Die president van die African National Congress Jacob Zuma het in 'n onderhoud met Business Day gesê dat ekonomiese beleid nie onder 'n nuwe regering sal verander nie.
Hy het gesê dat Suid-Afrika 'n afswaai in globale finansiële markte kan weerstaan maar dat plaaslike groei as gevolg daarvan stadiger mag wees.
Die regering het vrese dat 'n resessie op pad is, verwerp.
Beleggers het hul kommer uitgespreek oor toekomstige ekonomiese beleid in Suid-Afrika as Zuma die mag oorneem.
Zuma meen die ANC stem nie saam met die SAKP dat Mbeki behoort te bedank voor die einde van sy termyn nie.
Die Suid-Afrikaanse Weerdiens het gister gewaarsku dat 'n koue naweek vir die grootste deel van die land voorlê.
Sneeu word oor Lesotho gedurende die naweek verwag.
Buie en donderbuie word ná die koue front oor die oostelike helfte van die land verwag.
Koue temperature in Gauteng is nog nie verby nie en temperature van minder as 15 grade Celsius word oor die naweek verwag.
Volgens die weerdiens behoort die storms wat tans die Weskaap teister teen vandag verby te wees.
Buitelanders hou tans 'n sitstaking voor die Durbanse stadsaal.
Hulle maak beswaar teen die plaaslike en provinsiale regering se onvermoë om die krisis op te los.
Sedert verlede week het kerke nie meer geld en kos nie en die eThekwini-munisipaliteit het nou aan buitelanders aan wie hy onderdak gee gesê om alternatiewe akkomodasie te vind.
Die stadsbestuurder Mike Sucliffe blyk nie beskikbaar te wees om die saak aan te spreek nie.
Suid-Afrikaanse burgers het hul minagting teenoor die groep getoon deur hulle reguit aan te sê om na Zimbabwe terug te keer en vir Tsvangirai te gaan stem.
‘n Entoesiastiese hengelaar, mnr. Clive Hunter, is by Alkantstrand in Richardsbaai doodgeskiet nadat hy sy vrou aangesê het om in die see in te hardloop.
Die voorval het kort voor sesuur plaasgevind toe Hunter gemeen het hy en sy vrou behoort op te pak aangesien al die ander hengelaars reeds vertrek het.
Vier Zoeloesprekende mans het uit die bosse gekom en met hulle begin praat. Hunter het bekommerd geraak en vir sy vrou Zelda geskree om in die see in te hardloop. Sy het al langs die strand af na die naaste pier gehardloop om hulp te kry, maar was te laat om haar man te red.
Die aanvallers het die 35-jarige Hunter morsdood in die hart en long geskiet.
Rassekwotas in krieket het Suid-Afrika weereens gebyt toe Kevin Pietersen 'n honderdtal vir Engeland teen die Proteas op Lords gemoker het.
Pietersen het sy geboorteland, Suid-Afrika, verlaat nadat hy 'n slagoffer van rassekwotas geword het.
Hy het sedertdien die sterkolwer in die Engelse span geword.
Gister het hy 'n foutlose beurt gespeel en was teen die einde van die spel op 'n honderd-en-vier nie uit nie.
Engeland is in 'n sterk posisie oornag met 'n totaal van driehonderd-en-nege vir drie.
Pietersen sê die applous wat hy ontvang het toe hy van die veld afgestap het, het vir hom die mees emosionele twee minute van sy lewe verskaf.
Hy sê die Suid-Afrikaners het sy prestasie hartlik begroet en hy was veral aangedun toe hy in gelukwensing deur die vurige snelbouler, André Nel, hom omhels het.
Die Zimbabwiese opposisieparty, die MDC, het berigte dat lede van die party opleiding in geweld ontvang, as suiwer propaganda afgemaak.
MDC-woordvoerder Nelson Chamisa, sê die party het homself nog nooit tot geweld gewend nie en dat enige persoon wat dit sou doen, nie langer 'n lid van die party kan wees nie.
Die uitvoerende direkteur van die Raad vir Geesteswetenskaplike Navorsing, Kwandiwe Kondlo, sê egter dat hulle oortuig is dat MDC-lede opleiding ontvang.
Hy sê die geweldskultuur van ZANU-PF het oorgespoel na die MDC.
Die MDA sê verder hulle is nie in die proses om met die regering van Zimbabwe te onderhandel nie.
Die party het gister gesprekke met die regering gevoer maar sê niks substansieels is bespreek nie.
Die leier van die party, Morgan Tsvangira, sê hulle het slegs die voorwaardes neergelê waaronder hulle gewillig sal wees om in onderhandelinge betrokke te raak.
Hy sê geen onderhandelinge is moontlik terwyl die regime van Robert Mugabe oorlog voer teen die MDC en die mense van Zimbabwe nie.
Die MDC sê ten minste 'n honderd van hulle ondersteuners is deur Mugabe se milisie om die lewe gebring tydens die verkiesing.
Alle oë sal vandag by die Verenigde Nasies op Suid-Afrika wees.
Brittanje, die Verenigde State en ander Westerse lande beywer hulle vir verskerpte sanksies teen Zimbabwe.
Stormweer in die Weskaap het 'n ingrypende uitwerking op 'n toenemende aantal mense.
Amptenare sê dat ten minste 38 000 mense tot dusver ontwrig is.
35 000 mense in Kaapstad is gedwing om noodstappe te neem met baie van hulle, veral in informele nedersettings, wat gedwing is om hulle huise te ontruim.
In die Kaapse Wynland en die Sentraal-Karoo is honderde mense deur blitsvloede en stygende vloedwater afgesny.
Owerhede het geskarrel om komberse en voedsel by geteisterde gemeenskappe uit te kry.
Paaie en brûe is in die vloede beskadig en 'n aantal roetes is vir verkeer gesluit.
Die lotgevalle van klein volkere en tale word dikwels bepaal deur gebeurtenisse en prosesse wat hulle elders afspeel.
Dit was meermale die geval met die Afrikaners en Afrikaans. So ’n beslissende tyd was omstreeks 1672 – twintig jaar nadat Jan van Riebeeck met die nedersetting aan die Kaap begin het.
In 1664 het Nederland 'n verlies van wêreldhistoriese betekenis gely. Op 4 September het Pieter Stuyvesant, direkteur van die kolonie Nieu-Nederland in Noord-Amerika, 'n verdrag van oorgawe van die kolonie aan Brittanje onderteken. Die naam van die hoofstad, Nieu-Amsterdam, is dadelik verander na New York. Stil-stil het Nederlands begin verdwyn uit die land wat drie eeue daarna die magtigste moondheid op aarde sou wees.
Kort ná die verlies van Noord-Amerika het die stryd tussen Engeland en Nederland verder gegaan. Die Nederlanders het in 1666 en 1667 onder Michiel de Ruyter groot seeslae teen die Engelse gewen, selfs in die Teems opgevaar en verskeie Britse oorlogskepe verwoes. Maar in 1672 is Nederland, en daarmee sy klein kolonie aan die Kaap, met ondergang bedreig. Lodewyk XIV van Frankryk het Nederland al meer as die vernaamste teenstander vir sy planne in Europa gesien en die republiek probeer isoleer en uitwis. In die geheim is allerlei ooreenkomste bekook.
Terwyl die Nederlandse volk nog gemeen het dat hy veilig is, het Frankryk in 1672 skielik oorlog verklaar. Groot was die skok toe Brittanje en die Duitse biskoppe van Munster en Keulen dit ook doen. Sou Nederland dié oorlog verloor, sou dit as selfstandige nasie moes verdwyn.
Die volk was moedeloos en radeloos. Twee leiers het deur hul kragtige optrede egter verhinder dat Nederland ondergaan: prins Willem III van Oranje en admiraal Michiel de Ruyter. Willem III het die dyke langs die Suidersee oopgesteek en 'n waterlinie tot aan die Ryn gevorm. Daaragter kon hy die leër weer opbou. De Ruyter het daarin geslaag om die Brits-Franse vloot verskeie kere af te weer sodat sy gehawende teenstanders op die ou end die aftog moes blaas. Sowat 900 mense op die Britse skip Royal James het verdrink toe dit ontplof het.
Willem III van Oranje en De Ruyter het Nederland gered — en daarmee onregstreeks ook die Afrikaanse volk en taal. As die moederland tot 'n val gekom het, sou die Kaap gou die prooi van 'n Britse of Franse vloot geword het. Van Nederlands of 'n ontluikende Afrikaans sou niks oorgebly het indien Nederland die Kaap in 1672 moes afstaan nie. Dit was 'n sukkelende nedersetting, wat in die tien jaar ná 1662 byna nie uitgebrei het nie. So was daar in 1672 net 64 vryburgers en 53 blanke knegte aan die Kaap — darem 39 vroue ook.
Daarby was dit jare van ontbering. Die vryburgers kon nog nie genoeg produseer vir die Kaap nie. Party gesinne was so arm dat die kinders snags op die grond op 'n bietjie strooi moes slaap. Die vee het langsaam meer geword, want wilde diere, veral leeus, het baie doodgebyt. Ten tyde van die oorlog is hard gewerk aan die Kasteel wat op 26 April 1679 amptelik voltooi is.
Die skitterende wyse waarop Nederland hom verdedig het, het daartoe gelei dat Brittanje in 1674 vrede gesluit het. Op 26 Januarie 1678 het nog iets van groot betekenis gebeur. 'n Nederlands-Britse verbond is gesluit. Daarmee het 'n einde gekom aan die oorloë tussen die twee lande. Die vrede en samewerking sou 'n goeie eeu duur voordat dit weer versteur is. Omdat Brittanje die enigste moondheid was wat 'n bedreiging vir die Nederlandse kolonies kon vorm, het die bondgenootskap verseker dat die kolonies heeltemal veilig was. So kon die klein gemeenskap aan die Kaap ongestoord ontwikkel.
'n Politieke bakleiery het tussen Duitsland se regerende koalisievennote uitgebreek oor 'n beplande besoek deur senator Obama.
Kanselier Angela Merkel wil nie hê dat Obama 'n toespraak by die Brandenburghek gee nie.
Frank-Walter Steinmeier, die buitelandse minister en visekanselier, stem nie saam nie.
Die burgemeester van Berlyn moet nou besluit of die stad die waarskynlike Demokratiese kandidaat gaan toelaat of nie.
Obama is ongewoon gewild in Duitsland en die kanse is goed dat hy sy toespraak by die monumentale hek sal kan hou.
John F. Kennedy het naby aan die Brandenburghek gestaan toe hy gesê het: Ich bin ein Berliner.
In 1987 het president Ronald Reagan daar vir mnr. Gorbatsjof gevra om die muur af te breek.
Veertien immigrante uit Afrika, waaronder nege kinders, is dood aan hitte-uitputting in 'n poging om die EU vanuit Afrika te bereik.
Die Spaanse nuusagentskap EFE sê die Spaanse kuswag het die ander 35 mense gered.
Aan die begin van die week het veertien Nigeriese immigrante naby die Spaanse kus vedrink toe hul boot in 'n stormagtige see omgeslaan het.
Duisende swartes uit Afrika sterf elke jaar tydens pogings om 'n beter lewe in die EU te bereik.
Spanje se sosialistiese regering is beslis dat almal wat sonder visums aankom, gerepatrieer sal word.
