Vryheidsfront verloor op Naboom teen DA weens verdeelde regse stem

Die Vryheidsfront Plus het gister tydens ‘n tussenverkiesing in wyk 4 ‘n neerlaag teen die DA in ‘n konserwatiewe Noord-Transvaalse kiesafdeling op Naboomspruit teen die DA gely deur met 582 stemme teen die DA se 665 te verloor. Van die party se organiseerders blameer Afriforum wie se voorsitter op die dorp, mnr. Philip van Staden, as onafhanklike kandidaat gestaan het en 278 stemme behaal het. Die ANC het 104 stemme ontvang en Cope 3.

Mnr. Philip van Staden van die Vryheidsfront, wat die dr. Ilse de Beer se veldtog namens die Vryheidsfront vanuit Centurion kom ondersteun het, het in ‘n epos gesê: “Kryt my uit en sê my asseblief sleg, maar ek is klaar met DA-liberaliste en Afriforum-rugstekers. Ek hoop hierdie boodskap bereik hul ore.”

Die Gautengse leier en LPW van die party, mnr. Jaco Mulder, het egter die party vir sy poging op Naboospruit in ‘n mediaverklaring gister geloof:

“Die VF Plus het vandag ‘n beduidende prestasie behaal deur sy steunbasis in die wyk 4 Naboomspruit tussenverkiesing te behou terwyl DA steun met 16 persent gedaal het.

“Die DA se kandidaat mnr Charl van der Merwe het 665 stemme op hom verenig terwyl die VF Plus se dr Ilse de Beer 582 behaal het.  Die uitslag is tekenend van ‘n nuwe wending in oposisie-politiek met ‘n groeiende bewuswording van die noodsaak om minderheidsregte te bevorder op plaaslike vlak deur middel van die politieke platform van die VF Plus.”

Volgens ander lede van die party, sou die Vryheidsfront gewen het indien dit nie vir die onafhanklike kandidaat was nie. ‘n Gebelgde Vryheidsfrontlid het gesê: “As jy die Afriforum-kandidaat se stemme by ons s’n tel, sou ons met daardie syfer gewen het. Selfs die DA stem saam met ons, Afriforum het gesorg dat ons verloor.”

Zille skerm vir twisgierige Mandela’s

Nelson Mandela se familie moet die privaatheid gegun word om hul verskille op te los, het Helen Zille, leier van die Demokratiese Alliansie, Woensdag gesê.

“Ek wil liewer nie kommentaar lewer oor die kwessie nie. Die familie moet die ruimte gegum word om dit op te los,” het Zille aan joernaliste buite die Harthospitaal in Pretoria gesê.

Mandela is op 8 Junie vir ‘n herhalende longinfeksie in die hospitaal opgeneem. Hy is in ‘n kritieke, maar stabiele toestand.

Zille het gesê terwyl sy in Pretoria was, het sy dit goed gedink om aan te doen by die hospitaal waar Mandela behandel word, om ‘n bos blomme neer te sit en die voormalige staatshoof ‘n spoedige herstel toe te wens.

“Ek kon nie verby die hospitaal ry en niks doen nie. Die DA ondersteun die vader van die nasie, Nelson Mandela.”

Zille het gesê sy wou na die hospitaal kom wanneer Mandela se toestand verbeter het en dat sy familie sal besluit oor die internasionale ikoon se laaste rusplek.

Mandela-twis verhewig

Drie lykswaens van ‘n begrafnisondernemer in Mthata in die Oos-Kaap het op Mvezo aangekom om die oorskot van oudpresident Nelson Mandela se kinders na Qunu terug te neem, berig RSG.

Dit volg nadat Madiba se kleinseun, Mandla ‘n hofgeding verloor het om die opgrawing van Tembekile, Makgato en Makaziwe Mandela te keer.

Die hekke wat buite Mvezo aangebring is, is volgens die radiostasie oopgebreek.

Mandela se oudste dogter Makaziwe en kleinseun Ndbaba is ook op die toneel saam met amptenare van die departement van gesondheid. Hulle is deel van die 16 aansoekers wat die hofaansoek gerig het om die oorskot na Qunu terug te neem.

Die oorskot van drie van Mandela se kinders sal forensies ge toets word nadat dit oornag na ‘n lykshuis in Mthtatha gebring is.

Die oorskot is laat Woensdag ingevolge ‘n hofbevel by Mvezo opgegrawe.

Ingevolge die hofbevel moet die oorskot teruggeneem word vanwaar Mandla dit in 2011 na Mvezo geneem het.

Die drie familielede wie se oorskot geskuif is, is Mandela se oudste seun en Mandla se pa Makgato Mandela wat in 2005 oorlede is, Mandela se eerste dogter Makaziwe wat as ‘n baba in 1948 gesterf het, en Mandela se tweede seun Madiba Thembekile wat in 1969 in ‘n motorongeluk oorlede is.

Intussen sal Mandla Mandela Donderdag ‘n mediakonferensie hou om sy kant van die saak te stel.

ANC skors Potch-raadslede wat saam met DA stem

Die ANC in die Noordwes het die skorsing verwelkom van 14 raadslede van die Tlokwe-munisipaliteit wat saam met die DA gestem het om die burgemeester, Maphetle Maphetle, te ontsetel.

Die besluit om die groep te skors, is Woensdag op ‘n vergadering van die provinsiale tugkomitee gemaak.

Die ANC beweer 16 van sy raadslede het ‘n raadsvergadering bygewoon, waar hulle ten gunste van Maphetle se ontseteling gestem het.

Dit was die tweede poging om Maphetle uit sy pos te verwyder.

Chris Hattingh, DA-leier in die Noordwes, het gesê 29 raadslede van alle partye, insluitend die ANC, het eenparig gestem vir die heraanstelling van Annette Combrink.

Die geskorste lede kan by die nasionale appèlkomitee appelleer teen hul skorsing.

SA wil renosterhoringhandel beter reguleer

Suid-Afrika is intussen besig om ‘n omvattende voorstel vir handel in renosterhoring voor te berei vir oorweging by die Konvensie vir Internasionale Handel in Bedreigde Spesies, CITES.

Dit sal gereed wees vir die organisasie se volgende byeenkoms wat oor drie jaar in Suid-Afrika gehou word.

Die minister van omgewingsake – Edna Molewa – sê die land is as ‘n lid van CITES daartoe verbind om sy rol as ‘n leier op die gebied van omgewingsbewaring uit te bou. Sy het op ‘n nuuskonferensie in Pretoria gesê dat Suid-Afrika ook sy deel moet doen in besluitnemingsprosesse deur ander CITES-lede oor die wettige handel in renosterhoring te beïnvloed.

Die opstel van ‘n voorlegging vir CITES se volgende beraad is reeds deur die regering goedgekeur.

Drie vermeende renosterstropers wat intussen die naweek in die noorde van KwaZulu-Natal vasgetrek is, het erken dat hulle ‘n renoster in die iSmangaliso vleilandpark doodgemaak het.

Hulle is blykbaar op heterdaad betrap met wapens en renosterhoring in hulle besit. Die renoster wat gestroop is was moontlik dragtig.

Twee van die mans is van Suid-Afrika en die derde is ‘n Mosambiekse burger.

Een-en-veertig renosters is sover vanjaar in KwaZulu-Natal gestroop, en 450 landwyd.

Morsi deur staatsgreep uit die kussings gelig

Die hoofregter van die konsitusionele hof in Egipte, Adli Mansour word vandag as tussentydse leier van dié land ingesweer, nadat die eerste demokratiese-verkose president Mohammed Morsi gister deur die weermag uit die kussings gelig is.

Morsi se Moslem Broederskap- party meen dié stap was ‘n militêre staatsgreep.

Morsi en verskeie van sy assistente word deur militêre intelligensie in Kairo aangehou, terwyl 40 senior leiers van die Moslem Broederskap verbied is om die land te verlaat.

Die hoof van die weermag het gisteraand aangekondig dat Morsi se regering omver gewerp is en dat die grondwet opgeskort is. Die tussentydse regering sal in beheer van die land wees tot vervroegde verkiesings gehou word.

Die Moslem Broederskap in Egipte sê die afgesette president Mohammed Morsi word by ‘n militêre basis aangehou.

Die weermaghoof het tydens ‘n regstreekse televisieuitsending gesê ‘n tussentydse regering sal aangewys word wat die weg sal baan vir presidensiële en parlementêre verkiesings.

Intussen het die verskeie Westerse leiers kommer uitgespreek oor die ontsetting van Egipte se eerste demokraties-verkose president en die hoop uitgespreek dat Egipte se demokrasie spoedig herstel kan word.

Die Amerikaanse president, Barack Obama het in reaksie op die jongste verwikkelings gesê hy hoop die land kan gou terugkeer na ‘n verkose burgerlike regering.

Die EU het die bloedvergieting betreur wat met die onlangse betogings gepaard gegaan het.

Minstens 50 mense is in die geweld dood. Die Verenigde Nasies se sekretaris-generaal Ban Ki Moon het ook sy kommer uitgespreek oor die weermag se ingryping in die land.

Gaan kuier vir ouma, of dis tronk toe!

‘n Chinese wet het Maandag in werking getree wat boetes of tronkstraf vir kinders inhou wat nie hul ouers besoek nie.

‘n Dogter van ‘n Chinese bejaarde vrou is beveel om haar ma  ten minste een keer elke twee maande te besoek. Dit was die eerste vervolging onder die nuwe wet die bejaardes te beskerm.

Die wet is uitgevaardig te midde van stygende kommer dat China se vinnige ontwikkeling sy tradisionele uitgebreide families onder druk plaas weens ‘n toenemende aantal “leë nes” huise.

Verslae oor bejaardes wat verwaarloos of mishandel word deur hulle kinders het die land geskok.

‘n Egpaar van Wuxi, in die oostelike provinsie Jiangsu, het ingestem om te sorg vir die bejaarde vrou, maar het haar nog nie besoek nie, want sy woon by seun.

Die hof in Beitang-distrik het besluit dat die egpaar die moeder móét besoek, ten minste een keer elke twee maande, en op ten minste twee van China se nasionale vakansiedae.

Dit het ook gesê die egpaar kan vergoeding betaal as hulle haar nie besoek nie.

Die wet op die beskerming van die regte en belange van die Bejaarde sê dat familielede hul familie ouer as 60 “dikwels” moet besoek, maar gee nie ‘n presiese definisie van die term nie.

Kenners het kommer uitgespreek dat die nuwe wet moeilik sal wees om af te dwing en China se webgebruikers spot daarmee as ‘n “belediging vir die volk”.

Die wet is in Desember gewysig na gereelde verslae van bejaarde ouers wat deur hul kinders verwaarloos word. Dit sê kinders van ouers ouer as 60 moet toesien dat daar daagliks aan hulle finansiële en geestelike behoeftes voldoen word.

Alhoewel respek vir die bejaardes diep ingeburger is in die Chinese gemeenskap, het drie dekades van markhervorming China se tradisionele uitgebreide familie onder druk geplaas, en daar is min bekostigbare alternatiewe, soos aftree-oorde.

Meer as 14% van China se bevolking, of 194 miljoen is ouer as 60, volgens die jongste syfers.

Die VN beraam dat, teen 2050, sal 30% van die Chinese 60 of ouer wees. Die wêreldwye gemiddeld is 20%.

Brug en ID-slimkaarte vir Mandeladag

Die uitreiking van die ID-slimkaarte en die opening van ‘n nuwe brug is slegs ‘n paar geleenthede wat vir Mandela-dag beplan word, het die kabinet Dinsdag aangekondig.

Mandela-dag word jaarliks op oudpres. Nelson Mandela se verjaardag op 18 Julie gevier.

Die voormalige staatshoof sal vanjaar sy 95ste verjaardag vier.

“In hierdie moeilike tyd, laat ons liefde en begrip wys en Madiba trots maak,” het Phumla Williams, waarnemende kabinetwoordvoerder, gesê.

Mandela is steeds in ‘n kritieke toestand in die Medikliniek se Harthospitaal. Hy word sedert verlede maand vir ‘n herhalende longinfeksie behandel.

Williams het gesê die uitreiking van die nuwe ID-kaarte sal op 18 Julie begin.

Die kabinet het Dinsdag ‘n beroep op Suid-Afrikaners gedoen om op 18 Julie 67 minute van hul tyd op te offer om “hul gemeenskappe en Suid-Afrika vir goed te verander”.

Die kabinet het gesê vanjaar se tema is: “Neem aksie; inspireer verandering; maak elke dag ‘n Mandela-dag”, met die fokus op voedselsekuriteit, behuising en letterkunde.

FW de Klerk ‘sterk goed aan’

Oudpresident FW de Klerk se operasie Dinsdag om ‘n pasaangeër te kry was suksesvol, het die FW de Klerk-stigting in ‘n verklaring gesê.

Die stigting het Suid-Afrikaners vir hul goeie wense en boodskappe van ondersteuning bedank, en gesê die familie is ook dankbaar teenoor die “uitstekende mediese span” by die Panorama-hospitaal in Kaapstad waar die 77-jarige die intervensie ondergaan het.

President Jacob Zuma het De Klerk ook spoedige beterskap toegewens.

“Ons stuur goeie wense aan die voormalige president. Kom ons hou hom en sy familie in ons gebede,” het Zuma Dinsdag in ‘n verklaring gesê.

De Klerk moes in Junie 2006 ‘n operasie ondergaan om twee kwaadaardige nodusse van sy kolon te verwyder.

Kort na dié operasie het hy ‘n longinfeksie ontwikkel, maar het ten volle herstel.

Hof sê Mandela-grafte moet na Qunu

Oudpresident Nelson Mandela se kleinseun, Mandla Mandela, het tot drieuur vanmiddag tyd om die oorskot van drie van Madiba se kinders vanaf Mvezo na Qunu in die Oos-Kaap te verskuif.

Die Oos-Kaapse hooggeregshof sal na verwagting vandag in die saak beslis. Sestien lede van die Mandela-familie, asook Madiba se vrou, Graca Machel, het Vrydag ‘n hofbevel teen Mandela bekom om die oorskot na die oorspronklike grafte op Qunu terug te neem.

Mandela se regsverteenwoordigers voer aan dat die tussentydse bevel verwerp behoort te word, maar die Mandela-familie wil dit bekragtig hê.

Intussen kan Mandela ook strafregtelik aangekla word van grafskending nadat ‘n dossier hieroor geopen is. Die polisie wil egter nie bekend maak wie die klagte gelê het nie.