Duitser keelaf gesny in PE

Die lyk van ‘n Duitse sakeman is in ‘n hotelkamer in Port Elizabeth gevind, is Vrydag berig.

Die 25-jarige man is Woensdag in ‘n plas bloed by die Garden Court-hotel gevind. Hy is keelaf gesny, berig Herald Online.

Die polisie op die toneel het gesê die man is vermoedelik naby die badkamer vermoor en het probeer om na die deur te stap vir hulp.

Kapt. Johan Rheeder het gesê die man is Dinsdag vir die laaste keer gesien.

“Iemand het hom kom aflaai en hy is alleen na sy kamer. Die volgende oggend het ‘n kollega die sekuriteit by die hotel gevra om te gaan kyk waar hy is, omdat niemand hom in die hande kan kry nie,” het Rheeder gesê.

Die hotelbestuurders het ‘n loper gebruik om die deur van die man se kamer oop te sluit.

Volgens die hotel se rekords en beeldmateriaal het niemand Dinsdagaand by die kamer ingegaan of uitgekom nie.

Die vrou wat die man afgelaai het, het gesê hy was nie homself nie.

Rheeder het aan Herald Online gesê indien bewyse gemene spel uitwys, sal die saak van ‘n geregtelike doodsondersoek na moord verander sal word.

Mandelas wil van wit beheer oor trust ontslae raak

Die familie van Nelson Mandela het ‘n verenigde front gevorm in ‘n dispuut met jarelange wit medewerkers van die voormalige president.

Die dispuut handel oor die beheer van twee maatskappye.

In ‘n verklaring, sê Mandela se kleinkinders, probeer George Bizos en andere die Mandela-familie uitbeeld as “onsensitief en geldgierig” met geen respek vir die erfenis van die anti-apartheidsleier en Nobel-vredespryswenner nie.

“Die meeste van ons het ‘n inkomste, werk vir ons eie maatskappye en bestuur ons eie projekte,” lui die verklaring, wat nie enige van die kleinkinders by name noem nie.

Mandela het 17 kleinkinders en 14 agterkleinkinders, volgens die Nelson Mandela Centre of Memory, ‘n organisasie in Johannesburg.

Twee dogters van 94-jarige Mandela het ‘n hofsaak teen Bizos en sy medewerkers aanhangig gemaak, en eis dat hulle nie moet aanbly as direkteure van die twee maatskappye nie. Die opbrengs is veronderstel om die Mandela-familie te bevoordeel.

Bizos, ‘n menseregte-advokaat, sê hy is ‘n jarelange ondersteuner van die Mandela-familie en hy het betrokke geraak in die maatskappye op Mandela se instruksies.

Die hoofdoel van die maatskappye, Harmonieux Investment Holdings en Magnifique Investment Holdings, is om fondse in te kanaliseer uit die verkoop van handafdruk “kunswerke” deur Mandela tot die voordeel van sy familie.

The Star koerant het Bizos aangehaal waar hy sê Makaziwe Mandela wou R11.9 miljoen onttrek sonder om besonderhede te verskaf van hoe dit gebruik sal word.

“Dit is strydig met die bepalings van die trust. Daarom het ons geweier om haar die geld te gee.”

Wit Afrikaners ware mag agter DA, sê ANC

Die ANC het gister die DA uitgekryt as ‘n party wat swartes vir vertoon gebruik, maar die ware mag in die hande van wit Afrikaners hou.

Die opposisieparty het begin met sy verkiesingsveldtog deur te probeer om as ‘n voorbok in die stryd teen apartheid te poseer. Maar die ANC koop dit nie.

Die party versprei pamflette met foto van ‘n omhelsing tussen Nelson Mandela en Helen Suzman as deel van sy veldtog om glo die idee dat die party weer apartheid sal terugbring, te besweer.

Maar die ANC bevraagteken Suzman se struggle-verlede. ANC-woordvoerder, Keith Khoza, het vandeesweek gesê die DA het niks gedoen om apartheid te beëindig nie en Suzman het “die gerief van apartheid in die Parlement geniet” en “het nie enige stappe” teen apartheid geneem nie.

Die DA se uitvoerende direkteur van kommunikasie, Gavin Davis, het gesê die party verwag kritiek van sy teenstanders. Hy is ook nie bekommerd oor die moontlike kritiek dat die DA goedkoop publisiteit soek en Mandela se beeld uitbuit nie.

Davis het gesê die DA is ook ingelig deur sy aktiviste op die grond, sowel as navorsing, dat ‘n persepsie bestaan dat die party weer apartheid sal terugbring.

“Apartheid is ingeburger in die DNA en hulle kan nie verander nie. Kyk na hul strukture en hoe hulle regeer. Hulle het ‘n paar swartes as vertoon, maar die ware mag is steeds in die hande van wit Afrikaners,” het Khoza gesê.

Maar Davis het gesê sy leiers het ‘n geskiedenis van stryd teen apartheid.

“Ons huidige leier, Helen Zille, het gehelp om die wêreld te wys wat die waarheid van apartheid is. In 1977 by die Rand Daily Mail waar sy gewerk het, het Zille die waarheid agter Steve Biko se dood ontbloot. As ‘n prominente lid van die Black Sash, het Zille ANC-aktiviste by haar huis gedurende die 1986 noodtoestand weggesteek,” het Davis gesê.

“Joe Seremane was die party se federale voorsitter tot in 2010. Hy was ‘n politieke gevangene op Robbeneiland tussen 1963-1969. Hy is sonder verhoor aangehou tussen 1976-1978, en verskeie kere tussen 1982 en 1984.

“Wilmot James is tans die DA se federale voorsitter, en sy betrokkenheid in die stryd bereik terug na sy dae in die Suid-Afrikaanse Studente-organisasie, wat deur die Swartbewussynsbeweging geïnspireer is. James se teenkanting teen die Groepsgebiedewet het hom in die tronk laat beland.

“Patricia de Lille, wat tans die uitvoerende burgemeester van Kaapstad is, is reeds aktief in die politiek vir meer as 25 jaar. In 1988 is sy verkies tot vise-president van die Nasionale Raad van Vakbonde. Sy was ‘n LP in 1994 van die PAC [Pan Africanist Congress] afvaardiging in die grondwetlike onderhandelings in Kempton Park.”

Hy het gesê die foto van Mandela en Suzman is gekies vir die veldtog omdat “Nelson Mandela die rol wat Helen Suzman gespeel het in die teenkanting teen apartheid erken en ons wou die boodskap oordra.”

Die pro-ANC Indiese dagblad, The New Age, se hoofopskrif gister was egter: “Zille fails the race test”.

‘Grondwethofuitspraak oor grond selfvernietigend’

“Die uitspraak in die konstitusionele hof vandag in die saak tussen Agri-SA en die minister van mineralebronne sal Suid-Afrika op ‘n glybaan van selfvernietiging plaas,” sê mnr. Werner Weber, die VFPlus se nasionale woordvoerder oor landbou en grondhervorming.

Die hof het beslis dat geen onteiening plaasgevind het nie en dat die voormalige houers van minerale regte geen eis om vergoeding teen die regering kan indien nie. Mnr Weber, wat tydens die uitspraak in die hof teenwoordig was, het daarop gewys dat die beginsel van “gebruik dit of verloor dit” ( use it or loose it) wat nou deur die konstitusionele hof as ‘n beginsel gevestig is, ook nou op ander eiendom van toepassing gemaak kan word.

“Dít hou enorme implikasies in. Verwysings in die uitspraak na die verkryging van dié regte deur die houers van minerale-regte in die apartheidstyd en die opweeg van eiendomsreg teenoor openbare belang, het sterk politieke ondertone openbaar, wat niks goeds vir die toekoms van SA voorspel nie,” het mnr. Weber gesê.

UJ-prof jongste slagoffer in gay moorde

‘n Professor aan die Universiteit van Johannesburg is het glo sy moordenaar ingenooi, berig Eyewitness News.

Dr. Carl Mischke se bebloede lyk is Maandagoggend met verskeie steekwonde in Norwood gevind.

Die polisie ondersoek die moord as deel van ‘n reeks moorde op gay mans in Kaapstad en Gauteng.

Mischke is die negende gay slagoffer in dié reks moorde.

Die 47-jarige Mischke gee klas in Arbeidsreg.

Die polisie het moorde in Kaapstad met dieselfde bende verbind. Brig. Neville Malila, polisiewoordvoerder, het gesê Mischke se dood word ondersoek.

VF+ eis bedanking van Midvaal-burgemeester

Die VF Plus het vandag in ‘n sterk bewoorde verklaring geëis dat die burgemeester van Midvaal, mnr Timothy Nast, moet bedank.

Mnr Corrie Pypers, VF Plus raadslid vir Midvaal het gesê dat klagtes oor wanadministrasie sedert 2005 gedurende 2009 aan die Openbare Beskermer gerapporteer is en vandat Nast in 2009 as burgemeester verkies is, is onwettige afdankings van fluitjieblasers, amptenare en raadslede aan die orde van die dag.

Verder het viktimisasie teen die bestuur van die internasionaal befaamde Meyerton Golfklub byna die klub se ondergang tot gevolg gehad.

Bevoordeling van sommige ontwikkelaars deur voortydige goedkeurings, proseduriële magsmisbruik, die aanvang van ondersoeke deur die Openbare Beskermer (OB) en die Spesiale Ondersoekeenheid (SOE) het gelei tot ‘n OB-verslag wat sewe gevalle van wanadministrasie bevind het en gelei het tot die afdanking van die DA streeksvoorsitter en raadsprokureur.

‘n Kriminele ondersoek teen die DA administrasie deur die SOE duur steeds voort. Hierdie toedrag van sake is geensins in belang van die inwoners van Midvaal en daarom behoort Nast Midvaal eerste te stel en sy amp te ontruim saam met ander skuldige raadslede en amptenare.

Tydens ‘n Afbakeningsraadvergadering gehou op 11 April 2013 in die Vereeniging stadsaal, het ‘n senior ANC ampsdraer op die verhoog dit aan Nast gestel dat leningsvoorsiening aan Midvaal in die weegskaal is weens die SOE ondersoek teen hom.

Skielik het die DA en Nast ‘n struikelblok geword in die weg van ontwikkeling in Midvaal ten koste van die kiesers.

Nast behoort onder die omstandighede sy amp te ontruim deur onmiddellik saam met sy meelopers, waaronder amptenare en raadslede, te bedank.

By gebreke hierin sou die DA in die hand van die ANC speel omdat die kieserspubliek hul vertroue in die DA in Midvaal verloor en die verdere openbaring van wanadministrasie en dalk selfs korrupsie, kan die inwoners van Midvaal erg benadeel sê Pypers.

Zuma na Tsjad om SAR te bespreek

President Jacob Zuma woon vandag ‘n vergadering van die streeksleiers van die Ekonomiese Gemeenskap van Sentraal Afrikaanse state in Tsjad by om die krisis in die Sentraal Afrikaanse Republiek te bespreek.

Dit volg na die staatsgreep in die S.A.R waarin 13 Suid-Afrikaanse soldate dood is toe rebelle die bewind van president Francoise Bozize omver gewerp het.

‘n Noodvergadering van die leiers en president Zuma het vroeër vandeesmaand ‘n afvaardiging na die land gestuur om rebelle in te lig om ‘n komitee saam te stel om die land te bestuur en vir verkiesings oor 18 maande voor te berei. Terugvoering hieroor sal in vandag se vergadering gegee word.

President Zuma het vroeër die ontplooiing van die Suid-Afrikaanse Weermag in die Demokratiese Republiek van die Kongo en Soedan tot April volgende jaar verleng.

Die presidensiële woordvoerder, Mac Maharaj het die Parlement oor die besluit ingelig. Hy sê 850 soldate is in Darfoer ontplooi as deel van ‘n Afrika Unie/Verenigde Nasies-operasie.

Maharaj sê 1 267 weermaglede is in die DRK ontplooi as deel van ‘n VN-stabilisering-sending.

Marikana: Polisie hét geskiet wys verslag

‘n Polisieverslag het bevestig dat beamptes 34 stakende mynwerkers by Marikana doodgeskiet het, het die Farlam-ondersoekkommissie Woensdag gehoor.

Dumisa Ntsebenza, vir die families van die oorledenes, het gesê die verslag wys dat die polisie nie die bewering betwis het dat hulle die mynwerkers doodgeskiet het nie. Die argument het gegaan oor die omstandighede rondom die moorde.

Volgens die verslag is 30 van die mynwerkers op die toneel dood en vier het in die hospitaal gesterf, het Ntsebenza gesê.

Riah Phiyega, die nasionale polisiekommissaris, het vroeër gesê dit is nie bevestig dat die polisie die mynwerkers doodgeskiet het nie.

“Ek verstaan dat 34 mynwerkers dood is, maar om te sê wie hulle doodgemaak het, ek kan nie oor dit kommentaar lewer nie.”

Phiyega het tydens kruisondervraging by die kommissie in Rustenburg gevra dat sy nie onregverdige vrae gevra word waarvoor sy nie antwoorde het nie.

Sy het vir die kommissie gesê niemand is in hegtenis geneem of afgedank ná die sterftes nie.

Skoolhoof terug na porno-klagte

Die skorsing van ‘n skoolhoof wat daarvan beskuldig is dat hy pornografie aan ‘n leerder gewys het, is opgehef, het die departement van onderwys in Gauteng gesê.

Charles Phahlane, woordvoerder van die departement, het gesê daar was geen gronde om ‘n interne tugproses te begin nie, omdat die bewerings nie gestaaf kon word nie.

Die prinsipaal is Woensdag terug na die Mandisa Shiceka Sekondêre Skool in Kagiso nadat Boy Ngobeni, die departementshoof, sy skorsing opgehef het.

Die Sowetan het verlede maand berig dat ‘n gr.10-leerder beweer haar skoolhoof het pornografie aan haar gewys. Die prinsipaal het die bewerings ontken.

Die meisie se familie het toe ‘n klag by die departement van onderwys se distrikkantoor ingedien. ‘n Onderwyser by dieselfde skool het na bewering leerders oorreed om inligting teen die skoolhoof te vervals.

Die onderwyseres is hangende ‘n ondersoek geskors.

Nuwe aanklagte teen Angola se Dos Santos

Nuwe bewyse dat die Angolese president Jose Eduardo dos Santos miljoene uit die staatskas in die laat 1990’s in sy eie sak gesteek het, het na vore gekom. Dit hou verband met die terugbetaling van skuld na ‘n ooreenkoms tussen Angola en Rusland.

Die Londense waghond Corruption Watch het Dinsdag ‘n verslag vrygestel waarin beweerd word dat Dos Santos, top-olie amptenare en politici uit terugbetalings na Rusland deur middel van ‘n middelman voordeel getrek het.

Hierdie nuwe bewyse is aan aanklaers in Berne, Switserland Vrydag oorhandig.

Die organisasie wil ‘n nuwe ondersoek ingestel hê na “skokkende gevalle van bedrog en misleiding deur senior politici, amptenare en twyfelagtige sakelui, aangehelp deur die internasionale finansiële instellings, om hul eie burgers te beroof vir persoonlike gewin”.

In 1996 het Rusland aan Dos Santos se MPLA-regering, wat betrokke was in ‘n bloedige burgeroorlog, ‘n reeks lenings ten bedrae van $5 miljard dollar toegestaan.

Dit was twee-derdes van Angola se hele jaarlikse ekonomiese uitset.

Die geld is via ‘n tussenganger Abalone Investments betaal, vir dié doel deur sakemanne Arcadi Gaydamak en Pierre Falcone opgerig.

Die maatskappy word daarvan beskuldig dat hulle so veel as $750,000,000 van die Angolese regering se skuldterugbetalings gesteel het terwyl sommige individue, insluitende Dos Santos, $36.250.000 ontvang het via frontmaatskappye.

Volgens die verslag, het Rusland uiteindelik baie minder as die ooreengekome bedrag aanvaar.

‘n Vorige ondersoek is in 2004 in Switserland laat vaar.

“Elke element van hierdie komplekse transaksie versterk net hoe korrup die transaksie was, ‘n afpersingskema van globale omvang, wat die middelman en elite in Angola en byna seker Rusland bevoordeel het, met die hulp van ‘n groot Switserse bank,” lui die verslag.

‘n Angolese regeringswoordvoerder kon nie dadelik reageer op die bewerings nie.

“Switserland se bankstelsel het toegelaat dat hierdie geld gesteel word uit een van die wêreld se armste lande,” sê David Mendes, ‘n Angolese prokureur en die opposisiefiguur.

Korrupsie is algemeen in Angola wat 157ste van 174 lande in Transparency International se korrupsie-persepsie-indeks verlede jaar gestaan het.

Ten spyte van hierdie massiewe olie-rykdom, met grootskaalse wanbesteding van openbare fondse, bly die land een van die heel armstes ter wêreld.