Suid-Afrikaanse nuus, d.w.s. sowel nuus uit Suid-Afrika én Suider-Afrika.
‘n Vierjarige swart seun het doodgebrand in ‘n plakkershut in die Witsand-lokasie in Atlantis, Kaapstad.
Wilfred Solomons-Johannes, woordvoerder van die stad Kaapstad se rampbestuursentrum, het gesê 20 mense is dakloos gelaat nadat hul huise in die brand verwoes is.
Die skade van die brand word op R36 000 geraam. – Sapa
President Jacob Zuma het by ‘n byeenkoms in Seshego, Limpopo gesê die ANC Jeugliga mag radikaal wees, solank hulle die tradisies van die regerende party respekteer.
Tienduisende mense het die byeenkoms bygewoon. Daar was nie een wit gesig in die skare of op die verhoog nie, wat ‘n duidelike streep deur die ANC se vermaarde verbintenis aan “nie-rassigheid” getrek het.
Die president se toespraak was gemik om Julius Malema se EFF-steunbasis in sy tuisdorp. Zuma het gesê daar is nie iets soos die “Born Free” geslag nie – diegene wat ná 1994 gebore is – aangesien daar nog nie ekonomiese gelykheid in Suid-Afrika heers nie.
Die byeenkoms het die nege en sestigste herdenking van die Jeugliga gevier. Busse van oral het na Polokwane gereis vir die geleentheid.
Zuma het vroeër ook die graf van die voormalige Jeugligaleier Peter Mokaba besoek en ‘n krans gelê. Mokaba het die “Kill a Boer” liedjie gepopulariseer.
Khulubuse Zuma, die president se gesette neef, het miljoene rande verloor nadat hulle deur ‘n goudswendelaar in Guinee om die bos gelei is.
Zuma en ‘n sakevennoot Sikhumbuzo Shamase, het vroeër vanjaar ‘n privaatstraler gehuur om die “goud” te gaan haal van ‘n stamhoof in dié Wes-Afrikaland.
Die twee sakemanne, het op 16 Februarie by Lanseria-lughawe geland na hul reis, en hoogs in hul skik met hul jongste aankoop vir foto’s geposeer. By die doeane is die houer met die kosbare vrag oopgesny aangesien die twee nie die sleutel gehad het nie.
Die “goud” is na ‘n stoorplek by OR Tambo-lughawe geneem waar ‘n Belgiese koper van Argentor Essayeurs dit ‘n paar dae later sou gaan haal het. Die transaksie was deel van ‘n reeks soortgelykes wat Zuma en sy vennoot voorheen glo met sukses afgehandel het.
Maar op 26 Februarie toe die Belgiese kopers die die “goud” in Antwerpen ondersoek, het hulle vasgestel dat dit koper- en sinkstawe is met ‘n geraamde waarde van R7 000, en die houer teruggestuur.
Zuma en sy vennoot het toe reeds R2,5 miljoen spandeer om die straler te huur, en na Conakry te vlieg.
“Dis ‘n korrupte stelsel waar die weermag saamwerk met tradisionele leiers wat die grond besit. As hulle jou wil bedrieg is dit gewoonlik dié twee [groepe] wat saamwerk,” het Shamase gesê.
Die twee het nooit die saak by die polisie aangegee nie. “Dis donker Afrika. Ons het die hou op die ken gevat, want dis deel van hoe sake gedoen word in Afrika,” Het Shamase aan die Sunday Times gesê.
Die Sentrale Bank in Guinee het die besending as 99% suiwer goud gesertifiseer en hulle het self die besending met ‘n lasergeweer getoets. Dit kom glo van 250 verskillende dorpies in Guinee waar goud op ‘n primitiewe, artisanale wyse gedelf word.
Die delwers neem dan die goud na die stamhoof wat dit verkoop.
Die twee sakevennote is nie baie bekommerd oor die jongste verwikkelinge nie. “Ons het ander manier gekry om die verlies te dek en dit gaan aanhou [om geld in te bring],” het Shamase gesê.
Zuma was een van die direkteure van die Auroramyn wat duisende myners werkloos gelaat het ná likwidasie. Die myn is in chaos gedompel na die infrastruktuur verwaarloos is en goudtransaksies nie verklaar is nie.
Een vreemde aspek van die transaksie is dat die goud nie direk na die koper geneem is nie. “Ons het met vorige transaksies die goed na China, Japan en Dubai geneem, maar dis ‘n probleem om die geld terug te bring. Daar is te veel vrae.”
Die departement van vroue, kinders en mense met gestremdhede se geldsake en bestuur is haglik en die tyd het nou aangebreek dat dié departement na jare van wanbestuur afgeskaf word, sê adv. Anton Alberts, die Vryheidsfront Plus se parlementêre woordvoerder oor ekonomiese sake.
Dit blyk uit ‘n verslag wat uitgereik is deur mnr. Collins Chabane, minister in die presidensie, oor die swak prestasie en bestuur van feitlik al Suid-Afrika se staatsdepartemente.
Een van die swakstes is weer me. Lulu Xingwana se departement van vroue, kinders en mense met gestremdhede.
Adv. Alberts sê na jare se kritiek oor geldmorsery en doelwitte wat nie bereik word nie, is dit nou duidelik dat die minister en haar departement nie net in hul basiese bestuursfunksies faal nie, maar ook in die lewering van dienste wat die omgewing veiliger vir vroue, kinders en persone met gestremdhede moet maak.
Nasionale tesourie het reeds in April verlede jaar in die parlement gewaarsku oor ‘finansiële wanbestuur’ in Xingwana se department.
Dit het geblyk dat verreweg die grootste deel van haar begroting (hierdie jaar beloop dit R214 miljoen) aan salarisse en reis en verblyfkoste bestee word.
Volgens adv. Alberts is die departement nou ‘n blote mors van geld en sy funksies kan oorgeneem word deur die departemente van maatskaplike ontwikkeling en justisie.
“Die minister en die departement het sedert sy ontstaan nie daarin geslaag om tasbare resultate te lewer waar die regte van vroue, kinders en persone met gestremdhede konkreet bevorder is nie.
“Die minister is ook nie in staat om te skakel met haar mede-ministers in ander departemente om sekere belangrike kwessies te behandel nie. So gaan die epidemie van kinderverkragtings en moorde ongestoord voort.
“Vroue word steeds onderdruk, veral onder tradisionele leierskap, terwyl die minister eerder rassistiese aanvalle op wit Calvinistiese mans doen. Persone met gestremdhede word ook nie genoegsaam aangestel in werksplekke ingevolge die Wet op Gelyke Indiensneming nie.
“Die departement se geld kan eerder aangewend word om belangrike gate in die staat se sak te vul, soos die finansiering van ‘n nuwe SAPD kinder- en vrouebeskermingseenheid, die broodnodige inspuiting in die Transnet-pensioenfondse ten einde die pensioenarisse ‘n beter inkomste te verseker en om die e-tolskuld te betaal,” sê adv. Alberts.
Die parlement het ‘n spertyd van ses weke gestel vir die hersiening van die wetsontwerp oor die beskerming van staatsinligting.
“Die ad hoc komitee moet teen 31 Oktober verslag doen aan die Nasionale Vergadering,” lui ‘n parlementêre verklaring.
‘n Kommitee van 12 lede sal nou voorleggings aanvra en verhore hou.
Die Suid-Afrikaanse Nasionale Redakteursforum het pres. Jacob Zuma se besluit verwelkom om die wetsontwerp oor die beskerming van staatsinligting terug te verwys na die parlement.
Die forum sê hy stem saam met die president dat afdelings 42 en 45 van die ontwerp irrasioneel en ongrondwetlik is.
Die Vryheidsfront Plus sê ‘n groot oorwinning is behaal deurdat pres. Jacob Zuma die gewraakte sogenaamde ‘muilbandwet’ teruggestuur het na die parlement weens die ongrondwetlikheid daarvan.
Adv. Anton Alberts, die VF Plus se parlementêre woordvoerder oor Justisie, sê die VF Plus het die ANC by verskeie geleenthede gewaarsku dat die wetsontwerp ongrondwetlik is en dat dit geen toets in die Grondwethof sou deurstaan nie.
Hy sê dit is veral die gebrek aan ‘n baie sterk openbare belang-verweer in die beoogde wet wat die VF Plus bekommerd gemaak het.
Sonder dié verweer sou persone wat geklassifiseerde inligting besit, aan ‘n misdryf skuldig wees en sou hulle na die hof moes gaan om te bevind of die inligting se bekendmaking in openbare belang is. Verskeie ander partye asook die burgerlike samelewing het ook hierdie siening gehuldig.
Die VF Plus het tesame met die IVP in Agustus 2012 die goedkeuring van die wet strategies vertraag deur 123 wysigings aan te beveel ten einde die wet te verbeter.
Die wysigings is ook strategies voorgestel ‘n dag voordat die wet in die nasionale vergadering sou dien sodat dit volgens parlementêre reëls weer terugverwys moes word na die betrokke ad hoc-komitee vir behandeling
Desnieteenstaande hierdie poging het die ANC steeds later die wetsontwerp deurgestoomroller deur onder meer hul eie LP’s te dreig indien hulle nie vir die wet sou stem nie.
Die onbedoelde gevolg van die ANC se optrede is dat dit die opposisie saamgesnoer het tot ‘n geskiedkundige front teen die ANC wat die platform gelê het vir toekomstige samewerking en koalisievorming vir die 1014-verkiesing.
Die versekerings wat die voorsitter van die ad hock-komitee , mnr, Cecil Burgess, gegee het dat die wetsontwerp wel grondwetlik is , is met die terugverwysing deur die president as heeltemal onwaar bewys.
Die VF Plus sal voortgaan om saam met die opposisie te stry om te verseker dat die wet waarborge sal bied wat die burgers van Suid-Afrika deur ‘n verweer van openbare belang sal beskerm teen vervolging wanneer korrupsie openbaar gemaak word. – Sapa/praag
‘n Jong rugbyspeler is dood, nadat hy Vrydag saam met agt van sy spanmaats by die Nahoon-riviermond in Oos-Londen deur ‘n sterk stroom meegesleur is.
Craig Lambinon, woordvoerder vir die Nasionale Seereddingsinstituut (NSRI) het gesê die spelers was vermoedelik van die Noord-Wes Luiperds se o.19- en -21-spanne wat ná ‘n wedstryd strand toe gegaan het.
Die slagoffer se liggaam is aan die staat oorhandig vir ‘n ondersoek deur ‘n forensiese patoloog.
Nog een is in die hospitaal opgeneem toe die groep in die riviermonding in die moeilikheid beland het.
Nege van hulle is deur sterk strome meegesleur, maar gered.
Die liggame van drie swart kinders is in ‘n ou yskas in Atamelang in die Noordwes-provinsie gevind.
Sers. Kealeboga Molale, polisiewoordvoerder, sê die kinders, tussen drie en vyf jaar oud, is Donderdag laas gesien toe hulle buite gespeel het.
“Die kinders se ouers en gemeenskapslede het na hulle gesoek, maar sonder sukses.”
Molale het gesê die oupa van een van die kinders het die lyke Vrydag in die yskas gevind.
Niemand is in hegtenis geneem in verband met die voorval nie.
Dit is nie bekend gemaak of die kinders versmoor het en of daar vuilspel vermoed word nie. – Sapa
Die Brandstof Kleinhandelaarsvereniging het aansoek om ‘n dringende interdik gedoen ná voorvalle van intimidasie teen nie-stakende werkers in die brandstof- en motorverwante bedrywe.
Volgens die vereniging was daar gister alleen 20 voorvalle.
Vroeër die week is twee fotograwe ook aangerand. Die vakbond, SATAWU in die Vrystaat sê vragmotorbestuurders wat brandstof by vulstasies aflewer word aangeval.
Numsa se woordvoerder, Irvin Jim, het die optrede van die Brandstof Kleinhandelaarsvereniging as goedkoop truuks afgemaak en sê die vakbond sal dit teenstaan.
Die werkers staak sedert Maandag vir beter salarisse. – RSG
Senior polisiebeamptes het ‘n beplande klopjag op liefdadigheidsorganisasies wat met oudpres. Nelson Mandela verbind word, in die kiem gesmoor, berig die Mail & Guardian.
Hoëvlak-polisiebeamptes was glo bekommerd dat die klopjag op die Nelson Mandela-stigting, die –kinderfonds, en die –trust, verleentheid sal veroorsaak.
‘n Brief van die Valke is daarna onder meer na Mandela se familielede gestuur om finansiële state te eis.
Oupa Ngwenya, woordvoerder van Sibongile Mkhabela, uitvoerende hoof van die Nelson Mandela-kinderfonds, het bevestig dat hulle ‘n brief ontvang het.
“Die rekening wat die Nelson Mandela-kinderfonds by Nedbank het, is openbare kennis en is verreken in die finansiële state vir die jaar wat op 31 Maart 2013 geëindig het en is ingesluit in die jaarverslag.”
Ngwenya en Danielle Melville, woordvoerder vir die stigting se uitvoerende hoof, het gesê die briewe is na Mandela se prokureur, Bally Chuene, gestuur.
Die briewe hou glo verband met aanklagte van bedrog, vervalsing en uitgifte wat teen Mandela se voormalige prokureur, Ismail Ayob, aanhangig gemaak is.
Mandela se dogters, Makaziwe en Zenani Mandela-Dlamini, het ‘n aansoek voor die hof gebring om George Bizos, Tokyo Sexwale en Chuene as direkteure van Harmonieux Investment Holdings en Magnifique Investment Holdings te verwyder. Die saak is in Julie van die rol geskrap.
Die voormalige staatshoof sterk aan by die huis nadat hy vir ‘n longinfeksie in die Harthospitaal in Pretoria behandel is. – Sapa
Drie beamptes wat aangekla is oor die omstrede landing van die Gupta-familie se vliegtuig, sal Vrydag in die militêre hof verskyn.
Hulle staan tereg op aanklagte van die misbruik van staatseiendom en dat hulle vals verklarings onder eed afgelê het.
‘n Gupta-straler met sowat 200 bruilofsgaste aan boord het op 30 April by die Waterkloof-lugmagbasis geland. – Sapa
