Nuus Archives - Page 859 of 1583

Zille histeries oor ‘misdaad van Bantoe-onderwys’

Die DA-leier Helen Zille het president Jacob Zuma daarvan beskuldig dat hy “Bantoe-onderwys” steun deur “politiese gedienstigheid” aan die vakbond Sadou, ‘n filiaal van die ANC-bondgenoot Cosatu.

Haar “beswaar” oor Bantoe-onderwys was weer ‘n bedekte aanval op haar mees getroue ondersteuners, naamlik oningeligte Afrikaners.

Zille het nie verduidelik hoe Bantoe-onderwys en stakings verband hou nie. Onder Afrikanerbewind was daar geen onderwysstakings nie. Die Black Sash, waarvan Zille deel was, het egter die ontwrigting waarmee swart onderwys steeds worstel in die tagtigerjare sterk aangemoedig.

Zille het haar oordrewe kommentaar op Menseregtedag gelewer in Port Elizabeth ter bevordering van “gelykheid”. Die DA probeer naarstiglik swart stemme werf met oproepe om gelykheid.

Zille het gesê: “Die optrede van Sadou oor die afgelope twee jaar is niks kort van ‘n nasionale skande nie. Dit verdien afkeuring van elke leier van elke party. Om te sien dat president Zuma so onverskillig dank aan Sadou betuig in sy landstoespraak, was politieke opportunisme in sy ergste vorm.

“Die president het die potensiaal en toekomstige vooruitsigte van elke Suid-Afrikaanse leerder vir ‘n paar ekstra stemme in Mangaung uitverkoop.

“En hy het daardeur gehelp om die misdaad van ongelyke Bantoe-onderwys in stand te hou.”

‘n Regeringswoordvoerder het Zille daarop gewys dat Zuma nie melding gemaak het van Sadou in sy 2012-landstoespraak nie.

Die president het alle vakbonde geprys wat sorg dat leerkragte in die klas is, betyds opdaag en hulle werk doen, het hy gesê.

Geen finale ooreenkoms oor Pretoria-naam nie, sê VF+

Die VF Plus het bevestig dat gesprekke oor die naam van Pretoria, asook sowat 27 straatname in Pretoria tans tussen die VF Plus en die ANC plaasvind, maar het gesê dat daar tans geen finale formele ooreenkoms tussen die VF Plus en die ANC rakende ‘n oplossing vir die naamkwessie bestaan nie.

Die ANC in die Tshwane-metroraad beoog al vir ‘n geruime tyd om al 27 straatname wat tans oorweeg word, te verander. Dit is daarom belangrik dat straatname met beduidende historiese waarde vir die Afrikanergemeenskap behou moet word. Dit sal ‘n groot oorwinning wees as die naam van Pretoria in die proses behoue kan bly.

Volgens dr. Conrad Beyers, VF Plus-raadslid, is gesprekke oor die naamkwessie in ‘n baie vroee stadium en bestaan daar tans geen formele aanbod vanaf die ANC om Pretoria se naam te behou in ruil vir die verandering van 27 straatname nie.

“Die VF Plus verwelkom die moontlike behoud van die name van Paul Krugerstraat en Pretoriusstraat, maar die party kan nie instem tot die verwydering van talle ander straatname met beduidende historiese betekenis, soos Kerkstraat en Voortrekkerweg, nie. Die party dink egter ‘n politieke oplossing, wat beide die naam Pretoria asook straatname aanspreek, is moontlik”, het Beyers gesê.

Die VF Plus sal dit verwelkom indien die aansoek vir Pretoria se naamsverandering teruggetrek word. Die VF Plus sal egter nie instem tot enige proses waar die geskiedenis van een groep bloot met die geskiedenis van ‘n ander groep vervang word nie. Die VF Plus sal ook die hernoem van enige strate na “struggle”-figure wat ernstige aanstoot aan die Afrikanergemeenskap gee, teenstaan.

Die VF Plus sal nie instem tot enige ooreenkoms rakende die naam van Pretoria sonder dat behoorlike waarborge bestaan dat dit ‘n permanente reëling is nie.

Die VF Plus is bereid om wen-wen oplossings te oorweeg, maar indien daar nie op sodanige oplossings ooreengekom kan word nie, sal die VF Plus nie huiwer om huidige hofsake rakende Pretoria se naam, asook straatnaamveranderinge, te hervat nie.

topcargo

Pretoria se naamsonderhandelinge duur voort

Pretoria gaan sy naam dalk behou, maar meer as 27 straatname in die hoofstad sal verander word.

Dit is die ANC se “aanbod” in die geheime onderhandelinge wat tans aan die gang is in die omstrede naamsveranderingstryd, het Beeld berig.

Die Tshwane-metro se burgemeester, Kgosientso Ramokgopa, het met lede van die opposisiepartye vergader om die probleem Donderdag te bespreek. Die raad het in 2008 aangekondig dat die name van talle strate “wat aanstootlik is as gevolg van hul koloniale en apartheidsverlede” geïdentifiseer is.

Nuwe name vir die betrokke strate is in ‘n konsep-dokument vervat wat deur die raad opgestel word. Slegs twee straatname, Pretorius en Paul Kruger, het behoue gebly.

Ander, soos Schoeman, Van der Walt, Andries, DF Malan, Prinsloo, Genl Louis Botha, Skinner, Kerk, Walker / Charles, Koningin Wilhelmina, Voortrekker, Mears, Beatrix, Hendrik Verwoerd, Hans Strijdom, Vermeulen, Potgieter, en Duncan, gaan verander.

Opposisiepartye veg nog om die name van die Kerk- en Voortrekkerstrate te behou.

Ramokgopa sal na verwagting volgende week ‘n amptelike aankondiging maak.

Brandon Topham, DA-leier in die Tshwane-metroraad, het gesê sy party is baie bly die ANC het nie probeer om die naamsverandering op ‘n onsensitiewe wyse deur te druk nie.

“Almal se geskiedenis moet gereflekteer word in die stad, en niemand gaan aan die einde 100% tevrede wees met die proses nie,” het hy gesê.

SA maan dat Veiligheidsraad moet besluit oor Sirië

Suid-Afrika het die toenemende geweld in Sirië veroordeel en het versoek dat die land ‘n interne vreedsame politieke oplossing soek. Enige ingryping sal deur die Veiligheidsraad beslis moet word, het die departement van internasionale betrekkinge gemaan.

“Die situasie bly gespanne, ten spyte van oproepe … aan die Siriese regering en die gewapende opposisie om die geweld te stop en hul verskille op ‘n vreedsame wyse op te los,” het die departement in ‘n verklaring Donderdag gesê.

Suid-Afrika het deurgaans sy diepe kommer oor die verslegtende politieke, veiligheids-, sosio-ekonomiese en humanitêre situasie in Sirië uitgespreek.

“Ons veroordeel die gewelddadige verlies van die lewe in Sirië en vra al die partye in die konflik dat uiterste selfbeheersing toegepas sal word.

“Ons doen ‘n beroep op die partye om onmiddellik die geweld te staak en hulle te verbind tot ‘n vreedsame politieke oplossing, deur middel van ‘n eie, Siries-geleide, deursigtige en inklusiewe politieke proses wat sal voldoen aan die regmatige aspirasies van die Siriese mense.”

So ‘n proses moet ‘n waarborg van die mense se fundamentele politieke regte en vryhede verseker en politieke hervorming, geregtigheid, menseregte en sosio-ekonomiese ontwikkeling nastreef.

Suid-Afrika verwelkom en ondersteun die aanstelling verlede maand van die voormalige VN-sekretaris-generaal Kofi Annan as die VN-Arabiese Liga se spesiale gesant na Sirië, asook die sterk ondersteuning uitgespreek deur die Veiligheidsraad vir sy pogings.

Die departement het egter bygevoeg dat selfs met die Algemene Vergadering se mandaat, “bly die Veiligheidsraad die enigste grondslag oor die kwessie, want uiteindelik hang die mandaat vir ‘n VN-ontplooiing van die Veiligheidsraad af”.

Die vredesplan van Annan is vroeër hierdie week onderskryf deur die Veiligheidsraad met die steun van Rusland en China.

Verslae uit Sirië Donderdag, toon dat regeringstroepe die stad van Hama binnegedring het, na ‘n nag van swaar bombardering.

Volgens die VN se raming, is meer as 8000 mense reeds dood in die jaar-lange konflik, wat waarnemers sê in ‘n volskaalse burgeroorlog kan ontwikkel.

Komplot om Jeugligaleier glo te vermoor, 2 in hof

Twee mans wat verdink word van die agtervolging van die ANC-jeugliga se provinsiale sekretaris in Limpopo, Jacob Lebogo, sal na verwagting in die Polokwane-landdroshof verskyn Vrydag.

Peter Mthombeni, lid van die Suid-Afrikaanse Nasionale Weermag, en Philip Nkuzana is in Januarie in hegtenis geneem en aangekla.

Die een het homself as ‘n polisiebeampte voorgedoen en was in besit van ammunisie.

Die hof het voorheen gehoor dat Mthombeni vorige veroordelings gehad het terwyl Nkuzana ‘n hangende saak teen hom het.

Lede van die ANC-jeugliga beweer dat Mthombeni en Nkuzana ‘n komplot gesmee het om Lebogo dood te maak toe hulle in hegtenis geneem is naby die kantore van die provinsiale departement van paaie en vervoer.

Grootste post-apartheidskandaal tref SA: E-tol

Die IVP het hulle skok uitgespreek oor die werklike redes agter die regering se besluit om voort te gaan met die omstrede Gautengse e-tolprojek ten spyte van geweldige druk deur die vakbonde en die publiek om die padheffing te skrap.

Dit het ‘n week gelede bekend geraak dat die Public Investment Corporation – ‘n belegger vir staatsinstellings – R17 miljard in SANRAL-effekte gekoop het. ‘n Ongelooflike 89% van hierdie belegging is gemaak met fondse van die Government Employees Pension Funds.

“Ten slotte is dit duidelik waarom die regering hierdie projek ten alle koste wil red, ten spyte daarvan dat dit nie realiseerbaar is nie en ten spyte daarvan dat daar so baie openbare weerstand hierteen bestaan. Hierdie tipe van verdoeselings was algemeen onder die apartheid-regime, maar ‘n mens sou nooit kon glo so ‘n groot doofpot moontlik is in ons post-demokratiese bedeling nie,” sê Narend Singh LP, en die IVP se woordvoerder oor finansies oor die e-tolprojek.

Dit is nou duidelik dat daar groot ekonomiese kwessies op die spel is. As die tolprojek nie slaag nie, sal die regering nie net SANRAL moet red nie, maar ook die staatsamptenare se pensioenfondse.

“Dit is duidelik dat die regering hulleself tussen ‘n rots en ‘n baie harde plek bevind,” sê Singh.

Hy het bygevoeg: “Hierdie matriks waarin ons onsself nou bevind is heeltemal onhoudbaar, veral omdat die pensioene van gewone burgers op die spel is. Die regering het die publiek mislei. Ons glo dat dit bes moontlik een van die grootste post-demokratiese era skandale tot op hede verteenwoordig. Ek sal hierdie saak by die volgende geleentheid in die Parlement opper, want die belastingbetaler verdien antwoorde op hierdie saak,” het Singh afgesluit.

VSA dreig SA met sanksies oor olie

Byna al Suid-Afrika se olie-invoere uit Iran is opgeskort, volgens ‘n berig Donderdag.

“[Na my wete], vloei geen Iranse olie na ons land nie,” het adjunk-minister van buitelandse sake Ebrahim Ebrahim aan SABC TV-nuus gesê.

“As daar enige is, is dit baie min.”

Suid-Afrika, word bespiegel, sou waarskynlik aan die Verenigde State se sanksies onderhewig gewees het as die land nie ‘n beduidende besnoeiing in aankope gemaak het nie.

Suid-Afrika het daarom gehou by ‘n versoek van die VSA om ‘n aansienlike daling in Iranse voorrade te aanvaar.

Die US Energy Information Administration het gesê Iran is Suid-Afrika se voorste ru-olieverskaffer en verantwoordelik vir sowat 29 persent van die olie-invoere, volgens Reuters.

Ebrahim is gekant teen die VSA se houding, maar het gesê Suid-Afrika het geen ander keuse gehad as om daaraan gehoor te gee nie, as gevolg van die ekonomiese skade wat die land sou ly indien daar nie voldoen is aan die eise nie.

“Ons het nie ‘n keuse in die saak nie,” het hy in Pretoria gesê.

“As ‘n soewereine land, behoort Suid-Afrika in staat te wees om olie te koop waar ons ook al wil.”

‘n Ekonoom sê die nuus dat die petrolprys aanstaande maand met tot 64c per liter kan styg, moet verbruikers onrustig stem.

Dawie Klopper, ‘n beleggingsekonoom by PSG Konsult, het gesê dié prysverhoging sal die prys van kos en vervoer nadelig tref.

Klopper het gesê verbruikers sal hul bestedingspatrone dringend moet aanpas en onnodige kostes sny.

Onderwys tans erger as onder apartheid

Suid-Afrika se onderwysstelsel is vandag erger as die “gemorsopvoeding” wat die land onder die apartheidsregering gehad het, het die struggle-heldin Mamphela Ramphele gesê, volgens ‘n berig in The Star.

“Wiskundige geletterdheid … wat is dit? Dit is erger as die rekene wat ek onder Bantoe-onderwys geleer het,” is Ramphele aangehaal.

Sy het die sesde jaarlikse Solomon Mahlangu-lesing by die Universiteit van Johannesburg gehou.

Ramphele het die veelgeprese slaagsyfer gekritiseer en gesê dit is misleidend, want duisende word vir ‘n lewe voorberei wat geen belofte van verdere onderwys of indiensneming inhou nie.

Sy het haarself sterk uitgespreek teen die aangewese 30% slaaggemiddeld, en gesê dit breek onderwysstandaarde af en word gebruik vir politieke doeleindes.

“Kader Asmal [voormalige minister van onderwys] het vir mikropolitiek geval, toe die 40%-slaagsyfer skielik in 70% onder sy beheer verander.”

Ramphele het ook kritiek gehad op die 70,2%-slaagsyfer wat deur verlede jaar se matrikulante behaal is.

“Daar was ‘n groot razzmatazz oor die” historiese” 70,2 persent, maar hierdie vertoning was misleidend. Minder as 500 000 mense het hul matriekeksamen geskryf; 539 102 studente [wat in graad 1 was, 12 jaar tevore] het verdwyn uit die stelsel. Die departement van onderwys moet ons vertel wat gebeur het met daardie kinders.”

топкарго кидалы

Oproer kring uit na Limpopo

Nege mense is in die Thaala-lokasie, sowat 85 km van Groblersdal in Limpopo, in hegtenis geneem, het die polisie Donderdag gesê.

“Ons het nege mense in hegtenis geneem vir openbare geweld. Die betoging het laat Woensdagaand begin en het tot in die vroeë oggendure geduur,” het lt.kol. Mohale Ramatseba gesê.

Die betogers het glo vensters gebreek en privaateiendom beskadig, het hy gesê.

Die betoging het klaarblyklik oor ‘n tekort aan waterdienste in die omgewing gehandel.

Die nege sal na verwagting Vrydag in die Nebo-landdroshof verskyn.

Salafiste kan tot aksie oorgaan

Mohammed Merah is dood aan die einde van 32 uur van beleg. Intussen loop die polisie deur onder kritiek omdat hulle nie vroeër ingegryp het om die man te keer vóór die moorde nie aangesien die veiligheidsdiens hom reeds as verdag beskou het.

Anti-terreurspesialiste sê hulle vrees dat Merah se optrede die begin van nog aanvalle kan beteken.

Marine Le Pen het haar verbasing uitgespreek dat Merah reeds 15 keer gevang is, dat hy dopgehou en ondervra is, maar nie deur die owerhede gekeer is om tot sy afgryslike daad oor te gaan nie.

Sy advokaat wat hom voorheen verdedig het, het gesê Merah het hom nooit getref as ‘n terroris wat sulke dade kan pleeg nie, maar eerder as ‘n gewone misdadiger.

Merah, wat Donderdag in Toulouse met ‘n kopskoot gesterf het, het tydens die beleg aangedui dat hy met wapen in die hand sal sterf.

Omstanders kon ‘n laaste sarsie hewige outomatiese geweervuur buite die woonstel waarin hy vasgekeer was voor sy einde hoor. Hy was glo swaar gewapen.

Volgens die Franse polisie het Merah elk van die moorde met ‘n kamera verfilm, het die Paryse aanklaer Francois Molins bekendgemaak.

Hy is met ‘n koeël in die kop getref tydens die intervensie van die anti-terreurspesialiseenheid Raid, en het daarna uit die badkamervenster na benede geval.

Die owerhede het hul “dankbaarheid” teenoor die polisie wat die operasie onderneem uitgespreek en praat van “verligting” in die Toulouse-streek na die dood van Merah. Een van die die drie polisiemanne wat gewond is, veg vir sy lewe.

Die nuusberig wat beweer het Merah het voorheen probeer om by die Franse infanterie aan te sluit in 2010 in Toulouse is deur die ministerie van verdediging reggestel.

Merah het glo by ‘n werwingsentrum van die Vreemde Legioen, en nie die infanterie nie, probeer aansluit, het die Franse departement van verdediging Donderdag verklaar.

Die verdagte het probeer om aan te sluit by die weermag in 2008. Hy is later in Pakistan deur Al-Kaida opgelei.

‘n Organisasie wat bande met Al-Kaida het, het vanmiddag verantwoordelikheid vir die moorde op soldate, kinders en ‘n rabbi aanvaar, berig France Info.

Kenners sê die Salafiste se invloed is besig om met rasse skrede uit te brei in elk van die lande waar die Arabiese Lente die bestaande orde reeds omvergewerp het. Frankryk word reeds geïnfiltreer deur hierdie jihadiste en die kommer bestaan dat ondergedoke agente tot aksie sal oorgaan.