moet daaraan deelneem. As u ongelukkig is oor slaggate, oor dienslewering, laat ons dit bespreek. Dit is waaroor munisipale herstel gaan. Dit moet deur al die mense nagestreef word.”
Schiceka het gesê daar is ontdek dat alle gewelddadige betogings, “sonder uitsondering”, geskied omdat mense “kwessies met munisipaliteite opneem sonder dat daar reaksie is”.
“Woede is besig om oor te kook. Wat ons doen, is om ‘n meganisme te ontwikkel wat al die kwessies met munisipaliteite gaan aanspreek.”
Hy het gesê dat ‘n plan oor hoe om gewelddadige betogings te beëindig vandag by ‘n vergadering met LUR’e en plaaslike regeringsleiers bekendgestel sal word.
Shiceka het die diensleweringsbetogings vergelyk met babas wat vir hul ouers huil.
“Ons het gevind dat dit is soos ‘n baie wat huil as hy sy ouer sien. Ons hanteer die kwessies noudat mense dit meer onder ons aandag bring.
“Teen 2014 sal ons graag ‘n situasie wil hê waar daar nie meer gewelddadige betogings in Suid-Afrika is nie, waar ons attent kan wees op mense se kwessies.
“Hulle hoef nie op straat te gaan om buitebande te brand nie, om eiendom af te brand vir hulle om na geluister te word nie.”
Shiceka het verwys na ‘n moontlike vergadering met belastingbetalersunies in April. Volgens die dagblad Beeld, het mnr. Jaap Kelder van die NBU hom soos volg hieroor uitgelaat: ““Uiteraard sal ons met die minister vergader, maar hy moet sy munisipale bestuurders saambring. Een ding moet hy wéét: Dit gaan nie net by praat ophou nie, ons wil aksie sien.”
Munisipale bestuur in Suid-Afrika het onder swart beheer grootliks in duie gestort, veral in plattelandse gebiede. Terwyl burgemeesters, raadslede en munisipale amptenare groot bedrae op groot salarisse, luuksevoertuie, oorsese reise en konferensies in hotelle uitmors, word basiese dienste soos instandhouding, vullisverwydering en watersuiwering nie verskaf nie.
Vegvliegtuie, duikbote, fregatte vergaar stof
David Maynier, DA-LP, sê “die weermag word van sy operasionale vermoë gestroop” en het die toestand as “skandalig” beskryf.
Hy het dié opmerkings tydens ’n vergadering van die parlementêre portefeuljekomitee oor verdediging gemaak.
Volgens die departement van verdeiging se strategiese plan vir die volgende drie jaar, wat Maandag by die parlement ingedien is, sal die Gripens se 550 vlieguur tot 250 uur per jaar afgeskaal word.
Die vloot se 18 vaartuie sal 1000 minder see-uur jaarliks kry.
“Kyk na maritieme verdediging: gegewe dít waaroor ons beskik en die ure op see waarvoor begroot word, sal vlootvaartuie 23 dae op see en 328 dae in die hawe wees. Dalk is agt vaartuie – insluitend die fregatte en duikbote – meer realisties: Dít beteken hulle sal 55 dae op see wees en 299 dae in die hawe bestee.
“Die lugmag: Ons het 11 Gripens en 550 vlieguur vanjaar beskikbaar, wat beteken hulle vlieg minder as die helfte van die ure wat vereis word om te voldoen aan NAVO-standaarde.
Die meeste van dié uur gaan tydens WB 2010 gebruik word en die vegvliegtuie sal tussen Julie en die einde van die boekjaar in hul loodse staan.”
“Dit raak erger in die daaropvolgende jare: Wanneer al 26 Gripens afgelewer is, sal hulle gemiddeld 9,6 vlieguur per jaar vlieg.”
Thabang Makwetla, adjunkminister van verdediging, het gesê dis nie die departement se skuld nie en skuld op die gebrekkige verdedigingsbegroting geplaas.
Sakeman verloor diskriminasiesaak
Die gelykheidshof in Pretoria het in die guns van die voormalige president van die SA Reserwebank, Tito Mboweni, beslis in ‘n diskriminasiesaak wat deur die sakeman Mario Pretorius teen hom gebring is.
Die hof het beslis dat die kwessie oor Mboweni se opmerkings, wat tydens ‘n aandeelhouersvergadering gemaak is, “niks meer as ‘n storm in ‘n teekoppie” was nie.
Pretorius het Mboweni hof toe geneem oor beweerde rassistiese stellings wat hy tydens dié vergadering in 2008 gemaak het.
Hy het aangevoer dat die opmerkings onregverdig en diskriminerend is, en neerkom op haatspraak.
Hy het vergoeding en ‘n verskoning geëis en gesê Mboweni moet sy regskoste betaal omdat die stelling sy reputasie geskend het.
Mboweni het tydens die betrokke vergadering aan Pretorius gesê hy sal nie toelaat dat Pretorius met hom praat “soos wittes destyds met swartes gepraat het nie”.
Pretorius het gesê hy verstaan dat hy Mboweni beledig het.