Kategorie: Suider-Afrika

Pres. Jacob Zuma het Vrydag gesê Suid-Afrikaners behoort onderwys ernstig op te neeem.

“As ek daaroor kon besluit sou opvoeding nie net gratis wees nie, maar ook verpligtend,” het Zuma aan studente by die Universiteit van Johannesburg se Soweto-kampus gesê.

“Elke kind sou by die skool wees… Ons moet alle Suid-Afrikaners bemagtig. Dit moenie ‘n misdaad wees om ‘n kind skool toe te stuur nie.”

In verwysing na Julius Malema se uitlatings dat hy ‘n diktator is, het Zuma gesê: “As ek ‘n diktator was, sou ek baie van die tronke in skole omskep het en al die jong mense wat misdade pleeg, daarheen neem.

“Maar ek is nie ‘n diktator nie,” het Zuma geskerts.

Zuma het aan die studente gesê hy stel belang om hul opinies en voorstelle te hoor.

Hy het gevra wat gedoen moet word om die land se toekoms te vorm.

“Vandag hoor jy hoe mense die regering kritiseer… Hulle het vergeet dat die regering probeer om probleme die hoof te bied wat al eeue lank daar is… Hulle maak asof ons in 1994 begin het om opvoeding op te mors,” het die president gesê.

“Opvoeding speel ‘n baie groot rol in die land.”

Zuma het gesê mense kan krities wees, maar hy weet die regering “doen goed”. Hy het gesê opvoeding het uiteindelik die grondslag wat dit nie in die verlede gehad het nie.

Vaardigheid, en nie net ras nie, moet deur die Suid-Afrikaanse Lugdiens (SAA) oorweeg word wanneer hy kandidate kies vir sy kadetprogram vir voornemende vlieëniers, het die FW de Klerk-stigting Donderdag gesê.

Dis begryplik dat SAA wil hê sy vlugpersoneel moet verteenwoordigend wees van die land se demografie, het Jacques du Preez, woordvoerder vir die stigting, gesê.

Hy het egter gesê die lugdiens moet ook ander faktore in ag neem wanneer hy kandidate kies.

“Hy moet verseker dat vermoë… genoeg gewig dra in sy indiensnemingsbesluite. Die relatiewe vaardigheid, vermoë en kwalifikasies van aansoekers moet ‘n sentrale rol speel in die SAA se indiensnemingsbesluite, ongeag ras of geslag,” het hy gesê.

SAA het Maandag aangekondig dat 40 kandidate vir sy kadetprogram gekwalifiseer het: 10 is swart mans, vier swart vroue, nege bruin mans, een bruin vrou, sewe Indiërmans, twee Indiërvroue, en sewe wit vroue.

Du Preez het gesê die eerste vereiste behoort te wees dat die kandidate uitstekende vlieëniers moet wees, ongeag hulle ras.

SAA het in Augustus verlede jaar sy aanvanklike besluit om geen aansoeke van wit mans te aanvaar nie, opgehef.

Verskeie wit kandidate het in 2012 aansoek gedoen vir die program, maar hul aansoeke is summier verwerp wanneer hulle hul ras op die aanlyn-aansoekvorm ingetik het.

Kabelo Ledwaba, woordvoerder van die SAA, het destyds gesê die kadetprogram is geadverteer om die demografie van sy vlieëniers te verander. Volgens hom was 91% van die lugdiens se vlieëniers in daardie stadium wit mans.

Dr. Dirk Hermann, adjunkhoof van Solidariteit, het gesê verlede jaar se opheffing van die verbod was net ‘n rookskerm. Hy het gesê die vakverbond gaan ‘n veldtog teen die lugdiens begin.

Tlali Tlali, woordvoerder van die SAA, het gesê dit is belangrik om te verseker dat daar transformasie in alle dissiplines van die maatskappy is.

“Tans is die SAA se vlugbemanning nie ‘n weerspieëling van Suid-Afrika se rasse- en geslagsdemografie nie.”

Die inname vir die 2013-’14-kadetprogram word in Augustus vanjaar geadverteer.

‘n Standbeeld van oudpres. Nelson Mandela kan dalk opgerig word voor die stadsaal in Kaapstad, waar hy ná sy vrylating sy eerste toespraak gelewer het, berig die Cape Times.

Leonore van der Walt, DA-raadslid, het Woensdag op ‘n raadsvergadering voorgestel dat ‘n komitee aangestel word om die om die proses en befondsing te bespreek.

Andre Fourie, ‘n VF-raadslid, het gewaarsku dat behoorlike konsultasie moet plaasvind om ‘n debakel soos dié van die vryheid van die stad-toekenning wat aan die Obamas toegeken word, te verhoed. Die aankondiging van dié toekenning het kritiek uit alle oorde ontlok.

“Dit moenie gebeur met ‘n persoon met die statuur van Mandela nie.”

Tony Ehrenreich, ANC-leier in die stadsraad, het gevra vir ‘n “koherente nasionale beleid” om Mandela te vereer, anders sal die standbeeld in Kaapstad ‘n “DA-foefie” wees.

Die proses sal volgens die berig sowat R1 miljoen kos.

President Jacob Zuma het weer ‘n beroep op mense gedoen om vir oudpresident Nelson Mandela, te bid en hom in hul gedagtes te hou. Zuma het Mandela in die hospitaal in Pretoria besoek, waar hy die afgelope ses dae vir ‘n longinfeksie behandel word.

Die hospitaal waar Mandela behandel word, sê hoewel hy die pligte van polisielede by die hospitaal respekteer, is die hospitaal se pasënte sy eerste prioriteit.

Dit volg na berigte dat die polisie ‘n hartpasiënt geteister het. ‘n Woordvoerder van Mediclinic, Lee-Ann Bell, sê egter die hospitaal het die nodige stelsels by die Pretoriase Harthospitaal om te verseker dat geen pasiënte of hulle besoekers verontrief word nie.

Volgens berigte is ‘n kardiologiepasiënt, Maxwell Mkhonto, verkeerdelik vir ‘n joernalis by die hospitaal aangesien waarna hy na bewering aangerand, deursoek en beslag op sy selfoon gelê is.

‘n Gebeddiens word vanoggend vir die oud-president in die St George’s katedraal in Kaapstad gehou. Verskeie godsdienstige groepe sal die diens bywoon. Die ANC se sekretaris in die Wes-Kaap sê die diens is om vir Mandela se spoedige herstel te bid.

Die sogenaamde Economic Freedom Fighters het Ronald Lamola as ‘n “kortsigtige beroepsondersteuner” uitgekryt nadat Lamola Malema gekritiseer het.

“Lamola sal enigiets doen, insluitend diktators smeek vir sy persoonlike vryheid, en dus die saak vir ekonomiese vryheid in ons leeftyd opoffer,” het Floyd Shivambu, voormalige woordvoerder van die ANC-jeugliga, in ‘n verklaring namens die EFF gesê.

“Mnr. Lamola moet basies sy mond hou, omdat nie weet waarvan hy praat nie en niemand neem hom in elk geval ernstig op nie.”

Shivambu het reageer op Lamola se uitlatings dat die jeug nie Julius Malema se voorgestelde nuwe politieke party moet ondersteun nie.

In ‘n onderhoud met The Star het Lamola gesê Malema se forum van “radikale militante” is niks minder as militante wat mislei word nie.

Lamola het Malema daarvan beskuldig dat hy die jeugliga se resolusies oor ekonomiese vryheid, wat in 2011 op die nasionale konferensie in Midrand aanvaar is, “gekaap” het.

Shivambu het op sy beurt gesê Lamola het weggedryf van dié resolusies en aangesluit by die koor van “neo-liberale hervormers”.

Hy het ook gewaarsku indien Lamola aanhoudend dié soort uitlatings gaan maak, sal die EFF hom “ontbloot” vir die verskeie “individuele onderhandelings en manewales” in die aanloop tot die ANC se nasionale konferensie in Mangaung verlede jaar.

Die jeugliga se nasionale uitvoerende komitee is vroeër vanjaar deur die ANC ontbind en vervang met ‘n nasionale taakspan.

Nelson Mandela was nie net ‘n vriendelike ANC-lid nie, maar ‘n “ware Afrikaan”, het pres. Jacob Zuma Donderdag gesê.

Opposisiepartye moenie Mandela se nalatenskap verdraai nie en moet “eerlik en opreg” wees in hul waardering van hom, het hy gesê.

Mense skep ‘n oppervlakkige beeld van Madiba, het hy gesê.

“Hulle moet lief wees vir Madiba, die hoof-vrywilliger van die versetveldtog, Madiba die bevelvoerder van Umkhonto we Sizwe, Madiba die revolusionêr, Madiba die lang dienende gevangene,” het Zuma gesê.

“Ons moenie net fokus op Madiba die eerste president van ‘n demokratiese Suid-Afrika wat ANC-beleid van rekonsiliasie en transformasie geïmplementeer het nie.”

Mandela het Donderdag sy sesde dag in ‘n hospitaal in Pretoria deurgebring.

Zuma het Woensdag gesê hy reageer goed op die medikasie wat hy ontvang.

Die kabinet het Donderdag die land verseker dat oudpres. Nelson Mandela die beste mediese behandeling ontvang.

Mandela is Saterdag in ‘n ernstige maar stabiele toestand in die hospitaal opgeneem met ‘n herhalende longinfeksie.

“Die kabinet is bly dat hy goed reageer op behandeling en benadruk die versoek vir die media en publiek om die privaatheid van die voormalige president se familie te respekteer,” lui ‘n verklaring wat ná die kabinet se tweeweeklikse vergadering uitgereik is.

Mandela is al ses keer sedert Januarie 2011 in hospitale in Johannesburg en Pretoria behandel.

Die teenwoordigheid van die Suid-Afrikaanse Nasionale Weermag (SANW) in die Sentraal Afrikaanse Republiek (SAR) sedert 2009, het Suid-Afrika R166,2 miljoen gekos. Dit blyk uit die antwoord van die minister van Verdediging en Militêre Veterane, me. Nosiviwe Mapisa-Nqakula, aan Pieter Groenewald van die Vryheidsfront Plus in die parlement.

“Die werklikheid is dat die belastingbetalers se geld in die SAR gemors was, aangesien die SANW daaruit moes onttrek en nie die bi-laterale ooreenkoms kon nakom nie. Die minister het verklaar dat slegs sowat 25 lede van die SANW in die SAR teenwoordig was tot in 2012. Dit beteken R6,648 miljoen per lid was spandeer. Hierdie geld kon eerder spandeer gewees het aan die aankoop van nuwe toerusting en opleiding van soldate binne Suid-Afrika,” sê mnr. Pieter Groenewald, hoofwoordvoerder vir Verdediging van die Vryheidsfront Plus.

Volgens die minister het Suid-Afrika vier bi-laterale ooreenkomste op militêre gebied in Afrika gesluit wat gesamentlik sedert 2009 Suid-Afrika R471,8 miljoen gekos het. Die verkiesing in die Demokratiese Republiek van die Kongo (DRK) in 2011 en 2012 het die SANW R117 miljoen (R116 998 778) gekos, waarvan R100 miljoen terug ontvang is. Die patrollering van die Mosambiekse kanaal teen seerowery beloop tot einde 2012 R150,85 miljoen.

“Behalwe operasie Senoko in die RDK-verkiesing, moet die verdedigingsbegroting die volle koste dra vir die bi-laterale ooreenkomste. Hierdie is bi-laterale ooreenkomste en nie verpligtinge in terme van die Afrika-Unie of Verenigde Nasies nie. Dit veroorsaak dat die toerusting en opleiding van die SANW binnelands nie sy verpligtinge behoorlik kan nakom nie. Van hierdie gelde sou beter aangewend kon word vir byvoorbeeld grensbeheer in Suid-Afrika,” het Groenewald gesê.

Beeld berig dat twee lede van “die sogenaamde Waterkloof-vier wat 18 maande gelede onder korrektiewe toesig uit die tronk vrygelaat is”, gister beveel is om op 10 Julie vir voortgesette tronkstraf aan te meld.

Drie regters van die hooggeregshof in Pretoria het tot dié slotsom gekom.

Beeld berig voorts dat “die hof Reinach Tiedt en Gert van Schalkwyk – wat elk net minder as drie en ‘n half jaar tronkstraf uitgedien het – beveel (het) om na die Zonderwater-tronk in Cullinan terug te keer om hul tronkstraf te hervat”.

Dié twee jong mans is elk tot 12 jaar tronkstraf gevonnis omdat hulle 12 jaar gelede in 2001 as skoliere ‘n onbekende swartman in ‘n Pretoriase park doodgeslaan het.

Die vader van Christoff Tiedt, het gister oor die uitspraak gesê: “Ons is stomgeslaan. Ons verstaan dit nie.”

Die Waterkloof-2 se prokureur, me. Jenny Brewis, sal eers die uitspraak bestudeer en sal regsadvies inwin voordat daar besluit word om daarteen te appelleer, al dan nie.

Sowel Tiedt as Van Schalkwyk werk reeds met allerlei verantwoordelikhede. Daarom het regter Hans Fabricius gister gesê dit sou “erg onbillik en onmenslik wees” om te verwag dat hulle dadelik vir tronkstraf moet aanmeld. Daarom word hulle ‘n maand lank gegun om reëlings te tref.

‘n Volle bank van drie regters het in die guns van die minister en die kommissaris van die departement van korrektiewe dienste (DKD) se aansoek beslis dat streeklanddros Peet Johnson van Pretoria se bevel op 15 Desember 2011 – waardeur die tronkstraf in korrektiewe toesig omgeskep is – tersyde gestel moet word.

Volgens die kommissaris het hy en die minister van korrektiewe dienste nie geweet van die paroolraad se omskeppingsaansoeke voor landdros Johnson nie en het dit daarom nie teengestaan nie. Daar mag slegs vyf jaar voor die einde van ‘n straftermyn aansoek om parool gedoen word, terwyl die twee se termyn tot 20 Februarie 2020 strek.

Die landdros was daarom nie by magte om die omskeppingsaansoeke aan te hoor nie.

Regter Fabricius het wel gemeen dat “die twee geskikte kandidate is vir die omskepping van hul tronkstraf in korrektiewe toesig op ‘n datum wat nie langer as vyf jaar voor hul vrylatingsdatum is nie”.

Die hooggeregshof in Pretoria sal vandag besluit of die Tshwane metropolisie kan appèlleer teen ‘n hofbevel wat die verwydering van ou straatname verbied.

Die hofbevel is in April aan die burgerregtegroep Afriforum toegestaan.

In die hofbevel het regter Bill Prinsloo gelas dat die verwydering van ou straatname gestaak moet word hangende die uitslag van ‘n hersieningsproses.

Hy het die metroraad ook opdrag gegee om die ou straatname wat reeds verwyder is, terug te plaas.

Die Tshwane munisipaliteit het gister by die hof aansoek gedoen dat die hofbevel ter syde gestel word omdat dit meer as twee miljoen rand gaan kos om die ou name terug te plaas.

Afriforum sê daar kan nie teen ‘n tussentydse hofbevel geappèlleer word nie.

n Staking by Lonmin se myne is moontlik afgeweer nadat die mynmaatskappy nié ‘n stakingskennisgewing van die mynvakbond, AMCU ontvang het nie.

Die vise-president van die vakbond, Jeff Mthahmeme was ook onbewus dat so ‘n kennisgewing aan die mynbestuur oorhandig sou word.

Die myn se woordvoerder, Sue Vey het bevestig dat daar nog geen ooreenkoms met AMCU bereik is om dit as die meerderheidsvakbond by sy myne te verklaar nie.

AMCU het ook verskeie ander eise op die tafel geplaas. Vey sê die maatskappy is daartoe verbind om ‘n ooreenkoms te bereik wat in die beste belang van al sy werkers sal wees.

Die geskil is vir arbitrasie verwys en sal later die maand aangehoor word.

Adjunk-president Kgalema Motlanthe vergader môre met die Kamer van Mynwese en vakbonde in die mynbedryf.