Immigrante sal tot 10 jaar lank moet wag om Britse voordele en staatsbehuising te kan kry volgens die taaiste wetgewing nog in dekades, is gisteraand afgekondig.
Dié wat hard werk, wetsgehoorsaam is en vrywilligerwerk doen sal ná twee jaar vir voordele oorweeg word.
Die ander sal die volle 5 jaar moet wag voordat hulle voordele kan eis.
Dit geskiedn in 'n poging om immigrante te ontmoedig wat Brittanje as 'n maklik teiken sien om welsynsvoordele te bekom.
Een van die verdagte beplanners van verlede maand se aanvalle deur gewapende mans in Moembaai is deur Pakistani sekerheidsmagte gearresteer ná 'n aanval op 'n militêre kamp, het 'n beampte gesê wat welsynskakels met die groep handhaaf Maandag gesê.
"Ja, Lakhvi is een van die vier of vyf mans wat gearresteer is in die aanval gister," het die beampte, wie se JUD-welsynsorganisasie beskou word as 'n front vir die gevreesde militante groep, gesê.
Pakistani-inligtingsoffisiere het gesê dat ses mans gearresteer is, maar het geen name genoem nie. Daar was ook geen amptelike bevestiging van die aanval nie.
Wêreldmarkte het Maandag herstel ná Sjinese beamptes nuwe maatreëls ingestel het om groei aan te moedig en verkose president Barack Obama gesê het dat die wêreld se grootste ekonomie homself uit die resessie gaan bestee.
Groot Europese markte het gestyg tydens die opening met Brittanje se FTSE-100 wat 5,5% geklim het tot 4 272,42, Duitsland se DAX het 6,4% gestyf tot 4 661,19 en Frankryk se CAC-40 wat 6,8% toegeneem het in waarde tot op 3 191,34.
Soos hulle kollegas in Amerika Vrydag gemaak het, het Asiese en Europese beleggers nuus dat Amerikaanse werkgewers 533 000 poste gaan verminder in November, die meeste in 34 jaar, geïgnoreer. In plaas daarvan het beleggers moed geskep uit tekens dat die wêreld se grootste ekonomieë meer moeite doen om ekonomiese groei aan te help.
Die kabinet het die groen lig gegee vir voorgestelde veranderinge aan die wet om polisie toe te laat om toegang tot databasisse te kry wat vingerafdrukke van miljoene burgers en buitelanders bevat. Dit is gemik op die verbetering van hulle vermoë om verdagtes op te spoor en die vervolgingsyfers te verbeter.
Die konsepwet sal ook aan die SAPD verhoogde magte gee om vingerafdrukke en "biometriese materiaal" te kan neem en stoor, en sal ook die daarstelling van 'n DNS-databasis as teenmisdaadinstrument ondersteun.
Die regering sal ook toegang hê tot die databasis van die bestuurslisensies, wat aan hulle ongekende beheer oor misdadigers en landsburgers sal gee.
Sjina het Maandag erge kritiek uitgespreek teen Nicolas Sarkozy, die Franse president, omdat hy die Dalai Lama ontmoet het, met koerante wat hom as "arrogant" beskryf 'n dag nadat die Franse ambassadeur ingeroep is deur Beijing om teen die vergadering protes aan te teken.
Sjina se verhoudinge met Frankryk was maar baie stram ná die uitvalle in April oor die Tibetaangeleentheid, toe pro-Tibettaanse betogers in massas in die strate van Parys byeengekom het toe die Olimpiese vlam op die roete deur die stad geneem is.
Sommige Sjinese het gevra vir 'n boikot op Franse produkte, maar dit is grootliks geïgnoreer.
Sarkozy het die Dalai Lama Saterdag in Gdansk, Pole ontmoet, gedurende vieringe om die voormalige Poolse president Lech Walensa se Nobelvredesprys se 25ste herdenking te vier.
Die Dalai Lama het ook die prys ontvang.
Sarkozy het vroeër die hele saak afgemaak en gesê "daar is geen rede om so 'n drama van die kwessie te maak nie."
Suid-Afrikaanse selfoonbetaaldiensverskaffer POCit het te voorskyn gekom met 'n voorloper in selfoonbetalingstegnologie en om skelms te flous. 
Hulle noem dit POCitMoney, 'n bedrieglik eenvoudige, heeltemal veilige manier om sake te doen. Dit is gemaklik om te gebruik, heeltemal bestand teen diewe en skep nuwe gerief vir vakansiegangers en kopers.
POCit is 'n filiaal van 'n groot inligtingstegnologiemaatskappy, Tradebridge en word deur Capitech Bank ondersteun. Capitech is die vinnigste groeiende bank in Suid-Afrika.
POCit kan op enige selfoon met 'n kleurskerm gebruik word, en op enige netwerk.
POCit kan geld stuur of ontvang van enige bank en al wat die betaler nodig het, is die selfoonnommer van die ontvanger. Verder het POCit ook nie 'n spesiale simkaart nodig nie.
Ons leef in 'n weergawe van die ou Amerikaanse Wilde Weste – en die sheriff is lamlendig, onbelangstellend of hy is die een wat sy gesig agter 'n nekdoek wegsteek.
Net soos in die Ongetemdheid (die "Frontier") is wetstoepassing by ons ook yl teenwoordig. En ons word net so geteister deur menssoortige aasdiere wat gedy in die kompos van wetteloosheid.
Die groot verskil is natuurlik dat die Amerikaanse Ongetemdheidsburgers aanvaar het dat die staat nie by hulle misdaadkrisis gaan ingryp nie. Hoewel die beeld van die skrefiesoogcowboy, met die langlooppistole laag teen sy been vasgegespe, natuurlik gruwelik verromantiseer is, wás die gewone burger goed bewapen en – belangriker – die skietgoed was altyd byderhand. En – ook anders as in die Hollywood-weergawe – was die gemiddelde dorpenaar nie maar net 'n hardwerkende dog verbeeldinglose, ontruggrate lam ter slagting nie. Wanneer hulle deur rampokkers bedreig is, en niemand anders kon help nie… het hulle nie 'n telegram vir die A-Team gestuur nie – nee! – hulle het self die probleem laat weggaan.
Hulle het, byvoorbeeld, die gewelddadige James Younger-bende laat weggaan. Nadat die moorddadige Jesse James sonder noemenswaardige sukses deur die Amerikaanse regering, 'n kohort wetstoepassers en selfs die befaamde Pinkertonspeuragentskap van bakboord na stuurboord gejaag is, het die bende hulleself te pletter geloop teen die gemeenskap van die dorpie Northfield in Minnesota. Hulle het een bank te veel probeer roof. Die inwoners het hulleself vir die spul vererg, diverse pistole, Winchesters en haelgewere uitgeryg en die bende sat geskiet.
As jy getrou jou Louis L'Amour gelees het, sal jy weet dat 'n ordentlike, wetsgehoorsame man met 'n pistool 'n indrukwekkende mag van geregtigheid is. In ons land is dit al deeglik gedemonstreer. Toe die APLA-moordenaars die St. James-kerkdiens onderbreek het, AK en granaat in die hand, het 'n enkele moedige en wyse jongman, Charl van Wyk, vuur beantwoord met sy handwapen. Die rowers se veglus is deur hulle vlugdrang verplaas en hulle het hakke gekap om weg te kom.
Daar is niks wat 'n geweldenaar se moed so uit sy lyf pluk soos 'n ontstelde landsburger met donkerbek in die hand nie. Israel is 'n tyd lank gestriem deur aanvalle van terroriste wat verwoed tussen hulpelose skares ongewapende mense ingevuur het. Dié terroristestyl het skielik einde gekry – toe die Israeliregering gewone burgers nie net gemagtig het om wapens by hulle te dra nie, maar hulle inderdaad aangemoedig het om dit te doen. 'n Terroris se korttermyntoekoms is maar aan die grys kant as verwoede burgers uit alle oorde begin terug losbrand. Moslemterroriste het nie vir aanvalle waartydens slagoffers terugveg ingeskryf nie, so nou wend hulle hulle maar tot bomaanvalle.
Indië, daarenteen, het in 'n politieke slappolsoomblik burgerlikes net omtrent verbied om vuurwapens te besit of nog erger – o die afgryslikheid – by hulle te dra. In die pas afgelope Moembaai-slagting het die terroriste doodluiters rondgestap en magasyn na magasyn in die samedrommende burgers leeggeskiet. As Charl van Wyk daar was met sy getroue handwapen, sou die koerantopskrifte anders gelyk het.
'n Fotograaf, Sebastian D'Souza, het 'n opspraakwekkende foto van een van die terroriste geneem wat ronddrentel op die uitkyk vir net nog slagoffers. "Ek wens ek het 'n geweer in plaas van 'n kamera gehad!" skryf D'Souza agterna. As hy 'n geweer gehad het, kon hy 'n erekerfie in die kolf gemaak het want daar sou een terrie goed foersies gewees het. Die terroris was so houtgerus dat hy nie eers 'n magasyn in sy Kalasjnikof gehad het nie! (Die Indiese polisie het nie dié geleentheid aangegryp nie maar het in patetiese hopies agter skuilings gelê en probeer maak of hulle nie daar is nie, selfs nádat D'Souza by hulle gepleit het om tog net te begin skiet.)
Ons het nie (op die oomblik) ('n georganiseerde) terreurprobleem in Suid-Afrika nie. Maar ons het 'n geweldsmisdaadprobleem wat meer lewens op afgrysliker wyse stroop as die normale terrorismevlaag. Ons polisie is te min, te swak betaal, te beteuterd opgelei en te korrup om ons te beskerm. (Nie ál die polisielede is korrup nie maar die helfte wat eerbaar is, moet te veel tyd afstaan om die ander dop te hou en kan sodoende nie hulle volle aandag aan misdaadbekamping wy nie.)
So, dis die Wilde Weste hier – met een deurslaggewende verskil: Die gewone burger in die Ongetemdheid het sy Colt .45 "Vredemaker" aan hom gedra waar almal dit kan sien. En in die saalskede was daar 'n Winchester .45-70 wat kragtig genoeg is om enige misdadiger in sy spore om te dop.
Daar kan nou gevra word of ek bepleit dat elke wetsgehoorsame burger tot die tande toe gewapen Pick 'n Pay toe sal gaan? Hmm. Wel. Dis 'n goeie begin, is dit nie? Maar dis bietjie min, bietjie onduidelik vir my. Ek wil hê die regering moet erns maak met misdaad, en hier is hoe:
Rus elke wetsgehoorsame burger met 'n R4-stormgeweer toe en dwing hulle wetgewend om nooit op straat sonder dit te verskyn nie. As 'n persoon nie vir 'n wapen kwalifiseer nie, moet hy te alle tye 'n amptelike vryskelding by hom dra. En dan wys jy vir my die rower wat doodluiters in die Kolonnade sal instap om dit te roof terwyl daar driehonderd keelvol manne en vroue hulle inkopies met R4 oor die skouer of in die winkeltrollie doen.
Voorts moet die regering 'n nuwe "skiet-eers-en-vra-dan"-wet deurvoer. Daarvolgens moet enige huiseienaar die reg – nee, die plig! – hê om enige ongenooide besoeker of oortreder in die gesig te skiet. Ek was op die grens en glo my, enige iemand wat 'n R4-koeël gesluk het, se moorddadige entoesiasme word net daar en dan gedemp.
By Praag spook ons jare lank al om 'n vreedsame, werkbare politieke uitweg vir die Afrikaner se toekoms te bewerkstellig. Ons sou graag die vrede en veiligheid van elke mens in hierdie land – wit, swart of tussenin – wou waarborg. Dít kan ons nie. Maar as ons Afrikaners saamstaan sal ons nie te lank van nou af veilig en voorspoedig in 'n land woon waar gewapende, wetsgehoorsame burgers die polisie en die weermag met woord, daad en 5,56mm-rondtes bystaan om misdaad uitgeroei te hou.
Nie soos in hierdie land, hierdie bloedbesmette Nuwe Suid-Afrika nie. Hier erken die regering hulle is nie opgewasse om misdaad hoegenaamd te bestry nie, al is hierdie belydenis net opsigtelik in 'n televisieadvertensie wat maan dat die stryd teen misdaad "by jou begin".
Nee, dit begin nie by my nie. Dit begin by die regering en sy veiligheidsmagte wat 'n heilige, Bybelse plig het om die "swaard teen die boosdoener te dra".
Maar goed. Dít gaan nie gebeur nie. Ek het 'n groot 9mm-pistool. Ek weet hoe om hom te gebruik. Ek het ook 'n span lawaaierige honde. En as 'n misdadiger my huis betree, gaan my honde alarm maak. Ek gaan my pistool opneem.
En dan gaan ek voortgaan om my deel te doen.
Die aantal internetgebruikers in Suid-Afrika het teen die vinnigste koers sedert 2001 gegroei, dui 'n studie aan wat Donderdag vrygestel is.
“ Groei het hoofsaaklik op die rug van dramatiese aanbiedinge van breëband deur kleinbesighede plaasgevind, wat op hulle eie vir amper helfte die groei in die mark verantwoordelik was,” het Arthur Goldstuck, die hoof van World Wide Worx in 'n verklaring gesê.
Die verskuiwing het gekom in die konteks van alle internetgebruikers wat inskakelinternetverbindings, wat telefoonlyne gebruik, laat staan het ter wille van vinniger breëbandverbindings.
Die studie volg op 'n onlangse besluit deur die Minister van Kommunikasie, Ivy Matsepe-Casaburri, om nie te appelleer teen 'n hofbeslissing wat Waardetoevoegingsnetwerkdienste (WTND’s) toelaat om hulle eie netwerke op te rig nie.
WTND’s moes voorheen aansoek doen vir individuele lisensies van die Onafhanklike Kommunikasie-owerheid van Suid-Afrika.
Reshaad Ahmed, 'n seniorbestuurder by Cisco, sê in 'n verklaring: “Ons glo die verandering sal tot voldoende vlakke van kompetisie lei, wat toegang tot internetgebruik sal verhoog en sodoende wêreldwye kompeterendheid en ekonomiese diversiteit sal verhoog.”
Hy het gespekuleer dat Suid-Afrika 'n algehele ontploffing van internetdiensverskaffers gedurende die volgende jaar kan sien.
In sameloop hiermee sal nuwe ondersese kabels wat meer internetverbindings kan verskaf, na wat beplan word, in die middel van 2009 in werking kom.
Een kabel, die Seacom, sal Suid-Afrika se internasionale bandwydte veertigvoudig verhoog, sê World Wide Worx.
Drie gewapende mans het by 'n welbekende juweliersfirma in die hart van Parys ingebreek en met juwele en ander handelsware van meer as R650-miljoen weggekom, het Franse media vandag berig. Indien die waarde van die buit bevestig word, sal dit een van die grootste suksesvolle juweelrooftogte van alle tye wees.
Harry Winston is een van die wêreld se beroemdste juweliers. Hy het die befaamde tiara ontwerp wat deur die Keiserin Farah Diba tydens haar troue met Sjah Mohammed Reza van Iran gedra is. Hy het ook die beroemde peervormige diamant van amper 70 karaat geslyp wat die akteur Richard Burton vir sy vrou Elizabeth Taylor met haar 40ste verjaarsdag gekoop het.
Bykans 'n jaar gelede tot op die dag, op die 6de Desember 2007, het rowers by dieselfde winkel in Parys ingebreek en amper R130-miljoen se juwele gesteel.
'n Russiese oorlogskip is reg om Vrydag deur die Panamakanaal te vaar vir die eerste keer sedert die 2de Wêreldoorlog in 'n simboliese uitdaging teenoor die Amerikaanse invloed in die gebied.
Die groot anti-duikbootvaartuig, Admiraal Tsjabanenko, is geskeduleer om die waterweg tussen die Atlantiese- en Stille-oseaan deur te gaan êrens tussen Vrydagaand en Saterdagoggend, het die Russiese ambassade in Panama Donderdag gesê.
Die enigste keer wat so iets plaasgevind het, was in 1944 gedurende die 2d wêreldoorlog, toe vier Russiese duikbote deur die kanaal gevaar het, het die ambassade in 'n verklaring gesê.
Op daardie tydstip, toe die kanaal onder Amerikaanse beheer was, was Rusland en Amerika geallieerd in die teen-Nazikoalisie, het die ambassade bygevoeg.
Die geskeduleerde vaart deur die kanaal kom nadat die Russiese oorlogskepe Dinsdag twee dae se geskeduleerde oefeninge saam met die Venezualaanse vloot gedoen het.
Die aankoms van die Russiese skepe op uitnodiging van Venezuela word beskou as 'n uitdaging van Amerika se mag in Latyns-Amerika.
Rusland het ontken dat die oefening gemik is op enige "derde lande."
Moskou het die oefening aangekondig nadat president George W. Bush vlootvaartuie gestuur het na Georgië gedurende die Georgies-Russiese konflik in Augustus, wat die Kremlin kwaad gemaak het. Washington het gesê die oorlogskepe het humanitêre hulpvoorraad aan boord gehad.
Nadat die Russiese skip deur die kanaal gevaar het, sal die skip met sy 451 bemanningslede in Panama aanbly tot 11 Desember, by wat voorheen 'n Amerikaanse basis was.
Panama se minister van buitelandse sake, Samuel Lewis Navarro, het Donderdag gesê dat "soos ons almal weet is die Panamakanaal oop vir alle skepe ter wêreld," en so die kanaal se neutrale status weer bevestig.
