Storms het verwoesting gesaai in dele van die Oos-Kaap, Wes-Kaap en KwaZulu-Natal, het die SAUK Sondag berig.
'n Man is dood nadat 'n boom op hom geval het in Ndevana, buitekant King Williams Town. John Fobian, van die polisie se krisisbeheersentrum, het gesê huise se dakke is afgeruk in Tamara, Debe-nek en Alicedale.
Baie mense is ook haweloos gelaat nadat storms hulle huise aan die KwaZulu-Natalse suidkus verwoes het.
Die top-Amerikaanse gesant vir Afrika het gewaarsku dat Zimbabwe deselfde lot as Guinee in die gesig mag staar wanneer president Mugabe sterf.
Guinee verkeer in politieke onstuimigheid sedert die langsheersende diktator in Afrika verlede week dood is. 'n Militêr geleide groep het ure ná sy dood 'n oorname aangekondig en 'n tussentydse leier benoem.
Jendayi Frazer, die Amerikaanse adjunkminister van buitelandse sake vir Afrika-aangeleenthede, het Sondag gesê dat indien die 84-jarige Mugabe te sterwe sou kom terwyl hy aan bewind is, dieselfde lot ook vir Zimbabwe wag.
Frazer was 'n luide kritikus van Mugabe, wat sedert die land se onafhanklikheid in 1980 aan bewind is.
Vroeër vandeesmaand het sy gesê dat Amerika nie langer 'n voorgestelde magsdelingooreenkoms ondersteun wat Mugabe as president wil behou nie.
Israelse tenks het Maandag begin versamel op die grens met Gaza terwyl oorlogsvliegtuie Hamas teikens gebombardeer het in die digbevolkte enklawe waar aanvalle in die laaste twee dae meer as 300 mense gedood het .
Dosyne tenks en personeeldraers het by verskeie punte naby die grens gestaan en luier nadat Israel gewaarsku het dat hulle 'n grondaanval kan loods om met hulle lugaanvalle saam te val.
Hamas het op die aanhoudende bombardement gereageer deur vuurpyle dieper in Israel in te vuur, met een wat nie ver van Ashdod, Israel se tweede grootste lughawe, getref het nie. Dit was so 30 kilometer noord van Gaza en het geen ongevalle veroorsaak nie.
Die Islamitiese beweging het Israel daarvan beskuldig dat hulle 'n volkslagting uitvoer en dat die wêreld toekyk sonder om 'n vinger te verroer om dit te keer. Hamas-woordvoerder Fawzi Barhum het gesê "die organisasie behou die reg voor om te kan reageer op die aggressie met martelaaroperasies," bedoelende selfmoordbomaanvalle, van die aard wat Hamas nie in Israel sedert Januarie 2005 uitgevoer het nie.
VN-sekretarisgeneraal Ban ki-Moen het sy stem gevoeg by die VN-veiligheidsraad se versoeke vir 'n onmiddellike einde aan die vyandelikhede. Sy woordvoerder het gesê: "Hy beveel sterk aan dat alle gewelddade onmiddellik gestaak moet word."
Sjina en Japan het ook aangesluit by die internasionale koor van oproepe vir 'n einde aan die geweld, wat die stemme van Brittanje, Frankryk en Rusland insluit.
Beijing het gesê hulle is geskok en ernstig bekommerd oor die geweld, terwyl Japan 'n beroep gedoen het op Israel om selfbeheersing toe te pas en ook op die Palestyne om die vuurpylaanvalle te staak.
Pous Benediktus XVI het die internasionale gemeenskap gevra om alles moontlik te doen om die Israeli's en Palestyne te help met die doodloopstraat en nie toe te gee aan die perverse logika van konfrontasie en geweld nie.
Die Israelse minister van verdediging het beloof om die lugaanvalle te verskerp en uit te brei. Die aanvalle is geloods uit vergelding ná aanhoudende vuurpylaanvalle deur militante groepe.
"Indien dit nodig is om voetsoldate te ontplooi om ons burgers te beskerm, sal ons dit doen," het sy woordvoerder hom klaarblyklik aangehaal.
Die kabinet het reeds toestemming gegee dat 6 500 reserwesoldate opgeroep word, het 'n senior offisier aan verslaggewers ná die vergadering gesê.
Oorlogsvliegtuie gaan steeds voort om die verarmde en oorbevolkte gebied van 1,5 miljoen mense te bestook, waar meeste strate verlate is en baie skole en winkels gesluit is terwyl honderde begrafnisse gehou word.
Vegvliegtuie het die tonnels op Gaza se grens met Egipte bestook – die tonnels was 'n naelstring waardeur Hamas goedere en wapens in die enklawe ingesmokkel het. Die enklawe is so te sê deur Israel van die buitewêreld afgesny sedert Islamiete daar in Junie 2007 beheer oorgeneem het.
Laat Sondag het die vegvliegtuie verskeie metaalwerkswinkels aangeval, wat volgens Israel gebruik word om die vuurpyle saam te flans.
Rondom 25 Desember vier die Germaanse heidene, waaruit Afrikaners afstam, steeds die tradisionele Wendefees of Mitwinternacht.
Dit is 'n tyd van vernuwing met die hoop op n voorspoedige jaar. Ons voorouers was immers ook boere en die fees het sy oorsprong juis in die landbou. Tydens die kerstening van Europa is hierdie tradisies as heksery bestempel en met mening, soms met die grusame dood op 'n brandstapel vernietig. Volkseie gelowe is afgemaak as blote mitologie en die res is Christengeskiedenis.
Vandag is ons weer vry om ons volkse tradisies uit te leef. Vryheid van spraak en religie word in die grondwet verseker. Met die hoop dat Lekota se nuwe party die tweederde meerderheid van die ANC kan stuit, is ons verseker van die behoud van die grondwet. Met Afrikanerinsae in die party kan ons – en sal ons – die semantiek rondom regstellende aksie en swart bemagtiging kan transformeer na meer toegeeflike begrippe met betrekking tot huidig benadeelde Afrikaners.
In die lig van hierdie nuwe wending in die politieke magspel, wens ek almal 'n vernuwende en inspirerende 2009 toe. Ook 'n Geseënde Kersfees vir alle Christene.
Sommige van ons glo anders, dink anders en doen anders. Maar ons almal bly Afrikaners. En dis die band wat ons moet saambind. Ons moet bereid wees om mekaar te verdra ten spyte van ons religieuse verskille wat in ons pad staan na emansipasie vanuit ons huidige intellektuele slawerny.
Weg met die doemprofete en slegtenuusdraers. Ons almal ken die realiteite van Afrika, maar daar is altyd hoop. Met die regte benadering, impetus en beveiligingsaksies van ons gemeenskappe, kan ons weer gedy.
Ons het dit al gedoen en ons kan dit weer doen.
Mag die Afrikaner homself weer vind in hierdie opwindende tye.
Verskeie skrywers aan Praag maak gedurig melding van Afrikanerleiers in 'n politieke konteks asof sodanige leiers wel bestaan. Wie is hierdie leiers na wie hulle verwys? Behalwe die verkose parlementslede van die Vryheidsfront Plus, wat maar 'n klein minderheid Afrikaners verteenwoordig, dra ek geen kennis van enige ander politieke Afrikanerleiers nie.
Suid-Afrika kan in die nuwe jaar buitensporige vreemdelingehaatveldtogte ervaar met die drukkende ekonomiese toestand en gevolglike werkloosheid as die baie kort lont na die kruitvat.
Dít blyk uit die vrylike toestroming – sonder enige paspoortbeheer, om nie eens van nodige verblyf- en werkpermitte te praat nie – van derduisende mense uit al die buurstate na Suid-Afrika om die land se skaars werksgeleenthede te kom opraap.
Die swart vakverbond Cosatu het pas, ná 'n arbeidsindaba met die nywerheid en die owerheid, gesê dat 30 000 mense se werksgeleenthede weens die wêreld-ekonomiese krisis op die spel verkeer. Maar Cosatu het nie geopenbaar wíé se werksgeleenthede in die slag gaan bly nie, of dit byvoorbeeld 30 000 werkers uit Mosambiek (waar baie van die mynwerkers in ons land vandaan kom) sal wees nie, en of dié arbeidsinkorting Afrikaners en Suid-Afrikaanse swartes gaan raak nie.
Uiteraard dus: As die Mosambiekers voorkeur kry, geskied dit ten koste van swartes, maar ook ten koste van Afrikaners en Suid-Afrikaanse blankes. En juis hierdie saak, dat vreemdes werksgeleenthede uit swartes se hande neem, was een van die kwessies wat gelei het tot die etniese verdrywing wat lokasies en plakkerskampe vroeër vanjaar in ligte laaie gelaat het.
Die feit dat tot 100 000 Mosambiekers die grens na Mosambiek vir die groot vakansiedae in Desember – sonder die nodige grensbeheer – oorgesteek het, blyk uit 'n berig van SAUKTV-nuus. Daarin is reguit gesê dat dié Mosambiekse vreemdelinge geensins oor die nodige dokumentasie beskik nie – en dat die oortreders nie weens hul versuim vervolg word nie.
Daar kan met groot stelligheid aanvaar word dat die strengste grensbeheer tussen Suid-Afrika en Mosambiek by die Krugerwildtuin geskied waar inkomende Mosambiekers van tyd tot tyd 'n leeu ten prooi val. Die Krugerwildtuin se veldwagterspatrollies moet ook in 'n sekere mate as afskrikmiddel dien.
Die feit dat Mosambiekers onwettig Suid-Afrika instroom, strook ook met wat in ander buurstate gebeur. Landbou-verteenwoordigers in Noord-Transvaal het die beweging van swart vreemdelinge oor die grens na Zimbabwe tydens 'n Paasnaweek gemonitor. Die reusagtige omvang van dié mensebeweging – dit wil voorkom asof soveel soos 250 000 Zimbabwiërs tydens die Paasnaweek oor die grens kan beweeg en dan weer na Suid-Afrika terugkeer – laat 'n mens met net een gevolgtrekking: Wat Suid-Afrika en Zimbabwe betref, het daar vir alle praktiese doeleindes net een burgerskap ontstaan.
Ook wat Swaziland aangaan, bestaan 'n soortgelyke situasie. Net Rooikappie glo dat daar grensbeheer tussen Suid-Afrika en Swaziland is. Daar heers klaarblyklik 'n vrye beweging van mense – en diere – oor die grens tussen Pongola en Piet Retief.
Wat Lesotho betref, 'n staat wat deur Suid-Afrika omring word, geld dieselfde situasie. Die Oos-Vrystaat word behoorlik deur veediefstal uit Lesotho geteister. Die Vrystaatse dorpe na aan die grens loop konstant onder misdaad, ook plaasterreur, deur. Van die bloedigste plaasterreur en mense-uitwissing aan die hand van swartes kom in hierdie gebied voor.
Dat daar nie eintlik sprake van grensbeheer tussen Botswana en Zimbabwe is nie, blyk uit die feit dat derduisende swartes uit Zimbabwe hulle in die laaste sewe jaar in Botswana tuisgemaak het.
Die feit dat besmette vee die grense tussen die buurstate oorsteek, kan insgelyks nie weggeredeneer word nie. Ook wat hierdie saak betref, leef ons land met 'n tydbom aan die tik.
Die vraag kan met reg gestel word: Is die gebrek aan mense- en dierebeheer maar net die gevolg van die verafrikanisering wat by die verantwoordelike owerheidsinstellings ingetree het, of moet die wortel van die kwaad elders gesoek word?
Daar is meer as een owerheidsinstansie by grensbeheer betrokke. Dit sluit binnelandse sake (besoekerspermitte en reisdokumente), doeane, die departement van arbeid (werkspermitte), gesondheid (mensesiektes), landbou (dieresiektes), en die polisie (die bekamping van smokkelary in dwelms, vee en gesteelde voertuie – wat in hul duisende die grens oorgebring word) in.
Die eise wat so 'n omvangryke en gekoördineerde optrede betref, blyk net te groot wees vir 'n derdewêreldland soos Suid-Afrika.
Maar net so belangrik in die oorweging van die saak is die feit van die bestaan van die Suider-Afrikaanse Ontwikkelingsgemeenskap (SAOG) en die doelbewuste uitwissing van landsgrense wat deel van die mensdom se lot geword het met die aanbreek van die Anglo-Amerikaanse magsentrum se sogenaamde Nuwe Wêreldorde.
Voormalige amptenare wat met grensbeheer tydens die bewind van PW Botha te make gehad het, verklaar hulle het opdrag gekry om die grense tussen Suid-Afrika en sy buurstate as "sag" te beskou.
Wat ons vandag ervaar, is dus maar net dat die onkruidsaad wat al 19 jaar gelede gesaai is nou in sy volle aaklige blom staan.
Aaklig – want landsgrense, arbeidsgrense en volksgrense is daar om die burgers van die land te vrywaar van die mededinging van vreemdes se goedkoop arbeid, die siektes wat hulle dra, asook die siektes wat hul vee dra. Veral in 'n tyd soos hierdie waar die internasionale ekonomiese en arbeidsorde uitmekaar val en waar, anders as wat Darwin leer, nie die geskikste nie, maar die wreedste en magtigste en slegste en onderduimste kan oorleef.
'n Mens huiwer om te vra hoe 'n owerheid nog aan die wéttige burgers van die staat kan sê hy begroot en beheer en administreer die land vir 'n getal van soveel burgers as hy nie eens weet hoeveel vreemde mense hulle in daardie land bevind nie?
Want reeds rondom hierdie wéttige inwoners bestaan daar 'n kwessie. Hoeveel mense, miljoene, beskik oor 'n wéttige status bekom wat van hierdie baie eienaardige owerheid bekom is? Hoeveel paspoorte, ID-dokumente, reis-, verblyf- en werksdokumente is nie vals nie?
Watter proses word gebruik om die derduisende mynwerkers uit die buurstate in die land toe te laat? Is dit 'n deursigtige proses? Sal onafhanklike instansies, byvoorbeeld een of ander swart binnelandse waaksaamheidsgroep, toegelaat word om die proses te verifieer om te verseker dat plaaslike swart arbeid nie in die proses te na gekom word nie? Hoeveel van hulle is draers van die MIV/vigs-virus, 'n hoogs aansteeklike Afrika-siekte wat jy liefs buite jou land se grense wil hou? Hoeveel van hulle is veroordeelde misdadigers, wat in die ou dae grond vir die weiering van ongewenstes binne die land se grense was?
Hoeveel van hulle mag stem in verkiesings soos dié van aanstaande jaar?
In Oos-Transvaal woon honderdduisende Swazi's. Oos-Transvaal is seker een van die veiligste ANC-provinsies – meer as 80 persent van die uitgebragte stem gaan gewoonlik aan die ANC.
Oos-Transvaal is ook die woonplek van baie Zoeloes, dus potensiële IVP-ondersteuners. Maar die IVP maak nie hond haar-af daar nie want die Swazi's stem eenvoudig net vir die party (die ANC) wat hul teenstanders (die Zoeloes) op hul neuse laat kyk.
Daar is nie betroubare syfers beskikbaar nie. Maar 'n mens kan met vrymoedigheid aanvaar dat miljoene van hierdie gedomilisieerde vreemdelinge uit Suid-Afrika se buurstate aan aanstaande jaar se verkiesing sal deelneem. En dan karring onnadenkendes nog dat Afrikaners hul kruisies tydens hierdie klug moet gaan trek!
Die blankes in hierdie land moet eerder hulle belaglike stemkoors oorkom en hulle energie kanaliseer na die wesenlike krisisse in Suid-Afrika wat vroeg in 2009 nog duideliker gaan blyk as gevolg van die "eenburgerskap" van die land met sy swart buurstate.
Vanaf die PRAAG-redaksie, 'n Geseënde Kersfees aan al ons lesers! Dankie vir u troue ondersteuning gedurende die jaar wat van www.praag.co.za 'n gedugte speler in die nuwe Afrikaanse media gemaak het.
Hoewel Kersdag ook 'n heidense oorsprong het as die dag waarop die sonnewending in die noordelike halfrond gevier is, het dit reeds tweeduisend jaar lank 'n Christelike betekenis as die geboortedag van Jesus Christus wat vir ons sondes aan die kruis gesterf het.
Kersfees 2008 kom aan die einde van 'n jaar waartydens die onsekerheid wat ons as volk tans teister weereens verdiep het. Nie net die wêreldwye ekonomiese afswaai nie, maar ook Suid-Afrika se vele politieke en sosiale probleme waaraan daar feitlik niks gedoen word nie, stem baie Afrkaners tot pessimisme. Vele verlaat ons vaderland of beplan om dit te verlaat op soek na 'n beter toekoms elders.
Wat die Afrikaner egter byna uniek onder Westerse volke maak, is sy onwrikbare geloof. Kersfees is daarom 'n goeie tyd om ons geloof in 'n toekoms in 'n eie vrye vaderland – dít waarvoor ons voorgeslagte soveel opgeoffer het – te herbevestig. In die jaar wat kom, gaan ons opnuut gelouter word deur 'n onregverdige en dikwels rassistiese bestel wat deur buitelandse moondhede en verraaiers in eie geledere op ons afgedwing is.
Dit sou 'n illusie wees om te dink dat die komende verkiesing waartydens die Nguni-party, die ANC, die Sotho-party van Lekota en Shilowa mekaar die stryd gaan aansê hoegenaamd enigiets aan die Afrikaner se lot as slaaf en belastingbetaler gaan verander.
D.F. Malan se beroemde motto, "Glo in jou God! Glo in jou volk! Glo in jouself!" is vandag meer as ooit op ons van toepassing. Indien elkeen van ons in ons eie vermoëns glo, asook ons intellektuele en fisieke vermoëns om ons van die huidige verdrukking te bevry, sál ons onstuitbaar raak. Terwyl daar egter gemor en getwyfel word, sal ons in die huidige moeras bly vasval.
Kersdag is by uitstek ook 'n dag waarop Afrikaners landwyd en selfs globaal – denkende aan ons vele familielede wat weens geweld en rassisme in ons eie land in die buiteland verkeer – as gesinne feesvier. Dis ook 'n dag wat deur die gasvryheid en geselligheid waarvoor ons mense beroemd is, gekenmerk word.
Op sulke dae ervaar ons die oorvloed wat ons hier op die wêreld se armste kontinent, in 'n byna onherbersame land, geskep het, bloot deur ons vernuf en werkywer. Laat die trots waarmee elke gasvrou en gasheer hul feesmaal op Kersdag gaan voorsit, ons inspireer om dieselfde trots in die prestasies en vermoëns van die Afrikaner te ontwikkel.
In 'n wêreld van gebrek en selfs hongersnood, voorsien Afrikanerboere die hele subkontinent van voedsel. Feitlik alles wat ons elke dag, maar ook op Kersdag, aan tafel aan ons kinders en gades voorsit, word deur Afrikaners iewers in ons land geproduseer. Hierdie wonderbaarlike landboubedryf, soos ons taal, kultuur en selfs fisieke voortbestaan, word bedreig deur die soort bose en rassistiese ideologie wat reeds 'n Zimbabwe op sy knieë gebring het.
Terwyl ons op Kersdag die vrugte van die Goeie geniet, laat ons nie vergeet dat die Bose afgunstig op ons welvaart, sukses en vrede is nie. En ons verkeer reeds in 'n Bose bestel wat elke dag sy haat en nyd jeens ons volk op velerlei wyses demonstreer.
Christus het na die aarde gekom om vrede te bring, maar daarvoor is hy gekruisig. Op soortgelyke wyse wou die Afrikaner vrede en welvaart in Suid-Afrika skep, maar is ons verguis en belaster. Vandag word ons in ons huise en op ons plase dikwels grusaam vermoor.
Christus roep ons ook op om vir Hom soldaat te wees en om Sy erfenis en ons geliefdes met alles te verdedig, as dit moet.
Laat ons in die komende jare, in 2009 en vorentoe, soldate vir ons Verlosser wees en ons van hierdie bose bestel bevry.
Nog twee Xhosa-jeugdiges is in die Oos-Kaap dood as gevolg van besnydenisprobleme, wat die sterftesyfer vir die seisoen se inisiasiekandidate op 9 te staan bring, het die departement van gesondheid Dinsdag gesê.
Woordvoerder Sizwe Kupelo het gesê een jeugdige is Maandagoggend dood verklaar met sy aankoms by Mthatha se Nelson Mandela-akademiesehospitaal.
Die dood van 'n jeugdige by die Mlamli-hospitaal in Sterkspruit is ook bevestig.
Kupelo het gesê dat hy nie weet wat die doodsoorsaak van die individuele gevalle is nie, maar dat septisemie en ontwatering die grootste doodsoorsaak by inisiasiekandidate is.
Nog 'n kandidaat het oor die naweek verdrink in die Libode-gebied toe hy in die rivier ingegaan het vir die tradisionele wasseremonie aan die einde van die inisiasieritueel.
Twaalf jeugdiges word tans behandel in die Nelson Mandela-hospitaal en 17 in die Mthatha-algemenehospitaal.
Hy het gesê die departement het 'n opgrawingsbevel uitgereik vir die liggaam van 'n jeugdige wat dood is in die Maluti-gebied van Transkei verlede week en sonder seremonie begrawe is naby die inisiasieskool wat hy bygewoon het.
'n Nadoodse ondersoek sal gehou word om vas te stel wat die doodsoorsaak is, waarna die liggaam vir 'n behoorlike begrafnis aan die ouers oorhandig sal word.
'n VN-wapenkenner het Dinsdag gesê dat daar geen bewys is dat ammunisie wat in Augustus van die DRK na Zimbabwe gevlieg is se oorsprong in Sjina is nie.
"Dit is moontlik, maar ons het geen bewyse nie," het Jason Sterns, 'n lid van die paneel van VN-kenners wat 'n verslag saamgestel het oor wapenoordragte na en van die oorloggeteisterde Kongo aan AFP gesê.
Hy het gesê mediaberigte wat die VN verlede week aangehaal het, waarin daar gesê is dat betroubare inligting bestaan dat Zimbabwe Sjinese wapens deur Soedan en die DRK ontvang het nie korrek is nie.
Die verslag aan die VN-veiligheidsraad het gesê die kenners is bewus daarvan dat daar "groot hoeveelhede wapens en ammunisie in die oostelike Kongo aankom, sonder enige bekendmaking deur die uitvoerders aan die VN se sanksieskomitee, en dat die Kongolese weermag 'ook dalk wapens en ammunisie kan uitvoer na ander lande in die streek.'"
"Siende dat die DRK nie self wapens en ammunisie vervaardig nie, moes die voorrraad ingevoer gewees het na die DRK sonder enige kennisgewing en dan moontlik in oortreding van die oorspronklike eindgebruikersooreenkoms met die oorspronklike uitvoerder," het die verslag gesê, wat 12 Desember gedateer was.
Die verslag het verwys na vier Boeing-vlugte wat tussen 20 en 22 Augustus vanjaar plaasgevind het tussen Kinshasa, Harare en Lubumbashi, wat 'n totaal van 53 ton ammunisie bevat het en bestem was vir die Zimbabwiese weermag .
"Terwyl dit nie 'n oortreding van die wapenverbod is nie, is dit 'n aanduiding dat die DRK wel 'n oordragpunt kan wees vir wapens wat bestem is vir ander lande," het die verslag gelui.
Die Nuwejaar behoort 'n spoedige oplossing te bring vir die uiters onuithoudbare toestand in Zimbabwe, het Jacob Zuma Dinsdag in sy Kersfees- en Nuwejaarsboodskap gesê.
"Ek het op verskeie kere my toenemende kommer uitgespreek oor die ernstige politieke krisis en meegaande menslike tragedie in Zimbabwe," het Zuma gesê.
Hy het bevestig dat die ANC sy 97ste herdenking sal vier en sy verkiesingsmanifes in Oos-Londen op 10 Januarie sal bekendmaak.
Zuma het gesê dat Suid-Afrika nou 'n regering nodig het met ondervinding en politieke wilskrag, en wat ten volle verstaan wat gedoen moet word om die apartheidsverlede aan te spreek.
"Terwyl ons trots is op die sterk fondasie wat deur ons lang heroïese geskiedenis daargestel is, is die ANC eintlik 'n organisasie wat vorentoe kyk en daaraan toegewy is om verandering en dienslewering te versnel, om die lewens van elke burger te verbeter.
Hy was baie bewus daarvan dat 2008 in 'n ekonomiese sin 'n baie moeilike jaar was vir baie suid-Afrikaners.
"Die ekonomiese beleid wat die ANC-regering gevolg het, het veroorsaak dat die internasionale ekonomiese resessie nie die land so erg benadeel het as wat dit kon nie."
"Ek is wel terdeë daarvan bewus dat daar poste verlore gaan en dat baie Suid-Afrikaners die gevolge van die ekonomiese daling ervaar," het Zuma gesê.
"Ons het steeds 'n lang pad om te gaan voordat ons kan sê dat ons 'n meer regverdige samelewing het wat die erfenis van apartheid oorwin het."
"Tog bly ons toegewyd aan 'n ontwikkelende staat, met die uitwissing van armoede en werkskepping as ons belangrikste prioriteite," het hy verder gesê.
