Skrywer: Dan Roodt

Wapens uit polisiekantoor gesteel

Sowat 18 vuurwapens – meestal bewysstukke in misdade – is uit die polisiekantoor in KwaMhlanga, Mpumalanga, gesteel, het Beeld berig.

Die diefstal is Maandag ontdek toe die polisie se logistieke afdeling inspeksie daar gedoen het.

Meer as 12 pistole, verskeie rewolwers en selfs ‘n R5-geweer is uit die bewysstukstoor gesteel.

Kol. Leonard Hlathi, polisiewoordvoerder, het bevestig dat die diefstal ondersoek word.

Volgens die koerant was daar soortgelyke oortredings in die provinsie.

In Februarie 2010 is tydens ‘n interne oudit by die voormalige onluste-eenheid in Hazyview ontdek dat minstens 32 R5-gewere, 30 12-boor-haelgewere, verskeie Z88-pistole en 48 000 patrone weg is.

Verlede jaar is ‘n trommel vol wapens wat met misdaad verbind word by die Mhluzi-polisiekantoor in Middelburg gesteel.

Mangaung eis sy tol in Pretoria

“Die ANC Mangaung kongres van Desember 2012 is besig om sy tol in Pretoria te eis”. So sê die streeksleier en leier in die raad van die VF Plus, raadslid Philip Van Staden.

Dit volg nadat die burgemeester se stadsrede, wat gister sou plaasvind, skielik verlede week in die raadsvergadering uitgestel is na 04 April 2013 en na verskeie berigte in die media dat die uitvoerende burgemeester, Kgosientso Ramokgopa, op pad uit is nadat hy openlik die Motlanthe-kamp by Mangaung ondersteun het.

Van Staden meen dat Ramakgopa eerder oop kaarte met die inwoners van Pretoria moet speel oor sy moontlike vertrek en dat sy volgehoue ontkenning in die verband dui op swak leierskap.

“Die VF Plus is van mening dat hierdie situasie tot gevolg kan hê dat die stad se bestuur erg daaronder kan lei en dat politieke kampe binne die ANC kan veroorsaak dat dienslewering nog net verder hierdeur belemmer kan word”.

Van Staden sê dat Ramakgopa net ‘n proporsionele aanstelling is en dat sy onguns by die Zuma-kamp die einde van sy politieke loopbaan kan beteken ten koste van die stad se inwoners.

“Geen stad kan voldoende bestuur word indien daar in die administrasie politieke verdeling voorkom nie. So ‘n situasie kan tot gevolg hê dat die twee kampe mekaar wil vernietig en kommunikasie binne departemente heeltemal gaan vernietig wat tot gevolg gaan hê dat die stad se administrasie tot ‘n stilstand geruk gaan word”.

Die VF Plus dring daarop aan dat die burgemeester dadelik moet bekend maak wat die stand van sake is en wanneer hy sy nuwe moontlike pos by MTN sal aanvaar.

Grootste eis ooit teen Transnet

Hiermee gee die VF Plus kennis dat die grootste regseis in die geskiedenis van Suid-Afrika tot die bedrag van R90 miljard binnekort ingestel gaan word teen Transnet, die departement van openbare ondernemings en die tesourie in die vorm van ‘n klasaksie namens die duisende verarmde pensioenarisse van die Transnet Tweede Vastevoordeelfonds en die Transport Pensioenfonds.

Hierdie eis spruit voort uit die nie-nakoming en minagting van die parlementêre opdrag deur die uitvoerende gesag en Transnet om R1.9 miljard aan die fondse uit te betaal. Die latere in diepte ondersoek na die finansiële status van die fondse het aangetoon dat ‘n statutêre skuld nooit deur die regering aan die fondse oorbetaal is nie, dat Transnet wederregtelik wins vir homself geneem het uit die verkoop van die V&A Waterfront en dat bates in die vorm van T011-effekte uit die fondse gehaal is en dieselfde waarde nooit teruggeplaas is nie. Die gevolg is dat in plaas daarvan om bloot R1.9 miljard te betaal soos deur die parlement voorgestel, sal die staat en Transnet nou aanspreeklik wees vir R90 miljard se skuld en vergoeding aan die verwese pensioenarisse.

“There lies a great irony in all of this. If only Transnet and/or Treasury abided themselves to pay the recommended R1.9 billion, then we would not have embarked on a forensic investigation of the funds and would not have discovered the far greater claims due to the pensioners. There is also a lesson in this. If you commit to perform your responsibility diligently and fairly, then damages cannot accrue. If you kick the can down the road, a greater problem will meet and challenge you.This is what we call penny wise and pound foolish,” het adv. Anton Alberts in sy Ledeverklaring in die Parlement gesê.

Munisipaliteite skuld miljarde

Munisipaliteite word minstens R81 miljard geskuld vir dienste, het die Suid-Afrikaanse Plaaslike Regeringsvereniging (Salga) Dinsdag gesê.

“Dit verander elke jaar en die rente-faktor beïnvloed dit,” het Xolile George, uitvoerende hoof van Salga, aan joernaliste in Midrand gesê.

“Dit groei eksponensieel en maatreëls word in plek gestel.”

George het gesê daar is dispute oor geld en ander komplikasies. In sommige sake is daar oplossings gevind.

“Waar daar geen dispuut is nie, moet die geld betaal word.”

Hy het gesê werkloosheid en afleggings is ‘n probleem.

“Sommige mense kan nie bekostig om vir dienste te betaal nie, omdat hulle nie genoeg geld het nie. Dit is ‘n groot bekommernis.”

ANC distansieer hulle van Henke Pistorius se uitlatings

Die moordbeskuldigde atleet Oscar Pistorius, se pa, Henke, was rassisties toe hy gesê het die regering is nie bereid om wit mense te beskerm nie, het die ANC Dinsdag gesê.

“Die stelling is nie net ontbloot van die waarheid nie, dit is ook rassisties,” het Jackson Mthembu, woordvoerder van die ANC, gesê.

“Dit is hartseer dat hy gekies het om ‘n tragiese voorval, wat nog vars is in die geheue van diegene wat geraak word en die publiek, te politiseer.

“Die tragiese voorval het twee families geraak wat nog sukkel om te verwerk wat gebeur het en die jongste rassistiese uitlatings help nie dié families nie,” het Mthembu gesê.

Henke het in ‘n onderhoud met ‘n Britse koerant gesê die ANC-regering se onvermoë om gewelddadige misdaad te verminder is die oorsaak dat talle Suid-Afrikaners vuurwapens besit.

Hy het ook misdaad teen wit Suid-Afrikaners uitgesonder. Sy kommentaar volg nadat dit aan die lig gekom het dat hy, sy pa en broers tussen hulle 55 vuurwapens besit.

Henke het gesê die familie is versamelaars van vuurwapens en jagters, maar benodig ook wapens vir selfverdediging.

Oscar se oom, Arnold, het die atleet en sy familie van die uitlatings gedistansieer.

“Die Pistorius-familie besit slegs wapens vir jag- en sportdoeleindes,” het Arnold, woordvoerder van die familie, in ‘n verklaring gesê.

“Oscar en die res van die Pistorius-familie distansieer hulle van die uitlatings,” lui ‘n verklaring wat deur Vuma ­Reputation Management, Pistorius se beeldpoetsers, uitgereik is.

Mthembu het gesê die Pistorius en Reeva Steenkamp-saak is in die hande van bevoegde howe, wat die saak objektief en in ooreenstemming van die land se wette sal hanteer.

“Enige bespiegeling kan slegs die saak benadeel.”

Die ANC het die verklaring wat deur die Pistorius-familie uitgereik is, verwelkom.

Pistorius staan tereg op aanklag van moord nadat hy Steenkamp op Valentynsdag in sy huis in die ooste van Pretoria doodgeskiet het. Hy is verlede maand borgtog van R1 miljoen toegestaan en sal op 4 Junie weer in die hof verskyn.

Oscar se pa looi ANC oor misdaad, plaasaanvalle

Oscar Pistorius se pa, Henke, het die ANC uitgesonder as verantwoordelik vir die hoë voorkoms van misdaad teen wittes in Suid-Afrika, berig die Telegraph.

Henke het gesê die ANC-regering se onvermoë om gewelddadige misdaad te bekamp daartoe lei dat baie Suid-Afrikaners vuurwapens besit.

Die Pistorius-familie wat ooms en neefs insluit, besit glo altesaam 55 vuurwapens.

Volgens Henke is die wapenversameling vir jag, maar sluit ook wapens vir selfverdediging in. Henke het kapings en plaasaanvalle teen wit boere uitgesonder.

“Sommige van die vuurwapens is om te jag en die handwapens word gebruik vir beskerming. Dit sê iets oor die ANC-regering; kyk na die misdaadvlakke teen witmense. Hoekom is beskerming so swak in die land? Dit is ‘n aspek van ons samelewing,” het hy gesê.

“Jy kan nie op die polisie staatmaak nie, nie omdat hulle ondoeltreffend is nie, maar omdat die misdaad so erg is.”

‘n Woordvoerder van die ANC, Ishmael Mnisi, het Henke se uitlatings as “kommerwekkend” beskryf.

“Misdaad is iets wat almal in die land raak. Ons het erken dat dit ‘n probleem is, maar die regering doen baie om die kwessies aan te spreek.

“Dit regverdig nie dat ‘n persoon ‘n vuurwapen kan gebruik om moord te pleeg of vuurwapens in sy huis te hou nie. Mense moet misdaad by die polisie aanmeld. Oscar se pa het geen reg om dit te sê nie. Dit is ‘n baie kommerwekkende stelling.”

Chavez verloor stryd teen kanker

Latyns-Amerikaanse leiers betreur die dood van die president van Venezuela, *Hugo Chavez. Chavez is gister dood na ‘n lang stryd teen kanker. Hy was 58.

Die voormalige valskermsoldaat het Venezuela 14 jaar lank regeer. Hy is in Oktober herverkies vir ‘n volgende termyn van sewe jaar, maar is weens sy siekte nooit ingehuldig nie.

Chavez se liggaam sal in staatsie lê tot met sy begrafnis wat vermoedelik Vrydag sal plaasvind.

Die visepresident Nicolas Maduro sal waarneem as president en ‘n verkiesing moet ingevolge Venezuela se grondwet, binne 30 dae uitgeroep word.

Om anders oor die lewe na te dink

Kom ons veronderstel dat daar ʼn land met die naam Dystopia is wat bestaan uit ʼn heersersklas en miljoene onderdane waaroor die heersers met ʼn ysterhand regeer. Die heersersklas het ʼn sekere ideologie wat hulle gebruik om hul heerskappy oor hul onderdane mee te regverdig. Een van die kenmerke van die ideologie is dat dit ʼn sekere ideaal aan hul onderdane voorhou waarna almal van hulle behoort te strewe. Daar word van hulle verwag om sekere van hul basiese vryhede en plesiere op te offer, sodat die verwesenliking van die ideaal makliker en vinniger kan plaasvind. Die lede van die heersersklas het méér geriewe, geleenthede en vryhede as hul onderdane, maar selfs húlle het sekere gedragskodes wat hulle behoort na te volg. Hulle moet byvoorbeeld die opdragte van hul leiers sonder teëspraak uitvoer en ten minste in die openbaar, optree volgens die streng vereistes van die heersende ideologie. Die miljoene onderdane word vreesbevange gehou, beide deur hul eie medeburgers wat op hulle spioeneer én deur ʼn sterk polisiemag. Indien enige van hulle dit sou waag om die geldigheid van die ideologie te betwyfel of om te weier om getrou die wette van die staat te gehoorsaam, word hulle daaraan herinner dat hulle moet ophou om so selfsugtig te wees en dat hulle die welsyn en “vooruitgang” van die breë samelewing altyd in gedagte behoort te hou. Goeie voorbeelde vanuit die onlangse geskiedenis was natuurlik Nazi Duitsland van die vroeë twintigste eeu, die ou Sowjetunie en die huidige Rooi-Sjina.

Daar is verskeie metodes wat die heersersklas kan gebruik ten einde te verseker dat hul onderdane sal voortgaan om die staat se ideologie klakkeloos te aanvaar. Terwyl hulle aan die een kant ʼn sterk polisiemag of ʼn skrikbewind met gepaardgaande gewelddadige optredes kan gebruik, kan hulle aan die ander kant d.m.v. hul gedurige propaganda in koerante, op die TV en radiostasies, sorg dat hul onderdane die ideologie meer geredelik sal navolg. Hulle kan selfs films en ander sogenaamde vermaak gebruik om sekere woorde en dade van die akteurs as navolgenswaardig voor te hou. Naderhand sal hul onderdane die “gewillige slawe” wees van hul heersers en sal hulle selfs nie eens besef dat hulle weinig vryhede meer het nie. Hulle sal die heersende ideologie aanvaar as die enigste “redelike” rigtinggewende maatstaf vir hul eie gedrag. Vervolgens sal hulle dit nie eens oorweeg om anders oor die doel en betekenis van hul lewens na te dink nie. Dit sal daarna vir die heersers ook nie meer nodig wees om hul onderdane gewelddadig te onderdruk nie.

Min mense besef deesdae dat hedendaagse “Westerse” demokrasieë soos bv. die Verenigde State van Amerika, die Verenigde Koninkryk en selfs die Nuwe Suid-Afrika, in sekere opsigte baie soortgelyk is aan die bogenoemde onderdrukkende eenparty-diktature. Kiesers in demokrasieë aanvaar dikwels klakkeloos sekere lewenswaardes wat aan hulle voorgehou word. Die keuses wat aan hulle voorgehou word betreffende lewensbelangrike politieke kwessies, is soms baie beperk. Die twee grootste politieke partye in die bogenoemde drie lande stem dikwels saam oor belangrike kwessies, terwyl hul leiers in die openbaar met mekaar debatteer oor onbenullighede. In die VSA is leiers van beide die Demokratiese en Republikeinse Partye, uitgesproke ondersteuners van die regering van Israel, terwyl hulle ʼn “laissez faire” houding het jeens die instroming van onwettige immigrante vanuit veral Meksiko. Die leiers van die twee grootste partye in die VK – die Arbeidersparty en die Konserwatiewe Party, het die VSA se oorlogsverklarings teen Irak en Afghanistan, “soos-een-man” ondersteun. In Suid-Afrika ondersteun baie leiers van die ANC en die DA die regering se verklaarde beleid t.o.v. “Regstellende” Aksie, Swart Bemagtiging en selfs toenemende grondgrype (grondhervorming). Die hoofstroom media in hierdie drie lande is in die besit van ʼn klein groepie super ryk eienaars wat gevolglik ʼn geweldige invloed uitoefen op die uitslae van “demokratiese” verkiesings.

Ten einde gesag te verleen aan hul boodskap het baie Afrikaanse predikante met die woorde “So spreek die Here” voorgegee dat hulle namens God praat. Die Rooms-Katolieke Kerk het gedurende die Donker Eeue hul onderdane vreesbevange, ongeletterd en “dom” gehou deur bv. die Bybel slegs in Latyn aan hulle beskikbaar te stel en slegs biskoppe en priesters toe te laat om die Bybel op ʼn sekere manier aan kerklidmate te verduidelik en te interpreteer. Baie “afvalliges” is op gewelddadige wyses gedwing om die heersende godsdienstige “ideologie” van die kerk te aanvaar. Deesdae gebruik die (ware) heersers van Westerse demokrasieë die begrip “politieke korrektheid” om mense se lewenswaardes en denke in ʼn sekere rigting te kanaliseer. Die geïndoktrineerde onderdane word oningelig gehou aangaande die invloed van die ware maghebbers “agter” die openbare politici, deur hul aandag gedurig te fokus op vermaaklikheidskunstenaars se doen en late en op die nuutste sportgebeure. Sommige kerkleiers moedig hul lidmate dikwels aan om regeringsleiers as “bondgenote” te beskou met wie hulle behoort saam te werk om die maatskaplike probleme in die land op te los. ʼn Persoon wat dus onnadenkend van kleins af die heersende ideologie van die staat en die dogmas van die kerke navolg, word deur baie regerings- en kerkleiers as ʼn “goeie” en navolgenswaardige mens voorgehou.

In die verlede het rewolusionêre groepe hul boodskap aan die massas oorgedra d.m.v. massavergaderings, pamflette en koerante. Hulle het die huidige regerings geblameer vir die swaarkry van die meeste inwoners van die land en het ywerig hierdie propagandaboodskap aan andere oorgedra. In die Weimar Republiek het die Nazi’s hoofsaaklik die Jode beskuldig vir die Duitsers se swaarkry, terwyl die Bolsjewiste die Tsaar en sy ondersteuners geblameer het vir die Russe se swaarkry. Dis moontlik dat daar magte “agter die skerms” was wat hierdie rewolusionêre groepe gefinansier het en selfs gesorg het dat hulle genoeg wapens en ammunisie kon aanskaf. Daar was in beide lande dus ʼn klein groepie aktiviste wat doeltreffende metodes gebruik het om miljoene ander mense te beïnvloed en gevolglik die vorige regimes te vervang met ʼn onderdrukkende eenparty-diktatuur. Nie-rewolusionêre politieke partye en organisasies wat die ondersteuning geniet van die eienaars van TV-kanale, radiostasies of dagblaaie, het gewoonlik ʼn groter kans om sukses te behaal.

Gestel ek bevind myself binne-in die bogenoemde denkbeeldige land Dystopia waar die meeste mense “goeie” burgers van die staat is en onnadenkend die heersende ideologie ondersteun. Gestel ek besef dat die heersersklas nié die welsyn van hul onderdane in ag neem nie en dat hulle slegs die ideologie gebruik om hul onderdane mee te mislei. Gestel ook verder dat ek besef dat die meeste onderdrukte onderdane emosioneel sal reageer teenoor enigiemand wat die geldigheid van hul lewensbeskouing sou betwyfel. Ek besluit egter dat ek ʼn bydrae wil lewer tot die verbetering van ten minste sommige mense se lewenskwaliteite. Ek beskik oor oorgenoeg inligting aangaande die wandade van die heersersklas en die geleidelike vermindering van die meeste mense se vryhede en agteruitgang van hul lewensomstandighede. Daar is wel ʼn internet beskikbaar waarop ek my inligting kan plaas en waartoe die meeste mense toegang het. Hoe sal ek te werk gaan om die inligting aan andere oor te dra?

Ek kan dit miskien oorweeg om iets onwettigs in die openbaar te doen ten einde die publiek se aandag te trek. Voordat ek sou besluit om gewelddadig op te tree deur ʼn terroriste-daad te pleeg, moet ek besef dat die kanse goed gaan wees dat die meeste mense daarna ontsteld sal wees daaroor en dat ek in die tronk kan beland. Ek kan ʼn (ondergrondse?) beweging stig en probeer om soveel as moontlik lede te werf, of ek kan probeer om ten minste ʼn klein groepie mense te bereik met my boodskap. In albei laasgenoemde gevalle moet ek nog steeds ʼn manier vind om my boodskap aan mense oor te dra deur individueel met elkeen te gesels en/of my boodskap op die internet te versprei. Ek weet dat die oorgrote meerderheid dit nie eens naastenby sal oorweeg om my boodskappe op die internet te lees nie. Ek besef uiteindelik dat daar weinig kanse is dat ek en my ondersteuners die regering omver sal werp.

Dit is egter verbasend dat daar wél mense binne onderdrukkende eenparty-diktature is wat bereid is om die geldigheid van amptelike ideologieë te betwyfel. Dit dui daarop dat daar tog ʼn mate van “vrye wil” en uniekheid by mense teenwoordig is wat dalk nié volledig afhanklik is van die oorweldigende invloed van hul lewensomstandighede of selfs van hul gene of DNS nie. Kan dit wees dat mense wel ʼn onsterflike siel het wat ʼn vonk van vrye wil binne-in hulle laat ontstaan – ʼn vonk wat hulle lateraan laat besef dat die lewe tog op die ou end nie die moeite werd is as mens geen vrye denke het of jou skeppingsvermoë kan gebruik om die lewe vir jouself en andere meer interessant en betekenisvol te maak nie? Die Griekse filosoof Sokrates het tereg duisende jare gelede by sy verhoor gesê: “An unexamined life is not worth living” …

AARTO-boetes per e-pos onmoontlik

Die Vryheidsfront Plus verwerp die voorstel deur die department van vervoer om voortaan AARTO-boetes ook per e-pos af te lewer soos blyk uit die Wysigingswet op die Administratiewe Beregtiging van Verkeersoortredings (AARTO).

Alhoewel daar hofuitsprake bestaan wat die aflewering per e-pos van regsdokumentasie sanksioneer, skree die legio van tegniese probleme om uitvoering aan AARTO te gee ten hemele teen die byvoeging van nog ‘n tegniese vereiste van aflewering.

Volgens adv. Anton Alberts, VF Plus-parlementêre woordvoerder oor vervoer, heg die verkeersowerhede geen waarde aan die uitvoering van die letter van die wet nie en skep daarmee soveel probleme vir die publiek, soos die onwettige afleweringsmetodes deur middel van gewone pos, die onwettige blokkasie van lisensies, die onwettige arrestasie of dreigement tot arrestasie by padblokkades en die afwesigheid van verkeershowe waarin AARTO-boetes besleg moet word om net ‘n paar te noem.

“Indien hierdie basiese aspekte van AARTO nie eens nagekom word nie, hoe op aarde gaan die owerhede elektroniese databasisse administreer en bestuur?” het Alberts gevra.

Verder is die VF Plus bekommerd oor die beplande wysiging soos dit tans daar uitsien aangesien dit die vereistes van persoonlike betekening of per geregistreerde pos geheel en al uithaal en vervang met ‘n vae vereiste “soos voorgeskryf”.

Alhoewel die verduideliking is dat die wysiging eintlik net elektroniese aflewering ook moontlik maak, is hierdie ‘n slim wyse om ongesiens die streng vereistes wat bestaan uit te haal en te vervang met ‘n vae reëling wat ook die aflewering per gewone pos kan insluit. Daarom sal die VF Plus hierdie wysigingswet in die parlement teenstaan.

‘Reuse lugramp’ eis vyf in DRK

Slegs vyf liggame naby die wrak van ‘n vliegtuig gekry is wat in ‘n woongebied in Goma in die ooste van die Demokratiese Republiek van die Kongo neergestort het.

Daar was nege mense aan boord en nie tussen 30 en 50 soos wat die owerhede vermoed het nie. Drie oorlewendes is uit die wrak gehaal voordat die polisie gisternag die soektog opgeskort het.

Die vliegtuig, ‘n Fokker 50, was van die myngebied Lodja af in die oostelike Kasai-provinsie op pad. Dit het in die middel van Goma neergestort, maar het niemand op die grond getref nie.

Vliegtuigongelukke kom algemeen in die DRK voor waar talle vliegtuie en lughawens nie moderne toerusting het nie en owerhede geen passasierslyste aanhou nie.