Noodhulpbeamptes in die voormalige Sowjetrepubliek sê minstens 70 mense is dood in 'n sterk aardbewing wat Kirgistan naby die grens van Sjina getref het.
Die adjunknoodsituasieminister, Toerabek Dzjoenetjalijef sê volgens die jongste syfers is 70 mense in die suide dood en meer as 80 moes dringend hospitaalbehandeling kry terwyl 128 huise verwoes is. Die omvang van die aardbewing wat die afgesonderde Alaiski-distrik van suidelike Kirgistan Sondagaand getref het, het 6,6 geregistreer. Die verwoesting was gekonsentreer op Noera, 'n dorpie met 950 inwoners naby die Sjinese grens.
Lande in Europa het Sondagnag geskarrel om 'n dreigende kredietkrisis wat banke kan laat ineenstort, af te weer. Die Amerikaanse ekonomiese afswaai het nou Europa en Asië met alle mag getref.
Die Europese Sentrale Bank het verlede week drastiese stappe geneem om geld aan banke beskikbaar te stel soos wat die krisis nadergesnel het, maar het probreer om rentekoerse dieselfde te hou. Hulle het egter Donderdag aangekondig dat rentekoerse verlaag sal word. Die stappe het spaarders nie gerusgestel nie en aandelemarkte het swakker as in die VSA gevaar.
In Berlyn het Kanselier Angela Merkel en minister van Finansies, Peer Steinbrück, op TV verskyn om te belowe dat die regering alle spaargeld sal waarborg, maar dit was nie duidelik watter wetgewing aangepas sal moet word om die belofte gestand te doen nie. Merkel het woede teen internasionale bankiers wat die publiek se geld gebruik om hulle eie risiko's te dek, probeer besweer deur te belowe dat daar met hulle afgereken sal word.
'n Hoofbevelvoerder van die Britse leër sê die oorlog in Afghanistan kan nie gewen word nie en samewerking met die Taliban mag 'n langtermynoplossing vir die land wees.
As die Taliban tafel toe kom om te onderhandel oor 'n politieke skikking, dink hy dit sal die insurgensie opklaar. Alhoewel Brittanje as deel van NAVO 'n bloedige veldtog teen die Taliban voer, het Britse amptenare aangedui dat hulle die Taliban wil oorreed om hulle wapens neer te lê.
Die Britse regering het ontken dat hulle sending na Afghanistan is mislukking is nadat 'n Franse koerant berig het dat die Britse ambassadeur na Kaboel gesê het dat buitelanse troepe se teenwoordigheid die probleem vererger.
Die Franse weekblad, Le Canard Enchaine, het verlede Woensdag kommunikasie tussen die Britse ambassadeur Sherard Cowper-Coles en 'n Franse amptenaar Francois Fitou gelek. Daarin sê Cowper-Coles dat Afghanistan dalk beter sal vaar met 'n "aanvaarbare diktator".
'n Diktator, sê hy, sal die "enigste realistiese oplossing wees" en hulle behoort die "openbare mening te kry om dit te aanvaar". Die Britse ambassadeur kritiseer ook die VSA daarin omdat hulle nog troepe na Afghanistan wil stuur. Hy voel dat die kandidate sterk afgeraai moet word om verder in die land in te meng.
Die kommunikasie dateer van 2 September 2008. President Nicolas Sarkozy en Buitelandse minister Bernard Kouchner het albei afskrifte van die diplomatieke telegram ontvang.
Minister James Nsaba Buturo, minister van Etiek en Integriteit van Oeganda, sê die toestand van sy land se morele gesondheid laat veel te wense oor. Hy het Saterdag gesê lesbianisme en homoseksualiteit is besig om soos paddastoele op te stoot. Sy regering beplan om strenger anti-gay wette in werking te stel en groter polisieoperasies van stapel te stuur teen die groeiende "siekte".
Die wet gaan nou aangepas word om mense wat erken dat hulle gay is, dadelik as kriminele te brandmerk. Gays in Oeganda waag dit klaarblyklik in elk geval nie om hulle voorkeure te wys nie en lewe in die skadu, omdat hulle reeds vervolging vrees.
16:31:36 Westerse lande probeer om Sirië daarvan te weerhou om 'n rotasie-sitplek op die raad van die Internasionale Atoom Energie Agentskap in te neem omdat dié Midde-Oosterse land na bewering 'n geheime kernreaktor gebou het. Die eerste besoek van IAEA-inspekteurs aan die beweerde perseel in Sirië se woestyn het egter niks opgelewer nie.
Washington het in April die Agentskap in Wene van inligting voorsien wat daarop dui dat Damaskus baie naby daaraan was om 'n reaktor, wat verlede jaar deur Israel se lugmag gebombardeer is, te voltooi. Sirië hou vol dat die perseel 'n konvensionele militêre installasie was. Verskeie Westerse lande het Sirië gekritiseer omdat verdere besoeke van inspekteurs nie toegelaat is nie asook vir die verbod op toegang tot bykomende persele.
Ibrahim Othman, direkteur-generaal van Sirië se Atoom Energie Kommissie het op die konferensie beklemtoon dat sy regering met die Agentskap saamwerk. Hy sê die samewerking sal egter nie op enige wyse ten koste van die bekendmaking van Sirië se militêre persele of 'n bedreiging van hulle nasionale sekuriteit geskied nie. 'n Diplomaat sê Afghanistan is vol vertroue dat dit die steun van die meerderheid IAEA-lede geniet. Geloofwaardigheid van die kernagentskap is vir die VSA op die spel. 'n Diplomaat van 'n Europese land sê die uitslag van die verkiesing is onseker.
11:50:11 Islamitiese militantes in Somalië het seerowers wat 'n skip van die Oekraïne met tenks en militêre toerusting aan boord aanhou, aangemoedig om die vrag en die vaartuig te vernietig as 'n losprys nie aan hulle betaal word nie.
Terwyl Amerikaanse oorlogskepe en ander vlote die MV Faina seewaarts van Somalië se kus blokkeer, dring die seerowers aan op betaling van $20 miljoen om die vrag en die 21 bemanningslede vry te laat.
'n Woordvoerder van die Shahab-beweging, Sheikh Mukthar Robow, sê as hulle nie die geld kry wat hulle eis nie, word hulle gevra om die skip óf te sink óf aan die brand te steek. Robow sê sy beweging, wat stadigaan besig is om die oorhand oor regeringsoldate in die suide van Somalië te kry, het nie bande met die seerowers wat verlede week op die vragskip onderweg na Mombasa in Kenia beslag gelê het nie.
Robow sê dit is 'n misdaad om handelskepe oor te neem maar die kaping van vaartuie wat wapens vir die vyande van Allah dra, is 'n ander saak. Die Shabab-beweging het seerowery in die suide van Somalië verlede jaar amper uitgewis. Robow beweer dat die militêre skeepvrag aan Ethiopië behoort en na die hawe van Mogadisjoe onderweg was waar dit afgelaai sou word met die doel om Somalië te vernietig.
Die seerowers het vroeër gesê die wapens is na Soedan op pad. Die Oekraïense eienaars van die vragskip en die regering van Kenia sê die tenks is vir Kenia bestem. Amerika se vloot het belowe om te voorkom dat die seerowers die wapens aflaai.
Robow sê sy beweging sal nie omgee om hulle hande daarop te lê nie omdat dit hulle veldtog teen soldate van Somalië, Ethiopië en die Afrika-unie 'n hupstoot sal gee.
Byna 80 000 onwettige immigrante het hierdie jaar alleen op Griekeland toegesak. Griekse owerhede sê hulle kan nie meer die taak om Europa se suid-oostelike flank te beskerm, behartig nie.
Elf mense is in Augustus beseer en die polisie patrolleer nou die gebied dag en nag. Winkel- en restauranteienaars trek nou uit en die publiek vermy die stadsentrum en verkies om elders inkopies te gaan doen. Huurders trek ook uit. Inwoners het bang en teneergedruk geraak, sê belangegroepe.
Griekse owerhede blameer die immigrante en sê hulle gaan nie weer 'n inkomende mensegolf wettig nie. Dit is reeds drie keer onderneem sedert 1997. Owerhede is bekommerd dat regse partye opgang maak. Laos, 'n verregse party, se gewildheid het van 3,5% na 5,4% geklim in die parlement. Selfs die linkse partye erken dat daar 'n probleem met die immgrante bestaan.
Thomas Hammarberg, 'n Sweedse menseregteverteenwoordiger van die Europese Raad, het Griekeland gekritiseer omdat hulle immigrante se onwettige teenwoordigheid "kriminaliseer". Die Grieke sê egter dat Nigeriërs en Marrokane nuwe onwettige aankomelinge dadelik in bendes opneem.
Griekeland gee slegs aan 1% vlugtelingtoegang, terwyl die gemiddeld in die EU vir geslaagde asielaansoeke 20% is. Intussen word Lesbos en Samos steeds daagliks oorval met bootvragte vol onwettige immigrante en het 'n beroep gedoen op die regering om dadelik in te gryp.
Doeanebeamptes by die Brusselse lughawe het meer as 2 miljoen vervalste tablette en pille gekonfiskeer wat van Indië af na Afrika onderweg was. Dit was die grootste besending medisyne ooit van dié aard, het beamptes gesê.
Plastiek- en foelieblaasverpakkings met nagemaakte Tramal, 'n sterk pynstiller en 'n vervalste anti-malariamiddel is in groot sakke ontdek, het die doeanebeamptes gesê.
Die medisyne is in drie besendings gestuur van 'n maatskappy in Moembaai en was onderweg na 'n Afrikaland, nadat dit eers in Casablanca, Marokko oorgelaai is.
"Vir sover ons kennis strek, is dit die grootste besending vervalste medisyne wat nog in Europa gekonfiskeer is", het Lieven Muylaert, segsman vir die doeane-en-aksynsdepartement gesê. Hy wou nie 'n waarde heg aan die besending op die ope mark nie.
Doeanebeamptes se agterdog is gewek omdat die pille eerstens nie in kartondose vervoer was nie en verder ook deur spelfoute op die verpakkings.
Volgens die Wêreldgesondheidsorganisasie (WGO), verteenwoordig vervalste medikasie met 'n geskatte waarde van 600 miljard rand, sowat 10 % van die globale farmaseutiese nywerheid.
Die hoeveelheid vervalste medikasie wat by Europese grense onderskep is het met 51 % gestyg van verlede jaar nadat dit sowat 400 % gestyg het in 2006.
In Frankryk het sulke onderskeppings, veral van Viagra van Indië af onderweg na Afrika en Latyns-Amerika met 31 % gestyg verlede jaar.
Die Britte is skepties oor Gordon Brown se beloftes dat die regering alles in hulle vermoë sal doen om die bankstelsel te red. Omdat verkeie banke reeds bankrot verklaar is of oorgeneem is oor die laaste twee weke soos wat die krediettekort se greep verstewig, raak die vrees dat mense al hulle spaargeld kan verloor tasbaar.
Die probleem, sê ekonome, is dat kollektiewe paniek 'n groter krisis kan veroorsaak indien almal gelyk hulle spaargeld onttrek vir kontant. Vertroue is die fondament waarop die bankstelsel opgerig is. Daarsonder kan die stelsel nie funksioneer nie.
Die Ierse regering het Woensdag verklaar dat hulle alle deposito's in Ierland sal verseker. Die Franse het by monde van Nicolas Sarkozy 'n soortgelyke onderneming gegee. Maar hoe meer die politici probeer om mense te paai, hoe meer onrustig raak hulle. Banke, in teenstelling met politici, laat hulle kliënte nooit weet as hulle bekommerd voel nie, omdat dit juis paniekonttrekkings kan veroorsaak.
Banke hou ook nie genoeg kontant aan om almal se geld dadelik terug te gee nie. Maar meer nog boesem Gordon Brown geen vertroue by Britte in nie. Die man in die straat hou hom vir die ekonomiese krisis verantwoordelik.
Sover dit die eens gerespekteerde Northern Rock-spaarbank se bankrotskap, die eerste om Brittanje te tref, aangaan, het kliënte die eerste paar dae nie 'n idee gehad van wat aangaan nie en dié kwessie maak die publiek tans lugtig vir wat ander banke mag aanvang.
Parmigiano-Reggiano, oftewel Parmesaanse kaas, is die kositem wat die maklikste van winkelrakke in Italië verdwyn sonder dat daarvoor betaal word. Die harde krummelrige kaas word graag oor pasta gerasper.
Die afgelope jaar is 11% meer kaas gesteel as die vorige jaar. Parmesaanse kaas is ook die Italiaanse kosproduk wat die meeste nagemaak word. Die ware jakob moet van ongepasteuriseerde koeimelk gemaak word en moet 12 maande lank verouder word om die DOP of IGP waarmerk van die Parmastreek of van die Reggio Emilia-gebied in Noord-Italië te kry.
Veral Argentinië, Brasilië, Japan, Brittanje en Duitsland is lande waar nagemaakte Parmesaanse kaas onder 'n vals etiket te koop aangebied word.
