Die Suid-Afrikaanse Instituut vir Rasseverhoudinge het aangekondig dat die Weskaap die provinsie met die hoogste misdaadkoers in die land is. Daar vind meer gewapende rooftogte in Gauteng plaas, maar sowel moord as diefstal is meer algemeen in die Weskaap.
Die gedagte dat misdaad aan armoede verbind is, is teenstrydig met die statistiek. Die armste provinsie in die land, Limpopo, het die laagste moordsyfer met 14 moorder per 100 000 lede van die bevolking per jaar. Nie net is die Weskaap die rykste provinsie met ‘n gemiddelde inkomste van R135 000 per jaar nie, maar dit beskik ook oor die hoogste moordsyfer met 61 moorde per 100 000 per jaar, meer as vier keer die Limpopokoers.
Die VPIX-inflasiekoers wat deur die Reserwebank as teiken gebruik word, het skerp gestyg. Volgens die jongste syfers het dit verlede maand tot 10,1 persent gestyg, wat die verwagting skep dat nog rentekoersverhogings sal kom.
Statistiek SA sê dat die verbruikersprysindeks van alle items in Februarie tot 9,4% gestyg het, wat die hoogste vlak sedert Desember 2002 verteenwoordig.
Die Reserwebank se geteikende inflasieband lê tussen 3 en 6 persent.
Voedselinflasie het egter verlede maand 15,3% bereik, met petrolpryse wat 8% in die maand gestyg het.
‘n Hoofartikel in die regeringsbeheerde koerant van Zimbabwe, die Herald, het voorgestel dat ‘n regering van nasionale eenheid in Zimbabwe saamgestel word om die verslegtende politieke en ekonomiese krisis te beëindig. Dit verteenwoordig ‘n afwyking van die koerant se gewone standpunt waarin hy gewoonlik die opposisie daarvan beskuldig dat hy die stemme manipuleer.
Intussen is amptelike syfers van die hertelling van stemme in die parlementêre verkiesing bekendgemaak en Zanu PF het een setel oos van Harare van die opposisie verower met 6194 stemme teen 5931.
‘n Vorige Amerikaanse ambassadrise in Suid-Afrika en tans onderminister vir buitelandse sake, Jendayi Fraser, was gister op pad na Suid-Afrika en gaan ook Angola en Zambië besoek vir samesprekings oor Zimbabwe.
Die adjunk-president Phumzile Mlambo-Ngcuka het gister gesê dat Suid-Afrika buitelanders moet invoer om sy vaardigheidsprobleem aan te spreek.
Volgens haar het die skaal van die probleem intussen groter geword. Ook vakatures in die openbare sektor het onaanvaarbaar hoog gebly.
Verder lewer die openbare skole en universiteite nie genoeg opgeleide mense nie. Die gehalte en beskikbaarheid van opleidingspersoneel was ‘n vername struikelblok en landelike gemeenskappe het onafdoende toegang tot opvoeding en vaardigheidsgeleenthede.
Volgens Mlambo-Ngcuka moet kinders daarvan weerhou word om die skool voor matriek te verlaat.
Volgens die president van die African National Congress, Jacob Zuma, is die verkiesingskrisis in Zimbabwe onaanvaarbaar. Hy het dié verklaring gemaak ná ‘n ontmoeting met die Britse eerste minister Gordon Brown.
Aan die ander kant is Zuma gekant teen ‘n wapenboikot van Zimbabwe wat wel deur Brown ondersteun word.
Zuma het buite Downingstraat 10 met verslaggewers gesels na afloop van sy vergadering met Brown en hulle gesprek oor Zimbabwe. Hulle het saamgestem dat die situasie in daardie land onvaarbaar is en dat iets gedoen moet word om die effek op Zimbabwiërs aan te spreek.
Die Spesiale ondersoekeenheid ondersoek tans 30 000 staatsamptenare wat wederregtelik huissubsidies van die staat bekom het. Hulle sluit skoolhowe en polisiekapteins in wat op korrupte of bedrieglike wyse ten volle gesubsidieerde wonings verkry het.
Volgens Xolani Xundu van die behuisingsdepartement, is huissubsidies bedoel vir die armste van die armstes, dit wil sê mense wat minder as R3500 per maand verdien.
Maar ‘n totaal van 28 715 staatsamptenare wat sulke subsidies ontvang het, verdien meer as die R3 500 per maand. Voorheen was daar egter nie die nodige stelsels om die leuens wat staatsamptenare op aansoekvorms vertel te kontroleer nie.
In die hertellery van verlede maand se stemme, het president Robert Mugabe se party 23 kiesafdelings gewen volgens Zimbabwe se staatsmedia.
Mugabe se party, die Zimbabwiese African National Union – Patriotiese Front of Zanu-PF, het as wenner uit die stryd getree.
Terwyl die hertellery in 21 kiesafdelings wat deur die opposisie party, die MDC, gewen is, plaasgevind het, was Goromozi West een van slegs twee distrikte wat deur Mugabe gewen is waar stemme oorgetel is.
Die MDC het voorheen verklaar dat hulle 109 setels teenoor Zanu-PF se 97 setels gewen het uit die 210 setels. Mugabe se party kon dus slegs die meerderheid behaal as die uitslae in sewe of meer setels anders was.
Die hertellery het ook stemme ingesluit wat tegelyk in die presidensiële verkiesing uitgebring is. Geen van die uitslae van die presidensiële verkiesing is tot dusver openbaar gemaak nie.
Trustees van die bankrotboedel van Brett Kebble wil meer as R25 miljoen terugkry van persone en instansies wat geld van Kebble ontvang het. Van die begunstigdes is senior ANC-lede en ‘n vername sakejoernalis.
Almal het donasies van Kebble ontvang wat tussen 2003 en 2005 geskied het toe Kebble se boedel reeds insolvent was, sê die trustees.
‘n Lid van die ANC-jeugliga, Lunga Ncwana, sy vrou Nora en die Ncwana familietrust het die meeste geld ontvang, ten bedrae van R10 miljoen. ANC-takke het R4,6 miljoen gekry.
Menseregtegroepe, vakbonde en kerke regdeur suider-Afrika het teen die Sjinese vragskip An Yue Jiang verenig om die wapenbesending te keer, met die stille ondersteuning van die Verenigde State.
In Sjina het ‘n woordvoerder van die Buitelandsesakedepartement Jiang Yu daarop aangedring dat die besending deel was van normale produktehandel tussen die twee lande, maar bygevoeg dat die skip dit tans oorweeg om die wapens terug te bring.
In die Grahamstadse Hooggeregshof het ‘n bejaarde vrou, Thelma Lily Petzer, getuig hoe haar vriend Stephanus Jacobus Williams in hul huis vermoor is. Die twee aangeklaagdes, Roro Mntwaphi en Mbulelo Kula, pleit onskuldig op die moordklag.
Volgens Petzer het die twee mans haar aangerand en ook probeer om haar ringe van haar vingers af te byt. Een aangeklaagde het die ander vir ‘n mes gevra sodat hy Petzer se keel kon afsny. Dit het egter nie gebeur nie en hulle het haar bloeiend agtergelaat.
Petzer het agterna die polisie gevra om haar vriend se lyk te sien. By hierdie punt het sy in die getuiebank ineengestort en begin huil.
‘n Segsman vir die Suid-Afrikaanse departement van Verdediging, Temba Gadebe, het gister ontken dat die An Yue Jiang in Suid-Afrikaanse gebiedswaters is.
Hy het gereageer op ‘n verklaring van die Suid-Afrikaanse Sentrum vir Litigasie dat die Chinese skip op die oomblik in Suid-Afrika se gebiedswaters verkeer in oortreding van ‘n Durbanse Hooggeregshofbevel.
Gadebe het gesê hulle hou die skip dop en dat hulle seker is dat die skip nie in Suid-Afrika se gebiedswaters is nie. Hy kon nie sê waar die skip tans is nie.
Die An Yue Jiang het Vrydagnag onmiddellik anker gelig nadat die Durbanse Hof beveel het dat die vrag afgelaai word onder toesig van die balju.
Die Bush-administrasie het intussen ingetree om met regerings in Suidelike Afrika oorleg te pleeg sodat die skip nie die vrag ter plaatse kan aflaai nie.
Die pas verkose leier van die ANC-jeugliga, Julius Malema, het in sy eerste brief as president van dié organisasie uitgevaar teen diegene wat hulle aan onbehoorlike gedrag skuldig gemaak het by die liga se onlangse kongres in Bloemfontein.
Skurke en skorriemorrie wat glo dat hulle die organisasie kan afpers deur hulle aanstootlike gedrag sal ongenaakbaar behandel word, het hy gesê.
Onder andere het die Times-koerant ‘n voorbladfoto geplaas van ‘n afgevaardigde wat sy broek voor die kamera by die konferensie aftrek. Volgens Malema pas sulke gedrag nie by die kamerade nie.
Eerste Nasionale Bank se eiendomsbarometer toon dat die persentasie van eiendomsverkopers wat emigreer gestyg het. In die eerste kwartaal vanjaar was 12 persent van alle verkopers van plan om te emigreer, teenoor nege persent wat in die vierde kwartaal van verlede jaar besig was om te emigreer.
Die toename in emigrasie vind veral in die duurder buurte plaas waar huise meer as R2,5 mijoen werd is. Nie minder nie as 18% van alle verkopers in dié kategorie is van plan om te emigreer. Trouens, emigrasie is die enkele grootste rede waarom mense in die luuksemark hul huise verkoop.
Ook eiendomsagente bevestig dat daar ‘n onrusbarende toename in die aantal mense is wat van hul eiendomme weens emigrasieplanne ontslae wil raak. Volgens die voorsitter van Seeff, mnr. Samuel Seeff, wil 25% tot 30% van huidige verkopers van huise emigreer. Volgens hom gaan nie alle eiendomme verkoop nie en sal ‘n hele aantal mense dus verplig wees om in die land aan te bly.
Die opposisie het ‘n lys met besonderhede vrygestel van sy ondersteuners wat deur die regerende party beseer en gedood is sedert die verkiesing einde verlede maand.
Die menseregte-organisasie Human Rights Watch in New York het Saterdag gesê dat foltering en geweld in Zimbabwe toeneem. Die regerende party is besig om martelkampe op te rig, om mense te slaan en te martel wat daarvan verdink word dat hulle vir die MDC in verlede maand se verkiesing gestem het.
