Suider-Afrika Archives - Page 373 of 888

Mandela-familie gee eksklusiewe begrafnisregte aan CNN

Die Mandela-familie twis nou nog verder, dié keer oor die uitsaairegte vir Nelson se begrafnis wat aan CNN verkoop is. Die SAUK is droëbek en gebelg daaroor.

Mandla Mandela beskuldig die res van die familie daarvan dat hulle ook gelieg het oor Nelson Mandela se gesondheid terwyl hulle besig was om met die Amerikaanse uitsaaier CNN te onderhandel.

Volgens ‘n berig in vandag se Sunday Independent is ‘n “sensitiewe vergadering” aan die einde van verlede maand met die SAUK gehou. Tydens daardie vergadering het die Mandelas geëis dat CCN “voorkeurbehandeling” moet kry tydens ‘n eventuale begrafnis vir Nelson Mandela.

Die SAUK het gevoel dié eise was “onvanpas”. ‘n Amptenaar van die SAUK het gesê:

“Ons voel in die gesig gevat. Maar dit lyk asof daar min is wat ons hieraan kan doen aangesien die familie blykbaar hul eie planne het.”

‘n Tweede amptenaar van die SAUK het hom soos volg uitgelaat: “Dit was geen versoek nie. Hulle het dit geëis. Die CNN-ooreenkoms is klaar aangegaan.”

Dis egter nie duidelik wie van die Mandela-familie voordeel uit die CNN-ooreenkoms gaan trek en of enige betalings gemaak is nie.

Van hulle kant af wou CNN ook geen besonderhede bekendmaak nie en hul Johannesburgse verteenwoordiger, Kim Noorgaard, beweer dat sy nie op hoogte is nie. Bestuurders van CNN in Atlanta,VSA, kon nie deur die Sunday-Independent-verslaggewer bereik word nie.

Makaziwe Mandela was ontsteld om te verneem dat die nuus uitgelek het. Sy wou nie verder praat as die naam van die SAUK-amptenaar nie bekendgemaak word nie.

“Sê my dadelik wie dit was,” het sy geëis. “Dit was ‘n vetroulike vergadering en daar behoort nie daaroor gepraat te word nie.”

Indien Mandela te sterwe sou kom, sou die SAUK in elk geval die enigste uitsaaier wees wat ‘n intydse uitsaaidiens gaan aanbied. Daardie toevoer sal dan kosteloos aan die res van die wêreld beskikbaar gestel word, waaronder CNN.

Te veel kiesers en te min mense in Zim

“Die Zimbabwiese kiesersrol wat verlede maand uitgereik is, laat ernstige vrae ontstaan oor die moontlikheid of dié land se algemene verkiesing einde vandeesmaand enigsins vry en regverdig kan wees,” sê dr. Corné Mulder, die Vryheidsfront Plus se woordvoerder oor internasionale betrekkinge.

Volgens die kiesersrol is die aantal geregistreerde kiesers in Zimbabwe veel meer as die bevolking in 78 van sy 210 kiesafdelings, asook in alle bevolkingsgroepe van dertig jaar en ouer gemeet aan die laaste nasionale sensus wat in 2012 in dié land gedoen is.

Dit selfs nadat 300 000 afgestorwe persone van die kiesersrol verwyder is.

Volgens dr. Mulder het ‘n onafhanklike navorsingsverslag van die Research and Advocacy Unit (RAU) wat in die media gepubliseer is, hierdie skoksyfers aan die lig gebring. Die RAU is ‘n nie-regeringsorganisasie wat in Zimbabwe gesetel is.

Daarvolgens het Zimbabwe, met sy totale bevolking van 12,754 miljoen (2012-sensus) meer as 116 000 kiesers van honderd jaar en ouer op die kiesersrol in vergelyking met Suid-Afrika (met meer as 50 miljoen inwoners) se getal van 255 000 inwoners bo die ouderdom van 85.

Die grootste onreëlmatighede kom voor in die ouderdomsgroepe 80+ waar daar 219% meer mense op die kiesersrol is as wat sensus-statistiek aandui, en in die 40 – 44-groep waar daar 162% meer mense op die kiesersrol is.

Waarnemers meen dat die kiesersrol met tot soveel as 1,2 miljoen name gelaai is. Volgens dr. Mulder maak dit die deur oop vir grootskeepse bedrog en stemknoeiery wat bedenkinge laat ontstaan of die verkiesing vry en regverdig kan wees.

“Die VF Plus wil hom om hierdie redes opnuut uitspreek teen die lening van meer as R900 miljoen van die Suid-Afrikaanse regering aan Zimbabwe vir die verkiesing.

“Daar is steeds geen voorwaardes aan die lening gekoppel nie en ons eis dat die regering sê wat die motivering, terugbetalingsvoorwaardes en waarborge is wat aan die lening gekoppel is,” sê dr. Mulder.

Mulder het egter nie aangedui hoeveel Zimbawiërs hulself tans in Suid-Afrika bevind en of dit ingereken is in die opname nie.

Minister onbewus dat Aarto gekraak is

Die minister van vervoer, mnr. Ben Martins, het ‘n skok-erkenning aan die Vryheidsfront Plus gedoen dat hy tot nou toe nie bewus was daarvan dat die webwerf van Aarto (die Wet op die Administratiewe Beregting van Verkeersoortredings), reeds in Aprilmaand vanjaar gekraak is nie.

Die erkenning het gevolg op geskrewe vrae van adv. Anton Alberts, die VF Plus se parlementêre woordvoerder oor vervoer, oor die aangeleentheid waaroor wyd in die media berig is.

Die minister het ook die vraag ontduik oor presies hoeveel die oprigting van die webwerf gekos het, deur slegs te antwoord dat die totale koste van die Aarto-projek, wat die ontwikkeling van die webwerf insluit, R1,949,229-00 beloop het.

Hy het wel bevestig dat die inhoud-bestuursplatform Joomla! wat gratis van die internet afgelaai kan word, gebruik is om die webwerf te skep. Joomla! is soortgelyk aan WordPress.

Volgens adv. Alberts is dit onaanvaarbaar dat die minister nie van die ernstige voorval bewus kon gewees het nie, veral aangesien dit ‘n hoë-profiel webwerf is en die media wyd daaroor berig het.

“Dit is duidelik dat voldoende veiligheidsmaatreëls nie in plek was om die webwerf te beveilig nie. Enige stelsel is net so veilig as die praktyke wat gevolg word om dit te beskerm, en in hierdie geval was dit duidelik nie voldoende nie,” sê adv. Alberts.

Op die vraag of die oprigting van die webwerf deur die tenderproses gedoen is, wanneer dit gedoen is, wie die suksesvolle bieër was asook die waarde van die tender, is geantwoord dat dit wel per tender gedoen is.

Die tender is in April en Mei 2007 uitgereik vir die inwerkingstelling van Aarto, wat die ontwikkeling van die webwerf ingesluit het. Die tender is toegeken aan die maatskappy Magna FS.

Die antwoord lui voorts dat Joomla! gebruik is as ‘n ‘tydelike maatreël’ aangesien die Padverkeersbestuursorganisasie (RTMC) nie in daardie stadium die rekenaar-infrastruktuur gehad het om die Aarto-webwerf te huisves nie.

Die maatskappy HETZNER in Kaapstad is as bediener gebruik aangesien dit belangrik was om ‘n oop platform te gebruik wat enige IT-infrastruktuur kon akkommodeer.

Op die vraag oor of die minister ingelig is oor die voorval en of veiligheidsmaatreëls getref gaan word om te verseker dat dit nie weer gebeur nie en wat dit behels, is geantwoord dat die plan was om veranderings en verbeterings aan die webwerf aan te bring sodra die RTMC sy eie infrastruktuur hiervoor ontwikkel het.

Die veranderings sou gedoen word om versoenbaar te wees met die platforms van die RTMC se IT-stelsels, sy infrastruktuur en programme.

Kern van Mandela-twis is Xhosa-matriargie

Die twis tussen die Mandelas het verhewig met Nelson Mandela se kleinseun Mandla wat Donderdag daarop aandring het dat Mandela hom gevra het om in Mvezo, langs sy ouers, begrawe te word.

Madiba se graf het oënskynlik die familietwis tussen Mandla en sy broers en tantes veroorsaak. Makaziwe en 15 ander het hulself tot die hooggeregshof gewend om Mandla te “dwing” om die bejaarde Xhosa se begraafplaas weg van Qunu, na Mvezo te skuif.

Mandla – sy volledige titel en naam is Nkosi Zwelivelile Mandla Mandela – het Donderdag die gesin se vuil wasgoed in die openbaar gewas. Die werklike kern van die geskil is die Xhosas se matriargale stelsel wat teen ander stamme se patriargale stelsel afgespeel word.

“Die aansoekers, as bewaarders van die laaste testament van Nelson Mandela se plig is om te verseker dat sy laaste wense uitgevoer word in die geval van sy dood,” sê Makaziwe Mandela.

Oor Madiba se laaste wens, het Mandla egter gesê: “Dit bly ‘n geheim en lê by die mense wat hy aangestel het om dit te administreer.”

Hy het gesê die sukkelende Mandela sou ook teleurgesteld wees met die onlangse gebeure in die openbaar en in die hof. Hy het ook die wettigheid van ‘n paar van die 15 familielede wat hom na die hof gesleep het, bevraagteken en sê dat hulle nie kan aanspraak maak om deel van die Mandela-familie te wees nie.

Hy het sy tante Makaziwe Mandela, wat die hoofaansoeker in die hofsaak was, beskuldig daarvan dat sy probeer om haar hande te kry op die verswakte ou staatshoof se geld deur George Bizos, Tokyo Sexwale en Bally Chuene as trustees van Madiba se trusts afgedank te kry.

Tydens Donderdag se inligtingsessie het Mandla gefokus hoofsaaklik op Makaziwe en sy twee broers Mbuso en Ndaba.

Bygestaan deur sy ma Nolusapho, het die jong hoof gesê hy was die teiken van “aanvalle in alle gedaantes vir ‘n paar minute van roem en media-aandag op my onkoste” oor die afgelope paar dae.

“In die eerste plek wil ek my teleurstelling uitspreek oor die besluit wat geneem is by die Mthatha Hooggeregshof Donderdag,” het hy gesê.

Hy het gesê Makaziwe was getroud met Camagu Balfour en het twee kinders, Tukwini en Dumani, voor sy geskei en getroud is met Isaac Amuah, met wie sy ‘n seun met die naam Kweku Amuah het.

“Sy is in werklikheid ‘n mev Amuah en behoort te fokus op die Amuah-familieprobleme,” het Mandla gesê, in ‘n duidelike verwysing na die Xhosa-tradisie van matriargie.

Sy broer Ndaba is ook nie gespaar nie. “Soos met Ndaba. Ek is baie teleurgesteld. Hy beweer in die media dat ek gebore is buite die huwelik. Ek wens hy wil dit sê dat in die teenwoordigheid van my pa. Maar hy weet baie goed dat my pa ‘n getroude vrou swanger gemaak het… hy is ‘n gevolg daarvan.

“So, hy moet baie versigtig wees wanneer hy beledigings rondgooi, veral teen my ma wat steeds langs my sit, my koester en verseker dat ek in staat is om wakker te word elke dag om my gemeenskap te dien,” het Mandla gesê.

Sy ander broer Mbuso het hy ook bygedam.

“Vir twee jaar het ek ringkoppe gestuur om ‘n beroep veral op Ndaba te doen om te kom en hierdie sake tussen my en Mbuso te versoen,” het Mandla gesê.

Hy het bygevoeg dat sy oupa in ‘n stabiele toestand is.

In hofstukke, het Makaziwe en ander beweer dat Mandela in ‘n vegetatiewe toestand is.

Mandela se toestand verbeter effens

Nelson Mandela se vrou, Graca Machel, het Donderdag gesê dié voormalige staatshoof ervaar ongemak, maar nie pyn nie.

“Ons is nou al sowat 25 dae in die hospitaal,” het Machel gesê. Die kliniek het ‘n kamer tot Machel se beskikking gestel waar sy inwoon om die media-aandag buite die gebou te kan vermy.

Machel het ook haar dank betuig oor die boodskappe van beterskap van regoor die wêreld.

“Madiba was soms ongemaklik, maar hy het nog nooit pyn ervaar nie.”

Die voormalige president, wat later vandeesmaand sy 95ste verjaardag vier, is op 8 Junie vir ‘n longinfeksie in die hospitaal opgeneem. Hy is voorheen ook weens die infeksie gehospitiliseer.

Hy is sedertdien aan lewensondersteunende masjiene gekoppel, maar sy toestand het glo die afgelope week verbeter.

“Dankie, dankie, dankie,” het Machel gesê.

“Die uitstorting en verootmoedigende dade van liefde, van omgee, van ondersteuning, van hoop word elke liewe dag in ons harte opgeneem.”

Te midde van ‘n openbare familietwis in Mandela-geledere, wat bewerings van egbreuk en ‘n geskil oor grafte insluit, het Machel gesê Mandela se voorbeeld kan dien as ‘n simbool vir eenheid in Suid-Afrika.

Medici sê Mandela nie in ‘vegetatiewe’ toestand nie

Medici wat Nelson Mandela behandel, het ontken dat hy in ‘n vegetatiewe toestand is, het die presidensie Donderdag gesê.

Mac Maharaj, presidensiële woordvoerder, het Donderdagmiddag in ‘n verklaring gesê pres. Jacob Zuma het Mandela in die hospitaal besoek en dat die voormalige staatshoof steeds in ‘n kritieke, maar stabiele toestand is.

Die presidensie het die verklaring uitgereik nadat daar in hofdokumente aangevoer is dat Mandela in ‘n “permanente vegetatiewe toestand is” en dat sy familie aangeraai is om die masjiene wat hom aan die lewe hou, af te skakel.

Sapa het ‘n sertifikaat van dringendheid bekom wat adv. David Smith, regsverteenwoordiger van 16 Mandela-familielede, in hul saak teen Madiba se kleinseun Mandla ingedien het.

Smith het geskryf: “Ek is deur my opdraggewende prokureur ingelig dat mnr. Nelson Mandela se gesondheid erg verswak het en dat die Mandela-familie deur die mediese praktisyns geadviseer is dat sy lewensondersteuningsapparaat afgeskakel behoort te word.

“Eerder as om sy lyding uit te rek, ondersoek die Mandela-familie dié opsie as ‘n baie werklike waarskynlikheid.”

Smith het Madiba se gesondheid as “in lewensgevaar” beskryf.

“Die verwagting van sy naderende dood is op werklike en substansiële gronde gegrond.”

‘n Latere weergawe van die dokument wat by die hof ingedien is, het paragrawe weggelaat wat verband hou met Mandela se “vegatiewe toestand” en dié van dokters se raad om die masjiene af te skakel.

Zille skerm vir twisgierige Mandela’s

Nelson Mandela se familie moet die privaatheid gegun word om hul verskille op te los, het Helen Zille, leier van die Demokratiese Alliansie, Woensdag gesê.

“Ek wil liewer nie kommentaar lewer oor die kwessie nie. Die familie moet die ruimte gegum word om dit op te los,” het Zille aan joernaliste buite die Harthospitaal in Pretoria gesê.

Mandela is op 8 Junie vir ‘n herhalende longinfeksie in die hospitaal opgeneem. Hy is in ‘n kritieke, maar stabiele toestand.

Zille het gesê terwyl sy in Pretoria was, het sy dit goed gedink om aan te doen by die hospitaal waar Mandela behandel word, om ‘n bos blomme neer te sit en die voormalige staatshoof ‘n spoedige herstel toe te wens.

“Ek kon nie verby die hospitaal ry en niks doen nie. Die DA ondersteun die vader van die nasie, Nelson Mandela.”

Zille het gesê sy wou na die hospitaal kom wanneer Mandela se toestand verbeter het en dat sy familie sal besluit oor die internasionale ikoon se laaste rusplek.

Mandela-twis verhewig

Drie lykswaens van ‘n begrafnisondernemer in Mthata in die Oos-Kaap het op Mvezo aangekom om die oorskot van oudpresident Nelson Mandela se kinders na Qunu terug te neem, berig RSG.

Dit volg nadat Madiba se kleinseun, Mandla ‘n hofgeding verloor het om die opgrawing van Tembekile, Makgato en Makaziwe Mandela te keer.

Die hekke wat buite Mvezo aangebring is, is volgens die radiostasie oopgebreek.

Mandela se oudste dogter Makaziwe en kleinseun Ndbaba is ook op die toneel saam met amptenare van die departement van gesondheid. Hulle is deel van die 16 aansoekers wat die hofaansoek gerig het om die oorskot na Qunu terug te neem.

Die oorskot van drie van Mandela se kinders sal forensies ge toets word nadat dit oornag na ‘n lykshuis in Mthtatha gebring is.

Die oorskot is laat Woensdag ingevolge ‘n hofbevel by Mvezo opgegrawe.

Ingevolge die hofbevel moet die oorskot teruggeneem word vanwaar Mandla dit in 2011 na Mvezo geneem het.

Die drie familielede wie se oorskot geskuif is, is Mandela se oudste seun en Mandla se pa Makgato Mandela wat in 2005 oorlede is, Mandela se eerste dogter Makaziwe wat as ‘n baba in 1948 gesterf het, en Mandela se tweede seun Madiba Thembekile wat in 1969 in ‘n motorongeluk oorlede is.

Intussen sal Mandla Mandela Donderdag ‘n mediakonferensie hou om sy kant van die saak te stel.

ANC skors Potch-raadslede wat saam met DA stem

Die ANC in die Noordwes het die skorsing verwelkom van 14 raadslede van die Tlokwe-munisipaliteit wat saam met die DA gestem het om die burgemeester, Maphetle Maphetle, te ontsetel.

Die besluit om die groep te skors, is Woensdag op ‘n vergadering van die provinsiale tugkomitee gemaak.

Die ANC beweer 16 van sy raadslede het ‘n raadsvergadering bygewoon, waar hulle ten gunste van Maphetle se ontseteling gestem het.

Dit was die tweede poging om Maphetle uit sy pos te verwyder.

Chris Hattingh, DA-leier in die Noordwes, het gesê 29 raadslede van alle partye, insluitend die ANC, het eenparig gestem vir die heraanstelling van Annette Combrink.

Die geskorste lede kan by die nasionale appèlkomitee appelleer teen hul skorsing.

SA wil renosterhoringhandel beter reguleer

Suid-Afrika is intussen besig om ‘n omvattende voorstel vir handel in renosterhoring voor te berei vir oorweging by die Konvensie vir Internasionale Handel in Bedreigde Spesies, CITES.

Dit sal gereed wees vir die organisasie se volgende byeenkoms wat oor drie jaar in Suid-Afrika gehou word.

Die minister van omgewingsake – Edna Molewa – sê die land is as ‘n lid van CITES daartoe verbind om sy rol as ‘n leier op die gebied van omgewingsbewaring uit te bou. Sy het op ‘n nuuskonferensie in Pretoria gesê dat Suid-Afrika ook sy deel moet doen in besluitnemingsprosesse deur ander CITES-lede oor die wettige handel in renosterhoring te beïnvloed.

Die opstel van ‘n voorlegging vir CITES se volgende beraad is reeds deur die regering goedgekeur.

Drie vermeende renosterstropers wat intussen die naweek in die noorde van KwaZulu-Natal vasgetrek is, het erken dat hulle ‘n renoster in die iSmangaliso vleilandpark doodgemaak het.

Hulle is blykbaar op heterdaad betrap met wapens en renosterhoring in hulle besit. Die renoster wat gestroop is was moontlik dragtig.

Twee van die mans is van Suid-Afrika en die derde is ‘n Mosambiekse burger.

Een-en-veertig renosters is sover vanjaar in KwaZulu-Natal gestroop, en 450 landwyd.