Suid-Afrikaanse nuus, d.w.s. sowel nuus uit Suid-Afrika én Suider-Afrika.
Die derde Roadlinkbus in ‘n week is van die pad af gehaal nadat daar bevind is dat die voertuig se remme nie op standaard was nie.
Dit volg na twee Roadlinkbusse van George en Knysna op Nuwejaarsdag weens ‘n aantal foute padtoegang geweier is.
In Julie verlede jaar was ‘n Roadlinkbus betrokke by ‘n ongeluk naby Beaufort Wes waarin agt mense oorlede is.
Twaalf mense het in 2006 hul lewens verloor toe ‘n Roadlinkbus op Kersfees in ‘n pilaar van ‘n brug in KwaZulu-Natal vasgery het.
Eugene de Kock, 61, die eertydse bevelvoerder van die veiligheidspolisie se C10-teeninsurgensie-eenheid te Vlakplaas, mag dalk binnekort vrygelaat word.
De Kock is in Oktober 1996 in die Pretoriase Hooggeregshof twee keer lewenslange tronkstraf opgelê, nadat hy skuldig bevind is aan oa moord terwyl hy van 1985 tot 1993 by die eenheid gedien het.
Dié stap, meen ingeligtes, sal lei tot presidensiële kwytskelding vir die veroordeelde Schabir Shaik. Shaik het in April 2008 by die presidensie om kwytskelding aansoek gedoen.
Jacob Zuma het De Kock glo verlede jaar in April in die Sentrale Gevangenis in Pretoria besoek.
De Kock het klaarblyklik aan Zuma inligting verskaf oor mense wat “skotvry” daarvan afgekom het.
In ruil vir kwytskelding het De Kock aangedui dat hy met ‘n nuwe ondersoek oor die vorige bedeling se vergrype sal saamwerk en sal help met die opspoor liggame van slagoffers wat deur die NP se veiligheidsmagte vermoor is.
Zuma en die ANC se woordvoerders kon nie die ontmoeting bevestig of ontken nie.
‘n 41-jarige polisieman sal in die landdroshof in Jansenville verskyn nadat hy vermoedelik ‘n 15-jarige meisie aangerand en verkrag het, het polisie in die Oos-Kaap gesê.
Inspekteur Gerry van Rooyen het gesê die meisie het ‘n kroeg in Jansenville op 27 Desember saam met die polisieman verlaat.
Hy het haar toe na ‘n nabygeleë rugbyveld geneem en na bewering verkrag en ernstig aangerand.
Die polisieman, ‘n inspekteur, is by die Jansenville-polisiestasie gestasioneer.
Twee verkeersbeamptes van Mpumalanga het voor die hof in Delmas verskyn op aanklag van poging tot moord.
Robert Sekgoane en Simon Mathe, albei 31, is op borgtog van R500 vrygelaat .
Hulle saak is tot die 16de Februarie uitgestel.
Sekgoane het na bewering op Kersdag ‘n man in die been geskiet in Msimangostraat naby Delmas.
Mathe het kort daarna dieselfde geweer gebruik om aan die skiet te gaan sonder ‘n spesifieke teiken.
Hy het ‘n ander persoon in die proses beseer.
Die twee mans het hulself aan die polisie in Delmas oorgegee.
Daar bestaan reeds ‘n saak van aanranding teen Sekgoane terwyl Mathe nog op ‘n aanklag van onsedelike aanranding moet reageer.
‘n Storm wat verskeie dorpies rondom Brits in die Noordwes getref het, het 61 huise verwoes en sowat R1 miljoen se skade aangerig.
“Sowat 31 huishoudings en een skool is in Letlhabile verwoes terwyl dertig huise Maandagaand in Oskraal beskadig is,” het Tumelo Tshabalala, woordvoerder van die Madibeng-munisipaliteit, gesê.
Die munisipale burgemeester, Sophy Molokoane-Machiks, sal Dinsdag kospakkies uitdeel aan mense wat hulle besittings tydens die storm verloor het.
Cosatu dreig om die N4-hoofweg na Sun City onbegaanbaar te maak indien ‘n wit werknemer nie dadelik afgedank word nie.
Shane MacDougall, ‘n assistent-bestuurder, het glo rassistiese aanmerkings teenoor drie swart werknemers gemaak.
MacDougall het intussen ‘n finale waarskuwing van sy werknemer ontvang. maar Cosatu eis dat hy summier afgedank word.
“Hierdie is ‘n belediging teenoor al die werknemers van Sun City en al die swartmense in die land en selfs teenoor demokrasie,” het die vakbond in ‘n verklaring gesê.
Cosatu dreig dat “die werkersklas saamgeroep sal word om die N4 na Sun City te versper, selfs al duur dit tot in 2010”.
Hulle eis ook dat die wit uitvoerende hoof, Coutts-Trotter, moet bedank.
Die burgerregte inisiatief AfriForum het ʼn versoek aan die minister van Handel en Nywerheid gerig om dringend in te tree om die lewe en besittings van ʼn Suid-Afrikaanse burger, Ray Finaugty, en sy gesin in Zimbabwe te beskerm. Volgens BIPPA, ʼn beleggingsooreenkoms wat op 27 November 2009 deur beide die Suid-Afrikaanse en Zimbabwiese owerhede onderteken is, sal sodanige beskerming aan Suid-Afrikaanse burgers in die buurstaat verleen word.
Willie Spies, regsverteenwoordiger en woordvoerder van AfriForum, het gesê dat inligting wat deur AfriForum ontvang is aandui dat mnr. Finaugty van die plaas Manda by Rusape, slegs drie ure deur plaasbesetters gegee is om sy plaas te verlaat. Hy het hier met 11 000 hoenders en sowat 40 hektaar tabak geboer. “Hy is ook verhoed om die hoenders te versorg en hulle is gevolglik meer as drie dae lank sonder kos en water gelaat. In hierdie stadium vrees Finaugty vir die lewens van hom en sy gesin,” het Spies bygevoeg.
In November 2009 het AfriForum die Noord-Gautengse Hooggeregshof in Pretoria genader met ʼn dringende aansoek om die ondertekening van BIPPA te probeer verhoed, omdat gevrees is dat dit Suid-Afrikaanse boere wat slagoffers van Zimbabwe se onwettige onteieningsprogram was, in die steek sou laat. Die hof het uiteindelik ʼn bevel uitgereik waarvolgens die Suid-Afrikaanse regering onderneem om die Tribunaal van die Suider-Afrikaanse Ontwikkelingsgemeenskap (SAOG-tribunaal) se uitspraak ten gunste van kommersiële boere in Zimbabwe te respekteer en na te kom, en om die regte en regsmiddele van slagoffers van Zimbabwe se onwettige onteieningsprogram te handhaaf. In terme van die minister se beëdigde verklarings vir die hofsaak, asook die daaropvolgende hofbevel, is mnr. Finaugty geregtig op beskerming soos deur hierdie beleggingsooreenkoms omskryf.
Indien versekering nie binnekort van die minister ontvang word dat maatreëls in werking gestel is om mnr. Finaugty en sy gesin se lewens en eiendom te beskerm nie, sal AfriForum volgens Spies met dringende regsaksie voortgaan om dit te verseker.
Dit is tragies dat onskuldige Suid-Afrikaanse burgers in die Kerstyd aan hierdie soort teistering onderwerp word. Dit is net nog voorbeelde van die menseregtevergrype wat die Mugabe-regime kenmerk.
Vier mense, almal van dieselfde gesin, is Maandagmiddag oorlede toe ‘n sessitplek-vliegtuig naby Harrismith in die Vrystaat neergestort het.
Volgens Chris Botha, Netcare 911-woordvoerder, het nooddienste omstreeks 13:30 ‘n oproep ontvang dat ‘n vliegtuig geval het.
Die vliegtuig, ‘n Beach Bonanza, het by die Platberg neergestort in digte mis, het Netcare911 se woordvoerder, Chris Botha, gesê.
“Ongelukkig het al vier die passasiers gesterf,” het hy gesê.
Dr. Johan Adriaan Venter (61), ’n ortodontis, sy vrou, Elzabé (61), hul seun, Christiaan Venter, en sy vrou, Christine, was vroeg Maandagmiddag in ’n Beechcraft Bonanza-vliegtuig van Vereeniging na Margate onderweg toe hulle in slegte weer teen Platberg by Harrismith vasgevlieg het.
Die vliegtuig het in ‘n “amper onbegaanbare” gebied neergestort.
Paramedici, wat omstreeks 13:30 ‘n oproep oor die ongeluk ontvang het, moes hul voertuie agterlaat om die ongelukstoneel te bereik.
Volgens Gwebu is ‘n helikopter na die toneel gestuur om die gebied vinniger te bereik.
Paramedici en polisie was teen 16:00 steeds op die toneel besig.
Die vakbond Solidariteit het vandag met ʼn reuse internetveldtog begin waardeur ENB-kliënte gemobiliseer word om druk op die bank te plaas nadat die bank besluit het wit werknemers kan nie kwalifiseer vir beurse vir hulle kinders nie.
In die November-uitgawe van hulle nuusbrief aan die werknemers, Treetalk, skryf ENB dat indien werknemers finansieel sukkel met die eise van hoë studiekoste, daar goeie nuus is. Volgens die skrywe is ENB daartoe verbind om opleiding vir almal te verseker en as deel van die inisiatief bied hulle finansiële steun aan swart werknemers, met inbegrip van Afrikane, Indiërs, Kleurlinge en Chinese, wat minder as R100 000 per jaar verdien.
“Wittes is dus nie deel van “almal” nie. Wit werknemers wat swaarky en minder as R100 000 verdien, word eenvoudig uitgesluit suiwer op grond van hulle ras. Dit is seker die onsensitiefste Kersgeskenk wat ʼn werkgewer aan ʼn seker deel van sy werknemers kan gee. Die wit werknemers by ENB ontvang ʼn swart Kerskous wat hulle nie mag oopmaak nie, want hulle is nie swart nie,” het Dirk Hermann, adjunk-uitvoerende hoof van Solidariteit, gesê.
Lede van die publiek kan direk by ENB kla deur middel van die webbladsy www.solidariteit.co.za. Op die webbladsy kan webgebruikers ook deel word van ʼn Facebook-aksie teen ENB. Blogs is gister teen ENB begin en video’s teen ENB is op www.stube.co.za asook YouTube gepubliseer. Die veldtog met die naam “Kerskouse vir almal” skop vandag af en sal in 2010 voortgesit word.
Ons beroep tot kliënte van ENB en die publiek is om met ʼn veldtog teen die bank voort te gaan totdat die rassekriteria uit die beurstoekenning gehaal word. Die fokus van ENB se Werknemersondersteuningstrust is om kinders van werknemers op primêre skoolvlak tot graad sewe te help. “Klein kindertjies op laerskoolvlak word dus die slagoffers van diskriminerende praktyke.
Op grond van watter morele argument kan ENB argumenteer dat ʼn graadeentjie van ʼn ouer wat minder as R100 000 verdien steeds ʼn bevoordeelde uit apartheid is? ENB het geen morele argument nie, maar bloot ʼn rasse-argument,” het Hermann gesê.
“ENB-kliënte en alle Suid-Afrikaners moet opstaan teen hierdie harde rassestandpunt. Indien enige werknemer minder as R100 000 verdien, is dit byna onmoontlik vir daardie gesin om vir hul kinders se studies te betaal. Die regte benadering sou wees om almal wat minder as R100 000 verdien te laat kwalifiseer vir studiehulp. Die meerderheid van die ENB-werknemers wat minder as R100 000 verdien, is swart, maar jy kan nie die wit werknemers uitsluit nie.”
In die klag wat Solidariteit van ʼn werknemer ontvang het oor die diskriminerende beurspraktyk by ENB, word ʼn voorbeeld gebruik van twee wit vroue wat in ʼn spesifieke afdeling werk en minder as R100 000 per jaar verdien. Albei is enkelouers en sukkel om kop bo water te hou. In dieselfde afdeling werk ʼn swart vrou wat dieselfde verdien, maar haar man verdien R50 000 per maand. Sy kwalifiseer vir hulp maar die wit vroue, by wie die nood die grootste is, kwalifiseer nie, suiwer op grond van ras.
Meer as 700 voertuie van die openbare vervoerstelsel is die afgelope maand onpadwaardig verklaar, het die department van vervoer Woensdag in ‘n verklaring gesê.
Dit sluit meer as 400 busse en 250 taxi’s in.
“Wetstoepassingsbeamptes sal oor die volgende paar dae hul optredes teenoor operateurs van openbare vervoer verskerp, veral busse en taxi’s. Voertuie wat onpadwaardig is, sal van die pad verwyder word.”
“Luidens die verklaring het operateurs van openbare vervoer ‘n verantwoordelikheid om die lewens van hul passasiers te beskerm. Hulle moet nie net in geldmaak geïnteresseerd wees nie.”
Volgens die departement sal bestuurders wat die spoedgrense oortree, beboet of gearresteer word. Die afgelope maand is daar reeds 250 000 motoriste beboet wat spoedgrense oortree het, en 2 500 is gearresteer nadat hulle onder die invloed van alkohol bestuur het.
“Ten spyte van al ons waarskuwings, oortree motoriste steeds die wet.”
“Dis hoekom wetstoepassers in die volgende paar dae geen genade gaan toon nie,” het Sibusiso Ndebele, minister van vervoer gesê.
