Die derde Roadlinkbus in ‘n week is van die pad af gehaal nadat daar bevind is dat die voertuig se remme nie op standaard was nie.
Dit volg na twee Roadlinkbusse van George en Knysna op Nuwejaarsdag weens ‘n aantal foute padtoegang geweier is.
In Julie verlede jaar was ‘n Roadlinkbus betrokke by ‘n ongeluk naby Beaufort Wes waarin agt mense oorlede is.
Twaalf mense het in 2006 hul lewens verloor toe ‘n Roadlinkbus op Kersfees in ‘n pilaar van ‘n brug in KwaZulu-Natal vasgery het.
Meer joernaliste het in 2009 gesterf as vorige jaar – Verslaggewers sonder grense
Altesaam 26 persent meer joernaliste het in 2009 in die uitvoering van hul werk gesterf as die vorige jaar – ‘n totaal van 76 teenoor 2008 se 60.
Verslaggewers Sonder Grense (VSG), gewoonlik bekend onder dié organisasie se Franse naam, afgekort as RSF, se finale verslag vir 2009 is kort voor die Nuwejaar op die internet geplaas.
‘n Interessante feit is dat bykans al die joernaliste wat omgekom het, in hul eie lande gesterf het, ‘n aanduiding dat hulle nie gesterf het terwyl hulle na die wêreld se besigste konfikgebiede getrek is nie.
Nogtans meen die VSG dit word al moeiliker vir verslaggewers om nuusdekking oor groot brandpunte te doen, omdat hulle al meer self geteiken word.
Ander soort aanvalle op joirnaliste, soos fisieke aanranding, het met ‘n derde toegeneem.
Namate die elektroniese media belangriker word om inligting bekend te maak, veral in lande wat tradisioneel nie ‘n vrye inligtingsvloei voorstaan nie, slaan hierdie lande ook op internetgebruikers toe om inligtingsvloei te probeer smoor. Een blogger is in gevangeskap dood, en 151 is gearresteer.
Volgens die jongste persvryheidsindeks is Denemarke, Swede, Finland, Noorweë en Ierland die mees persvrye lande ter wêreld, met die voormalige Sowjietrepubliek, Estland, in die sesde plek. Ghana is die mees persvrye land in Afrika, gevolg deur Mali met Suid-Afrika nou in die derde plek, en 33ste in die wêreld. Namibië, wat verskeie jare meer persvry as Suid-Afrika geag is, het nou na die 35ste posisie teruggesak.
In 2009
76 verslaggewers gedood
33 verslaggewers ontvoer 573
1456 fisiek aangerand
570 media gesensor
157 verslaggewers het uit hul eie lande gevlug
1 blogger is in die tronk dood
151 bloggers en kuber-dissidente gearresteer
61 fisies aangerand
60 word deur aanlyn-sensuur geraak
Die eerste minister van Japan, Yukio Hatoyama, het sy eie woernaal begin en ‘tweet’ glo daagliks in ‘n poging om sy gewildheid ‘n hupstoot te gee.
“Gelukkige Nuwejaar almal,” het hy in sy eerste ‘tweet’ geskryf en aandag daarop gevestig dat hy dit self geskryf het.
“Ek gaan probeer om een tweet elke dag te skryf totdat ek gewoond daaraan is.”
Die Japannese weergawe van Twitter is in April verlede jaar gestig.
Hatoyama se woernaal se naam is Hato cafe met foto’s wat hy self geneem het. Hy het ook daarop geskryf dat hy jammer is oor al die foute wat hy in die verlede gemaak het.
‘n Pastoor se beroep op sy megakerk se gemeente om die kerk se nadelige banksaldo van bykans R6 miljoen om te keer, het gelei tot ‘n somtotaal van meer as R17 miljoen se donasies.
Pastoor Rick Warren sê die geld is Oujaarsaand ingesamel nadat hy ‘n beroep op die kerk se webblad geplaas het.
Die geld is egter alles in kontant betaal en nie elektronies nie.
Hy het bygevoeg dat daar steeds geld inkom.
Mense lewer persoonlik geld af en stuur ook donasies per pos.
Blykbaar was dit slegs lede van die megakerk wat geld gegee het en meeste van die donasies was onder ‘n honderd dollar elk.
“Ons begin die jaar in oorvloed,” het hy gesê.
“Dit kom van gewone mense af, nie net van een ryke nie.”
“Met 10% van ons gemeente wat hul werk in die resessie verloor het, het die kerk se uitgawes vermeerder terwyl ons inkomste stilgestaan het.” het Pastoor Rick Warren op die webblad geskryf.
Hy het ook duidelik melding gemaak van waarvoor die donasies gebruik sal word.
Pastoor Rick Warren is die skrywer van die gewilde boek “A Purpose Driven Life”.
Eugene de Kock, 61, die eertydse bevelvoerder van die veiligheidspolisie se C10-teeninsurgensie-eenheid te Vlakplaas, mag dalk binnekort vrygelaat word.
De Kock is in Oktober 1996 in die Pretoriase Hooggeregshof twee keer lewenslange tronkstraf opgelê, nadat hy skuldig bevind is aan oa moord terwyl hy van 1985 tot 1993 by die eenheid gedien het.
Dié stap, meen ingeligtes, sal lei tot presidensiële kwytskelding vir die veroordeelde Schabir Shaik. Shaik het in April 2008 by die presidensie om kwytskelding aansoek gedoen.
Jacob Zuma het De Kock glo verlede jaar in April in die Sentrale Gevangenis in Pretoria besoek.
De Kock het klaarblyklik aan Zuma inligting verskaf oor mense wat “skotvry” daarvan afgekom het.
In ruil vir kwytskelding het De Kock aangedui dat hy met ‘n nuwe ondersoek oor die vorige bedeling se vergrype sal saamwerk en sal help met die opspoor liggame van slagoffers wat deur die NP se veiligheidsmagte vermoor is.
Zuma en die ANC se woordvoerders kon nie die ontmoeting bevestig of ontken nie.
Rusland se bevolking sal hierdie jaar vir die eerste keer sedert die val van die Sowjet-unie ‘n styging toon.
“Ons kan met vertroue sê die Russiese bevolking het hierdie jaar gegroei,” het die land se premier, Wladimir Poetin, tydens die regering se jaarafsluitingstoespraak op staatstelevisie gesê.
Volgens Poetin sou statistiek wat die groei bevestig, later bekend gemaak word.
Sy woordvoerder, Dmitri Peskof, het bevestig dat die land se bevolking dié jaar gegroei het.
Poetin het in 2006 Rusland se kwynende bevolking sedert die einde van kommunisme, as die land se grootse probleem bestempel.
Die daling in bevolkingsaanwas word hoofsaaklik aan emigrasie toegeskryf, maar faktore soos alkoholisme, stres en swak gesondheidsorg het ook al die skuld gekry.
Die premier het ‘n plan aangekondig wat bevolkingsaanwas sal aanwakker deur ‘n hoër geboortesyfer, ‘n beter migrasiebeleid daar te stel en Russe se lewensverwagting te verbeter.
Rusland se lewensverwagting het na “byna 69” jaar gestyg in 2009, het Poetin gesê.
Tatjana Golikova, die land se minister van gesondheid, het in 2008 gesê die land se gemiddelde lewensverwagting is 67.8.
Gevegte tussen Islamitiese militante en veiligheidsmagte in die noorde van Nigerië het tot die dood van ten minste 35 mense gelei.
Volgens Mohammed Barau, polisiewoordvoerder van die Bauchi-staat, het lede van die Kata Kalo-sekte onder mekaar begin baklei en die blaam vir hulle leier se ernstige siektetoestand op mekaar gelê.
Hy het ook aangevoer dat vroeëre berigte dat die inhegtenisname van die leier tot die onluste gelei het, nie korrek was nie.
Die geveg het vinnig na die strate van ‘n arm buurt naby die stad Bauchi versprei, en militêre magte het probeer om dit daar te stuit, het Barau gesê.
Volgens amptenare was die militante gewapen met spiese en pyle.
Barau sê veiligheidsmagte het later na die gebied teruggekeer, maar “voor die polisie daar kon uitkom was almal reeds dood.”
Volgens Barau was die gebied teen Dinsdag weer onder beheer.
“Dinge is weer terug na normaal. Almal gaan weer hul gang,” het hy gesê.
‘n 41-jarige polisieman sal in die landdroshof in Jansenville verskyn nadat hy vermoedelik ‘n 15-jarige meisie aangerand en verkrag het, het polisie in die Oos-Kaap gesê.
Inspekteur Gerry van Rooyen het gesê die meisie het ‘n kroeg in Jansenville op 27 Desember saam met die polisieman verlaat.
Hy het haar toe na ‘n nabygeleë rugbyveld geneem en na bewering verkrag en ernstig aangerand.
Die polisieman, ‘n inspekteur, is by die Jansenville-polisiestasie gestasioneer.
AfriForum het ʼn beroep op ouers gedoen om hulle kinders in die komende jaar in skole te sit waar hulle in hulle moedertaal onderrig kan word. Ouers word ook deur AfriForum versoek om in ʼn toenemende mate druk op die regering te plaas om moedertaalonderrig te voorsien in gevalle waar dit nie reeds beskikbaar is nie. Waar moedertaalonderrig beskikbaar is, moet ouers volgens AfriForum enige poging van die regering om moedertaalonderring in te perk, sterk teenstaan.
Volgens Kallie Kriel, uitvoerende hoof van AfriForum, bevestig die matriekuitslae jaar na jaar dat leerders wat moedertaalonderrig ontvang, beter vaar as diegene wat hulle onderrig in ʼn tweede of derde taal ontvang.
Kriel het daarop gewys dat dit al oor en oor bewys is dat leerders nuwe konsepte en vaardighede die maklikste in hulle moedertaal aanleer, en dat hulle hierdie vaardighede later dan maklik na ʼn tweede taal soos Engels kan oordra. Kriel het aangedui dat die omgekeerde ook waar is, naamlik dat leerders moeilike begrippe nog moeiliker in ’n ander taal vind en dit in baie gevalle selfs nie kan bemeester nie.
Kriel voer aan dat moedertaalonderrig vir so lank as moontlik, selfs tot op nagraadse vlak, verkies behoort te word, omdat dit die leerder of student veral by die “moeilike vakke” soos wiskunde en wetenskap, ’n voorsprong gee. “Daarsonder is ’n loopbaan in ’n groeiende aantal beroepe nie meer moontlik nie.
As die begrippe eers gevestig is, ondervind studente geen probleem om na Engels toe oor te skakel nie. Talle Afrikaanse studente het byvoorbeeld sedert die sestigs net in Afrikaans gestudeer en daarna met groot sukses hulle doktorsgrade aan die beste buitelandse universiteite behaal. Vandag is dit nog makliker omdat kinders met Engels op televisie en op hulle rekenaars grootword,” het Kriel bygevoeg.
Nie-Engelssprekende kinders wat Engelse skole bywoon, betaal volgens Kriel dikwels later die prys. “Ouers wat aan hulle kinders se loopbane en toekomstige verdienvermoë dink, moet daarop aandring dat hulle kinders in hulle moedertaal onderrig word,” het Kriel gesê.
Twee verkeersbeamptes van Mpumalanga het voor die hof in Delmas verskyn op aanklag van poging tot moord.
Robert Sekgoane en Simon Mathe, albei 31, is op borgtog van R500 vrygelaat .
Hulle saak is tot die 16de Februarie uitgestel.
Sekgoane het na bewering op Kersdag ‘n man in die been geskiet in Msimangostraat naby Delmas.
Mathe het kort daarna dieselfde geweer gebruik om aan die skiet te gaan sonder ‘n spesifieke teiken.
Hy het ‘n ander persoon in die proses beseer.
Die twee mans het hulself aan die polisie in Delmas oorgegee.
Daar bestaan reeds ‘n saak van aanranding teen Sekgoane terwyl Mathe nog op ‘n aanklag van onsedelike aanranding moet reageer.
