Babaverkragtingsvraag in eindeksamen is ‘siek’

bread-white-loafOntsteltenis heers dwarsoor die land by leerlinge in Dramatiese Kunste wat Maandag tydens hul matriekeindeksamen ‘n vraag oor ‘n toneel met ‘n babaverkragting moes beantwoord. Volgens ‘n berig van Sapa, gaan ouers en leerlinge die departement van basiese onderwys versoek om die 15 punte aan alle leerlinge wat die eksamen moes aflê, toe te ken.

Die vraag in afdeling C van die vraestel, wat volledige hier onder weergegee word, was verpligtend. Daarin moet leerlinge kommentaar lewer op die simboliese uitbeelding van ‘n babaverkragting deur middel van ‘n brood en ‘n besemstok. Die toneel is afkomstig uit die stuk Tshepang deur Lara Foot Newton.

Omdat die vraag 15 punte uit ‘n totaal van 150 tel, verteenwoordig dit tien persent van die hele vraestel en sou dus die verskil tussen ‘n druip en ‘n slaag of ‘n onderskeiding en ‘n nie-onderskeiding kon bepaal.

“Ek kon amper nie verder skryf nie,” het een meisie in Johannesburg gesê. “Dit het my naar gemaak en ek moes net die trane wegsluk. Hoe kan hulle vir ons so iets in die eindeksamen gee? Ek weet daar is iets soos verkragting en daar gebeur vreeslike goed in ons land, maar hierdie is te erg! Ek het amper die vraag heeltemal uitgelos, maar ek het heel jaar nog onderskeidings vir Drama gehad en daarom moes ek dit maar beantwoord, teen my sin.”

Blykbaar word die memorandum vir die vraestel vandag in Pretoria bespreek.

Hier is die gewraakte vrraag 11 uit die vraestel:

Dramatiese Kunste DBE/November 2013

AFDELING C: PAS PERSOONLIKE HULPBRONNE TOE EN BESIN EN EVALUEER

AFDELING C is VERPLIGTEND.

VRAAG 11

Lees die uittreksel uit Tshepang deur Lara Foot Newton en beantwoord die vrae wat volg. Die toneelstuk is geïnspireer deur die brutale verkragting van die nege-maande-oue baba, Tshepang. Daar is twee akteurs in die produksie. Simon vertel die storie en vertolk verskeie karakters. Ruth is op die verhoog, maar praat nie.

SIMON:     Sy het die heeltyd geweet.
Sy was te bang om hulle te vertel, want sy was sy houvrou.
Nou praat die dorp! Waarom het sy dit geheim gehou? Waarom het sy nie enigiets gesê nie? …
Alfred was dronk. Hy wou seks gehad het. Ruth wou gaan drink en het nie
belanggestel nie. Sy het haar baba op die bed gelos en tavern toe gegaan.
Ruth plaas die brood op die klein bedjie.
Dit het gou donker geword. Die son het ondergegaan.
Hy beeld die verkragting uit deur die besemstok en dië brood te gebruik.
Later het Sarah, die een met die goue tand, na die_huis toe gekom om vir Ruth te soek. Sy het ingeloop, Siesie gehoor skree en ‘n vuurhoutjie getrek. Alfred het vir ‘n oomblik gestop. Sarah het na hom gekyk, na die baba, en toe die kamer verlaat … en niks gedoen nie. Toe het Alfred voortgegaan. Hy het later haar liggaam in die veld gaan gooi … waar Dewaal haar gekry het.

11.1 Verduidelik tot watter mate die karakter Simon ‘n verteller genoem kan word (2)

11.2 As die enigste praatrol in die toneelstuk is Simon se stemvertoning noodsaaklik vir die sukses van die toneelstuk. Beskryf hoe jy toon, tempo en volume in reël 1-8 sou gebruik om tot die hoogtepunt (klimaks) op te bou in hierdie uittreksel. (6)

11.3        Die verhoogaanwysings in reël 9 sê: ‘Hy beeld die verkragting uit deur die besemstok en die brood te gebruik.’

      11.3.1 Waarom het die dramaturg gekies om die simbool van ‘n brood te gebruik om die baba uit te beeld en die besemstok as die verkragterr? (3)

     11.3.2 Beskryf hoe jy die akteur wat Simon vertolk, reël 9 sou laat opvoer om die aakligheid van die verkragting vir die gehoor te vergroot. (4)

                                                                                                                                           [15]

Angola ontken anti-Islam-berigte

angolaAngola is tans ‘n warm onderwerp van bespreking in die internasionale media nadat nuus regoor die wêreld gebreek het nadat dié land Islam verbied het en begin het om moskees af te breek.

Moslems het woedend gereageer na bewerings dat Islam in Angola geteiken word.

Maar ‘n amptenaar by die Angolese ambassade in Washington, DC, wat nie geïdentifiseer wil word nie, het gesê dat daar is geen so ‘ n verbod is nie en dat die berigte verkeerd is.

“Die Republiek van Angola … is ‘n land wat nie inmeng in godsdiens nie,” het die amptenaar gesê. “Daar is vryheid van godsdiens. Ons het die Katolieke , Protestante, Baptiste, Moslems en evangeliese mense.”

Ander berigte het die land se minister van kultuur aangehaal wat teen “sektes” uitgevaar het.

Die direkteur van die Nasionale Instituut vir Godsdienstige sake, Manuel Fernando sê die Angolese regering het geen amptelike standpunt oor Islam of enige ander geloof nie.

Godsdienstige organisasie moet in Angola aansoek doen vir akkreditasie. In die stadium word 83 Christelike organisasies erken.

By nadere ondersoek van sommige van die eerste berigte oor die sogenaamde verbod en aftakeling van moskees is die materiaal egter verdag . Een so voorbeeld is die afbeelding van ‘n minaret van ‘n “Angolese moskee van Oktober 2012”.

Die afbeelding is van ten minste so vroeg as 23 Januarie 2008, uit ‘n artikel oor die vernietiging van Bedoeïenehuise in Israel..

Ander amptenare kon nie die berigte bevestig nie.

Angola is ‘n Christelike land van sowat 16 miljoen mense, waarvan ‘n beraamde 55 persent Katolieke is, 25 persent behoort aan Afrika Christelike denominasies, 10 persent is Protestants, en 5 persent behoort aan Brasiliaanse Evangeliese kerke. Slegs 80.000 tot 90.000 Angolese is Moslems, volgens die Amerikaanse State Department.

Islam word nietemin beskou as een van die vinnigste groeiende gelowe ter wêreld.

Volgens ‘n direkteur van die Islam Intergeloof Navorsingsinstituut, Rafiq Hassan, word die moskees in Angola aangewend vir onwettige praktyke soos geldwassery.

Hy sê dié Moslems is hoofsaaklik buitelanders van lande in Wes-Afrika wat finansiële regulasies in Angola probeer systap. Die meeste berigte oor die regering se anti-Islam-houding kom uit Wes-Afrika.

Droogtehulp aan boere in Noordwes

droogte2Boere in Noordwes wat aansoek gedoen het vir droogtehulp, gaan aanhou om voer te kry om die impak van die droogte op hul lewende hawe te verlig.

Voer sal aan 23.000 boere in die provinsie verskaf word. Meer as 14.000 sakke is sedert verlede week versprei.

Die departement van Landbou en Landelike Ontwikkeling sê meer as 100.000 sakke sal uiteindelik uitgedeel word.

Volgens die departement sal ‘n boer met 30 of meer diere ‘n maksimum van 14 sakke ontvang, terwyl die res minder sal kry.

Die verspreiding van voer volg op die goedkeuring en toewysing van ‘n noodlenigingsfonds van 43 miljoen rand deur die Nasionale Tesourie. – RSG

Agliotti direk met Krejcir verbind

Agliotti
Agliotti

Glenn Agliotti, die dwelmbaas en vertroueling van die oudpolisiehoof Jackie Selebi, is regstreeks met Radovan Krejcir verbind.

Katerina Krejcirova, vrou van die Tsjeggiese voortvlugtige, se naam eergister in Agliotti se sekwestrasieverhoor genoem, nadat dit aan die lig gekom het dat Agliotti geld by geleen het by Groep Twee Beleggings.

Groep Twee het ook aan ene kol. Francois Steyn, bevelvoerder van die eenheid teen georganiseerde misdaad in Germiston, geld geleen.

Agliotti is voorlopig in die hooggeregshof in Pretoria gesekwestreer. Die keerdatum vir die bevel is 10 Februarie.

Krejcir het glo vir “regskoste” geld aan Agliotti geleen.

Twee Valke is ook intussen weens ontvoering vas nadat Krejcir Vrydagaand deur die polisie gearresteer is op aanklag van ontvoering en poging tot moord.

Beeld het onthul dat die taakspan wat Krejcir ondersoek, ‘n gespanne verhouding tussen lt.genl. Anwa Dramat, hoof van die Valke, en lt.genl. Vinesh Moonoo, die polisie se nasionale speurhoof, moet trotseer.

Dit is nie bekend wat die spanning tussen die twee hoë lui is nie.

Agliotti het in 2007 skuld beken op aanklag van dwelmsmokkelary.

In 2010 het regter Meyer Joffe geweier om Agliotti kwyt te skeld van vervolging nadat sy getuienis Selebi  gekelder het. Joffe het die dwelmbaas toe as ’n leuenaar bestempel.

Agliotti is in 2010 onskuldig bevind aan die moord op die mynmagnaat Brett Kebble.

Krejcir se Duitse vriend gearresteer

Willi Breuer
Willi Breuer

‘n Duitse man wat glo  al vir die afgelope agt jaar onwettig in Suid-Afrika woon, is in hegtenis geneem by sy huis in Kibler Park, suid van Johannesburg, Dinsdag , het die departement van binnelandse sake gesê.

“Willi Breuer word tans aangehou by Lindela-repatriasiesentrum en wag vir deportasie,” het ‘n woordvoerder van die departement Thapelo Moeng in ‘n verklaring gesê.

Breuer, 61, is glo ‘n goeie vriend van die Tsjeggiese voortvlugtige Radovan Krejcir .

Volgens City Press, het Breuer president Zuma privaat in sy huis in Johannesburg in September verlede jaar ontmoet.

Hy het glo gespog tydens die vergadering en gesê dat hy en sy maatskappy Auxilium Africa miljarde gaan belê in Suid-Afrika om afvalbestuur veral in armer munisipaliteite te transformeer, het die koerant berig.

Die man is brandarm, het die departement van binnelandse sake Dinsdag gesê.

“By die [ laaste bekende ] adres wat ons vir hom gehad het, het hy nie die huur vir die afgelope twee jaar daar betaal nie en is uiteindelik uitgesit,” het die departement se immigrasie-inspektoraat se hoofdirekteur Modiri Matthews gesê.

“Hy het basies homself aangebied as ‘n belegger. Dit is hoe hy in staat was om ‘n indrukwekkende profiel te kry. Maar die waarheid is dat hy leef van aalmoese van sy mede-Duitsers [ wat in en rondom Johannesburg woon ].

“Ons het hom gevind in die kelder van sy vriend se huis. Hy het gesê hy het geen geld nie,” het Matthews gesê. – Sapa

Lyk van vrou wat glo verkrag is, gevind in George

sapstapeDie lyk van ’n 25-jarige vrou is in die agterplaas van ’n huis in George in die Suid-Kaap gevind.

Kapt. Bernadine Steyn het gesê ’n vriend het op die 25-jarige Belinda Paulsen se liggaam in Versfeldstraat in die bruin woonbuurt Conville afgekom.

“Die liggaam was gedeeltelik geklee en het op ’n matras gelê in ’n hut in die agterplaas. Ons vermoed dat sy met ’n stomp voorwerp in haar gesig geslaan is,” het Steyn gesê.

Die lyk van Paulsen is in ‘n huthuis, slegs ‘n paar huise vanaf haar ouerhuis, gevind.

Die oorledene se onderlyf was na wat verneem word naak toe ‘n vriend op haar liggaam afkom.

Volgens polisiewoordvoerder van die Suid-Kaap, kaptein Bernadine Steyn, word daar vermoed dat die oorledene met ‘n stomp voorwerp in die gesig geslaan is.

“Die moontlikheid van verkragting word ook ondersoek,” het Steyn gesê.

Nog geen verdagtes is in verband met die voorval aangekeer nie en ‘n saak van moord is geopen. – Sapa-AFP

Oproermakers waarsku Kapenaars om winkels Vrydag te sluit

ctloot‘n Groep oproeriges wat verlede maand op ‘n gewelddadige plundertog in die Kaapstadse middestad gegaan het, het sake-ondernemings gewaarsku om Vrydag hul deure te sluit.

Nóg ‘n opmars word vir Vrydag beplan en sowat 50 000 inwoners word verwag, berig die Cape Times.

Die Cape Town Informal Settlements Organisation beplan om na die Wes-Kaapse wetgewer op te ruk om ‘n griefskrif aan Helen Zille, premier, te oorhandig.

Die stad het die groep toestemming geweier vir die optog.

Sithembele Majoba, woordvoerder van die groep, het gesê dít sal hulle nie keer nie.
“Daar sal geen kansellasie wees nie. Of dit wettig is of nie, ons sal betoog.”

Die optog sal om 10:00 by die Kaapstadse Parade begin.

Twee Valke vas oor beweerde bande met Krejcir

valkeTwee lede van die Valke is vanoggend in hegtenis geneem weens beweerde bande met die Tsjeggiese voortvlugtige, Radovan Krejcir.

Die woordvoerder vir die Valke, Paul Ramaloko sê hulle word verbind met dieselfde saak van ontvoering waarin Krejcir na bewering betrokke is.

Die polisiewoordvoerder, Solomon Makgale het nog nie die inhegtenisneming van ‘n tweede verdagte bevestig nie.

Makgale het vroeër gesê dat ‘n 41-jarige adjudant-offisier in hegtenis geneem is.

Die voorval ter sprake het in Junie vanjaar plaasgevind. Krejcir en ‘n vennoot, Desai Lupondo is Vrydag in verband met die saak in hegtenis geneem en het Maandag in die hof verskyn.

Intussen het die Valke berigte ontken dat die bevelvoerder van die georganiseerde misdaad-eenheid in Germiston, Kolonel Francois Steyn bedank het.

Steyn het na wat berig word ‘n lening van R408.000 aanvaar van ‘n maatskappy wat bande met Krejcir het.

Hy het blykbaar eers vyf maande later uitgevind dat die maatskappy in Krejcir se vrou, Katerina se naam geregistreer is.

Beeld berig dat Steyn wou bedank, maar dat die nasionale polisiekommissaris, Riah Phiyega dit nie wou aanvaar nie, hangende die uitslag van ‘n interne ondersoek teen hom.

Ramaloko sê egter hy is bloot met verlof en dat hy nooit aangebied het om sy pos te verlaat nie.

‘n Ondersoekbeampte wat nie gemoeid is met die saak nie, sê die Tsjeggiese voortvlugtige, Radovan Krejcir sal dalk probeer om te ontsnap.

Krejcir het sy hofsaak gewen om onder polisiebewaking in ‘n hospitaal opgeneem te word.

Krejcir het nie verwag om in hegtenis geneem te word nie omdat hy skynbaar planne beraam het om die naweek uit Suid-Afrika pad te gee. – RSG

Polisiebeampte in hof oor vrou hom teister

police’n Kaapse metropolisiebeampte  het hom tot die gelykheidshof gewend nadat ’n vroulike kollega hom na bewering herhaaldelik seksueel geteister het.

Die 39-jarige superintendent het die Stad Kaapstad daarvan beskuldig dat hy versuim het om hom van die beampte te beskerm. Die vrou het glo herhaaldelik seksueel uitlokkende opmerkings gemaak en sy bobeen gestreel, berig The Times.

Die man het gesê hy is raadop en het hom tot die hof gewend omdat sy bestuurders nie sy klagtes ernstig opgeneem het nie.

Luidens hofdokumente het die probleme in Januarie begin toe hy sy rekenaar moes verstel sodat hy haar nie kan sien nie.

Die vrou het glo ook gevra om op sy skoot te sit en voorgestel dat sy voor hom uittrek.

Hy het tydens ’n ander voorval met ’n stresbal in die kantoor gesit, waarna sy by die deur gaan staan het.
“Sy het haar bene oopgemaak en voorgestel dat ek die bal tussen haar bene boul.”

Die voorvalle het hom “emosionele en professionele probleme, vernedering en moeilikheid in my huwelik veroorsaak en ook my goeie naam in oneer gebring”. – Sapa

Droogte gaan tekort aan rooivleis beteken

droogteVeeboere in groot dele van die land reeds gedwing het om “tot ’n derde” van hul veekuddes te slag weens droogte.

Dié uitdunning sal lei tot ’n ernstige tekort aan rooivleis, het Die Burger berig.

Die kwaai droogte wat veekuddes knou, kan met dié van 1933 vergelyk word, maar dit duur reeds langer en strek wyer.

James Faber, Noord-Kaapse voorsitter van die Rooivleisprodusente-organisasie (RPO) en veeboer in die distrik van Barkly-Wes, het gister gesê boere slag hul vee uit wat dragtig is. Koeie wat kalf, is alreeds so erg verswak, hulle bly net lê.

“Ons gaan tekorte aan rooivleis sien. Oor vyf maande gaan daar nie lammers op die mark wees nie. Die siklus vir beeste is anders . . . daar sal die tekorte oor ’n langer tydperk van so 18 maande intree,” het hy gesê.