Die hoof van die Russiese ruimte-agentskap het voorgestel dat Rusland ‘n kernaangedrewe ruimtetuig moet bou.
Anatoly Perminov het aan die regering gesê dat ‘n voorlopige ontwerp teen 2012 gereed sal wees.
Die bou van die ruimtetuig sal na 2012 geskied. Dit sal sowat nege jaar duur en minstens R470 miljoen kos om te bou.
President Dmitry Medvedev het die kabinet aangemoedig om die nodige fondse te verskaf.
Die familie van ‘n bankier het aantygings gemaak dat lede van Guinee se presidensiële wag hom vlugtig ontvoer en sy kar gesteel het.
Die sogenaamde “Rooi Beret”-eenheid het Ibrahima Diallo, direkteur van First International Bank, naby sy huis ontvoer.
Hulle het hom in ‘n militêre voertuig gegooi, sy kar gesteel en hom in die buitewyke van die stad vasgebind en agtergelaat.
In protes teen die ontvoering, sal alle banke Donderdag en Vrydag gesluit wees.
Teenstanders van die militêre junta het mense gewaarsku om eerder nie Woensdag hul huise te verlaat nie.
Dié waarskuwing kom ‘n maand na sowat 150 mense doodgeskiet toe soldate verlede maand losgebrand het op betogers.
Die betogers het in ’n stadion byeengekom het om te eis dat die junta-leier, kapt. Moussa Dadis Camara, nie in Januarie as ’n kandidaat in die verkiesing staan nie.
Die doodsertifikaat van ’n motorelektrisiën wat sowat drie weke gelede voor sy gesin deur gewapende rowers in die hart doodgeskiet is, lui dat hy aan natuurlike oorsake dood is.
Henry Locke is op 5 Oktober op die Elands-wildplaas naby Cullinan, noordoos van Pretoria, voor sy vrou, dogter, Monique (13), en seun, Dawie (23), wat ’n kwadrupleeg is, deur rowers in die hart geskiet.
Lees die hele berig hier
‘n Man het in die hof verskyn na hy skynbaar vir Nelson Mandela tydens ‘n potjiekoskompetisie by Sun City beledig het.
Benjamin Burger, 46, aandeelhouer van die sekuriteitsmaatskappy wat gasheer gespeel het, het na bewering ‘n vermengde weergawe van Nkosi Sikelel’ iAfrika gespeel.
In die liedjie word Mandela ‘n “kaffir” genoem.
Die polisie is in kennis gestel en Burger is in hegtenis geneem.
Hy is op borgtog van R1 500 weer vrygelaat.
‘n Saak van crimen injuria teen Burger sal weer die 11de Desember hervat word.
Suid-Afrika en Lesotho is een van die top tien lande ter wêreld wat die minste teen vrouens diskrimineer, het die Wêreld Ekonomiese Forum, WEF, gesê.
Suid-Afrika het vanaf nommer 22 na ‘n sesde plek geklim, terwyl Lesotho vanaf nommer 16 na ‘n tiende plek gevorder het.
Die WEF se Globale Geslagsgapingsindeks baseer dié resultate op ekonomiese deelname en geleenthede, politieke bemagtiging en die gesondheid en oorlewing van vrouens oor 134 lande.
“Die data toon dat Suid-Afrika geweldig baie gevorder het,” het die WEF gesê. Daar word volgens die forum baie meer vrouens in die regering en ministerie van die land aangestel.
Lesotho het ook daarin geslaag om onder die top tien lande te val as gevolg van “die aanstelling van meer vrouens, asook om die gaping tussen salarisse te verklein.
Nordiese lande is egter bo aan die lys wat geslagsgelykheid betref.
Ysland pronk in eerste plek, Finland is tweede, Noorweë is derde en Swede volg in vierde plek.
Die Filippyne is die enigste Oosterse land wat onder die top 10 beland het.
Jemen het egter laaste geëindig met Tsjad en Pakistan onderskeidelik tweede en derde laaste wat die swakste beleid vir geslagsgelykheid volg.
Die DA het Dinsdag ‘n klag van haatspraak teen Thebe Meeko, die voorsitter van die ANC-jeugliga in die Vrystaat gelê. Dit kom na Meeko se uitlatings wat hy glo oor Jonathan Jansen, rektor van die Universiteit van die Vrystaat, gemaak het.
Die klag is by die Kaapstadse Landdroshof gelê nadat die koerant, The Times, berig het dat Meeko gesê het Jansen moet “doodgeskiet word omdat hy ‘n rassis is”.
Meeko se uitlatings kom nadat Jansen verlede week tonge los gehad het toe hy aangekondig het dat die universiteit hul klagtes teen die sogenaamde Reitz-vier laat vaar het.
“Dit is sulke skokkende stellings. Ons moet optree wanneer iemand vra dat iemand anders doodgemaak word,” het Wilmot James van die DA gesê.
Floyd Shivambu, woordvoerder vir die ANC-jeugliga, het gesê dié uitspraak vra nie dat Jansens geskiet word nie maar dat rassisme geskiet word.
“Hy het nie bedoel dat ‘n persoon doodgemaak moet word nie. Hy het na rassisme verwys,” het Shivambu gesê.
Meer as 600 besighede in Mpumalanga soek regsadvies nadat die naamsverandering van Nelspruit volgens hulle foutief en onregverdig plaasgevind het.
Die besighede, wat verteenwoordig word deur die Laeveldse Kamer vir Sake en Toerisme, die LCBT, is van mening dat die konsultasieproses voor die naamsverandering na Mbombela onregverdig plaasgevind het.
“Ons sal regsadvies kry om die naamsverandering teen te staan,” het Linda Grimbeek, die LCBT se woordvoerder, gesê.
Volgens haar het hulle geen vergaderings gemis nie en was daar altyd ‘n verteenwoordiger by elke byeenkoms ten spyte van die feit dat hulle op kort kennisgewing daarvoor uitgenooi is.
“Die LCBT is een Saterdag uitgenooi na ‘n vergadering wat om 09:00 begin het. Teen 15:00 was die naamsverandering nog nie bespreek nie. Daar was ook nie programme beskikbaar wat die tydskedule aangedui het nie,” het Grimbeek gesê.
Sy het ook gesê dat die Laeveld ‘n gewilde toeristebestemming is en dat ‘n naamsverandering soos dié net onsekerheid sal veroorsaak.
“Die tweede punt is dat die naam, Nelspruit, nie politieke aanstoot gee nie,” het Grimbeek gesê.
Die DA in Mpumalanga het ook die naamsverandering bevraagteken. “Die DA ondersteun naamsverandering as dit tot aanstoot lei. Maar daar is niks verkeerd met Nelspruit se naam nie,” het Anthony Benadie, DA-leier in die provinsie, gesê.
“Volgens ‘n verslag het die publiek tot 16 Oktober kans gehad om die verandering teen te staan, maar was die inligting nie vrylik beskikbaar nie en het min persone geweet van die spertydperk,” het hy gesê.
Benadie is ook van mening dat so ‘n naamsverandering onnodige kostes tot gevolg het en groot verandering beteken.
“Meeste van die kostes word deur die belastingbetaler gedra.”
Die leier van Mosambiek se opposisieparty van sowat drie dekades, Afonso Dhlakama, 56, het aangekondig dat hy nie weer vir president sal staan as hy Woensdag onsuksesvol is tydens hierdie jaar se verkiesing nie.
“As ek hierdie keer verloor gaan ek vir seker nie weer staan nie,” het Dhlakama die afgelope naweek aan sy ondersteuners gesê.
President Amando Guebuza, 66, is reeds in sy tweede termyn as president en sal na alle verwagtinge vanjaar weer met die titel wegstap.
“Die land moet aanhou ontwikkel. Ons moet opstaan teen armoede en korrupsie. Om hierdie doel te bereik sal julle vir my moet stem,” het Guebuza tydens die laaste dag van sy verkiesingsveldtog gesê.
Tydens Woensdag se verkiesing sal presies dieselfde kandidate deelneem as in 2004 toe Guebuza met 64% gewen het.
Die klag van dronkbestuur teen Suid-Afrika se ambassadeur in Angola, Muziwakhe Kubheka, 61, is Dinsdag in die landdroshof in Pinetown teruggetrek.
Kubheka is in Maart in die Kloof-area buite Durban in hegtenis geneem nadat hy met sy Mercedes-Benz in ‘n heining vasgery het. Hy is aangekla van dronkbestuur.
Volgens die staatsaanklaer, Neville Loubser, is die klagtes op provinsiale vlak teruggetrek totdat die ondersoek na die voorval voltooi is.
“Die staat sal aansoek doen om die analise van die bloedtoets te sien. Die getuies moet ook nog hulle verklarings aflê,” het Loubser gesê.
Kubheka was voorheen Suid-Afrika se ambassadeur in China, Mongolië en Denemarke voordat hy in Angola gestasioneer is.
Sy vrou Lindiwe en hulle seun, Lindithemba, het in 2003 in ‘n motorongeluk op die N3 naby Durban gesterf terwyl hy in China was.
‘n Amerikaanse diplomaat is só ontnugter deur die VSA se betrokkenheid in Afganistan dat hy uit sy pos bedank het.
Hy is die eerste Amerikaanse amptenaar geword wat bedank in protes teen die agt jaar lange oorlog, het die Washington Post Dinsdag berig.
Die 36-jarige Matthew Hoh was ‘n senior amptenaar in die staatsdepartement van Afganistan se Zaboelprovinsie totdat hy verlede maand bedank het.
Hoh het in ‘n brief op 10 September aan die staatsdepartement se personeelhoof geskryf: “Ek het begrip en vertoue in die strategiese prosedures van Amerika se teenwoordigheid in Afganistan verloor.”
“Ek twyfel oor ons huidige strategie en beplande toekomstige strategie. My bedanking is nie gebaseer op hoe ons die oorlog aanpak nie, maar hoekom en vir watter doel,” het hy geskryf.
Volgens die berig het die bedanking “skokgolwe tot in die Withuis gestuur.” Regeringsamptenare het vergeefs probeer om Hoh te oorreed om te bly.
Die regering is glo bekommerd dat hy ‘n prominente kritikus teen die Amerika se Afganista-beleid gaan word.
