south africa sucks – praag.co.za

My onregmatige en onwettige arrestasie – Uhuru Guru

In antwoord op die vrae wat Anton Barnard rondom die vreemde inhegtenisname en aanhouding van die webmeester Uhuru Guru van South Africa Sucks gevra het, het ons die volgende brief van 2300 woorde van Bert Oosthuizen alias Uhuru Guru ontvang. Hoewel Oosthuizen verlede week nooit formeel aangekla is nie, het Beeld sy regte naam gepubliseer, asof hy reeds in die hof verskyn het en aangekla is. Hier volg sy brief:

Ek kan u verseker dat my arrestasie onregmatig én onwettig was. Ter verduideliking in pynlike detail:

Gedurende 1993 was ek werksaam as gekontrakteerde IT konsultant by ‘n rekenaarfirma in Cresta, Johannesburg. Ek (ongetroud op daardie stadium) het ‘n ruim meenthuis besit te Castle Hill in Ferndale / Windsor. Een van die tegnici wat saam met my gewerk het (jong blanke Afrikaanse man van 21) het by my loseer vir ongeveer 5 maande. Hy het egter nie ‘n sent huur betaal in die HELE periode nie en ek het hom uiteindelik uitgegooi. ‘n Week later het hy (by die kantoor waar ons werksaam was) my motorsleutels gegaps terwyl ek in ‘n vergadering was, ‘n hardeskyf (40Mb ek dink) geneem uit sy eie werkswinkel en dit in my meenthuis gaan plant om wraak te neem teen die feit dat ek hom uitgeskop het terug na sy ouers toe.

Hy het toe teruggekom en na die eienaar van die firma gegaan en hom meegedeel dat ek komponente gesteel het. Hy het toe die eienaar na my meenthuis geneem om hom te wys. Ek was salig onbewus hiervan terwyl ek besig was met my sake-voorlegging. Hulle kom toe beide terug, waarop die eienaar my gekonfronteer het. Ek het woedend gereageer en het onmiddelik en summier bedank. Tot vandag toe skuld hulle my baie duisende rande vir werk waarvoor ek nooit betaal is nie.

Etlike jare later vind ek uit dat daar ‘n klag van diefstal en bedrog teen my is, sowel as ‘n lasbrief van my arres. Ek was stomgeslaan en het my prokureur instruksie gegee om dit dadelik uit te sorteer. Hy het oproepe gemaak na die polisie. My prokureur het my later meegedeel dat dit ‘n onbesonne en niksseggende klag was waaroor ek nie hoef te bekommer nie. Dit het geblyk dat die klag nie op die polisie databasis was nie.

Ek het dit daar gelaat en aangegaan met my lewe. Nou, sestien jaar later kom byt hierdie ding my en veroorsaak dat ek ‘n nag in die selle moes deurbring met geharde misdadigers. Die Linden SAPS het alles in hul vermoe gedoen om te verseker dat ek nie dadelik mog hof toe gaan nie, ten spyte van die feit dat my advokaat gereel het met een van die senior aanklaers om wel my borgaansoek aan te hoor.

Indien die beskuldigde NIE voor 10h00 by die hof is nie, weier die hof om die saak aan te hoor. Die advokaat het skriftelike toestemming gekry hiervoor.

Die advokaat is terug na kaptein en het hom die brief van die staatsaanklear gewys. Sy het hom toe gevra om my te stuur, en hy het toegestem. In haar teenwoordigheid het hy twee polisielede opdrag gegee om my hof toe te neem. Dit was Woensdag ongeveer 1NM.

My prokureur was op daardie stadium by my en het my gegroet en gesê “ek sien jou oor 30 min by die hof”. Kortliks na hy uitgestap het, het die een inspekteur die

dossier neergegooi en aan my gesê “ek kan jou nie hof toe neem nie, jy is nog nie aangekla nie.” Ek was verbyster en het aan hom genoem dat ek reeds 16 jaar gelede “aangekla” is. Hy het egter aangedring hy moet my eers aankla. Toe vlieg hy op en sê “ek moet gou met die kaptein (Van der Linde) gaan praat, ek kom terug oor 5 minute.

Ek wag toe vir twee ure in die selle se aanhouding area. Teen 3NM het ek paniekbevange begin word en het toe die aanhoudingselle se bevelvoerder gevra of ek my “konstitusioneel gewaarborgde” oproep mag maak. Ek wou my prokureur bel om hom mee te deel wat aan die gang is. Dit was geweier. So 3:10 NM het ‘n swart inspekeur na my toe gekom, my gevra of ek Oosthuizen is. Ek het bevestigend geantwoord. Toe vra hy my of ek my selfoon by my het (nee) en of ek geld aan my het (nee). Toe kyk hy na sy horlosie en se “eish, I’m not going to rush to get you to court now”. Ek het by hom gepleit en aan hom genoem dat die SAP my deur afgeskop

het en dat my huis tans baie onveilig is, en dat my vrou en drie dogters se veiligheid op die spel is. Hy het my egter geïgnoreer en iets in ‘n swart taal aan die sel-bevelvoerder gesê, wat my toe dadelik terug na die selle geneem het en toegesluit het.

Intussen het my prokureur en advokaat niksvermoedend by die Randburg hof gesit en wag vir my. My advokaat het etlike kere vir Kapt van der Linde gebel wat eers gesê het, hy sal terugbel, wat hy nie gedoen het nie. Toe my advokaat weer bel sê hy dat ek binnekort op pad is, dat ek geprosesseer word, aldus my regspan. Intussentyd sit ek in die selle…

Teen 3.15 NM was die hofpersoneel wie my saak sou aanhoor, weg. Hierna het my regspan teruggekeer na Linden SAP en my meegedeel dat ek die nag in die selle gaan deurbring. Die volgende oggend om 8:30 is ek geboei aan ‘n swart dwelmsmous en winkeldief, agter in ‘n vangwa gelaai en hof toe geneem. Die bestuurder het geweldig gerem, hard petrol getrap en draaie gegooi met die voertuig. Die boeie was geweldig styf en het my seergemaak, en ek het gesukkel om asem te haal omdat die twee ander gevangenes vreeslik gestink het agter in die vangwa.

By die hof aangekom het die bestuurder (‘n swart sersant) my in die hofselle ingebring en toe die boeie verwyder. Toe sê hy op Engels dat as die hof nie my saak aanhoor nie, dat ek dan nie na Linden teruggeneem word nie maar “Sun City” toe gaan. Ek was oorbluf oor sy stelling wat ek geen kop of stert van kon uitmaak nie. Wat het Sun City tog te doen met my saak? Ek dink toe vlugtig aan die crimen injuria saak van die ou wat Shane “Sies jou vark” se CD gespeel het en gearresteer is vir Crimen injuria teen Nelson Mandela, by Sun City.

Ek gesels toe met een van die ander gevangenes wat my laggend meedeel dat “Sun City” eintlik die bynaam vir Diepkloof gevangenis is. Ek was natuurlik toe uiters bekommerd dat dit nou miskien die plan met my is. Diepkloof is tans onder kwarantyn en niemand word toegelaat om hof toe te kom of enigsins die gevangenis te verlaat nie.

My regspan was op daardie stadium besig om te prober uitvind watter hof my saak gaan aanhoor. Na ‘n vreeslike gesukkel sien hulle toe my naam op ‘n bord met die woord “NOR” aangeteken langs dit. NOR beteken “Not On Roll”. Hulle kry toe die senior aanklaer wie, nadat sy my dossier bestudeer het, besluit het om nie voort te gaan nie. Die resultaat is date k onmiddellik vrygelaat moes word.

‘n Konstabel het my uit die selle kom haal en toe ek teen die trappe van die hof opstap het ek dit vreemd gevind dat dit doodstil is. Ek het verwag om in ‘n vol hofsaal in te stap en in die aangeklaagdebank te gaan staan om te kan pleit en ook vir borg aansoek te doen.

Daar was egter nie ‘n enkele siel in die hof nie, en ek het uitgestap in die gang in, heeltemaal oorbluf van wat aan die gang was. Nadat ek vir ongeveer 20 minute op en af gestap het op soek na my advokaat en prokureur, het ek hulle uiteindelik in die gange opgespoor. Ons is dadelik weg daar. Ek wil dit benadruk dat ek op GEEN stadium voor enigiemand verskyn het nie, geensins gepleit het of selfs enigiets op enige stadium met enige aanklaer of landdros te make gehad het nie. Die saak teen my was nie op enige stadium eers op die rol geplaas nie!

Die berig in Beeld, sowel as die feit dat my naam genoem het is feitelik verkeerd en grens aan kwaadwilligheid en laster.

Al my rekenaartoreusting is gekonfiskeer en ek kan tans gladnie my besigheid bedryf nie. Die lasbrief wat Woensdag oggend om 6:15VM op my gedien is toe my deur hardhandig en onnodiglik afgeskop is in tipiese Gestapo styl, is ‘n lasbrief op sterkte van crimen injuria sowel as klagtes van ongespesifiseerde kuber-misdade. Ek is nie vir enigiets anders aangekla nie maar is deur ‘n superintendent van georganiseerde misdaad gewaarsku dat afhangende van wat op my rekenaars ne bedieners gevind word, daar verdere klagtes teen my gelê gaan word. In die lig hiervan was ek dus huiwerig om publieke uitsprake te maak en was geadviseer om liefs niks te sê nie.

My skrywe hier is nou teenstrydig met my regsadvies en ek hoop nie dat ek myself verder benadeel hierdeur nie. Ek voel egter genoop om my kant te stel deur die kuber-ruim vrae wat nou die rondtes doen en veral die vals en bedrieglike wyse waarop Beeld die artikel gepubliseer het, wat soos u tereg opgemerk het, ‘n duidelike agenda van mistasting en moedswillige verdraaiing toon. My integriteit word kwaai aangetas en ek kan nie langer die vrae ignoreer nie.

Ek is nie ‘n krimineel, dief of bedrieër nie. Ek is voorts ook nie ‘n kranksinnige Al Queda terroris of Boeremag styl bedreiging vir die staat nie, maar wel ‘n dood-gewone rekenaarkonsultant vies vir hierdie vervallende kriminele land. Steeds steier ek onder die feit dat nie minder as 5 SAPS spesialis-eenhede, ondersteun deur polisiemanne van Fairland, Linden en Honeydew polisiestasies my deur kom afskop het asof my residensiele tuiste ‘n swaar-verdedigde terroristebasis is. Die aanvanklike kontingent was ongeveer 18 na 20 polisimanne, meeste in siviele drag. Later het meer polisie opgedaag en ek sou raai dat daar ten minste dertig in totaal betrokke was hierby.

Dat sulke ongelooflike hupbronne ingespan word teen ‘n onbelangrike, onbenullige nietige man soos ek is verbysterend, veral gesien in die lig van die ondenkbare wrede moorde, verkragtings en martelings van onskuldige blanke vrouens, mans en kinders wat nooit ondersoek word agv ‘n kastige “tekort aan hulpbronne” nie. Die vrae wat aan my gestel is deur die twee blanke Afrikaanse veiligheids manne (een is nogal ook ‘n Oosthuizen!) herinner aan die Sowjet-Unie en Oos Duitsland era se modus vivendi.

Hulle was geweldig geinterresseerd in my skakel met Dr Roodt, maar my regsverteenwoordiger het dadelik ‘n stokkie voor hulle ongelooflike vrae gesteek.

Wat opmerklik was, was die belangstelling (deur AL die polisiemanne) veral in die boeke geskryf deur Dr Dan Roodt, wat hulle in my kantoor in die boekrak langs my lessenaar gevind is. Al die boeke is sorgvuldig gefotografeer en enige ander boeke wat te doen het met geskiedenis (bv ek het kopiee van David Irving se werke) sowel as ‘n boek deur Richard Dawkins is versigtig gefotografeer. Ek het handleidings wat aan my gegee is gedurende my nasionale diensplig op die SWA grens in 1983, onder meer “mynbewustheid” en ander SAW materiaal, wat gemerk is “restricted”. Hierdie SAW handleidings is gekonfiskeer en daar is aan my genoem dat ek in onwettige besit is daarvan.

Daar is ook afgekom op rekenaarspeletjies, MP3-musiek en dies meer, en toe voeg die ondersoekbeamptes by dat hulle my selfs vir besit van roofprogramme (piracy) sal aankla. Dat hulle instruksies gegee is om “throw the book at him” is duidelik en ek het geen twyfel dat alles polities geinspireer is nie.

Ergste van alles, die hele aanslag op my is geïnisieer deur Fred Rundle, met wie ek ‘n lelike argument gehad het toe hy na aanleiding van Dan se Heilbron ontmoeting weereens ‘n lelike aanval op Dan geloods het. Ek en hy was (hoewel ons vriende was) gereeld haaks oor sy ongeoorloofde en onnodige aanvalle op Dan. Rundle het die polisie gekontak en verklarings afgele wat my van kuber-misdade beskuldig het.

My vrou en kinders is ongelooflik getraumatiseerd maar dis vir my ‘n riem onder die hart dat ek sulke fantastiese ondersteuning vanuit alle oorde en veral PRAAG ontvang het. Ek wil graag vir Dr Dan persoonlik bedank vir sy moeite en bewusmaking van my onregmatige arrestasie en ook aan u Anton, my dank betuig – die artikel waarop ek nou reageer is besonder goed geskryf en u is 100% korrek oor die afleidings wat u gemaak het. Ek is spyt ek het nie vroeer my mond oopgemaak om al die onsekerheid uit die weg te ruim nie maar u sal verstaan dat dit vir my ‘n skrikwekkende en skokkende ervaring was.

Vir die eerste keer in my lewe (behalwe vir ‘n verkeersoortreding ook in die ’90’s) is ek gearresteer, boeie aan my polse gevoel en was soos ‘n gewone rampokker saam met drie swart misdadigers vir die nag toegesluit, in ‘n stinkende sel om dit deur te bring op ‘n harde, koue sement vloer met honde komberse.

Ek vrees egter dat dit nog net die begin is, en verwag om die slagoffer van verdere klopjagte en arrestasies te wees, aldus my regspan.

Beste wense,

Bert Oosthuizen

Wat is die ware feite oor ZA Sucks se webmeester?

Ek het Donderdag reeds, toe gerugte oor die inhegtenisname van die webmeester van ZA Sucks begin verskyn het, my bedenkinge gehad oor die hele storie en geskryf dat daar ‘n slang in die gras is in reaksie op die eerste berigte oor die saak.

Die berig wat op ZA Sucks verskyn het rakende sy webmeester, Uhuru Guru of UG, beweer dat 28 blanke polisielede sy deur afgebreek het en sy huis deursoek het. Wat ek onmiddellik vreemd gevind het, was beide die aantal polisielede en die onverwante eenhede waaraan hulle behoort het – motordiefstal, kubermisdaad ensovoorts. So ‘n oormag roep beelde van ‘n misdaadbende wat Glenn Agliotti en sy trawante s’n ewenaar by mens op, maar dit gaan klaarblyklik oor ‘n 19 jaar oue (of is dit 16 jaar oud?) saak en die verdagte is een indiwidu wat verdink word van ‘n nie-gewelddadige oortreding. Iets klop nie. Waarom soveel polisielede vir een klopjag, as gewelddadige teenstand nie verwag word nie? Bedrog of diefstal is voorts nie sulke ernstige misdade, gemeet aan moorde of Agliotti-hulle se soort georganiseerde misdaad nie.

Miskien is dit inderdaad skoktaktieke ontwerp om bloggers te intimideer, of andersins ken ons nie die volle feitestel nie.

UG is toe na die Lindense polisiestasie geneem. Volgens die berig op ZA Sucks is hy nie na die hof geneem nie, en het die polisie alles in die boek probeer om ‘n hofverskyning en borgtog te dwarsboom, en hom gedwing om in die selle te slaap. Hy het volgens die berig nie in die hof verskyn nie, maar volgens ‘n berig in Beeld het hy egter wel in die Randburgse landdroshof verskyn en is die saak uitgestel. Watter een van die twee weergawes kan mens nou glo?

Voorts beweer die berig op ZA Sucks dat die saak 19 jaar oud is en handel oor gesteelde goedere wat iemand anders op UG se perseel versteek het (die klag sou dus diefstal wees). Volgens Beeld se berig gaan dit egter oor bedrog, nie diefstal nie, ‘n klag wat uit 1993 spruit, dus 16 jaar gelede. Watter weergawe is die korrekte een?

Verstaan goed: ek is geen bewonderaar van Naspers met sy Broedereienaars en napraters van Jonathan Jansen en kie nie. Dit sou ook skokkend wees indien UG wel geteiken is bloot omdat hy dinge skryf waarvan die regime nie hou nie. Dit sou afdoende bewys wees van die regime se poging tot gedagtebeheer, maar die twee stories weerspreek mekaar in verskeie belangrike besonderhede. Uitgesluit die aanvanklike bewerings wat op ZA Sucks gemaak is, swyg die werf sedertdien soos die graf oor die ganse aangeleentheid. UG beweer dat sy regsverteenwoordiger hom aangeraai het om stil te bly.

Om dit in platvloerse Afrikaans te stel: sou Beeld se bewerings waar wees, het dit die potensiaal om werwe en indiwidue wat oor ‘n wesentlike probleem, swart-op-wit misdaad, skryf, se name ernstig gat te maak. Wat 100% gewaarborg is om te gebeur, is dat die opponente gaan volhou dat diegene wat so oor swart misdaad kla, self ‘n paar geraamtes in die kas het en dus nie ernstig opgeneem kan word nie. Beeld het alreeds vertrek op ‘n propagandaveldtog en rojaal van die geleentheid gebruik gemaak om regses by te kom in die berig oor UG. Die boodskap in Beeld se berig is duidelik: julle regses wat so oor misdaad skree, is self skuldig.

ZA Sucks behoort na my mening spoedig ‘n amptelike verklaring te publiseer wat die teenstrydighede met Beeld se berig aanspreek en opklaar. Indien daar wel iets is om oor te bieg, en ek weet nie of dit die geval is nie, wil ek voorstel ZA Sucks neem Joost van der Westhuizen se ervarings in ag, en maak so spoedig moontlik so.

Uhuru Guru vrygelaat

Te midde van ‘n storm wat PRAAG se berig oor die inhegtenisname van Uhuru Guru, webmeester van South Africa Sucks, veroorsaak het, is hy so pas vrygelaat, volgens ‘n sms wat van sy regsverteenwoordiger vanaf die Randburgse landdroshof ontvang is.

Blykbaar was die saak nie eens op die rol nie en is geen klag teen hom gelê nie. Hy het egter die nag in die selle van die Lindense polisiestasie deurgebring en is vanmore saam met die ander verhoorafwagtendes geboei en na die hof vervoer.

Sy vrylating kom ná PRAAG vanmore ‘n veldtog op tou gesit het, met mediaverklarings en oproepe aan invloedryke persone. “Ons was reg om ‘n internasionale veldtog vir sy vrylating op tou te sit. Dit lyk egter asof die polisie besef het dat hulle geen saak het nie,” het Dr. Dan Roodt van PRAAG gesê.

“Die feit dat so iets kon gebeur, toon egter dat alles nie pluis is nie. Die staat het duidelik sy mes in vir die onafhanklike webwerwe wat aan die ANC se oorhoofse beheer ontkom,” het hy gesê.

Ystervuis teen webwerwe

Die inhegtenisname van die bekende Johannesburgse “blogger” Uhuru Guru van die woernaal South Africa Sucks het gister skokgolwe deur Suid-Afrika se internetgemeenskap gestuur. Oënskynlik het die ANC-bewind op die vooraand van die Wêreldsokkerbeker tot hardhandige optrede oorgegaan teen webwerwe wat die land se probleme soos misdaad en verdrukking van minderhede aan die groot klok hang. Daar is ook die afgelope dae ‘n veldtog deur anonieme briefskrywers op LitNet, ‘n webwerf in die Media24-stal, gevoer teen die misdaadberigte wat South Africa Sucks gewoonlik met kommentaar aanbied.

Die voordeur van Uhuru Guru is gisteroggend om 6:30 deur ‘n “taakmag” van die polisie afgeskop en hy en sy gesin is hardhandig uit die bed gepluk. Sy vrou is nie toegelaat om enige oproepe te maak nie en selfs sy dogtertjies se selfone is gekonfiskeer, tesame met alle rekenaartoerusting in die huis. Die taakmag, wat uit lede van die polisie, veiligheidspolisie en verskeie spesialiseenhede soos kubermisdaad bestaan het, het die webmeester ook oor PRAAG en dr. Dan Roodt ondervra, wat moontlik kan veroorsaak dat die polisie se veldtog na hierdie webwerf kan uitbrei.

Uhuru Guru, wat tans om sakeredes verkies om anoniem te bly, is agterna na ‘n Johannesburgse polisiestasie geneem waar hy tans in aanhouding verkeer. Volgens sy regsverteenwoordiger is daar duidelike pogings deur die staat om die regsproses te vertraag ten einde hom vir die maksimum periode vir ondervraging aan te hou. Die klagtes teen hom is onduidelik, maar daar word gepraat van crimen injuria, asook ‘n insident tydens 1993 toe een van sy werknemers gesteelde goedere ter waarde van enkele honderd rand op sy perseel versteek het. Dit wil voorkom asof die polisie dié klag wat sestien jaar gelede teruggetrek is, op hul rekenaar opgespoor het ten einde ‘n verskoning te vind om hom in hegtenis te neem.

Volgens Uhuru Guru se regsverteenwoordiger is “die hardhandige en oordrewe optrede deur die polisie… duidelik polities gemotiveer”.

PRAAG het enkele dae gelede vanuit ‘n bron binne die ANC verneem dat daar ‘n groep blanke Afrikaners binne die polisie verkeer wat weens transformasiedruk hul eie poste en begrotings moet motiveer deur op ‘n fiktiewe “regse gevaar” te spioeneer. Die polisie wat gister teen Uhuru Guru van South Africa Sucks opgetree het, was blykbaar deur die bank blanke Afrikaners wat direk aan hoofkantoor rapporteer en nie aan enige plaaslike polisiestasie nie.

Volgens Uhuru Guru se regsvereentwoordiger het hulle ‘n “sinistere indruk gemaak, presies soos die ou Veiligheidspolisie in die tagtigerjare onder die Nasionale Party. Ek was destyds baie links gewees en as ek nie so ontnugter was deur die nuwe Suid-Afrika nie, sou ek seker steeds links gewees het. Daarom moes ek dikwels met die Veiligheidspolisie namens kliënte onderhandel wat in aanhouding was. Gister se ervaring het my ‘n gevoel van déjà vu gegee. Dit was presies dieselfde, dieselfde mense, dieselfde metodes, dieselfde kyk in die oë. Een van: ‘Te hel met jou. Ons maak wat ons wil.'”

Dr. Dan Roodt van PRAAG het intussen verklaar dat “daar geen bande tussen PRAAG en South Africa Sucks bestaan nie. Terwyl South Africa Sucks se hooffokus misdaad en Suid-Afrika se rasseprobleme is, wil praag.co.za ‘n onafhanklike, algemene kuberkoerant wees wat lesers oor allerlei sake inlig en ook onverskrokke, maar beskaafde kommentaar lewer. Hoewel die feite oor misdaad wat in South Africa Sucks vermeld word gewoonlik waar is, handhaaf die blad ‘n polemiese en uitdagende toon wat nie ons styl is nie. Maar dis Uhuru Guru se goeie reg, indien Suid-Afrika wel ‘n demokrasie met spraakvryheid sou wees. Die huidige gebeure laat egter twyfel of Suid-Afrika veel langer op die etiket ‘liberale demokrasie’ sal kan aanspraak maak.”

Dr. Roodt was egter vol moed dat die alternatiewe Afrikaanse media die huidige aanslag van die staat sou oorleef. “Die ANC is ‘n magshonger monster wat geen teenspraak of alternatiewe sienings duld nie. Immers het die beweging sy tande in die ou Oos-Europa geslyp waar totalitêre bewinde alle aspekte van die samelewing beheer het. Daarom, toe ons praag.co.za as ‘n e-koerant gevestig het, het ons die blad se bediener in die VSA opgestel waar ons die beskerming van die Amerikaanse grondwet en wette oor vryheid van spraak geniet. Nóg die ANC, nóg die Veiligheidspolisie wat tans ‘n voorbeeld van South Africa Sucks gemaak het, kan ons stilmaak. Al word ons almal in die tronk gesit weens ons menings teen geweldsmisdaad en meerderheidsoorheersing in Suid-Afrika, beskik ons ook oor mense in oorsese lande wat die webwerf van daar af kan bedryf en aanhou publiseer.”