Bykans 10 000 mense is deur die aardbewing gedood wat suidwestelike Sjina getref het. Reddingswerkers sukkel tans om by die gebiede te kom wat die ergste getref is en veel meer mense mag gesterf het.
Deur die nag het reddingswerkers naarstig gewerk om lyke uit skole, huise, fabrieke en hospitale te haal wat deur die aardbewing vernietig is. Die skudding het 7,8 op die Richterskaal aangeteken en het gistermiddag vanaf die bergagtige Sietsjoean-provinsie oor die grootste deel van Sjina getrek.
Die eerste minister, Wen Jiabao, het drie keer as roubetuiging gebuig voor 50 liggame van tieners wat in 'n skoolgebou vergruis is. Altesame 900 jongmense is by die skool onder die puin begrawe.
Die minister het aangedui dat sy egter nog geen terugvoering van Mpofu ontvang het om haar siening meer gebalanseerd te maak nie.
Sy het die publiek gemaan om kalm te bly en om spekulasie te vermy sodat verdere skade aan die beeld van die openbare uitsaaier wat aan almal behoort, kan beëindig word.
Mnr. Kebby Maphotsoe, die MKVV se nasionale voorsitter, het Saterdag by dié assosiasie se konferensie in Gauteng gesê die Skerpioene is die tande van ‘n teen-rewolusionêre beweging in Suid-Afrika en dat hulle vol gif is.
Hy verduidelik dat misdadigers soos Mark Thatcher en Adriaan Vlok vrygespreek is, maar ANC-leiers voel die “brandende haatsteek van die Skerpioene”.
Maphotsoe voer verder aan dat Zuma se ondersoek gelei word deur die Skerpioene, maar dat dit verder aangedryf word deur die media en die opposisie, spesifiek die Demokratiese Alliansie (DA).
“Die ondersoek duur te lank. Mens kan nie iemand vir nege jaar lank ondersoek nie. Eers vir die wapentransaksie van R500 000 en dan vir ‘n karwas van R10. Geregtigheid wat uitgestel word, is geregtigheid wat ontken word,” sê Maphotsoe.
Hy sê ook dat politieke inmenging in dié saak broodnodig is, juis omdat dit ‘n polities gedrewe hofsaak is.
“Hoekom kan Tony Blair in die Verenigde Koninkryk ‘n ondersoek na ‘n wapentransaksie kanselleer om die land se belange te beskerm en ons kan nie dieselfde doen nie? Is die motivering agter die hele ondersoek nie miskien om die ANC te vernietig nie?”
Maphotsoe kritiseer ook sekere ANC-lede daarvan dat hulle hulself nou skaar in die Zuma-kamp, net om vir hulle setels te verseker wanneer die verkiesing kom. Hy doen ‘n beroep daarop dat dié mense, wat voor die Polokwane-konferensie in die Mbeki-kamp was, ontbloot moet word.
Nóg ‘n spreker by die MKVA-konferensie die naweek was die ANC-voorsitter in Gauteng en ook die party se provinsiale minister van finansies, mnr. Paul Mashatile. Hy het op sy beurt gemaan daarteen dat ANC-lede hulself beskou as die bewaarders van besluite wat geneem is tydens die ANC-konferensie. “Ons as party het almal saam besluite geneem en ons almal is die verdedigers daarvan,” sê Mashatile.
Suid-Afrika staar nóg ‘n krisis in die gesig, dié keer in die graanbedryf. ‘n Moontlike voedseltekort dreig met die stygende voedselpryse en die afname in plaaslike graanproduksie.
Die probleem is te wyte aan verskeie faktore, maar hoofsaaklik as gevolg van die regering se besluit om die buiteland ook op die plaaslike mark te laat meeding. Ander bydraende faktore wat dit byna onbekostigbaar maak vir graanboere is vervoer en die verval van infrastruktuur in Suid-Afrika, soos byvoorbeeld spoorwegvervoer wat, hoewel goedkoper, onprakties geword het.
Volgens die Suid-Afrikaanse Graaninligtingsdiens het graanproduksie vanaf 2,5 miljoen ton in 1997, tot 1,8 miljoen verlede jaar gedaal.
Mnr. Nico Hawkins, bestuurder van Graan Suid-Afrika (GSA) se nywerheidsdienste, sê die regering het in die 1990’s begin wegbeweeg van ‘n selfonderhoudende beleid sover dit voedselproduksie betref. Die nuwe voedselbeleid bring kortom mee dat: “solank as wat voedsel goedkoper op die internasionale mark is as die produksiekoste in Suid-Afrika, gaan dit nie lonend wees om dit self te verbou nie”.
GSA doen nou ‘n beroep op die regering om invoertariewe te verhoog. Hawkins verduidelik dat die vryemarkstelselbeleid dit moontlik maak vir die regering om tariewe te gebruik om boere te beskerm ten tye van lae winsgewendheid.
“Ons (die GSA) het die regering al in 2006 gevra om invoertariewe te verhoog, maar hulle het geweier. Dit het tot gevolg gehad dat die plaaslike mark nie beskerm was nie en sommige boere is ontmoedig om verder te boer,” sê Hawkins.
Mnr. Hans van der Merwe, die besturende direkteur van AgriSA, meen weer dat verhoogde invoertariewe nie die antwoord is nie. Ontwikkelende lande kan eenvoudig net nie meeding met die subsidies wat die staat aan reeds onwikkelde lande se boere betaal nie. Deur te probeer om daardie subsidiebedrae te ewenaar, gaan dit in elk geval voedselpryse die hoogte in laat skiet.
Van der Merwe sê: “Dit gaan heeltemal onbekostigbaar word vir arm mense om kos te koop, as die invoertariewe verhoog word. Die belangrikste is egter dat alhoewel subisidies steeds aangewend word in ryker nasies om hul landbousektor te ondersteun, is dit teen die gees en reëls van die Wêreldhandelsorganisasie”.
Volgens mnr. Jannie de Villiers, besturende direkteur van die Meulenaarsvereniging, dra die steeds verslegtende toestand van Suid-Afrika se infrastruktuur ook by tot die groeiende graankrisis. “In 1985 is 85% van Suid-Afrika se graan per spoor vervoer. Vandag is dit net 50% daarvan, ten spyte van die feit dat padvervoer 30% duurder is,” sê De Villiers.
Nóg ‘n bydraende faktor tot die krisis is as gevolg van ‘n tekort aan navorsing op dié gebied. Ferdi Meyer, ‘n senior lektor aan die Universiteit van Pretoria in landbou-ekonomie sê: “Navorsing en ontwikkeling het so te sê heeltemal ineengestort as gevolg van beperkte fondse en swak bestuur die laaste paar jaar. Baie min navorsing word nog gedoen met minimale finansiële ondersteuning van privaat instellings.”
Die ANC mag eerskomende Vrydag by 'n vergadering oor energie vra dat die bonusse van Eskom se bestuur ondersoek word. Aanduidings is dat Eskom se bestuur altesaam R10 miljoen se bonusse aan hulself betaal het terwyl kragonderbrekings landwyd plaasgevind het.
Aan die ander kant verdedig Alec Erwin, die minister van handel en nywerheid, die bonusse deur te sê dat dit betaal is vir verlede jaar se prestasie.
Eskom wil ook tariefverhogings van 53% instel wat 'n beduidende uitwerking op die land se inflasiekoers gaan hê.
Die ANC se kommissie van ondersoek na Eskom het ook bevind dat die maatskappy bestuurders beloon het wat geld bespaar het deur nie meer onderhoudsuitgawes op kragsentrales aan te gaan nie en ook deur van blanke bestuurders en ingenieurs ontslae te raak.
Ten spyte van ’n daling in koerantverkope, die beskikbaarheid van gratis nuusblaaie en die toenemende gewildheid van nuuswebwerwe op die internet, bly koerantredakteurs wêreldwyd steeds optimisties. Die Wêreldredakteursforum, gesteun deur Reuters, het pas die sogenaamde Newsroom Barometer gepubliseer.
Uit hierdie ondersoek blyk dit dat koerantredakteurs glo dat die internet binne tien jaar die mees prominente bron van nuus gaan wees. 85% van redakteurs is egter optimisties oor hulle koerante se toekoms. Hulle meen toenemend dat sowel gedrukte media as aanlynnuus in die toekoms gratis beskikbaar gestel gaan word.
Oor die 700 senior koerantwerkers het aan die opname deelgeneem. Agt uit tien respondente sien aanlyn- en nuwe media as ’n welcome toevoeging. Diegene met hoë volume webverkeer – meer as 200 000 unieke besoekers per dag – is meer geneig om nuwe media in ’n positiewe lig te sien, maar die meerderheid redakteurs by koerante met beskeie verkeer of geen webwerwe he took nuwe media as positief beskou.
Volgens George Brock, voorsitter van die Wêreldredakteursforum en Saterdagredakteur van die Times, is negatiewe uitsprake oor die toekoms van koerante toe te skryf aan kommersiële menings. Koerantredakteurs voel nie noodwendig dieselfde nie. Hy erken egter dat Amerikaanse redakteurs meer pessimisties is as hulle eweknieë elders. Daar is ook vrese dat koerante nie genoeg daarin belê om joernaliste te werf en op te lei nie.
Wiskunde en wetenskap is te moeilik en veeleisend, meen Suid-Afrikaanse skoolleerlinge. Meer as 60% van die 7 000 leerlinge wat aan 'n opname deur Mark Shuttleworth se stigting deelgeneem het, meen dit is waarom Suid-Afrika se wiskunde- en wetenskappunte so laag is vergeleke met ander lande.
Terwyl Suid-Afrika se swak prestasie op dié gebied gewoonlik aan swak opgeleide onderwysers toegeskryf word, weet leerlinge van beter want slegs 13% dink dat slegte onderwysers vir die swak akademiese prestasie en klein aantal leerlinge wat wiskunde en wetenskap as vakke neem, verantwoordelik is.
Barack Obama mag dalk vir Hillary Clinton as sy vise-presidentskandidaat oorweeg. Obama het tydens 'n onderhoud op NBC-nuus gesê dat sy sonder twyfel as visepresidentskandidaat geskik is.
Op CNN het hy haar beskryf as 'n bittereinder, slim en bekwaam en het bygevoeg dat sy op enigeen se kortlys sal wees as potensiële visepresidentskandidaat.
Clinton se kanse is besig om te taan, maar na verwagting gaan sy aanhou omdat wentellings vir haar in Wes-Virginië, Kentucky en Puerto Rico vir haar politieke gunste van Obama kan verkry, waaronder die posisie van visepresident van die VSA. Obama se kamp lyk nie so gretig om gou van Clinton ontslae te raak nie.
President Thabo Mbeki van Suid-Afrika sal vandag in Zimbabwe aankom vir samesprekings met die land se leiers, berig die departement van buitelandse sake. Woordvoerder Ronnie Mamoepa sê dat Mbeki met die land se politieke leierskap sal vergader binne die konteks van die Suider-Afrikaanse Ontwikkelingsgemeenskap se fasiliteringsproses.
Onlangs het Suid-Afrika, Sjina en Rusland sterker optrede deur Westerse lede van die VN se Veiligheidsraad teen Zimbabwe teengestaan.
Zimbabwiërs het op 29 Maart gestem, maar die uitslag van die presidensiële verkiesing is eers vyf weke later deur die Zimbabwiese verkiesingskommissie bekendgemaak met geen volstrekte meerderheid vir een van die kandidate nie.
Die uitslae wat verlede Vrydag aangekondig is, toon dat Morgan Tsvangirai 47,9% van die stemme ontvang het, teenoor 43,2% vir Robert Mugabe.
