‘n Boer is Saterdagaand op sy plaas in Mpoponmeni, Pietermaritzburg, doodgeskiet, het ER24 gesê.
Woordvoerder Derrick Banks het gesê die man, in sy 50’s, is gevind in ‘n plas bloed met ‘n skietwond aan sy kop. Hy is op die toneel dood verklaar.
Ander lede van sy familie is ongedeerd, maar baie getraumatiseer deur die voorval.
Volgens Sapa is dit nog nie duidelik wat die motief vir die moord was nie.
Die Joost-storie wat op die oomblik al die koerante se voorblaaie haal, maak my naar. En dis nie vir die redes wat almal voorhou nie, nee.
Dis nie omdat hy ‘n leuenaar en ‘n skynheilige skurk is wat sy vrou vertel het dis nie hy op die video nie. Of dat hy gesê het dit was net een keer en nou kondig die koerante met genoegdoening aan van hoeveel gewillige vroue daar eintlik was nie. Nee, nie een daarvan nie.
Dis niks snaaks om mans te hoor spog oor hulle telling nie. Enige kroegtoonbank met ore sal daarvan kan getuig. Onsmaaklik en onopgevoed is dit wel, maar nie regte naarmaakstof nie. Hoogstens doodvervelig en sielloos kinderagtig.
Die rede waarom ek so naar is, is omdat die werklike skande, die onvergeeflike sonde, nie eens ‘n sinnetjie iewers gehaal het nie.
Ek vra myself af of al die seks en bedrieëry wat so breedvoerig in al die berigte geskets word, nie net ‘n verskoning vir pornografiese vermaak is nie. Nou kan ‘n Sondagkoerant wat voorgee om vir die gesin te wees, sonder meer die Son in die dag indra en dit sonder om te blik of te bloos. Dit is dalk die rede daarvoor dat die belangrikste aspek van die Joost-verhaal geen aandag geniet nie.
Nouja, dames en here, die rede vir my naarheid: Nie ‘n enkele woord oor die Springbokrugbykaptein se dwelmgebruik nie. Nie ‘n geligte wenkbrou, ‘n afwysende sin, ‘n oordeel van enige aard het nog die dooiehoutmedia gehaal nie.
Dis die Springbokkaptein om hemelsnaam! Dis ‘n held vir opgeskote seuns, ‘n man wat gekies is as kaptein vir hopelik sy leierseienskappe wat daar op die naat van sy rug lê, onderbroekloos in ‘n dwelmkoma.
Soos David Bullard onlangs skryf, moes almal onraad vermoed het toe Joost sê die man in die video is beter bedeeld as hy.
Dat Steve Hofmeyer vir Joost so opkom oor sy ontrouheid, is seker te verstane. Die arme Steve het ook gedink die media skuld hom. Maar nie eens Steve het hom uitgelaat oor Joost se dwelmafhanklikheid nie. Waarom nie? Is Steve bang Joost verwys na sy bles wat hy probeer wegsteek met ‘n pruik? Of dat hy wat Steve is se kinders nie ‘n woord Afrikaans praat nie?
Dit is asof daar ‘n verstandhouding tussen die dooiehoutmedia, Joost en Steve heers om geen woord oor Joost se verslawing te rep nie. Is dit nie die groot storie nie? Is dit nie die werklike misstap nie?
Nee, blykbaar nie. Want ons word Sondag na Sondag vertel van die twee se viriele sekskapades. Dat Joost s’n van sy dwelmgebruik afhang, is skynbaar eerder ‘n pluspunt wat verswyg moet word.
Enige verskoning, selfs verslawing, dwelmmisbruik, om die Afrikaanse na ‘n seksgod te laat lyk, is aanvaarbaar.
Ons sogenaamde voorbeelde het kennelik nog nooit van Viagra gehoor nie en die dooiehoutmedia gaan binnekort uitvind dat hulle die pornodoepa al hoe sterker sal moet aanmaak om hulle getroue lesers se aandag te hou.
Politiek het al te gereeld Suid-Afrikaanse rugby geboorlak, maar Vrydagaand in Engeland was dit die eerste keer wat politiek die Suid-Afrikaanse spel deurtrek het – met, die standaard van Suid-Afrikaanse politiek in ag geneem, voorspelbare rampspoedige gevolge. Enige iets wat met die voorvoegsel “Reënboog” beslaan is, is bestem om te midde van verhewe ideale, eindelose en sinnelose retoriek, wollerige broederskapbetuiginge en algehele onbeholpenheid vas te slaan. Hierdie span was die Reënboogspan…
Politieke histerie was die atmosfeer waarin die span saamgestel is. Oorkant die stadion in Leicester, Engeland, is die Nelson Mandela Park, en te midde van só ‘n heiligheid, het die voetballers skynbaar in prewelende, kniebuigende pelgrims verander. TV-aanbieder, Matthew Pearce, het in vervoering oor die Reënboogterroris gehyg en dit was hý wat die reënboogmantel om die arme span gehang het.
Die spankeurders was ooglopend net so asemloos verwonderd, want hierdie was die multi-kulturele span om alle multi-kulturele spanne van die morele hoëgrond af te stoot. Die beginspan was polities geheilig deur nie minder as nege nie-blankes nie. Kombinasies is geoffer op die altaar van selfregverdigende, liberale verhewendheid. Hierdie was altyd ‘n span wat met al die doeltreffendheid van ‘n ANC-dorpsraad sou onderpresteer.
Die ellende was dat die ongepoetste Leicester Tiere nie so polities sensitief was nie, en hulle het die multi-kulti Springbokkies met ‘n soort brutale baldadigheid verfonkfaai. Dit het gelyk asof die Azaniërs daar was om musikale stoele met hulle maatjies van die Internasionale Broederskap te speel terwyl die Engelse rugbygeskiedenis op die brein gehad het. Selfs geharde ramme soos Danie Rossouw, Andries Bekker en Jannie du Plessis was duidelik in ‘n stuipe van liberale bonhomie en dit is juis in die voorpak waar die ellende begin het. Die internasionale voetbalgemeenskap het hulleself sekerlik verkneukel in die ongewone gesig van ‘n Springbok-skrum holderstebolder in trurat. Ware Suid-Afrikaanse rugbyliefhebbers het geween en desperaat gewonder hoekom die hele Vrystaat-voorry nie daar was om ‘n lans vir Antidorcas Marsupialis – die Springbok – se eer te breek nie.
Niemand kan tog so beneweld wees om, anders as vir Reënboogredes, te dink dat Chilliboy Ralepelle naastenby die gehalte is van die Cheetahs se blonde, stoofvormige Viking, Adriaan Strauss nie. Maar Ralepelle het die nodige reënboogkwalifikasies – ‘n melamienryke huid. En die pilare weerskante van Strauss in die Vrystaatskrum, Wian du Preez en WP Nel, sou miskien nie so polities saf gewees het nie en sou ten minste gelyk het of hulle belangstel om te skrum.
Agterlangs het integrasie op die gewone fiasko uitgeloop. Heinie Adams en Ruan Pienaar het net soos senters Wynand Olivier en Juan de Jongh by mekaar verbygeleef. Die agterste driehoek, Ndungane, Earl Rose en Nokwe, het voetbal gespeel asof hulle wag vir ‘n komitee om ‘n regrukplan aan te kondig.
As produktiwiteit en doeltreffendheid steeds belangrike oorwegings in die Suid-Afrikaanse voetbalruim was, sou Wynand Olivier sy gebruiklike krygsmakker, Jaco Pretorius aan sy buitekant gehad het. Die Snor met die Heliumstem sou op ‘n werkende 9-10 kombinasie, soos die Griekwas se Sarel Pretorius en Naas Olivier of die Vrystaat se Jacques-Louis Potgieter besluit het. Maar almal van hulle is van ‘n kleur sonder ‘n plekkie in die reënboog.
Selfs met hulle teenstaanders so polities beneweld, het die Engelse span dit steeds moeilik gevind om te wen. Hulle beste speler, en dit by verre, was Stuart Dickinson, die Suid-Afrikaans-verguisende Aussie-skeidsregter. Hy het voortreflik op die aanval vertoon en met manjifieke verontagsaming van die reëls by die Tiere se losskrumgeknoei verbygekyk en boonop sy skouers vir ‘n lieflike stukkie obstruksie wat tot Leicester se enigste drie gelei het, opgetrek. Op die verdediging was hy vir sy lieflingspan – énige span wat teen ‘n Suid-Afrikaanse een speel, is sy liefling – goud werd.
Ná die ontruiming van die veld, het Leicester 22 punte teenoor die Springboklammetjies se 17 gehad. By daardie gevierde lys Reënboogprestasies – Eskom, SAL, die Spoorweë, Denel, Korrektiewe Dienste en allerlei ander staatsdepartemente – is nog ‘n eens trotse instelling, nou ‘n liederlike internasionale grap, gevoeg: Die Springbokrugbyspan.
Julius Malema se lewe is in gevaar, en lyfwagte is nou aangestel om hom dag en nag te beskerm, het die polisie se ministerie Saterdag aangekondig.
Zweli Mnisi, ministeriële woordvoerder het gesê ‘n analise, gedoen deur die misdaad-intelligensie-eenheid het onthul dat die ANC Jeugleier dreigemente ontvang, en dus beskerm moet word.
“Hy het ‘n brief aan ons geskryf waarin hy gesê het sy lewe is in gevaar. Ons eenheid het ondersoek ingestel, en voorstelle aan die polisiekommisaris deurgestuur.”
“Gebasseer op ons bevindinge, was daar besluit op lyfwagte,” het Mnisi gesê.
Hy kon egter nie meer oor die bevindinge van die ondersoek uitbrei nie, en het koerant gerugte ontken dat Malema doodsdreigemente ontvang het.
“Ek kan nie die aard van die dreigemente bekend maak nie, en ek ontken dat ek glo gesê het Malema kry doodsdreigemente,” het hy gesê.
Floyd Shivambu, ANC woorvoerder wou ook nie oor die aangeleentheid praat nie, en het gesê hy dra nie kennis van die situasie nie.
“Al het ons geweet, gaan ons nie kommentaar oor die aangeleentheid lewer nie.”
Die ANC het Saterdag in ‘n verklaring gesê hulle is bekommerd oor die dreigemente, en dat Malema geregtig is om deur lyfwagte beskerm te word, ten spyte daarvan dat opposisie partye gesê het dit is onnodige vermorsing van belastingbetalers se geld.
“Prominente leiers van politieke partye is geregtig om lyfwagte te gebruik, wanneer hul persoonlike lewe in gevaar is,” het Jackson Mthembu, nasionale ANC-woordvoerder gesê.
Volgens hom was die reaksie van die Demokratiese Alliansie (DA) en Onafhanklike Demokrate (OD) ‘verregaande en onsensitief’.
Maar Dianne Kohler-Barnard, woordvoerder van die DA het volgehou dat Malema nie geregtig is op die gebruik van lyfwagte nie.
“Van wanneer af betaal die staat vir lede van politieke partye om beskerming te kry. Hierdie man is nie ‘n politikus nie, hy is maar net ‘n hoof van een van die eenhede binne die ANC. Watter regte het hulle om belastingbetalers se geld op hom te spandeer.”
“Ek dink dis verregaande dat hulle belastingbetalers se geld op Malema gebruik, wanneer hy die een is wat dreig om mense dood te maak. Hy het dit oor homself gebring,” het sy gesê.
Die Verenigde Nasies het ‘n versoek aan Israel en Palestina gerig om beweerde oorloggeweld wat gedurende die Gasa-oorlog plaasgevind het, te ondersoek. Israel het hierdie voorstel egter van die hand gewys.
“Israel verwerp die resolusie van die VN se Algemene Vergadering,” het die buitelandse ministerie in ‘n verklaring gesê.
Volgens die VN se verslag het die Israelse magte “hoër waardes getoon as enige van die aanhitsers” tydens die 22 dae van oorlog, waartydens 1 400 Palestyne en 13 Israeliete gesterf het.
Donderdag het 192 lede by die vergadering die verslag goedgekeur waarin beweer word Israel en Palestinië is skuldig van moontlike oorlogmisdade en misdade teen die mensdom.
Van die 192 verteenwoordigers het 114 in guns van die verslag gestem, 18 was daar teen en 44 het buite stemming gebly.
Die VN se verslag het aanbeveel dat sy bevindinge na die Internasionale Strafhof in Den Haag gestuur word, indien Israel en die Hamas-leiers versuim om ‘n ondersoek na die oorlog in te stel.
Twee lede van die Suid-Afrikaanse Nasionale Weermag (SANW) is dood in ‘n valskermongeluk, het die departement van verdediging en millitêre veterane Vrydag gesê.
Die ongeluk het Donderdagoggend 10:30 plaasgevind, het die departement in ‘n verklaring gesê.
Beide lede was deel van ‘n opleidingsprogram wat in Januarie afgeskop het.
“Hulle was besig met opleiding as deel van die finale fase van hul opleiding as valskermsoldate,” het die departement gesê.
‘n Ondersoek deur die polisie en die SANW se ondersoekraad is geloods.
Die slagoffers was John Mpshe (23) van Britstown in die Noord-Kaap en Thabang Mokoena (22) van Weppener in die Vrystaat.
Die Black Management Forum, BMF, waarvan Jacob Maroga ’n lid is, wil nie aanvaar dat Maroga bedank het nie en het ’n giftige aanval gedoen op Bobby Godsell, voorsitter van die direksie van Eskom.
Themba Mnyaka, waarnemende voorsitster van die BMF, het Godsell uitgedaag om met Maroga se bedankingsbrief vorendag te kom.
“Godsell het Eskom se personeel en die publiek onder die wanindruk gebring dat Maroga bedank het,” het sy op ’n nuuskonferensie in Johannesburg gesê.
Sy het namens die BMF daarop aangedring dat Godsell sy pos moet ontruim.
“In Eskom is daar ’n verwydering tussen die strategiese doelwitte van die regering as aandeelhouer, wat ’n ontwikkelingsagenda najaag aan die een kant, en die direksie met Godsell as voorsitter, wat die strategiese rigting en siening van Eskom raak,” het sy gesê.
Die BMF het ook vir Barbara Hogan voor stok gekry en het die ANC gevra om haar tot orde te roep.
“Die ANC moet met progressiewe beleid vorendag kom om die bydraes van staatsbeheerde korporasies tot ’n ontwikkelingstaat te versnel,” het Mnyaka gesê.
‘n Boer van Brits se vrou is ernstig geslaan en uit haar rolstoel gegooi gedurende ‘n aanval op hulle plaas, het polisie van Noordwes Vrydag gesê.
“Die vrou was in haar kamer toe sy gehoor het hoe die venster oopgaan en toe ‘n geweer gesien het wat op haar gerig is,” het snr. supt. Kebaakae Metsi oor die voorval wat laat Donderdagmiddag plaasgevind het, gesê.
“Terwyl die een verdagte die rewolwer op haar gerig het, het ‘n ander die kamer binnegegaan, haar vuurwapen geneem en vir geld gevra.”
Volgens Metsi het die twee weggekom met onder andere ‘n skootrekenaar en selfone ter waarde van R14 280.
Die twee rowers het vroeër die boer en ‘n dominee, wat na herstellings aan ‘n gebou op ‘n kleinhoewe in die area gekyk het, aangehou.
“Dieselfde twee verdagtes het die mans genader en ‘n vuurwapen op hulle gerig. Hulle het die mans met hul skoenveters, gordels en ‘n tou vasgemaak,” het Metsi gesê.
Toe die rowers van die toneel vlug het hulle na die plaashuis gegaan.
Die boer en die dominee het losgekom terwyl die mans in die huis was.
“Die boer het sy vuurwapen gevind wat buite weggesteek was…” het sy gesê.
Hy het gedurende ‘n rusie met die rowers op hulle begin skiet en beide is beseer.
Polisie wat in die omgewing gepatrolleer het, het die skote gehoor en na die plaas gehaas waar die twee in hegtenis geneem is en na die hospitaal is vir behandeling.
Hulle sal binnekort in die hof verskyn.
Toe die Reitzvideo aanvanklik gedurende Februarie 2008 op die wêreldtoneel gebars het, het meeste Afrikaners gedink hier is slegs ‘n geval van onsmaaklike studentepret wat effens handuit geruk het.
Die mediareaksie op die video het egter getoon hier is ‘n senuwee oopgeboor wat die onsekere bestaan van die nuwe Suid-Afrikaanse orde wesenlik bedreig.
Soos die Reitz-4 sage voortsleep in ‘n opvoering van politieke teater in sy mees absurde vorm, word toenemend besef dat die historiese omvang van die Reitz-4 sage nie meer onderskat kan word nie. Ons het hier ‘n video wat die bodem uitruk uit die skyn en pretensies van die nuwe Suid-Afrika.
Die gebeurtenis in die Afrikaner se geskiedenis wat die naaste hieraan herinner, is die Slagtersnekrebellie amper 200 jaar gelede, wat die eerste Afrikanerdaad van openlike verset teen die Britse kolonialisme was en bygedra het tot die Groot Trek dekades later. Soos die Slagtersnekrebellie is die Reitzvideo ‘n onsmaaklike voorval van groot historiese betekenis.
Soos met die Bezuidenhoutbroers voor Slagtersnek, het die Reitz-4 nooit die historiese implikasie van hul dade besef nie.
Hier is ‘n voorlopige en onvolledige lys van die historiese implikasies van die Reitzvideo:
a)Vir die eerste keer sedert 1994 is openlik die spot gedryf met die absurditeite en skyn van die nuwe Suid-Afrika en sy politieke ideologie.
b)Die histeriese reaksie van o.a. die media, het gewys hoe onseker en bedreig die wit Suid-Afrikaanse establishment is oor die huidige sosio-politieke opset in Suid Afrika.
c)Die vreesbevange reaksie van organisasies van die ou Afrikaner establishment, wat vir een of ander rede verantwoordelik gevoel het vir die optrede van die vier studente. Die ironie is dat hierdie organisasies eintlik niemand meer verteenwoordig nie en hul irrelevansie net verder beklemtoon het.
d)Die finale doodskoot van die Vryheidsfront Plus as deelnemer aan politieke prosesse in die land “namens” Afrikaners. Die Afrikaners wat wel nog aan die politiek wou deelneem sou die volgende verkiesing binnegaan as Kaapse koloniste wat DA stem.
e)Die blootlegging van die onderliggende beskawingskonflik in Suid Afrika deur die teenstrydige intrepretasies van die video nl. studentepret vs nasionale rasseramp.
f)Die video is ook ‘n permanente historiese illustrasie van die ontstellende wyse waarop die heersende politieke ideologie die ontspanne menseverhoudinge tussen mense van verskillende rasse beduiwel het.
g)Die mediaveldtog, die vervolging van die Reitz-4, die sogenaamde “vergiffenis” en “heropleiding” om gedrag te verander en transformasieretoriek toon onteenseglik dat die liberale demokrasie op ‘n totalitêre wyse afgedwing sal moet word om in Suid-Afrika te slaag.
Staatsgesag en mediamanipulasie sal toenemend gebruik moet word om mense se kulture af te breek en te dwing tot nie-rassige Engelsprekende individuele verbruikers van kommersiële nutsprodukte wat elke vyf jaar gaan stem.
Persone wat nie hierdie nuwe vereistes vir “vryheid” nougeset nakom nie, kan verdink word van afwykende gedrag en geteiken word vir “heropleiding in diversiteit.”
h)Die versnelde transformasie van die Universiteit van die Vrystaat tot nog ‘n Engelssprekende derderangse akademiese instelling.
i)Die voorspel tot die verskyning van Julius Malema waar ANC-ondersteuners vir die eerste keer sê wat hulle dink.
j)Die versnelde dekonstruksie van die Afrikaner na ‘n pre-1910 opset van Kaapse koloniste en Boere. Laasgenoemde kan dan weer op die Groot Onttrek gaan.
j)Die moontlikheid dat die Reitz-4 historiese martelaarstatus onder Boere kan verwerf is nie meer uitgesluit nie.
Opsommend kan gestel word dat die liedjie “De la Rey” en die Reitz video meer grensverskuiwend kan word as al die letterkunde van die Sestigers.
