OFM berig die drie Zimbabwiërs, tussen 19 en 20 jaar oud, is om 10:00 in die Oukasie-plakkerkamp naby Brits in hegtenis geneem.
Die polisie het inligting ontvang wat hulle na ‘n huis gelei het waar twee van die vasgetrek is. Die derde verdagte is kort daarna by ‘n ander huis, in hegtenis geneem.
Verdere besonderhede volg later.
RSG berig ‘n beraamde 20 000 vragmotorbestuurders staak landwyd en eis ‘n salarisverhoging van 12% elke jaar tot en met 2014.
Sewentien voorvalle van geweld teen nie-stakende bestuurders is die laaste twee dae aan die Oos-Rand in Gauteng aangemeld.
In die Wes-Kaap is die polisie besig om die situasie in Nyanga op die Kaapse Vlakte te monitor nadat petrolbomme na vragmotors in die gebied gegooi is. Motoriste is gevra om die gebied te vermy.
Die geweld word verbind met die vragvervoerstaking.
Intussen het die radiostasie berig daar is vrese dat vulstasies se brandstof op kan raak indien die staking sou voortduur.
Satawu het egter gesê dat petroltenkwa-bestuurders by die staking aangesluit het.
RSG berig daar is vrese dat vulstasies se brandstof op kan raak indien die staking sou voortduur.
Avhapfani Tshifularo, ‘n woordvoerder vir die Suid-Afrikaanse petroleumbedryfsvereniging, sê egter gebeurlikheidsplanne in plek.
eNCA het vroeër berig dié staking deur meer as 40 000 vragmotorbestuurders kan die land se vervoernetwerk heeltemal lamlê en grootskaalse ontwrigting veroorsaak.
Sanders is deur rowers in die maag geskiet en is Sondagoggend in die Kalafong-hospitaal in Pretoria dood.
Die Brits-medikliniek is net sewe minute ver van die Thatch Haven-restaurant, waar Sanders Saterdagaand tydens ‘n gewapende rooftog gewond is. Die Kalafong-hospitaal is baie verder – ogeveer45 minute ver – van die restaurant.
Die Brits-medikliniek het gesê hy het ‘n 24-uur noodeenheid met chirurge wat Sanders se geval sou kon hanteer. Volgens die hospitaal het hy nooit ‘n versoek rakende Sanders van paramedici ontvang nie.
Sanders se familie het gesê die Hartbeespoort-reddingseenheid het aan hulle gesê hy kan nie na die Brits-medikliniek geneem word nie, omdat hy nie ‘n mediese fonds het nie.
Dit is nie duidelik hoekom paramedici Sanders na ‘n verder hospitaal geneem het nie.
Die reddingseenheid wou nie kommentaar lewer nie.
Senzo Mkhize, provinsiale woordvoerder vir die ANC, sê Mbuzeni Ximba (takvoorsitter), Sbu Mpanza (adjunk-takvoorsitter) en Bulelani Njoli (wykskomiteelid) is Woensdagaand geskiet.
Mkhize sê twee gewapende mans het by die vergadering ingestorm en begin skiet.
Die mans is in ‘n kritieke, maar stabiele toestand in die hospitaal. Een van hulle is in die been geskiet. Dis onbekend waar die ander mans gewond is.
Kol. Vincent Mdunge het die skietery bevestig. Hy sê die voorval het by die Imbaliyethu-hoërskool plaasgevind.
Die motief agter die aanval is nog nie bekend nie.
“Wesensverdienste per aandeel uit voortgesette bedrywighede vir die ses maande wat op 30 September hierdie jaar geëindig het sal ten minste 65% laer wees as die vergelykende tydperk in die vorige jaar,” het die maatskappy gesê.
Die laaste keer wat ons gesien het hoe val ‘n klip, was in die uiters mededingende selfoonmark. Die daling van 65% in wesensverdienste is deels te danke aan die feit dat Telkom gedwing was om voorsiening te maak vir ‘n R449 miljoen boete wat opgelê is deur die Mededingingstribunaal agv hul monopolitiese houding tussen 1999 en 2004.
Telkom moet nou betaal vir wyle dr. Ivy Matsepe-Casaburri wat geen snars van die telekommunikasiemark verstaan het nie, maar blykbaar ANC-ideologie ten volle bemeester het.
Jan Alleman is ook aan die ontvangkant, aangesien die regering – wat tans 40% in aandele hou plus wat die pensioenfondse besit – sy belang in Telkom moes verminder het, en lankal ‘n wins geneem het.
Die huidige minister van kommunikasie, Dina Pule is meer geïnteresseerd in rooisoolskoene as haar portefeulje. Vir elke 10% toename in breëband-penetrasie, is daar ‘n gemiddeld ‘n 1% toename van die bruto binnelandse produk, dws BBP-groei in lande wat die belangrikheid van die inligtingsrewolusie verstaan.
Wit jong Afrikaanse kinders wat sonder Facebook of Google moet klaarkom, het nie die voordeel daarvan om in te skakel by hulle eie gemeenskap of die wêreld te ontdek nie. Die Internet is deesdae belangriker as wat spoorverbindings 100 jaar of meer gelede was, veral vir Afrikaners wat Facebook al dig bevolk het.
Jy het bandwydte nodig hiervoor en jy kan nie sonder behoorlike belegging in die infrastruktuur wat dit moontlik maak daarby uitkom nie: Breëband. Suid-Afrika is jare agter die ontwikkelde wêreld se optieseveselnetwerke. Hierdie kabels word benodig, veral vir die video-gerigte internet vandag.
Telkom het die veselomwenteling heeltemal verpas. Net soos die ADSL-rewolusie. Nêrens anders in die wêreld vra ‘n telekommunikasie-verskaffer twee keer vir huur nie: Die lynhuur en dan die ADSL-gedeelte.
Minister Pule dink haar duur skoene gaan haar van punt A na punt B bring. Sy sal hulle maar moet uittrek en begin draf met haar mikstokkie.
“Julle is die enigstes wat die debat oopgestel het,” het Mbalula aan studente by Wits Universiteit in Johannesburg gesê.
Hy het gepraat tydens die ANC-jeugliga se 68ste herdenkingslesing.
“Sommige van ons in die beweging is selfs te bang om die woorde ekonomiese vryheid in ons leeftyd te sê. Wat julle moet doen kamerade is om jul begrip van ekonomiese vryheid te verdiep.
“Dit is die lied waaroor almal moet sing. Selfs die linkses in hierdie land, die Kommunistiese Party, Cosatu [en] sommige van ons kamerade is bang om ekonomiese vryheid te sê.”
Die rede hiervoor is omdat dit met individue geassosieer word, het Mbalula gesê, in verwysing na Julius Malema.
Hy het aan die jeugliga gesê dat vryheid oor hulle gaan.
“Dit gaan oor totale bevryding en as jy nie daaroor gaan praat nie, wie anders sal dan? Hoekom moet die jeug nie obsessief wees oor ekonomiese mag nie?”
Mbalula sê die jeugliga moet versigtig wees, want wanneer die “tweede revolusie” kom, kan dit deur opportuniste gekaap word.
Die ANC-jeugliga was krities oor die sogenaamde tweede oorgang, wat by die ANC se beleidskonferensie in Junie voorgestel en gedebatteer is.
Mbalula sê die tweede oorgang kan nie vereenvoudig word na vryheidsliedere en leierskap nie.
“As julle begin sing sal julle nooit die debat verstaan nie,” het hy gesê.
“‘n Oorgang is nie ‘n geleentheid nie, dit is ‘n proses en ‘n reis.”
Jan Bosman, hoof-sekretaris van die Afrikanerbond, sê die uitlatings deur Holomisa is ‘n aanhitsing tot geweld en omdat hy verwys het na ras, word sy aanmerkings as die verkondiging van haat gesien.
Holomisa het gesê wittes het nie grond van swartes gekoop nie want dit is met geweld deur blankes afgeneem. Hy het die uitlatings op 15 Augustus tydens ‘n gedenklesing vir McGregor Mgolombana in die Oos-Kaap gemaak.
“Ons moet onsself volgende jaar voorberei vir ‘n stryd vir grondhervorming sodat ons nie meer situasies het waar 87% van grond in blankes se besit is en 13% deur swart mense beset word nie,” het Holomisa glo gesê.
Bosman sê vryheid van spraak in die handves van regte sluit onder andere uit die propaganda vir oorlog, aanhitsing van geweld en die verkondiging van haat wat op ras gebaseer is.
“Uitlatings soos hierdie het die potensiaal om misverstaan te word deur ongesofistikeerde mense,” het hy gesê.
Holomisa sê daar is niks in sy uitlatings wat geweld aanhits nie.
“Daar is absoluut niks [in die verklaring] wat die grondwet oortree nie,” het hy gesê.
Holomisa het gesê die staat het nie die geld om grond terug te koop van blankes en dit dan onder swart mense te versprei nie.
“Dus is daar plakkerskampe wat oral oor Suid-Afrika opskiet, want ons het die mense van Afrika versaak.”
Hy het bygevoeg dat elke swart mens geregtig is op ‘n stuk grond sodat individue huise kan bou en kos vir hul families kan produseer.
‘n Tipiese moordslagoffer in die Wes-Kaap was waarskynlik gelem, vol alkohol en was ‘n swart man tussen die ouderdom van 18 en 35, het ‘n koerant berig.
Cape Argus berig dié profiel was die uitslag van ‘n verslag wat die provinsiale departement van gemeenskapsveiligheid saamgestel het. Die verslag verwys na moorde van 2008 tot 2011.
Volgens die koerant het die departement data van lykshuise in plaas van misdaadstatistiek gebruik om die saak te ondersoek.
Gideon Morris, hoofdirekteur van die departement, sê die polisie se misdaadstatistiek verskaf nie gedetailleerde ontleding nie, maar is ‘n goeie aanduiding van wat gebeur.
Luidens die verslag het die provinsie die derde hoogste moordsyfer in die land – 43,4 slagoffers per 100 000 mense – tussen April 2011 en Maart 2012 gehad.
Die meeste moorde is in Nyanga, Gugulethu, Khayelitsha, Milnerton en Mfuleni gepleeg.
Altesaam 87% van die slagoffers was mans. Die helfte van die vermoordes is gesteek, ‘n derde van hulle is geskiet en sowat 17% van die slagoffers het as gevolg van ernstige aanranding of trauma van ‘n stomp voorwerp gesterf.
Cape Argus berig 70% van die oorledenes het positief vir drank getoets.
My ouers was staatspensionarisse gewees, my pa is intussen oorlede. Hulle het nie mediese fondse nie, en is afhanklik van staatsmedies. Dit beteken dat as jy ‘n dokter wil sien, jy al sesuur in die oggend in die ry moet staan buite die kliniek, maar dit is verstaanbaar.
In 2004 is my pa by Tygerberghospitaal vir ‘n hartomleiding ge-opereer. Die volgende dag is die ventilator afgehaal, te vroeg, en hy het in koma gegaan. Hy het ‘n eienaardige brandwond aan die bokant van sy voet opgedoen in die hospitaal, so groot soos R5 stuk, wat maande sou neem om te genees. Die hospitaal had geen verklaring.
7 Dae later was hy buite gevaar. Ons het opgelet dat die teenoorgestelde van waar die aar uitgehaal is, ook ‘n sny in gehad het, en hulle het verduidelik dit was omdat hulle aanvanklik die aar uit daardie been wou haal, maar dit nie geskik was nie. Ongelukkig het ons self later uitgevind dat hy nooit weer die volle gebruik van daardie been sou kry nie, en hy het meeste van die tyd daarna in rolstoel deurgebring.
Ten tye van sy verblyf het 2 verpleegsters hom gehelp stap, maar hom gelos om iets te gaan haal. Hy het gevra dat hulle hom bly steun, maar hulle het hom gelos, hy het geval en ‘n rugwerwel gekraak.
‘n Paar jaar later is hy weer opgeneem in Tygerberg, vir bloedverlies. Hy was so 69. Hoewel sy behandeling aanvaarbaar was, was die toestande ondenkbaar. Die trappe het ‘n swaar reuk van ou urine gehad, en bloedbevlekte ou pleisters was in die gange gestrooi hier en daar. Met ons besoek een aand was daar ‘n 16 jarige swartseun met ‘n bylbesering aan kop, wat aanhoudend vir water gevra het. My vrou het die suster aan diens gaan vra, en sy het geweier om te help, omdat die seun “altyd dors is”. My vrou het hom water gegee uit die wasbak in die saal, en hy het dit gedrink soos iemand wat jare laas water gehad het.
Dit was egter nie die ergste deel van ons besoek nie. Ergste was dat die bed oorkant my Pa, ‘n man se lyk bevat het. Die man is die oggend oorlede, en hulle het hom daar gelos, omdat daar glo nie plek in die lyksdeel was nie. My Pa het gekla oor hoe ongemaklik dit was, want die lyk het kort kort geroggel, agv wind wat opgebou het in die ingewande. Ons het aangedring dat hy in ‘n ander saal geplaas word.
In Mei verlede jaar 2011, het ons gehoor my Pa het breinkanker, maar dat dit ‘n nie-aggresiewe gewas was wat hom nie sou dood nie, en dat hy met die sou kon leef. In Julie het hy skielik bloed opgebring, en ons het hom deurgejaag Karl Bremer toe. Daar is uitgevind hy het ‘n bloeinde maagseer. Hy was wakker en het met my gesels in die saal. Hy is later morfien ingespuit vir pyn, en die volgende dag was hy ‘n zombie. Hy het op niks gereageer nie, en vlak asemgehaal.
Die dokter aan diens deel ons mee dat dit niks is om ons oor te bekommer nie, dis net die effek van sy medikasie, maar vra ons ook of ons enige spesifieke voorkeure het t.o.v begrafnisondernemer, “in geval iets sou gebeur wat mens nie kan voorspel nie”. Hy het ons ook gevra of ons wou gehad het hulle moes my pa probeer bybring in so ‘n geval, en aanbeveel dat ons dit nie doen nie, omdat my pa “te veel soul y”. Al is sy lewe volgens hulle buite gevaar? Op vraag oor hoekom hy nie in intensiewe sorg is nie, is ons meegedeel hy is te “oud”, en dat die beddens baie beperk is, en dat hulle verkies om dit te gee vir jonger pasiente wat nog ‘n lang lewe voor hulle het…
Nodeloos om te noem, my Pa is die volgende aan in my broer se arms oorlede tydens besoektyd, sonder enige verklaring. Tot vandag glo ek hy het ‘n oordosis morfien gehad. Soos wat hy sou wou gehad het, is hy ongelukkig veras en is daar nou geen manier om dit te bevestig nie. Maar wees gewaarsku.
Die Vryheidsfront Plus is bekommerd oor die departement van handel en nywerheid se besluit om nie beleggingsbeskermingkontrakte met internasionale handelsvennote, soos die EU-lidlande, te hernu nie.
Hierdie kontrakte bied, onder andere, waarborge aan handelsvennote teen die nasionalisering van die betrokke lande se bates in Suid-Afrika. “Dit blyk dat die departement bloot die kontrakte laat verval het soos die een na die ander opkom vir hernuwing. Hierdie besluit laat mens wonder of die regering bang is dat hulle miljarde rande skadevergoeding aan handelslande sal moet betaal indien daar besluit sou word om te nasionaliseer.
“Daarom kan hierdie besluit net gesien word teen die moontlikheid van ‘n toekomstige vorm van nasionalisering wat moontlik toegepas kan word,” het adv. Anton Alberts, VF Plus-parlementêre woordvoerder oor handel en nywerheid, gesê. “Die VF Plus gaan derhalwe parlementêre vrae in die verband rig aan die minister van handel en nywerheid, dr. Rob Davies. Suid-Afrika het steeds sy EU-handelsvennote nodig en enige vorm van diskriminasie teen hulle sal fataal vir ons ekonomie wees,” het Alberts gewaarsku.
Die VF Plus vind hierdie besluite van die regering ook vreemd teen die agtergrond dat die beleggingsbeskermingkontrak tussen Suid-Afrika en Zimbabwe wel in stand gehou word.
Die regering sal verseker sy prioriteite moet hersien en daarom sal minister Davies moet antwoord waarom hierdie irrasionele besluite geneem is.
