Kategorie: Internasionale nuus

Britse minister van Finansies Alistair Darling gaan vandag waarskynlik aankondig dat £50 miljard van belastingbetalers se geld in die land se grootste banke ingestoot gaan word. Dit sluit Barclays, Lloyds TSB en die Royal Bank of Scotland in. Uitvoerende beamptes het aan die begin van die week met Darling ontmoet om hom te vra om vinnig te beweeg om die krisis te probeer afweer.

'n Politieke ekonoom by die London School of Economics sê daar is nie meer so 'n ding soos 'n veilige bank nie. Banke is net so veilig soos wat hulle regerings hulle kan maak. Bankaandele het skerp gedaal gister.

Bank of Scotland se aandeelprys het met 39% gedaal omdat beleggers meen dat die kapitaalinspuiting die bestaande aandeelhouding kan verminder. Daarbenewens was handelaars bekommerd oor die afgradering van Standard & Poor vir die Bank of Scotland omdat die bank sukkel om fondse in die hande te kry.

Die idee agter die Britse plan is om kapitaal te verhoog om banke 'n kussing teen verliese te gee. Kenners sê dit is te laat want die kombinasie van 'n resessie en korttermynlikiditeit is te groot om positief op 'n kapitaalinspuiting te reageer.

In Spanje, waar die tuimelende huismark die banke besonder hard tref, het eerste minister Zapatero 'n 30 miljard euro hulppakket aangekondig. Hy het belowe dat net "gesonde" bates ondersteun sal word en nie toksiese bates nie om kritiek teen sy plan af te weer. Sommige kenners is bekommerd dat banke wat opgesaal is met subprimalenings nie daarby gaan baat nie.

In Luxemburg het Europese leiers ooreengekom om bankreëls vir boekhouding te verslap om die groeiende krisis te besweer. Dit is die eerste keer dat al 27 EU-lidlande 'n gemeenskaplike pad vorentoe inslaan met die ondertekening van die ooreenkoms.

Jerome Corsi, skrywer van "The Obama Nation: Leftist Politics and the Cult of Personality," word in Nairobi aangehou, nadat die polisie hom by sy hotel in hegtenis geneem het. Carlos Maluta, die senior beampte, het aan die media gesê hulle weet nog nie wat hulle met hom wil doen nie. Hy het aan AP gesê Corsi moet 'n tydelike werkpermit hê om in Kenia sake te doen.

Obama is geweldig gewild in Kenia. Sy vader was 'n Keniaan. Corsi beweer in sy boek dat Obama gevaarlik is en dat hy radikaal is. Hy skryf dat hy deurtrek is van "swart woede". Op Obama se webwerf, FightTheSmears.com, probeer die kandidaat se veldtogbestuur die beweringe in Corsi se boek as onware gerugte afmaak.

Corsi is na Kenia uitgenooi deur 'n groep Christelike sendelinge wat bekommerd is oor die opkoms van Islam. Hy wou glo daagliks verslag doen oor sy besoek, maar deur sy aanhouding het niks daarvan gekom nie.

Obama se oom wat in Kenia woon, weet nie van die aanhouding nie

Beijing het laat weet dat hulle verskeie hoëvlakbesoeke sal kanselleer en ander militêre samewerkingsbesoeke sal opskort. 'n Segsman vir die Amerikaanse departement van Verdediging het sy spyt uitgespreek oor China se besluit om verhoudinge tussen die twee lande te verpolitiseer.

Beijing is teleurgesteld met Amerika se besluit om 'n $6,5 miljard wapenpakket aan Taiwan beskikbaar te stel. Dit sluit geleide missiele en aanvalshelikopters in. China sê die aankope meng in China se binnelandse sake in en benadeel nasionale sekuriteit.

Die VSA se Defense Security Cooperation Agency het die Kongres in kennis gestel van hulle voornemens om die gevorderde wapenstelsels aan Taiwan te verkoop. Die wetgewing wat buitelandse militêre verkope reël bepaal dat die transaksie kan voortgaan indien daar geen teenkanting binne 30 dae geregistreer word nie.

Die Duitse regering het aangekondig dat hulle alle privaatspaargeld sal waarborg in die hoop dat senuweeagtige bankklante nie hulle deposito's sal onttrek nie. Nuus dat die Duitse Hypo Eiendomsbank deur die regering ondersteun sal moet word en dat Fortisbank in België, wat takke feitlik oral het, bankrot is, het skokgolwe deur die EU gestuur. Fortis het 'n week gelede 11,2 miljard euro saam van Nederland, België en Luxemburg ontvang maar moes ten spyte van die hulp hulle deure sluit.

Die Europese Sentrale Bank het verlede week drastiese stappe geneem om geld aan banke beskikbaar te stel soos wat die krisis nadergesnel het, maar het probreer om rentekoerse dieselfde te hou. Hulle het egter Donderdag aangekondig dat rentekoerse verlaag sal word. Die stappe het spaarders nie gerusgestel nie en aandelemarkte het swakker as in die VSA gevaar.

In Berlyn het Kanselier Angela Merkel en minister van Finansies, Peer Steinbrück,  op TV verskyn om te belowe dat die regering alle spaargeld sal waarborg, maar dit was nie duidelik watter wetgewing aangepas sal moet word om die belofte gestand te doen nie. Merkel het woede teen internasionale bankiers wat die publiek se geld gebruik om hulle eie risiko's te dek, probeer besweer deur te belowe dat daar met hulle afgereken sal word.

Brigadier Mark Carleton-Smith het aan die Britse Sunday Times gesê: "Ons kan nie die oorlog wen nie." Hy het verduidelik dat dit gaan om die insurgensie na 'n vlak te bring waar die Afghaanse weermag dit kan beheer, maar daar sal in die platteland voortslepende onrus wees.

As die Taliban tafel toe kom om te onderhandel oor 'n politieke skikking, dink hy dit sal die insurgensie opklaar. Alhoewel Brittanje as deel van NAVO 'n bloedige veldtog teen die Taliban voer, het Britse amptenare aangedui dat hulle die Taliban wil oorreed om hulle wapens neer te lê.

Die Britse regering het ontken dat hulle sending na Afghanistan is mislukking is nadat 'n Franse koerant berig het dat die Britse ambassadeur na Kaboel gesê het dat buitelanse troepe se teenwoordigheid die probleem vererger.

Die Franse weekblad, Le Canard Enchaine, het verlede Woensdag kommunikasie tussen die Britse ambassadeur Sherard Cowper-Coles en 'n Franse amptenaar Francois Fitou gelek. Daarin sê Cowper-Coles dat Afghanistan dalk beter sal vaar met 'n "aanvaarbare diktator".

'n Diktator, sê hy, sal die "enigste realistiese oplossing wees" en hulle behoort die "openbare mening te kry om dit te aanvaar". Die Britse ambassadeur kritiseer ook die VSA daarin omdat hulle nog troepe na Afghanistan wil stuur. Hy voel dat die kandidate sterk afgeraai moet word om verder in die land in te meng.

Die kommunikasie dateer van 2 September 2008. President Nicolas Sarkozy en Buitelandse minister Bernard Kouchner het albei afskrifte van die diplomatieke telegram ontvang.

Tien jaar gelede, sê hy, het dit nie bestaan nie en nou is dit besig om oral kop uit te steek. Huwelike tussen mense van dieselfde geslag is onwettig in Oeganda. Soos die wette egter tans daar uitsien, is dit moeilik vir die gereg om oortreders aan te kla en diegene wat gevang word stap dikwels ongestoord weg. "Ons moet die skuiwergate toemaak," sê Buturo.

Die wet gaan nou aangepas word om mense wat erken dat hulle gay is, dadelik as kriminele te brandmerk. Gays in Oeganda waag dit klaarblyklik in elk geval nie om hulle voorkeure te wys nie en lewe in die skadu, omdat hulle reeds vervolging vrees.

Volgens diplomate is die Verenigde State en ander Westerse IAEA-lede daarop uit om later vandag op die Agentskap se algemene konferensie in Wenen eerder vir Afghanistan as Sirië te stem om een van die 35 raadslede te word. Die feit dat 'n stemmery nodig is om die saak te besleg, dui op 'n tweespalt tussen lede van die IAEA. Die groep Midde-Oosterse en  Suid-Asiatiese lande kom gewoonlik ooreen oor 'n kandidaat om te nomineer wat dan vanselfsprekend op die algemene konferensie aanvaar word.

Washington het in April die Agentskap in Wene van inligting voorsien wat daarop dui dat Damaskus baie naby daaraan was om 'n reaktor, wat verlede jaar deur Israel se lugmag gebombardeer is, te voltooi. Sirië hou vol dat die perseel 'n konvensionele militêre installasie was. Verskeie Westerse lande het Sirië gekritiseer omdat verdere besoeke van inspekteurs nie toegelaat is nie asook vir die verbod op toegang tot bykomende persele.

Ibrahim Othman, direkteur-generaal van Sirië se Atoom Energie Kommissie het op die konferensie beklemtoon dat sy regering met die Agentskap saamwerk. Hy sê die samewerking sal egter nie op enige wyse ten koste van die bekendmaking van Sirië se militêre persele of 'n bedreiging van hulle nasionale sekuriteit geskied nie. 'n Diplomaat sê Afghanistan is vol vertroue dat dit die steun van die meerderheid IAEA-lede geniet. Geloofwaardigheid van die kernagentskap is vir die VSA op die spel. 'n Diplomaat van 'n Europese land sê die uitslag van die verkiesing is onseker.