Die onluste in Alexandra na wedersydse moorde tussen plaaslike inwoners en buitelanders het gisternag voortgeduur met inwoners wat die polisie met klippe bestook het.
Die polisie het in ruil rubberkoeëls afgevuur.
Die woordvoerder van die Gautengse polisie, Lungelo Dlamini, kon nie die voorval bevestig nie.
Ek is nie oor so 'n voorval ingelig nie, ek sal u kontak sodra iemand van Alexandra my gebel het om my oor die jongste verwikkelinge in te lig, het hy gesê.
Die geweld in die lokasie noord van Johannesburg het begin toe plaaslike inwoners buitelanders aangeval het omdat hulle daarvan verdink word dat hulle vir die misdaadgolf in Alexandra verantwoordelik is.
Die moeder van die vermoorde Danielle Esterhuizen het gister in die Randfonteinse streekhof getuig en vertel hoe haar 5-jarige dogtertjie op haar skoot doodgeskiet is. Danielle en haar pa, Diederick, was op 20 Desember 2006 langs 'n dam besig om vis te vang toe beskuldigdes David Nqomane, Tsakane Sithole en Thabang Jane goedsmoeds op die kind losgebrand het.
Die moord het die aandag van die media getrek toe openbare figure soos Steve Hofmeyr, Joost van der Westhuizen en Dan Roodt saam buite die Randfonteinse hof betoog het tydens die borgaansoek van die moordenaars.
Die vader van Danielle het gesê dat hy nooit weer aan 'n visstok sal vat nie omdat hy homself blameer dat sy dogtertjie dié dag net vir 'n halfuur lank by die dam kom kuier het.
President Robert Mugabe se regering het die aanslag op sy politieke opponente verskerp, terwyl opposisieleier, Morgan Tsvangirai,
voorberei vir sy terugkeer na Zimbabwe om aan die uitklopverkiesing deel te neem.
Verskeie joernaliste, vakbondleiers en honderde aktiviste is al in hegtenis geneem sedert die verkiesing in Maart wat die regerende party verloor het. Gister is die eerste gesagsfiguur wat deel is van die Beweging vir Demokratiese Verandering (MDC) egter gearresteer.
Heya Shoko, ‘n parlementslid vir die MDC in Masvingo-provinsie – wat voorheen regeer is deur Zanu-PF – is gister in hegtenis geneem na beweerde geweld in sy kiesafdeling.
Ernest Mudavanhu, ‘n kollega van Shoko, was saam met hom toe drie “inspekteurs” hom gearresteer het.
Dié nuus volg nadat die president en die sekretaris-generaal van die vakverbond van Zimbabwe (ZCTU) se aansoek om borgtog geweier is na hul eerste hofverskyning. Hulle is in aanhouding op gronde van beweerde opstokery.
Die MDC se leier, Morgan Tsvangirai, en voormalige president van die ZCTU sal dié week terugkeer na ongeveer ‘n maand in die buiteland. Hy het die verkiesing gewen, net kort van ‘n volstrekte meerderheid.
Tsvangirai het egter voorwaardes vir die beplande uitkloprondte gestel: hy sal slegs deelneem indien die geweld in die land heeltemal gestaak word, die verkiesingskommissie hersien word en laastens as daar buitelandse waarnemers in die land ontplooi word.
Die regering sê op hulle beurt dat Westerse waarnemers nie nodig is nie en dat Tsvangirai nie rede het om vir sy lewe te vrees nie.
“Indien Tsvangirai wel in gevaar is, het ons polisielede wat hom wel kan beskerm,” sê die adjunk-minister van Inligting, mnr. Bright Matonga.
“Ons het geen idee gehad dat hy die land verlaat het omdat hy klaarblyklik vrees vir sy lewe nie. Ons het bloot gedink hy is met vakansie terwyl hy terselfdertyd probeer om steun op te bou in sy poging om Zimbabwe te demoniseer.”
Tsvangirai wat bedreig word deur ‘n klag van hoogverraad is verlede jaar erg aangerand tydens polisie-aanhouding.
Mugabe se minister van Justisie, mnr. Patrick Chinamasa, sê die regering sal nie buitelandse waarnemers toelaat nie, veral nie dié wat sanksies teen hulle handhaaf nie. “Hulle sal weer ons guns wen as hulle die sanksies teen ons lig, andersins is daar geen rede vir ons om ‘n verhouding met hulle te bou nie.”
Geen Westerse waarnemers is in die eerste rondte van die verkiesing toegelaat nie en die Suider-Afrikaanse Ontwikkelingsgemeenskap (SAOG) is erg gekritiseer omdat hulle die verkiesing as vry en regverdig bestempel het.
Die uitslae van die eerste verkiesing is vir vyf weke nie bekendgemaak nie en ‘n datum vir die uitkloprondte is nog nie bekend nie, hoewel die wet sê dit moet binne 21 dae van die vorige verkiesing plaasvind.
Mugabe regeer al vanaf 1980 met Zimbabwe se onafhanklikheidswording en het die laaste verkiesing met 43,2% verloor teen Tsvangirai se 47,9%.
Die Verenigde Nasies en die Europese Unie handhaaf sanksies teen Zimbabwe, nadat Mugabe na bewering die 2002-verkiesing gekook het.
'n Totaal van 39 mense is gister in die Johannesburgse lokasie in hegtenis geneem.
Kriminele het intussen die situasie uitgebuit en plundery kom voor.
Die polisie-eenheid vir Openbare Orde is ontplooi om die toestand te monitor en kalmte te herstel.
Ses mense is in hegtenis geneem by Sun City gister nadat hulle probeer het om die ANC se provinsiale konferensie by te woon. 'n Groep mense het deur 'n versperring van ANC-toesighouers by die ingang gebreek en die polisie met klippe bestook.
Die mense wat nie kon inkom nie, glo dat die konferensie nie verteenwoordigend is nie. Sondagaand het die polisie 40 mense hardhandig uit die luukse oord verwyder nadat hulle aan die konferensie wou deelneem.
gemaak in die VSA. Maar dit is op die punt om te verander in Milwaukee. Milwaukee is die grootste stad in die deelstaat Wisconsin.
'n Lid van die Skoolraad en onderwysspesialis sê dat hulle besig was om skole in die mees stabiele swart woonbuurte in die stad te sluit as gevolg van die busse en dat iets met die prentjie geskort het.
Kennelik is skooldesegregasie in Milwaukee iets wat tot die verlede behoort soos die bekende 1945 hofuitspraak van Brown v. Board of Education, om nie van ware integrasie te praat nie.
Sloering met oordragte en gebrekkige ondersteuning van opkomende boere het voedselproduksie drasties verminder en het bygedra tot hemelhoë kospryse.
In Limpopo se Levubu-vallei, bekend as die vrugtemandjie van landbou, waar al die plase grondeise in die gesig staar, het produksie dramaties afgeneem die afgelope drie jaar vanaf 300 ton tot 60 ton.
Dr. Frederik van Zyl Slabbert, die liberale politikus en meningsvormer, is tot die nuwe kanselier van Stellenbosch-universiteit verkies.
Die ander kandidaat vir die pos was mnr. Ton Vosloo, die voorsitter van Naspers.
Die voorsitter van die kieskollege en huidige rektor van die US, prof. Russel Botman, het laat blyk dat daar geen debat gevoer is oor die ras van die kandidate nie. Daar was net een beswaar dat albei blanke mans was.
Die vorige kanselier van Stellenbosch was 'n vrou, prof. Elize Botha, wat op 16 November verlede jaar oorlede is.
Helen Zille, leier van die DA, het gister geëis dat Thabo Mbeki bedank as gevolg van sy inmenging met staatsinstellings soos die SAUK en die nasionale vervolgingsgesag. Sy hou hom ook verantwoordelik vir die huidige elektrisiteitskrisis.
Verder is Zille insgelyks gekant teen 'n toekomstige president Jacob Zuma. Volgens haar het Zuma en sy vennote reeds hul minagting vir die grondwet getoon.
Die DA eis dat die nasionale vergadering ontbind en dat daar 'n nuwe verkiesing gehou word.
'n Skare in Alexandra, 'n lokasie in die noorde van Johannesburg, het gister 'n groep immigrante aangeval, twee doodgemaak en omtrent 40 beseer, volgens die polisie.
Hierdie voorval volg op ander soortgelyke aanvalle wat 'n maand gelede op buitelanders in lokasies in die Pretoria-omgewing plaasgevind het.
Konstabel Neria Malefetse, 'n woordvoerder van die polisie, sê dat die aanval plaasgevind het weens die misdaadbedrywighede in die lokasie wat aan buitelanders toegeskryf word.
Sekere van die slagoffers was Zimbabwiërs, wat tot die grootste enkele groep immigrante in die land behoort.
