Miskien moet ek 'n raps meer agtergrond oor manlief gee. Sy belangstellings in rolprente en aktrises is skraps. Hy slaap dwarsdeur tagtig persent van die flieks wat ons kyk en as hy wakker bly tot aan die einde is dit 'n teken dat die fliek aan te beveel is! Byna daagliks moet ek verduidelik wie Tom Cruise en wie Brad Pitt is, hy verwar kronies die twee. Hy ken slegs 'n paar sterre op die naam, omtrent net Nicole Kidman (sy is vir hom baie mooi, maar nou te maer) en Jessica Simpson (al is sy dalk nie so slim nie, dink hy sy is oulik). O ja, en hy ken vir Paris Hilton as gevolg van haar oor-blootstelling deur die media. Nou, op die Saterdagoggend weet hy dadelik van wie ek praat as ek Kate Hudson se naam noem. Ongelooflik!
Die Sondag kuier ons by vriende en ek vertel hoe ingelig hy is. “Wie is die vrou?” vra buurman. “Sy is 'n blonde model met 'n man wat met dwelms deurmekaar is,” sê manlief dadelik. So kom ons toe agter hy is eintlik besig met Kate Moss, die model, en is toe glad nie so ingelig nie! Na ons breedvoerig verduidelik het, sê hy: “Ag, miskien geld dieselfde kommentaar vir hulle ook: Hollywood is Hollywood, almal is op dwelms!”
Die kennis van watter rolprente ons al gesien het en wat goed sal wees om te sien, moet ek altyd onthou. Sy gunstelingakteurs moet ek menigmaal uitwys. “Onthou jy,” sal ek sê, “dit is die ou wat in 'Beautiful minds' gespeel het.” En dan gaan daar gewoonlik darem 'n lig op. Ek is ook die een wat die name van die flieks wat vir hom goed was, onthou. My wederhelf is nou maar eenmaal nie op die rolprentbedryf ingestel nie. Hy gee net te min om, om sy kosbare geheue daaraan te wy. Hy lees liewer graag 'n boek en kyk dokumentêre films oor dinge wat saak maak. As hy dan ook die dag positief oor 'n rolprent voel, is dit gewoonlik gebaseer op ware gebeure.
Van wêreldsake weet manlief meer as ek. Die ekonomie maak vir hom definitief meer sin. In 'n gesprek oor oorlogvoering, rugby en krieket is hy altyd die fundi. Hy weet van pype, motors en huisplanne, maar iewers in die spektrum van alle kennis het ek ook 'n plekkie om te vul – agter sy blad staan ek stewig en kry my eie toekenning vir ingeligtheid, al is dit nou net vir 'n paar oomblikke se vermaak. Die vrou agter mý wederhelf is beslis 'n ingeligte fliekvlooi!
06:54:50 Volgens die Instituut vir Sekerheidstudies behoort sekswerk gedekriminaliseer te word en deur dieselfde arbeidswetgewing as ander sektore van die ekonomie gereguleer te word.
06:49:23 Die leier van die Zimbabwiese opposisie, Morgan Tsvangirai, het gister gesê hy is tevrede met die manier waarop die samesprekinge met Zanu-PF verloop.