Kategorie: Internasionale nuus

Madagaskar se eerste minister Monja Roindefa sê Niels Marquadt, die onvergenoegde Amerikaanse ambassadeur, moet die eiland wat gebuk gaan onder voortdurende krisisse, verlaat as hy nie ophou om in te meng in hulle sake nie.

Die eerste minister het gereageer op die VSA-diplomaat se toesprake wat hy tydens 'n amptelike besoek aan die suidweste van die eiland gelewer het.

Marquardt het gevra vir 'n dialoog tussen die 34-jarige Andry Rajoelina, 'n oud-platejoggie, en Roindefa om die magstryd wat sedert Januarie woed, op te los. Geweld op die eiland het reeds 200 lewens geëis.

Sedert Rajoelina die staatshoof Marc Ravalomanana se bewind omver gegooi het in Maart, vra die Amerikaanse ambassadeur dat daar teruggekeer word na grondwetlike orde en dat verkiesings hierdie jaar gehou moet word.

Europa se ambassadeur, Jean-Claude Boidin, sê daar is tans geen regstaat in Madagaskar nie. Hy het bygevoeg dat die EU steeds 'n vriend en vennoot van Madagaskar bly, maar het belangrikheid beklemtoon dat die land 'n demokratiese en verantwoordelike regering moet verkies.

'n Tonnelroete vanaf Sirië na Irak om buitelandse soldate vir Al-Kaida in te smokkel, is geheraktiveer, het die Washington Post Sondag berig. Die hernude gebruik van die smokkelroete is 'n verleentheid vir die Obama-administrasie wat weer diplomatieke gesprekke met Sirië hervat het.

Twee hoë Amerikaanse amptenare, Jeffrey Feltman, adjunkminister van buitelandse sake en Daniel Shapiro, van die nasionale veiligheidsraad, was Woensdag in Sirië op hul tweede besoek sedert Obama die leisels oorgeneem het.

Verlede week het die VSA opnuut sanksies ingestel teen Sirië en Damaskus daarvan beskuldig dat hulle terrorisme in die Midde-Ooste borg en stabiliteit in Irak ondermyn.

Onder president Bush het Amerika Sirië se outoritêre president Bashar al-Assad dikwels daarvan beskuldig dat hy buitelandse soldate na Irak help insmokkel. Die Siriese intelligensie is volgens die VSA bewus van die smokkelnetwerke.

'n Amerikaanse militêre amptenaar sê egter dat hulle nie weet op watter vlak, hoog of laag, die Siriërs aan die netwerk meewerk nie. Generaal David Petraeus, het verlede maand aan die Kongres gesê dat Siriese roetes heroopgestel is.

Die Amerikaanse weermag is besorg oor die gebied rondom Mosoel, wat beskou word as die laaste vesting van Al-Kaida in Irak. Verskeie intelligensieverslae dui daarop dat die aanvraag vir buitelandse vegters in Irak onlangs toegeneem het.

'n Gesiene regter, Françoise Desset, het Dinsdag verklaar dat drie Afrikapotentate in Frankryk verhoor behoort te word op aanklagte dat hulle openbare fondse verduister het.

Die klaers, gewone burgers, in 'n saak wat aanhangig gemaak word teen die beweerde korrupte staatshoofde, word verteenwoordig deur 'n liggaam wat stry teen korrupsie genaamd Transparence international France (TI).

TI wil duidelikheid hê oor die omstandighede betreffende die aankoop van eiendom in Frankryk deur Denis Sassou Nguesso, president van die Kongo, Omar Bongo Ondimba, staatshoof van Gaboen en Teodoro Obiang van Ekwatoriaal-Guinee, asook lede van hulle personeel.

Die voorsitter van TI Frankryk, Daniel Lebègue, sê dit sal 'n historiese saak wees wat "die einde van die korrupte leiers in die wêreld kan beteken". Die drie betrokke Afrikalande is groot olieprodusente.

Daar is egter politieke teenstand teen die skuif om die leiers voor die hof te daag, maar IT se advokaat meen indien die hof besluit om die saak nie aan te hoor nie, dit sal beteken dat die skeiding van wetgewende en uitvoerende gesag onder verdenking is.

Die Paryse hoërhof het reeds in 2007 en 2008 beslis dat soortgelyke klagtes teen Bongo en Sassou Nguesso uitgegooi word.

Swart mans is glo gevaarliker as varkgriep. 'n Groep aktiviste en ministers wil hê president Obama moet dadelik MIV/Vigs as 'n openbare gesondheidskrisis onder Afro-Amerikaanse gemeenskappe verklaar.

Pastoor Calvin Butts, voorsitter van die Nationale Swart Leierskapkommissie oor VIGS, meen "dit is meer gevaarlik as varkgriep en ek hoop die land sal besef dat indien ons dit oplos, ons ander gesondheidskwessies sal kan takel."

Die helfte van alle nuwe MIV-infeksies kom voor onder swart Amerikaners en sterftes agv daarvan is ook die hoogste onder swartes. Dit is die vierde grootste oorsaak van dood onder swart mans en die derde onder swart vroue.

Charlie Rangel, Kongresverteenwoordiger uit Harlem, NY, het 'n beroep op president Obama gedoen om MIV/Vigs as 'n epidemie onder swart Amerikaners te verklaar en ook gevra dat 'n grondige studie gedoen word oor waarom die koers van besmetting so buitengewoon hoog onder swart Amerikaners is.

President Barack Obama gaan nie met sy volgende besoek aan Duitsland saam met Kanselier Merkel afgeneem word nie. Trouens hy gaan nie eers in Berlyn aandoen nie.

Die Amerikaanse president wil eerder besoek bring aan Dresden en Buchenwaldkonsentrasiekamp om sy persoonlike familiegeskiedenis na te vors. Sy besoek aan Duitsland in Junie sal dus geen amptelike besoek wees nie.

Dit het Dinsdag aan die lig gekom dat 'n verkennende span reeds in die voormalige Oos-Duitse stad Dresden aan die Elberivier besig is om moontlike akkomodasie vir die president te soek.

Obama se grootoom, Charlie Payne, het in die 89ste Infanteriedivisie gedurende die Tweede Wêreldoorlog gedien. Hy het glo deelgeneem aan die bevryding van Ohrdruf, 'n satellietkamp van Buchenwald.

Die Duitse regering help tans aan die voorbereidings vir die besoek, wat 'n draai in Normandië in Junie mag insluit.

Kenners meen die ongewone reëlings is 'n verskoning vir die VSA om bande met Duitsland te probeer versterk, sonder om 'n amptelike besoek aan te kondig. Kanselier Merkel het nog nie besoek aan die Withuis gebring nie.

Diplomate beskryf die verhoudinge tussen die VSA en Duitsland op die oomblik as een van "wedersydse strategiese geduld".