Veterane van die Mau Mau rebellie, wat deur historici beskou word as die anti-koloniale beweging wat onafhanklikheid na Oos-Afrika gebring het, wil vergoeding eis van die Britse regering vir die wandade wat Britse soldate gepleeg het.
Vyf bejaarde Keniane wat destyds gedurende die1950s aangehou is vir hulle rol in die opstand, is die hoofeisers in die saak wat op 23 Junie in die Londense hoërhof gehoor sal word.
Die Mau Mau Oorlogsveteraanorganisasie en die Kenia Menseregtekommissie (KMRK) het die eis ingestel met die hulp van die Britse regsfirma Leigh Day & Co.
Tom Kagwe, waarnemende hoof vir die KMRK, het aan 'n nuuskonferensie in Nairobi gesê dat 40 gevalle van menseregteskendings, wat foltering en seksuele wandade insluit, gedokumenteer is.
Die Mau Mau beweging het in 1952 begin toe rebelle wit plaasboere aangeval het. Geskiedkundiges meen ongeveer 30 Britse setlaars is gedood gedurende die opstand.
Die Britse regering het ingegryp en honderdeduisende Keniane doodgemaak en aangehou, ook Jomo Kenyatta, wat die eerste president van Kenia sou word nadat Kenia onafhanklikheid verkry het in 1963.