Kategorie: Nuus

Die Vryheidsfront Plus is bekommerd oor toenemende rassepolarisasie wat uit protesaksies teen swak dienslewering voortvlooi.  So sê mnr Hennie van Staden, VF Plus raadslid vir Randfontein.

‘n Protesaksie by die Siyahlala plakkerskamp en die aangrensende Buderile plakkerskamp  in Brandvlei, Randfontein het die afgelope naweek hand uitgeruk toe inwoners besluit het om hul mobiele groen toilette na die munisipale kantore en hoofpad te sleep en aan die brand te steek.  In die proses is padtekens uitgeruk en gevandaliseer waarna die SAPD met klippe en bakstene bestook is.

Volgens van Staden kon plaasboere in die omgewing nie hul wonings verlaat nie omdat die toegangsroetes na die plase deur die protesaksie geblokkeer was en moes hulle letterlik ure wag voordat die pad weer veilig was.

Die protesaksie is ook nie die eerste in die Brandvleigebied nie.  Inwoners het vroeër reeds om behuising betoog waarna 700 huise sonder die nodige dienste voorsien is.

Die ANC stadsraad pluk nou die vrugte van onuitvoerbare beloftes.  Die VF Plus eis dat die raad nou verantwoordelik begin optree omdat menselewens deur vals beloftes in gevaar gestel word.

“Die plaasaanval in Noordwes op mnr. Karel Griessel en sy twee dogters is ‘n bewys dat geweldsmisdaad buite beheer is. 

“Die polisie op Klerkskraal, in wie se gebied die plaasaanval plaasgevind het, kon nie telefonies of per radio bereik word nie en dit wil voorkom asof die polisiestasie of onbeman of die lede aan die slaap was. Dit is totaal onaanvaarbaar en die minister van Polisie, mnr. Nathi Mthethwa, gaan versoek word om op te tree aangesien sulke laksheid bydra dat misdadigers nie die polisie vrees nie en maklik ontsnap.

“Die boeregemeenskap was weereens op hulle self aangewese om mnr. Griessel te hulp te snel. Die polisie op Potchefstroom het later reageer, maar die aanvallers het toe reeds gevlug.

“Plaasaanvalle in Noordwes neem onrusbarend toe en dit kan toegeskryf word aan haatspraak en veral opruiende uitlatings van die ANC-jeug asook van Cosatu in Noordwes,” het mnr. Pieter Groenewald, VF Plus-provinsiale leier in Noordwes en hoofwoordvoerder oor Polisie, gesê.

“Die minister van Polisie sal moet antwoorde verskaf oor hoekom die polisie op Klerkskraal nie beskikbaar was nie. Dit is sulke optredes wat daartoe bydra dat veral geweldsmisdaad, maar ook misdaad in die algemeen floreer en nie onder beheer gebring word nie.

“Cosatu blaas gereeld rassehaat aan omdat hy plaasaanvalle wil regverdig asof dit die boere is wat rassisme bedryf. Hierdie optredes sal onmiddellik gestaak moet word, anders sal boeregemeenskappe reg in eie hande begin neem omdat plaasaanvalle en plaasmoorde emosies nou tot breekpunt dryf,” het Groenewald gesê.

Nege munisipale waterowerhede het nie deelgeneem aan die regering se watergehalte-assesseringsprogram nie.

Blue Drop, die departement van omgewingsake en waterwese se assesseringsprogram, is daargestel om die gehalte van drinkwater wat deur Suid-Afrikaanse munisipaliteite en waterowerhede verskaf word, te reguleer.

Van die 787 munisipale waterowerhede wat aan die assessering deelgeneem het, het slegs 38 Blue Drop-status bereik vir 2010.

Rejoice Mabudafhasi, adjunkminister van waterwese en omgewingsake, het probeer walgooi deur te wys daarop dat waterverskaffers wat nie die Blue Drop-status behaal het nie, nie noodwendig water van swak gehalte verskaf nie.

Slegs munisipaliteite wat ‘n telling van 95 persent en meer behaal het, het die Blue Drop-status behaal.

In die verslag van 269 bladsye het assesseerders hul teleurstelling uitgespreek dat nege munisipaliteite glad nie ingestem het om geassesseer te word nie.

Die Times Live berig dat alle aanklagte teen die omstrede president van die ANC-jeugliga (ANCYL), Julius Malema, laat vaar gaan word deur die ANC.

Die ANC wou nie dadelik kommentaar lewer oor die wending nie, maar verskeie bronne na aan die jeugliga het bevestig dat Malema nie vervolg sal word nie.

Maandag is daar berig dat Malema diisiplinêre aksie in die gesig staar weens sy swak dissipline. 

President Jacob Zuma het egter volgens ingeligte bronne Maandag onverwags van mening verander. By ‘n vergadering met ANC-leiers is besluit om die klagtes teen Malema terug te trek.

Alhoewel Mathews Phosa nie opgedaag het nie en Gwede Mantashe vroeg geloop het, het visepresident Kgalema Motlanthe, adjunksekretaris-generaal Thandi Modise en nasionale voorsitter Baleka Mbete saam met Zuma besluit om die Jeugligaleier te verskoon.

Dit is glo algemeen bekend dat Phosa goeie verhoudinge met China handhaaf en Chinese belange op die hart dra.

Motlanthe het blykbaar deurentyd aangedring dat die dissiplinêre verhoor teen Malema wat volgende maand sou begin, moet voortgaan, maar Zuma het later geswig voor die druk en ingegee.

Die klagtes teen Malema sluit in: Sy uitsprake na afloop van sy besoek aan Zimbabwe wat Suid-Afrika se onderhandelingsposisie bemoeilik, sy bewering dat Zuma erger is vir die Jeugliga as Mbeki, verbode kommentaar oor Eugene Terre’Blanche se dood en die sing van ‘n verbode liedjie, asook die feit dat hy ‘n BBC-joernalis ‘n “baster” en ‘n “bleddie agent” genoem het.

Die Jeugliga het daarop gewys dat Malema Zimbabwe besoek het met die seënwense van Zuma en dus nie daarom verantwoordelik gehou kan word vir sy optrede nie.

Die atmosfeer was glo deurentyd gespanne, omdat “Julius baie mag het”, volgens ‘n bron binne die Jeugliga.

Dié besluit is ná afloop van ‘n vergadering met die jeugliga Maandag geneem. Dié nuwe wending sal Dinsdag tydens ‘n perskonferensie deur Modise bekend gemaak word.

Minister van polisie, Nathi Mthethwa, sal Maandagoggend ‘n Afrikaner Weerstandsbeweging (AWB) afvaardiging ontmoet, het ‘n regeringsamptenaar bevestig.
  
“Die vergadering is aangevra deur die AWB,” sê Mthethwa se woordvoerder Zweli Mnisi.
  
Hy het gesê die regse organisasie – wie se leier, Eugene Terre’Blanche twee weke gelede doodgekap is op sy plaas  – wil “sekere moorde” bespreek.

“Ons sal ons landelike veiligheidsprogram met hulle deel,” sê Mnisi.
  
Die minister, die sekretaris van die polisie, Jenny Irish-Qhobosheane, en Mnisi sal teenwoordig wees tydens die vergadering met die AWB.
  
Die AWB se algemene sekretaris Andre Visagie sal na verwagting die vergadering om 8vm in Pretoria saam met ander AWB-lede bywoon.

‘n Vyftigjarige man is Sondag op ‘n plaas buite Ventersdorp, waar Terre’Blanche vermoor is, aangeval.
  
Hy is na die hospitaal gehaas met verskeie steekwonde aan die been nadat hy aangeval toe hy na buite gegaan het om te kyk waarom sy honde blaf, het paramedici gesê.
  
Terre’Blanche is twee weke gelede doodgekap op sy plaas .

Vier mense was teenwoordig tydens die moord op die AWB-leier en twee, waarvan een glo minderjarig is, is intussen in hegtenis geneem vir die daad. Die ander twee, ook minderjarig, is in ‘n plek van veilige bewaring.

Die president van Zimbabwe, Robert Mugabe, het Sondag ‘n beroep op die land gedoen om “enige geweldadige optrede te vermy.”

Dit is die eerste keer sedert die begin van die land se stormagtige politieke situasie dat Mugabe standpunt teen geweld inneem.

Die president het die beroep gedoen tydens ‘n toespraak ter viering van Zimbabwe se 30ste jaar van onafhanklikheid van Brittanje.

Mugabe het gesê hy rig die versoek namens die land se koalisieregering.

“Die inklusiewe regering vra dringend dat geweld in al sy vorme vermy word.

“Ons as Zimbabwiërs moet ‘n omgewing van aanvaarding skep waarin ons mekaar met respek behandel, ongeag van ouderdom, ras, geslag, etnisiteit of politiese- of geloofsoortuiging,” het Mugabe in Harare se hoofsportstadion gesê.

Sekretaris-generaal van die ANC, Gwede Mantashe, is deur die party gevra om teen Malema op te tree omdat die nasionale Jeugligaleier glo uit sy beurt praat.

Shadrack Tlhaole, ANC-jeugligaleier in die Noord-Kaap, staan egter by Julius Malema. Hy het sy misnoeë oor die klagte teen Malema uitgespreek.

Die klagte kom nadat Malema die party benadeel het deur swak dissipline, asook omdat hy ’n BBC-joernalis nie na wense behandel het nie.

Tlhaole sê die klagte vir die tugverhoor is ongegrond. Hy het aan media24 gesê: “Ons verwerp die aantyging dat Malema se swak gedrag ’n uitwerking kan hê op ’n groot organisasie soos die ANC wat internasionaal gerespekteer word.”

 Malema het Saterdag vyf uur laat opgedaag vir die jeugliga se saamtrek op Colesberg in die Noord-Kaap. Hy het “buitelanders”, met verwysing na Afrikaners, gedreig met uitsetting omdat hulle glo “al die grond besit”.

Floyd Shivambu, nasionale woordvoerder van die jeugliga, het gesê hy is nie bewus van enige klagte nie. Hy het bygevoeg dat niemand in die ANC bewus daarvan is nie.

‘n Voormalige luitenant-kolonel in die kommando, Frederick Rabie, is in in hegtenis geneem ná ‘n onwettige wapenarsenaal in sy huis in Worcester gevind is.

Sowat 10 000 rondes ammunisie, ‘n 9mm-pistool, plofstof en weermagtoerusting is tydens ‘n polisieklopjag op die 62-jarige man se huis gevind.

Rabie is op borgtog vrygelaat en sal na verwagting Maandag in die hof verskyn, berig die Sunday Independent.

Die klopjag was glo deel van ‘n polisieondersoek na die Suidlanders, ‘n verregse organisasie wat na bewering die Wêreldbeker-sokkertoernooi wou saboteer.

Soortgelyke klopjagte is in Pretoria, Mpumalanga en die Wes-Kaap uitgevoer.

Die koerant beweer die ondersoek is gekoppel aan die webwerf www.boycott-2010-world-cup.co.nr.

Die polisie wou nie kommentaar lewer nie.
 

Independent het egter ‘n “goed geplaasde” bron binne die Suidlanders aangehaal, wat gesê het die wapens sou gebruik word om “vuil truuks” uit te voer in ‘n poging om buitelandse besoekers aan die sokkertoernooi weg te skrik.