Kategorie: Nuus

‘Grondgryp in Pretoria is wettig’

Die EFF het Woensdag aan Sapa gesê daar is niks onwettig aan die grondgryp by Nellmapius, oos van Pretoria, nie.

“Daar is niks fout daarmee nie. Indien die regering sloer om grond aan mense toe te ken, moet hulle dit beset,” het Floyd Shivambu, EFF-hoofsweep, aan verslaggewers by die parlement gesê.

Die hoofsweep van die Tshwane-metroraad, het intussen gesê dat ‘n wyksraadslid in Nellmapius, Precious Marole, se huis gevandaliseer en geplunder is. Die polisie kon nie onmiddellik die voorval bevestig nie.

Die Tshwane-metropolisie het vroeër Woensdag besetters van Nellmapius met rubberkoeëls verwilder nadat hulle plakkershutte in ʼn oop stuk veld wou oprig.

Die oproeriges het metropolisielede met klippe bestook waarna die metropolisielede met rubberkoeëls op hulle losgebrand het. Die klipgooiers het na die nabygeleë lokasie gevlug toe die metropolisie ‘n Nyala-pantservoertuig teen hulle ontplooi het.

Die Ou Bronkhorstspruit-pad is vroeër met brandende motorbande, klippe en takke versper.

Vusi Msiza, woordvoerder van die EFF se Nellmapius-tak, het vroeër gesê die grondbesetting het Sondag begin. “Ons het mense hier op die stuk grond aangetref waar hulle besig was om plakkershutte te bou. Ons het besluit om hulle te ondersteun, aangesien ons almal hierdeur geraak word.” Hy het gesê mense is moeg daarvoor om vir HOP-huise te wag en dat hulle grond soek waar hulle hul eie huise kan bou.

Julius Malema, leier van die EFF, was nie vir kommentaar beskikbaar nie.

Dumisa Ntuli, woordvoerder van die ANC in Gauteng, het gesê die spesifieke stuk grond is geoormerk vir laekostebehuising.

Mbuyiseni Ndlozi, die EFF se nasionale woordvoerder, het vroeër gesê die party ondersteun grondonteiening maar wou nie spesifiek kommentaar lewer die gebeure in Nellmapius nie.

Swak diens en banier eindig in die hof

Die selfoondiensverskaffer Cell C, wat ‘n kliënt met ‘n swak kredietrekort opgesaal het, het die hof genader daaroor.

‘n Banier wat na Cell C verwys as die mees nuttelose diensverskaffer in Suid-Afrika is glo “lasterlik en daarom onregmatig”, het die hooggeregshof in Johannesburg Woensdag gehoor.

Christopher Whittcuut, Cell C se regsverteenwoordiger, het dié redes aangevoer dat hul voormalige kliënt, George Prokas nie die banier wat Vrydag by die WorldWear-winkelsentrum op die hoek van Beyers Nauderylaan en Wilsonstraat in Fairland opgerig is, mag vertoon nie.

Die banier het gelui: “Die mees nuttelose diensverskaffer in SA – Cell C Sandton City. Cell C se Riaan van Rooyen, ‘franchisebestuurder’ 084-XXX-XXXX sê sy naamlose ‘uitvoerende hoof’ weier om die kliënt by te staan!!”.

Die hof het gehoor dat daar in 2013 ‘n dispuut tussen Prokas en Cell C ontstaan het nadat hy ʼn selfoonkontrak vir sy seun uitgeneem het. Die foon se toegekende nommer het egter aan ʼn ander persoon behoort en is deur die persoon gebruik. Dié persoon het ʼn rekening van nagenoeg R5 000 gehad. Prokas het die debietorder vir die foon in Oktober verlede jaar gekanselleer.

Prokas het vroeg in 2014 ‘n motor probeer koop waarna hy verneem dat hy as ʼn slegte skuldenaar gelys is weens die R5 000 wat nie betaal is nie. Hy het Cell C genader om die situasie te probeer oplos maar teen einde Oktober was daar nog geen vordering nie.

Prokas het e-posse aan Cell C gestuur waarin hy aangedui het dat hy die banier gaan oprig indien sy klagtes nie hanteer word nie. Prokas het R61 200 betaal om die banier te laat maak en op te rig.

Die banier is oor die naweek geskend en lui nou: “Die mees bruikbare diensverskaffer in SA soos ervaar via Cell C Sandton City. Ons is lief vir Cell C.”

Whittcutt het gesê hoewel die banier se bewoording verander is, dit steeds daar hang. “Hy wil dit weer opsit soos wat dit oorspronklik was, sonder mnr Van Rooyen [die franchisebestuurder] se besonderhede. Indien die interdik nie toegestaan word nie, is dit presies wat hy gaan doen.”

Uitspraak word na verwagting Donderdag gelewer.

Media24 adverteer afwykings as nuuswaardig

Parafilie (van die Griekse para παρά = naaste en -philia φιλία = vriendskap) is die versamelnaam van ‘n groep seksuele handelinge wat afwykend van heersende norme is.

Beeld het dit Donderdag as ‘n soort advertensie in ‘n hoofberig gebruik, wat die vermoede verder versterk dat die koerant besig is met ‘n donker projek.

Parafilie kan van onskadelike tot erg skadelike gedrag wissel wat sulke persone se omgewing betref.

As dié seksuele gedrag lei tot probleme tussen ‘n persoon en sy omgewing, kan daar sprake wees van ‘n ernstige geestesongesteldheid. Om dus sulke afwykings as ‘n “ope belydenis” op ‘n koerantvoorblad aan te bied, laat vrae oor die redaksionele gesondheid van Media24 ontstaan.

Yvonne van den Bergh, wat bekendheid verwerf het vir haar rolle in die Die vierde kabinet, 7de Laan en Orion, asook in die kykNET-program Vallei van sluiers, het op Facebook ʼn bekentenis gemaak oor dié afwyking.

Die aktrise het haar “haar tweede beroep en groot liefde” naamlik BDSM, oftewel Bondage and Discipline, Dominance and Submission, Sadism and Masochism op Facebook bely.

“Hierdie wat ek julle nou gaan vertel, het eintlik niks met enigiemand te doen nie, maar Rapport dink ongelukkig nie so nie en wil dit Sondag publiseer. ‘n Online stalker, ‘n cyber-boelie, het BDSM-foto’s van my vir hulle gestuur. Ek weet ‘n koerant sal dit net probeer sensasionaliseer, so ek vertel dan eerder vir almal wat my tweede beroep en groot liefde is, al het dit niks met enigiemand te doen nie.”

Dié belydenisse is kennelik gemaak onder aanmoediging en dreigemente van sekere partye.

Feit is dat dit die meeste lesers met ‘n gevoel van ongemak laat in ‘n koerant wat hom as ‘n ernstige nuusblad aanbied, wat die besluit om dit as nuuswaardig te beskou onder verdenking plaas.

 

Afrikaans is Groot in volle vaart!

Afrikaans is Groot (AIG), die Afrikaanse musiekkonsertreeks wat Vrydag in Pretoria begin, sal nie deur die ANC-jeugliga ontwrig word nie.

Die uitvoerende burgemeester van Tshwane, Kgosientso Ramokgopa, het intussen ‘n uitnodiging aanvaar om van die konserte by te woon.

Die organiseerders het veiligheidsmaatreëls in plek gestel om te verseker dat kaartjiehouers nie verontrief sal word deur die ANC-jeugliga nie.

Barnard Beukman, organiseerder van AIG, navrae is ontvang oor of dit veilig sal wees om die konserte by te woon na berigte dat die ANC-jeugliga buite wil betoog.

Dié dreigemente vorm deel van georkestreerde pogings om die konsert in die wiele te ry, ook met persoonlike aanvalle teen een van die groot vermaaklikheidsterre by AIG, Steve Hofmeyr.

‘n Tussentydse bevel teen Hofmeyr se teisteraars is intussen toegestaan in die Randburgse landdroshof.

Dit blyk nou dat die Jeugliga nie enige aansoek ingedien het om ‘n betoging te hou nie. Só ‘n aansoek moet by die owerhede ingedien word alvorens daar sprake is van ‘n protesbyeenkoms.

Die ANC-jeugliga se tak wat ‘n verklaring uitgereik rakende protes, het glo aan AIG bevestig dat daar geen finale besluit oor enige protesaksie geneem is nie en dat dit tans net “oorweeg” word.

Minstens sewe dae se voorafkennisgewing is onontbeerlik en indien dit afgewys word, word die betoging onwettig beskou deur die polisie.

Geen melding van só ‘n georganiseerde betoging is egter gemaak in ‘n verklaring wat uitgereik is deur die Jeugliga nie.

 

Verkragting die nuwe polisiesport

Volgens die Onafhanklike Polisie Ondersoekdirektoraat (OPOD) het die aantal klagtes van verkragtings wat deur polisielede gepleeg is in ses maande (April – September 2014 teenoor dieselfde tydperk in 2013) met 25% toegeneem en verkragtings van persone in aanhouding het met 160% toegeneem.

Die OPOD het hierdie statistiek bekend gemaak in ’n voorlegging aan die portefeuljekomitee oor polisie in die parlement.

Die aantal verkragtings deur polisielede wat op diens is, met 56% toegeneem het. In die geval van mense in polisieaanhouding wat verkrag is deur polisielede wat op diens is, was die toename ‘n yslike 350%!

Dit beteken dat hierdie verkragters glo hulle is verhewe bo die reg bloot omdat hulle polisielede is en die gesag wat aan hulle toegeken is op grond van hulle amp, misbruik.

In dieselfde ses maande tydperk is 127 klagtes ontvang vir sterftes in polisieaanhouding en 186 klagtes vir sterftes as gevolg van polisieoptrede, ’n totaal van 313 sterftes.

Voorts is van die 475 aanbevelings deur die OPOD om optrede teen polisielede te inisieer, slegs 33 sake afgehandel. Dit beteken dat die polisie slegs 6,9% sake afgehandel het.

Kennelik is die SAPD en die minister van polisie, Nkosinathi Nhleko, besonder traag om op te tree teen hul eie lede.

Die OPOD is die instelling waardeur die algemene publiek kan klagtes lê teen ongemagtigde optredes van polisielede, maar indien slegs 6,9% sake afgehandel is, beteken dit dat die publiek se klagtes in wese geïgnoreer word.

Dat OPOD nie optree om die publiek te beskerm nie, is een van vele redes waarom die SAPD kwalik nog vertroue inboesem.

Indien  nie ingryp en polisielede wat hulle skuldig maak aan wandade ontslaan uit die diens nie, kan dit die SAPD se rol as beskermer heeltemal tot niet maak.

Ebola eis nog ‘n slagoffer in Mali

Ebola het nog ‘n slagoffer in Mali geëis.

‘n Gesondheidswerker wat ‘n ebola-pasënt van Guinee behandel het, het die tweede persoon geword om in die land aan die virus te sterf.

Die kliniek in Bamako waar die gesondheidswerker gewerk het, is intussen deur die polisie afgekordon.

Die gesondheidswerker het ‘n man wat van Guinee gekom het by die Pasteur Clinic behandel.

Bykans 5000 mense is reeds in die Wes-Afrikalande, Guinee, Siera Leone en Liberië aan die siekte dood.

Die jongste geval hou nie verband met die eerste nie toe ‘n twee-jarige meisie dood is aan die siekte aan die einde van Oktober.

Dinsdag is dit voorts bevestig dat Marokko nie meer die gasheer vir die 2015 Afrika-beker van Nasies sal wees nie, as gevolg van sy vrese oor ebola.

Sierra Leone bied intussen $5000 in vergoeding aan die families van gesondheidswerkers wat gesterf het as gevolg van die behandeling van pasiënte met ebola.

Elders het plaaslike leiers van ‘n dorp in Guinee ‘n eetstaking gehou in protes teen die weermag se teenwoordigheid daar sedert September.

Die laaste bekende persoon in die VSA met ebola, spandokter, Craig Spencer, het herstel en is uit die hospitaal ontslaan.

Intussen versprei die virus steeds in Sierra Leone, met byna 300 nuwe infeksies net in die laaste drie dae.

Oorskot van kerkrampslagoffers uit Nigerië verwag

Die oorskot van 85 persone van Suid-Afrika wat in Nigerië gesterf het toe ‘n gebou by TB Joshua se Synagogue Church of All Nations ineengestort het, sal na verwagting hierdie naweek huis toe gebring word.

Die minister in die Presidensie, Jeff Readebe sê lede van die weermag, polisie en die department van gesondheid is in Nigierië om bystand te verleen.

Radebe is in Nigerië om die proses te probeer bespoedig, twee maande nadat die ramp plaasgevind het weens ontevredenheid wat opgelaai het onder oorlewendes en naasbestaandes oor die gesloer.

Hy sê die liggame van die 81 Suid-Afrikaners kan reeds teen Vrydag of Saterdag in Suid-Afrika wees.

Radebe sê president Goodluck Jonathan van Nigerië het hom daartoe verbind om te verseker dat al die liggame so gou as moontlik teruggebring word.

“As alles goed verloop, sal dit hierdie naweek gebeur,” het Jeff Radebe, minister in die presidensie, Dinsdagaand tydens ʼn perskonferensie in Lagos gesê.

Die gastehuis het op 12 September ineengestort. Altesaam 116 mense is oorlede, waarvan 81 Suid-Afrikaners, asook drie Zimbabwiërs en een persoon van die DRK wat Suid-Afrikaanse paspoorte gebruik het.

Geld begin praat in Cosatu

Cosatu sal meer as R1 miljoen per maand aan ledegeld moet inboet nadat die sentrale uitvoerende komitee besluit het om Numsa te skors.

Numsa se geraamde bydrae is R1 022 000 per maand uit ‘n affiliasiefooi van R2.92 wat elk van sy nagenoeg 350 000 lede maandeliks betaal. Dit beteken Cosatu kan meer as R12 miljoen jaarliks verloor sonder Numsa.

Cosatu se uitvoerende komitee het Numsa Saterdagoggend met 33 stemme teenoor 24 geskors.

“Numsa het ook R38 000 vir die verteenwoordigerstydskrif betaal,” het Mphumzi Maqungo, tesourier van die National Union of Metalworkers of SA, gesê.

Patric Craven, woordvoerder vir die vakbondfederasie het gesê finansies is een van knelpunte.

Zwelinzima Vavi, het intussen gesê hy kan nie die besluit  verdedig om Numsa te skors nie. Vavi, die vakbond se uitvoerende hoof, is verlede jaar geskors.

Vavi het sy afwesigheid per brief uiteengesit oor waarom hy nie by die naweek se historiese nuuskonferensie opgedaag het nie. Sy weergawe verskil van die amptelike verduideliking.

Vavi het in ‘n brief wat deur die SABC bekom is, gesê die toekoms van die federasie is op die spel. Hy het gesê die federasie stuur op ‘n totale ramp af.

Die skorsing van Numsa en die besluit deur nog sewe filiale om hulle deelname aan Cosatu op te skort, maak Vavi kwesbaar vir optrede deur die komitee.

Volgens ingeligte bronne was NUM vermoedelik Cosatu se grootste finansiële bydraer vóór Marikana.

NUM-lede het egter na die Marikana-slagting in hul honderde by die mededinger-unie Association of Mineworkers and Construction Union (Amcu) aangesluit, en dié vakbond is nou die meerderheidvakbond by Lonmin.

Sewe ander Cosatu-filiale, die Food and Allied Workers Union, die Democratic Nurses Organisation of SA (Denosa), die SA Commercial Clothing and Allied Workers Union (Saccawu), die Communication Workers Union (CWU), die SA State and Allied Workers Union, die Public and Allied Workers Union of SA en die SA Football Players Union ondersteun almal Numsa en het onderneem om die skorsing teen te staan.

Slegs Denosa, CWU en Saccawu dra maandeliks noemenswaardige by tot Cosatu. “Maar indien dié maandelikse bydraes bymekaar getel word, is dit moontlik minstens R3 miljoen per maand, ” het ‘n arbeidskenner gesê.

DA kla oor EFF se swaar straf

Die Parlement se Komitee oor Bevoegdhede en Voorregte het die verslag aanvaar wat strafmaatreëls aanbeveel teen 20 EFF-parlementslede.

Die DA maak egter beswaar teen die verslag én die strafmaatreëls.

DA-lid van die komitee, Annelie Lotriet, sê die rede waarom die DA die aanvaarding van die verslag en die strafmaatreëls teenstaan, is omdat daar soveel gebreke in die hele proses was.

Sy meen die strawwe teen die EFF is te swaar.

Die LP’s van die EFF is skuldig bevind aan minagting van die parlement nadat hulle president Jacob Zuma se mondelinge antwoordsessie in die Parlement meer as twee maande gelede ontwrig het.

Sy sê geregtigheid ontbreek en die DA is van mening dat dit baie onregverdig is om so ‘n swaar straf op te lê waar die hele komitee en die prosedures problematies was.

Die komitee het die verslag oorweeg met al die bevindinge en aanbevelings wat by die Nasionale Vergadering ingedien moet word.

Die komitee het strafmaatreëls aanbeveel insluitende skorsing vir 30 dae sonder salaris.

Die voorsitter van die komitee, Lemias Mashile, sê hulle het sekere wysigings aan die verslag aangebring wat nou by die parlement ingedien sal word.

 

Sankariste bedreig VSA-greep op Burkina Faso

Na ‘n gewilde opstand in Burkina Faso teen die jarelange diktator Blaise Compaore wat 27 jaar aan bewind gebly het ondersteun deur die Verenigde State en Frankryk, moes president Barack Obama vinnig beweeg om die VSA se teenstanders in dié land skaakmat te stel.

Die Withuis moet verseker dat lojaliste van Compaore se vermoorde voorganger, Thomas Sankara, nie ‘n greep op die mag verkry nie.

Die Amerikaanse Afrikabeheersentrum (Africom), met hul hoofkwartier in Stuttgart, Duitsland het vinnig het oorgegaan tot aksie om te verseker dat Burkina Faso ‘n militêre junta aanstel met luitenant-kolonel Isaac Zida as die “tussentydse” president.

Politieke partye en leiers van die burgerlike gemeenskap in Burkina Faso het intussen besluit dat die land in aanloop tot ‘n verkiesing aanstaande jaar deur ‘n burgerlike president gelei moet word, maar dat die regering ook lede van die weermag moet insluit.

Ingevolge ‘n konsep-handves oor die oorgangsperiode mag die tussentydse president en lede van die oorgangsregering nie aan die verkiesing deelneem wat vir November aanstaande jaar beplan word nie.

Die weermag, wat beheer van die land oorgeneem het ná die ontsetting van president Blaise Compaore sal sy eie handves voorlê in ‘n poging om konsensus te bereik.

Die adjunkbevelvoerder van die presidentswag, Isaac Zida het beheer van die land oorgeneem, maar belowe die weermag sal nie aan die mag vasklou nie. Maar sy vrome beloftes beteken dalk nie veel nie.

Obama, die CIA-direkteur John O. Brennan, en Africom is steeds bekommerd dat die grootste opposisie party, die Mouvement Sankariste (MS) nie ‘n nuwe regering moet vorm nie.

Die MS-leier, Bénéwendé Stanislas Sankara, ‘n familielid van die vermoorde Thomas Sankara en prokureur vir die Sankara-familie, staan ‘n baie goeie kans om Burkina Faso se nuwe president te word.

Maar Zida, ‘n gegradueerde van die VSA Gesamentlike Spesiale Operasies Universiteit by MacDill Air Force Base in Tampa, Florida, wat Africom se militêre intelligensiekursus in Botswana bygewoon het, is haastig deur die Obama-administrasie met dreigemente van geweld in Compaore se plek ingeskuif.

Die Ivoorkus-president, Alassane Ouatarra het die afgesette Compaore intussen met ope arms verwelkom. Ouatarra se moeder is in Burkina Faso gebore is, en word beskou as ‘n virtuele marionet van die Wêreldbank, die Pentagon, en Israel.

Burkina Faso, onder Compaore, het toegelaat dat ‘n Amerikaanse onbemandetuigbasis in die land gevestig word, ‘n geheime operasie met die kodenaam Creek Sand, en ‘n geklassifiseerde plaaslike intelligensiesentrum verbonde aan die Amerikaanse ambassade, met die kodenaam Aztec Archer.

Die gewilde Sankara was vyandig teenoor die IMF asook die Wêreldbank. Dit het hom duur te staan gekom. In Oktober 1987, het Sankara by ‘n nuuskonferensie gesê: “Ons moet met een stem praat, en sê hierdie skuld kan nie betaal word nie. En omdat ek die eensame stem is, sal ek vermoor word. Ons moet saam sê, ons kan nie betaal nie, want ons moet werk om ‘n toekoms vir ons mense te bou. Indien slegs Burkina Faso weier om te betaal, sal ek nie hier wees by die volgende konferensie nie.”

Twee weke na dié opmerkings, op 15 Oktober 1987, het Sankara se tweede-in-bevel, Compaore, by ‘n vertrek ingeloop waar Sankara gesit het en twee skote in Sankara se bors geskiet.

Compaore het sy staatsgreep met die CIA by die Amerikaanse ambassade in Ouagadougou en die Franse Algemene Direktoraat vir Eksterne Veiligheid (DGSE) in die Franse ambassade gekoördineer.