Dan Roodt, Author at praag.co.za

Splinternuwe Volkswagen Touareg spog met blou tegnologie!

Die groot nuus verlede maand was die bekendstelling van die splinternuwe Volkswagen Touareg. Nou spog die groot Volksie ook met ‘n wêreldbekende Volkswagen-gesig wat op al die nuwegenerasie- VW-produkte pryk. Skoner lyne en ‘n baie meer vriendelike gesig met sagte rondinge en nuwe ligte voor en agter. Die groot nuus egter is die nuwe enjintegnologie wat VWSA met die Touareg aan ons kom voorstel. Hulle noem dit “BlueMotion” en ja, ons het nie te lank gelede oor die “Blue Efficiency” van Mercedes berig. Wel, hierdie tegnologie is soortgelyk aan dié van Merc.

Daar is drie modelle in die Touareg-reeks, die 3,6 L V6-petrol ontwikkel 206Kw se krag en 360 Nm wringkrag. Hierdie syfers laat die intreevlak-Touareg van rus tot by 100km/u versnel in slegs 7,8 sekondes en sy asem raak eers by 228km/u op. Brandstofverbruik gee VWSA aan as 12,4 L/100km en uitlaatgasse is 248 g/km. Hierdie is dan ook die enigste petrolweergawe in die nuwe reeks. Die 3,0L V6 TDI is die enjin waaroor almal gaande is. Dit is ‘n turbodieseleenheid wat 176Kw en 550NM ontwikkel. Versnelling van rus to 100 km/u neem slegs 7,8 sekondes en die meneer sal eers op 218 km/u begin moed opgee. Brandstofverbruik is eintlik die Volksie se troefkaart met 7,4 L/100km dit is 1,9L minder as die vorige enjin en slegs 195 g/km uitlaatgasse wat geproduseer word. Die vooros in die nuwe Touareg-reeks is die 4,2L V8 TDI. Met 250 Kw en ‘n astronomiese 800 Nm se wringkrag is dié net die voertuig waarmee jy omtrent enige iets sou kon sleep. Sy versnel tyd van slegs 5,8 sekondes van rus tot 100km/u en ‘n baie onwettige 242km/u topspoed maak hom dan ook die vinnigste Volksie in SA, ja nie eers ‘n goed ingeloopde GTi sal kan byhou nie. Brandstofverbruik word aangegee as 9,1 l/100km 2,8 L minder as die vorige V10 TDI en die uitlaatgastelling van 239 g/km is laer as sy V6-stalmaat se syfer. VW roem hom op ‘n 25%-afname in brandstofverbruik en tot ons een van die Touaregs self getoets het sou ons nie kon sê hoe akkuraat hierdie bewerings is nie.

Wat beteken “BlueMotion” nou eintlik? Wel, dit sê maar net dat VW alles binne hulle vermoë gedoen het om die enjins meer brandstofdoeltreffend te maak. Daar is die “Stop Start”-tegnologie wat die motor outomaties afskakel wanneer daar by ‘n stopstraat of verkeerslig gestop word. Die enjin skakel dan ook binne millisekondes aan wanneer daar weggetrek word. Die ander groot tegnologie wat hier ingespan word is die hergenerasieremme wat veroorsaak dat die motor vinniger en baie meer doeltreffend rem. Nou vra jy my wat beteken dit vir die omgewing, wel dit sê maar net dat al die kinetiese energie wat voorheen verlore sou gaan nou ingespan word om die motor te rem en die elktrisiteit wat hier opgewek wordm word dan weer na die battery gestuur om op ‘n ander plek in die motor gebruik te word. Die Touareg is die enigste VW-model wat beskikbaar is met die “Blue motion”-tegnologie, maar dit sal vroeg in November ook in die VW Polo en Golf beskikbaar wees en die nuwe VW Tiguan kom in 2011 insgelyks met dié tegnologie.

Pryse vir die nuwe Touareg sluit ‘n 5-jaar/100 000km-padbystand- en onderhoudsplan in sowel as VW se gebruiklike 3 jaar/120 000km-waarborg.

VW Touareg 3,6L V6 FSI R562 600

VW Touareg 3,0L V6 TDI BM R622 000

Die V8 TDI se prys was nie beskibaar nie.

для дачи

Die Tea Party se lesse vir Afrikaners

Die Republikeine het skoonskip gemaak in die VSA se verkiesing vir die Amerikaanse Kongres en ook goed presteer in die verkiesing vir die Senaat. Die linkse waansin waarmee Amerika se halfbloedprins se verkiesing ‘n skamele twee jaar gelede begroet is, is lank reeds vergete. Die verkiesing is as ‘n referendum oor president Obama se prestasie sedert 2009 voorgehou. As die verkiesing dan wel ‘n eksamen was, is president Obama ‘n druippunt deur die Amerikaanse kiesers gegee. Herinner nogal sterk aan ‘n ander swart politikus se H vir Houtwerk…

Die Republikeine se oorwinning in die verkiesing kan aan een groep se idees toegeskryf word: Die Tea Party. Sowat 40% van alle Amerikaners wat die stemlokale verlaat het, het gesê hulle steun die Tea Party-beweging. Linkses, liberales, en skrywers in die hoofstroom-media soos Maureen Dowd van die ekstreem-linkse New York Times het gestik in hul komkommer-toebroodjies by die blote gedagte aan die Tea Party.

Dis weliswaar onduidelik hoe effektief die Tea Party-beweging as ‘n organisasie is. Is dit eens ‘n organisasie met ‘n eenvormige strategie, visie of strukture? Die Washington Post, ‘n linkse koerant soos bykans al die hoofstroom-media in die VSA, het probeer om al die takke van die Tea Party-beweging te kontak, en te vra hoeveel lede hulle het. Dit het geblyk dat die meeste van die respondente nooit enige kontak met ‘n politikus gehad het nie, en dat hulle ledetal eintlik maar klein was. Nietemin was die Tea Party-beweging die gogga wat vir die Demokratiese baba slapelose nagte besorg het, en nie om dowe neute nie.

Waarom? Wat het die Tea Party-gedoen om homself so effektief te maak, al is hy gedisorganiseerd en het hy eintlik min volgelinge? Watter lesse bevat dit vir Afrikaners, indien enige?

Ek meen dat daar wel twee gróót lesse vir Afrikaners in die Tea Party is:

· Dis nie hoeveel ingeskrewe lede jy het nie, of hoe goed jou strukture is nie. Dis die inhoud en gehalte van jou boodskap wat tel.

· Jou boodskap se trefkrag maak staat op twee komponente: Die boodskap self en hoe dit kiesers raak, en hoe dit oorgedra word.

Wat was die Tea Party se boodskap? Was dit dat wit Amerikaners om rassistiese redes nie van die halfbloedprins in die Withuis hou nie? Nee! Dit het gegaan oor Amerikaners se gatsakke. Oor belasting. Die Tea Party is vernoem na die Bostonse teepartytjie, waartydens die Amerikaners se voorouers in opstand gekom het teen die onregverdige belastings wat die Britse koloniale meesters op hul onderdane in Amerika wou hef. Dit het eweneens nie vir die moderne Tea Party oor aborsie, godsdiens in Amerikaanse skole of al die ander gewone gevegte gegaan nie, maar oor belasting.

Dus: Kultuur, taal, tydskrifte in Woolworths, kwotas op die rugbyveld ensovoorts verwek weliswaar passievolle belangstelling vir ‘n kort tydjie, en Afrikaners mag vir ‘n paar minute opgewonde raak oor die ANC se magsmisbruik teen Hoërskool Ermelo se taalbeleid, maar vir Jan Publiek gaan dit op die lange duur veel meer oor sake wat hom en sy beursie raak. Die Amerikaanse kieser was kwaad oor werkloosheid en die pogings van die Demokrate om die VSA in ‘n sosialistiese staat te omvorm, en die Tea Party het dit briljant raakgesien en uitgebuit.

Die les vir Afrikaners? Eenvoudig. Die ANC is ideologiese sielsgenote met die Amerikaanse Demokrate. Baie van die ANC se radikale rassisme soos regstellende aksie het sy oorsprong op linkse kampusse in die VSA, asook in die Black Consciousness-beweging. Die ANC is ons Demokrate en Black Panther-beweging, behalwe dat die ANC veel, veel meer radikaal-links, swart-fascisties en Marxisties is as selfs die linkse voormalige professor wat in die Withuis sit. Die Afrikaner gaan eweneens binne die volgende paar jaar geslaan word met buitensporige addisionele belasting, benewens die buitensporige belastinglas wat ons reeds dra. Nes die Demokrate se planne om gesondheidsorg te sosialiseer, wil die ANC ook die geklike NHI hier instel.

As jy jou organisasie as ‘n leier vir Afrikaners wil posisioneer, leer jou les oor wat vir die kiesers belangrik is: Hul beursies. Fokus op die swak of geen opbrengs wat ons, die belastingmelkkoeie, vir ons belasting kry. Waarom moet ons dubbel betaal vir skoolgelde as ons reeds belasting betaal? Waarom kry ons nie ‘n effektiewe polisiemag nie? Ons betaal immers vir een. Hoe kan ons die ANC effektief bekamp? Deur ons belasting terug te hou.

Dit help egter nie net dat jou idees goed is nie. Dit moet ook goed oorgedra word en gekommunikeer word. Die Tea Party se wapen van massa-bekoring was Sarah Palin. Haar kennis van geografie mag gebrekkig wees, sy skiet wilde diere, sy sukkel soms met die Engels (“refudiate”), maar eisj! Sy is fotogenies en sy is nie skaam om haar boodskap oor te dra nie.

Siende dat mnr Jaap Kelder-hulle reeds ‘n Tea Party in die kleine het met hul belastingbetalersverenigings wat die ANC regime se getransformeerde stadsrade so op hul plek hou, is die enigste vraag waar ons ‘n Afrikaner-weergawe van Sarah Palin gaan kry? Is daar enige aanvallige dames wat wel ter tale is, en wat iets groots wil bereik?

детские игри

Grondeise voed volkstaatgedagte

Die Grondeisekommissaris het pas sy grootste enkele eis vir restitusie teen ‘n enkele grondeienaar te laat vaar, toe die eis wat namens twee stamme op sowat 20 000 Ha van mnr. Charl Senekal in KwaZulu-Natal ingestel was, opgeskort is.

Senekal het twee volkekundiges aangestel wat bevind het die twee stamme het nooit die grond besit nie. Boonop moes die grondeisekommissaris reeds twee keer in verband met dié saak in die hof verskyn, maar het nie opgedaag nie.

Dit is nie die eerste keer dat eise na behoorlike historiese navorsing in die stof byt nie. Dit laat die vraag ontstaan in hoe ‘n mate die staat se navorsers in die eerste plek die geldigheid van talle eise geëvalueer het, en op sterkte van hierdie sogenaamde navorsing bereis was om sake verbete in die howe te beveg. Uiteraard op die slagoffer van die ongeldige eis en die belastingbetalers se koste.

Grondeise is ‘n emosionele aangeleentheid, onder meer oor die regering se voortgesette verkondiging van sy doelwit om landelike armoede deur grondbesit te verlig. Dat ‘n boer in Suid-Afrika se half-woestynklimaat ‘n taamlike groot stuk grond en heelwat kundigheid nodig het om suksesvol te kan boer, is lank reeds ‘n bekende feit. Hiersonder word armoede, en nie welvaart nie, gekweek.

‘n Tweede aspek wat nie uit die oog verloor moet word nie, is dat ongeldige grondeise ‘n klimaat van polarisasie en selfs verbittering, skep.

Derdens skep dit ‘n klimaat van onsekerheid, en so ‘n klimaat is nie bevorderlik vir die stabiliteit wat nodig is om voedselsekuriteit te verseker nie. Die onsekerheid het weer ‘n invloed op werksgeleenthede in ‘n omgewing – en dit skep armoede.

Die vrotsige of bevooroordeelde navorsing werp natuurlik ‘n donker wolk oor die betroubaarheid van ander navorsing wat vir die staat gedoen word, soos die navorsing oor die geldigheid van plekname.

Dit het onlangs geblyk dat een van die Vrystaat se plekname-komiteelede self voorgestel het dat Bloemfontein se naam na Mangaung verander word. As rede voer hy aan dat swart mense die naam Mangaung gebruik het voor die blankes die plek Bloemfontein begin noem het. Dit, terwyl reeds gepubliseerde navorsing deur historici, onder meer gebaseer op die werk van die gesaghebbende Theal, meen die naam is afgelei van die omstrede Korannahoofman, Jan Bloem, wat geleef het voor die Basothovolk nog deur Mosjesj byeengebring is.

Wat die swart mense –Tswanasprekendes wat deel van die sogenaamde Legoya-kultuur – dit genoem het voor hulle deur uitdelgingsoorloë vernietig is, weet niemand nie. Nog minder weet iemand wat die Koi en San die omgewing of hul nedersettings daar genoem het voor daar nog swart mense in die omgewing was.

Wat wel bekend is, is dat die naam Bloemfontein ouer is as die naspeurbare herkoms van Mangaung. Maar skynbaar moet geskiedenis vir persepsie terugstaan.

In ‘n ander geval is selfs ‘n standbeeld laat maak van ‘n persoon wat volgens die mees betroubare geskiedskrywing nooit bestaan het nie, en die oorsprong van die naam van die fiktiewe hoofman nog in groot onduidelikheid gehul is. Volkekundiges wat meen hulle weet waar die betrokke naam vandaan kom, herlei dit onder meer na ‘n rituele bees toe.

Om polariserende persepsies in plaas van historiese feite in ‘n gepolariseerde heterogene samelewing te laat gedy is soos petrol op die vuur. Dit maak dat die ras-koppetellery in rugbyspanne ‘n hoogs emosionele saak word, nie so seer oor die afsnypunt van getalle nie, maar oor die impak op die kollektiewe psige waar ‘n onlosmaaklike deel van die streek se bevolking soos vreemdelinge in hul eie land begin voel.

En dan verbaas te wees as die volkstaatgedagte momentum kry.

topcargo отзыв

Uit die dagboek van ‘n trekleier

Uit Louis Tregardt se dagboek leer ons sy geselskap ken soos geen ander trek nie. Soos Anna Böeseken toon, rus sy blik veral met trots en voldoening op sy naasoudste seun Petrus Frederik of Pieta, gebore 30 Oktober 1819.

Behalwe Pieta op jag — daar was leeus, tiers, renosters, kwaggas, wildevarke, elande, wildebeeste, koedoes, volstruise, wildeganse en allerhande bokkies in oorvloed — sien ons Pieta aan die werk. Hy gaan dekgoed vir die skerm haal en trek dit oor met velle. Hy gaan haal mis en brand kalk, brei velle en sny rieme, maak jukskeie maar breek ongelukkig die skaaf. Dan sien ons hom besig met die maak van ‘n veldstoel, of hy kap hout en tentstokke.

Dan weer sleep hy riet en palmiet aan en in Junie 1836 is ‘n skooltjie klaar, grotendeels deur Pieta se ywer. Daniël Pheffer kan dan onder geriefliker omstandighede skoolhou vir die 21 kinders onder sestien. Vir Pieta was daar, behalwe die jag, geen ontspanning nie, sodat hy partymaal moes sat word vir die werk. So teken sy pa op Saterdag 3 Junie 1837 aan: “De avond sprak ik met Pieta, gaf hij mij geen antwoord, maar een suure gezigt, waar ik boos om worden ben. Was ik met een jukscheij achter hem, kon hem niet krijgen.”

Toe Potgieter en sy mense nie opdaag nie, het Tregardt besluit om alleen verder te gaan. Tot aan die voet van die Drakensberge vorder hulle sonder hindernis. By die berge het Jan Pretorius hom byna oortuig dat dit te swaar sou wees om ‘n weg te baan. Maar die vroue het in opstand gekom en op hul aandrang is die trek voortgesit.

In kort skofte het spanne van 16, 18 of 20 osse die waens boontoe getrek. Bang dat die mans ekskuse gaan soek om nie verder te trek nie, het Martha Tregardt, Antjie Scheepers en Breggie Pretorius die enigste moontlike pad ondertoe aangewys. Die afgaan was baie moeiliker omdat dit steiler was, en aanhoudende reën en mis hulle vertraag het. Drie seuns het moedeloos geword en weggeloop na die gewese land — maar op 29 Desember 1837 was hulle terug. Tregardt wou hulle alles vergewe, maar Antjie Scheepers het haar Kobus met twee stroppe geslaan, en die ander moes toe hul seuns ook deurloop.

Die epiese oortog het twee maande en tien dae geduur. Die agterwiele van die waens is uitgehaal, swaar houtblokke onder die asse vasgemaak, net vier osse voor elke wa gespan en hulle een vir een tot aan die voet van die berg gebring. Ná nog 2½ maande is die 52 lede, onder wie sewe bruin mense, op 14 April 1838 by Lourenco Marques (Maputo). Daar tref ‘n nuwe ramp die geselskap: malaria. Byna al die lede van die geselskap word siek, en die meeste volwassenes sterf.

Ook die siekte van Tregardt se vrou Martha neem ‘n ernstige wending, en op 1 Mei moet hy ontroerd aanteken: “Mijn Liefste en Dierbaar pand wierd van mijn voor Eeuwig genomen.” Nog eenmaal skryf hy in sy dagboek: op 10 Augustus wanneer hy verjaar. Op 25 Oktober 1838 is hy oorlede. In Julie 1839 is 28 oorlewendes, ook Antjie Scheepers en Pieta, per skip na Port Natal.

Die Tregardt-dagboek bevat waardevolle inligting oor die trek, swart stamme, plante- en dierelewe. Ook D.J. Opperman se sombere drama Voëlvry (1968) is daarop gebaseer. Daarin sê Tregardt deurmekaar, half ylend, voor sy dood: “Al ons sorg en moeite was vergeefs … vergeefs gewees / Of, o grote God, skep u party volke / dat U deur hulle heen U skepping kan verken, / dat hulle eerstelinge van U groei moet wees?”

гидробак джилекс

Private veiligheidsmaatskappye bedreig staatsveiligheid

Die Volksblad berig dat die private veiligheidsbedryf glo “‘n bedreiging vir staatsveiligheid inhou” vanweë ‘n gebrek aan regulering. Die parlementêre portefeuljekomitee oor polisie het dié uitspraak gemaak.

Die Beheerliggaam vir Sekuriteitsmaatskappye (Psira) se topbestuur het Dinsdag ‘n donker prentjie geskilder van volgehoue wanbestuur, finansiële verliese, personeeltekorte, ‘n gebrek aan vaardighede en ‘n lae moreel.

Daarbenewens is Seth Mogapi, uitvoerende hoof, in Julie 2009 weens onder meer wangedrag en swak bestuur afgedank.

“Dit is geen verrassing ‘n mens lees daagliks van sekuriteitswagte wat by misdaad betrokke is nie. Dit is duidelik dat die sekuriteitsbedryf glad nie gereguleer word nie,” het Pieter Groenewald, LP van die VF+, gesê.

Ook Mluleki George (Cope) het beweer staatsveiligheid word bedreig deur onwettige maatskappye met buitelanders en misdadigers in hul diens.

Vrese is geopper oor die feit dat veiligheidsmaatskappye se wapens verdwyn sodra Psira die maatskappy se registrasie opgeskort het nie. Die polisie word daarvan in kennis gestel, maar wat daarna met die wapens gebeur, is die veiligheidsmaatskappye se verantwoordelikheid.

Volgens Mahlabela Chauke, Psira se nuwe hoof wat in September aangestel is, is die inligting op hul databasis “onbetroubaar”.

Voorts het Psira se inspekteurs in die 2009-’10-boekjaar nagelaat om inspeksies by bykans 500 maatskappye te doen om te verseker dat hulle wel aan wetlike vereistes voldoen.

Meer as 1miljoen van die 1,5 miljoen sekuriteitswagte wat by Psira geregistreer is, is glo “onaktief”.

Barbaarse verkragting veroordeel

Die Vryheidsfront Plus veroordeel die wreedaardige en barbaarse verkragting op ‘n 35-jarige vroulike dokter van Bloemfontein. Die feit dat dit in die dokter se werkplek, in Pelonomi-hospitaal gebeur het, getuig weereens van die swak toestand waarin die gesondheidsdienste in die Vrystaat verkeer.

Jan van Niekerk, lid van die Vrystaatse Wetgewer vir die VF Plus, sê dit is presies die rede waarom die VF Plus die doodstraf vir moordenaars en verkragters eis. Misdadigers skrik nie meer vir die strawwe wat hulle opgelê word nie, daarom pleeg hulle sulke onmenslike dade soos hierdie.

Die VF Plus wil hiermee sy innige simpatie met die dokter en haar familie betuig en sal, alhoewel dit nie die onmenslike gebeurtenis ongedaan sal maak nie, haar aanraai om die hospitaal verantwoordelik te hou vir die feit dat sy nie veilig in haar werkplek was nie. Dit is ‘n regering se primêre plig om aan sy burgers ‘n veilige werk- en leefruimte te verseker. Hierdie barbaarse gebeure getuig daarvan dat die regering nie daarin slaag nie.

Die VF Plus verstaan ten volle die dokters by Pelonomi se houding dat hulle nie voort sal gaan om nagskofte te werk nie, aangesien daar van geen mens onder sulke omstandighede verwag kan word om sy eie lewe in gevaar te stel nie. Die feit dat selfs die veiligheidswagte vir hul lewe vrees in die donker gange is ‘n sprekende bewys van hoe onveilig dit veral vir vroulike dokters moet wees om in Pelonomi-hospitaal te werk.

Die regering moet besef dat baie mense se lewens op die spel is as dokters weier om snags by die Pelenomi-hospitaal te werk. Dit is die department se verantwoordelikheid om toe te sien dat dokters in ‘n veilige omgewing mense se lewens kan verbeter en selfs red.

Arcelor Mittal van rassisme beskuldig

Mnr. Jaco Mulder, VF Plus-LPW en provinsiale leier vir Gauteng, het Arcelor Mittal daarvan beskuldig dat hy gemeenskappe verdeel oor die gevolge van ‘n swart ekonomiese bemagtigingstransaksie in die Vaaldriehoek.

Dit volg na ‘n aankondiging in die Emfuleni-raad dat Arcelor Mittal in terme van ‘n swart ekonomiese bemagtigingstransaksie ‘n gemeenskapstrust wil oprig in die Vaaldriehoek waarin die gemeenskap bevoordeel moet word.

Mittal vereis dat ‘n raadslid uit die Emfuleni-stadsraad genomineer word om as lid op die trust te dien. As vereiste word dit uitdruklik gestel dat die raadslid onder andere swart moet wees. Die uitgebreide definisie van swart (African, Indian, Chinese or Colored) word gebruik.

Die oprigting van ‘n gemeenskapstrust op die wyse sluit dus wittes uitdruklik uit en bevoordeel slegs ‘n gedeelte van die reeds verarmde gemeenskap.

Mnr. Nic Janse van Rensburg, VF Plus-raadslid vir Emfuleni, het dit beaam deur te sê dat die transaksie, die oprigting en bestuur van die trust sal lei tot verdere polarisasie in dié gebied en ook in die Emfuleni-stadsraad.

“Indien die oprigting van die trust op hierdie wyse voortgaan, behoort die benaming van die trust beskryf te word as ‘n eksklusiewe swart gemeenskapstrust,” het Mulder gesê.

Die wyse waarop swart ekonomiese bemagtiging sedert sy ontstaan in Suid-Afrika toegepas word, kom neer op industriële sabotasie en die skep van nuwe onregte wat in die toekoms as menseregteskending onthou sal word.

Die volgehoue weerhouding van geleenthede van ‘n spesifieke rassegroep, lei tot die verdere uitvloei van kundigheid uit Suid-Afrika en dui op ‘n staat wat reeds gefaal het.

Partydigheid vir haatspraak

Julius Malema en die ANC-Jeugliga sal nou eers laat in April of vroeg in Mei weet of Malema ‘n tweede keer sy rieme oor haatspraak styfloop. Die klag wat Afriforum gelê het oor die sing van die liedjie, Skiet dood die Boere, sal dan eers in die Hooggeregshof aangehoor word.

Afriforum het die klag teen die ANC self hieroor na bemoedigende samesprekings onttrek. Hoewel die ANC die vroeëre verklaring deur die Hooggeregshof dat die liedjie haatspraak is, op appél neem, meen Afriforum dat dit oor ‘n onbevredigende stel feite handel waar twee vriende mekaar die stryd in die hof aangesê het.

Suid-Afrika stuur op ‘n landswye verkiesing af, en verkiesings in Suid-Afrika is steeds grootliks etniese sensusse, waar spanningsvlakke baie hoog loop. In die verlede is al deeglik getoon hoe doodgewone politiekery as die aanstigting van rassespanning vertolk word, en die stempatrone beïnvloed. Vra maar vir enige kulturele antropoloog hoe Helen Zille se styl van aanvalle op Jacob Zuma swart steun weer in die ANC gekonsolideer het, en selfs Cope in die proses van hierdie gekonsolideerde steun moes afstaan.

Pas het pres. Jacob Zuma ‘n kabinetskommeling aangekondig, of koerante berig oor van sy nuwe aanstellings wat al stywe boetes vir bedrog opgelê is. Ook ander, heel geldige kritiek word teen sommige van die aanstellings geopper. Na verwagting gaan die regering se reaksie wees om harder te dryf met sy mediasnoeringsplanne. Dit, op sigself, skep ‘n gespanne klimaat in die aanloop tot ‘n verkiesing.

Om te argumenteer dat dit bloot munisipale verkiesings is, het kwalik bene om op te staan. Onlangs was die minister van Samewerkende Regering erg in die spervuur omdat hy die opposisie verkwalik oor ‘n persepsie huldig dat sake op munisipale vlak erg haper. Dié minister het nie met die kabinetskommeling in die slag gebly nie.

Die ANC Jeugliga se reaksie op die hofverrigtinge is om Afriforum as ‘n klomp rassistiese kinders wat mal is, uit te skel. Dat Afriforum, as gemeenskapsorganisasie, die sentimente van bitter baie mense verteenwoordig wat saamstem dat ‘n liedjie wat “Skiet die Boere” bewoord, haatspraak verteenwoordig.

‘n Maklike toets om te bepaal of iets op haatspraak of rassisme neerkom, is om bloot die liedjie se bewoording te verander om ‘n ander bevolkingsgroep as teiken vir die skietery te bevat. Dit is hoe eenvoudig dit is, en geen argumente oor ‘n historiese aanloop – veral nie uit ‘n tyd van stryd nie – kan haatspraak as iets anders inkleur nie.

Dat so ‘n saak hof toe moet gaan, of soos in die geval van “Kill the Boer, kill the farmer” op appèl by die Menseregtekommissie moes gaan, en ‘n sokkerstadion daarna boonop na die voorsanger vernoem is, toon dat bitter baie mense openlik haatdraend die statutêre terrein bevolk. En so lank hierdie sentimente openlik gesteun word, sal die slagoffers met rede kan voel dat die motief vir sogenaamde regstellende aksie en transformasie met male fides besaai is.

пазли для дітей

Ondersoek na brande gevra

Die Vryheidsfront Plus het die Gauteng regering vandag versoek om ‘n dringende ondersoek te gelas na die ontstaan van talle brande die afgelope tyd in geboue in die provinsie.

Dit volg nadat ‘n brand vroeër die week die Pretoria Landdroshofgebou in puin gelaat het en ‘n brand vandag in die Hillbrow toring in Johannesburg ontstaan het.

Mnr Jaco Mulder, VF Plus LPW vir Gauteng het gesê dat die Department vir Infrastruktuur en Ontwikkeling, plaaslike owerhede en nooddienste in die provinsie ‘n gesamentlike ondersoek moet gelas na die standaarde van instandhouding, brandtoerusting en noodplanne.

Dit wil voorkom asof swak onderhoud, ongemagtigde toegang en gebrekkige noodplanne besig is om sy tol te eis, het Mulder gesê. Verskeie prominente geboue het gedurende 2010 alreeds in brande deurgeloop, onder andere die Pieter Wessels Tehuis vir Bejaardes in Nigel, die Waterford Sakepark in Johannesburg, twee geboue in Crown Mines, ‘n gebou in Marshalltown Johannesburg en die Krugerpark woonstelle in Pretoria.

Gedurende 2009 het die Johannesburg Poskantoor in Rissikstraat afgebrand en verskeie brande het by geboue in Randburg en selfs by die Pretoria Skou uitgebreek.

Dit het tyd geword dat die owerhede nou drasties optree om toe te sien dat verdere verlies aan infrastruktuur en geboue verhoed word.

Данильченео

Afriforum trek haatspraakklag teen ANC terug

AfriForum het gisteroggend ‘n klag van haatspraak wat hy teen mnr. Julius Malema en die ANC ingedien het, teen die ANC teruggetrek.

Malema se verhoor sal na verwagting einde April volgende jaar voor regter Colin Lomont in die hooggeregshof in Johannesburg begin.

Die klag van haatspraak kom nadat Malema die woorde Dubul’ ibhunu (“skiet die Boer”) in Polokwane in Maart by ‘n studentebyeenkoms gesing het.

AfriForum het op 4 April ‘n interdik in die hooggeregshof in Pretoria teen Malema verkry wat hom verbied om die liedjie met dié woorde in te sing.

Volgens mnr. Willie Spies, regsverteenwoordiger van AfriForum, is die saak teen die ANC teruggetrek omdat die party openlik kritiek teen Malema se liedjie uitgespreek het.

“Mnr. Malema was glad nie tegemoetkomend nie en het in geen stadium gesê hy het berou nie.” Volgens Spies het die ANC-jeugleier gesê hy gaan self ook in die saak getuig.

Volgens mnr. Siyabonga Mahlangu, wat die ANC verteenwoordig het, is dit “nie logies” om die saak teen die ANC, en nie teen Malema nie, terug te trek. “Malema was nog nie eens gebore nie toe daar al begin is om dié lied te sing.” Mahlangu is ook bekommerd oor die gevolge wat die verbod op ander liedere sal hê. “Elke tweede struggle-lied bevat elemente van dié lied.”

Volgens Spies is daar nie op die oomblik vaste wette oor haatspraak nie.

“Ons hoop om met dié verhoor die tafel te dek om op regsgronde te besluit wat is reg om te sê en wat nie.”

Daar sal ook na Malema se optrede die afgelope naweek, toe hy na me. Helen Zille, DA-leier, as ‘n “kokkerot” verwys het, in hul saak verwys word, het hy gesê.

Фильчаков прокурор