Die Bank van Japan het Vrydag gesê dat hy sy rentekoers gaan verminder van 0,3% na 0,1%, in 'n handeling wat aansluit by die globale rentekoersverlagings wat daarop gemik is om ekonomiese probleme hok te slaan.
Japan het reeds voorheen rentekoerse van nul persent gehad, wat in Maart 2001 deur die BOJ ingestel is.
Toe Bernard Madoff huis toe gegaan het na sy woonstel in Manhattan, was dit vir hom onmoontlik om nie die skade raak te sien wat hy veroorsaak het met sy beweerde $50-miljardbeleggingsbedrog nie.
Kameras het hom ingewag buite die hof toe hy na sy voertuig toe geloop het. Minute later is 'n smalende Madoff weer omring deur nog kameras toe hy in die woonstelgebou ingeloop het, en op een stadium het dit in 'n skrum ontaard met 'n stampery tussen Madoff en 'n joernalis.
Hy is daarna met 'n elektroniese moniteringsarmband toegerus en onder huisarres geplaas in sy $7-miljoenwoonstel.
Madoff se chaotiese rit huis toe het gekom nadat die skandaal van New York na Washington versprei het, met die Sekuriteite en Beurskommissie (SBK) wat meer kritiek moet verduur en die Kongres wat ook by die saak betrokke raak.
Die voorsitter van die Huis se kapitaalmarktesubkomitee, verteenwoordiger Paul Kanjorski, 'n demokraat van Pennsilwanië, het aangekondig dat 'n raad van ondersoek vroeg volgende maand gaan begin kyk na die grootste piramideskema ooit en hoekom die regering dit nie raakgesien het nie. Daar gaan ook gekyk word na die verhouding tussen Madoff se niggie en 'n voormalige SBK-prokureur wat Madoff se besigheid bekyk het.
Madoff het sy verskyning in die hof gemaak om voorwaardes vir sy borgtogpakket te onderhandel. Die regter het van hom verwag om twee bykomende mense te kry om saam met hom, Madoff, te teken, maar klaarblyklik was daar niemand wat saam met hom in die lig van die skandaal gesien wou word nie.
Regter Gabriel W. Gorenstein het gereageer deur 'n verandering aan die borgvereistes goed te keur. Uiteindelik moes Madoff by die hof verskyn om eienaarskap van sy boonste Oostekantwoonstel oor te teken, en sy huise in Florida en die Hamptons in New York.
'n Franse hof het 'n klerefirma beveel om 40 000 Euro (R560 000) te betaal aan skadevergoeding vir die verspreiding van sakke met die naakte beeld van die Franse presidentsvrou, Carla Bruni-Sarkozy, daarop.
Die foto dateer uit haar dae as model. Sy het gevra vir 125 00 Euro aan skadevergoeding van die klerehandelaar Pardon, wat die sakke aan sy kliënte versprei het.
Pardon het gesê hulle gaan appelleer teen die uitspraak wat Donderdag gelewer is op die Franse Indiese-oseaaneiland Reunion, waar die maatskappy geleë is. Die firma het ook belowe om die 5 500 Bruni-sakke wat hulle oor het, te vernietig.
Die hof het bevind dat Pardon die Bruni-Sarkozi-eienaarskapsregte van haar beeld oortree het. Haar prokureurs het gesê dat sy enige geld wat sy uit die saak maak aan 'n welsynsorganisasie sal skenk.
Duitse sakevertroue lyk of dit Desember weer gaan val vir die sewende maand agtereevolgens, volgens die voorspellings van 'n ondersoek wat Donderdag vrygestel gaan word. Dit stem ooreen met tekens dat die afneem van die grootste ekonomie in Europa begin om momentum te kry.
Met die globale ekonomiese duisternis wat Duitsland se uitvoere bedreig, voorspel ontleders dat die Ifo-sakevertroueindeks wat goed dopgehou word, sal daal tot op 84 punte.
Die voorspelling van die daling in Desember kom nadat die indeks deur Ifo, wat in Munich gestasioneer is, meer gedaal het in Desember tot op 85,5 punte vanaf 90,2 punte in Oktober.
Die Desember-Ifo-ondersoek, wat gebaseer is op inligting vanaf 7 000 Duitse uitvoerende beamptes, val saam met die publikasie van 'n groot klomp aanduiders en data wat die donker ekonomiese vooruitsig wat oor Europa hang, ondersteun.
Die eindresultaat is dat die verdere daling in die Ifo-indeks die maand verdere druk kan plaas op die Europese sentrale bank om voort te gaan met die vermindering van rentekoerse tot in die nuwe jaar.
Soldate van Sri Lanka het verdedigingstellings van die Tamiltiere naby die rebelle se politieke hoofkwartier verower ná hewige gevegte, het die regering Donderdag gesê.
Soldate was besig met teen-terrorismeoperasies langs die noordelike en noordwestelike verdedigingslinies van Kilinochchi, die politieke hoofstad van die Bevrydingstiere van Tamil Eelam (BTTE), het die ministerie van verdediging gesê.
Die weermag het Woensdag ten minste 10 bomaanvalle teen die Tamiltiere se posisies gedoen toe voetsoldate erge teenstand van die rebelle ontvang het.
Die BTTE het gesê dat hulle die veelvoudige aanvalle Dinsdag en Woensdag deur die regeringstroepe weerstaan het, en 170 soldate gedood het en 420 gewond het.
Die weermag het die bewerings verwerp en gesê dat hulle net 25 soldate verloor het.
President Mahinda Rajapaksa se regering het die val van Kilinochchi al maande lank voorspel en die weermag het onlangs gesê hulle is binne "soenafstand" van die stad.
Kwaai teenstand van die rebelle en swaar monsoenreën het die weermagoffensief vertraag.
In Januarie het die regering van Sri Lanka onttrek uit 'n vredesooreenkoms wat deur Noorweë saamgestel is.
Twee mans is gearresteer nadat hulle klaarblyklik 'n minibus in Alexandra, noord van Johannesburg gekaap het, het polisie Woensdag gesê.
Die mans het die bestuurder van die minibus aangehou omstreeks 23:00 Dinsdagaand en hom beveel om uit te klim voordat hulle met die minibus weggery het, het konstabel Neria Melefetse gesê.
"Die voertuig wat te vinnig gery het, het die agterdog van polisie wat op patrollie was gewek en hulle het die voertuig voorgekeer. Daar was vier mans in die voertuig. Twee is gearresteer en twee het weggekom."
Die mans wat 19 en 21 jaar oud is, verkeer in hegtenis en sal binnekort in die Wynbergs landdroshof verskyn op klagte van kaping.
Die cholerakrisis in Zimbabwe het sowat 18 000 mense besmet en kan erger word soos wat die swaar reëns dreig om die dodelike siekte verder te versprei, het hulpwerkers in Brittanje gesê.
Oxfam, 'n vooraanstaande welsynsorganisasie, het gesê dat hulle hul versoeke vir sowat 4 miljoen pond (R60 miljoen) verhoog het om skoon water, sanitasie en voedsel aan meer as 1 miljoen mense in Zimbabwe te kan voorsien.
"Die vinnige verswakkende toestand in Zimbabwe maak dit 'n baie ernstige humanitêre krisis wat in 2009 verder kan verswak," het Oxfam se humanitêre direkteur, Jane Cocking, gesê.
Volgens Oxfam, toon syfers van de VN dat cholera, wat deur water oorgedra word, reeds meer as 18 000 mense besmet het en omtrent 800 mense se dood veroorsaak het.
Verbruikersinflasie het vir die derde agtereenvolgende maand effens gedaal, het Statistiek SA Woensdag gesê.
Volgend die Pretoriagebaseerde agentskap, het die VPIX (wat hooflyninflasie insluit maar huisverbande uitsluit) gedaal tot 12,1% op 'n jaar tot jaar grondslag vanaf 12,4% die vorige maand.
Dit was egter nie soos wat ekonome voorspel het nie.
"Ons het 11,9% verwag," het die Efficient Groep se Dawie Roodt gesê.
"Dit bevestig my vermoede dat die reserwebank verlede week 'n fout gemaak het deur die rentekoerse te verlaag. Almal het gesê dat ek 'n pretbederwer is, maar ek was reg," het hy gesê.
Statistiek SA het gesê dat die alle-itemsverbruikersprysindeks of VPI jaarliks gestyg het tot 11,8% teenoor 12,1% in Oktober.
Op 'n maandelikse basis het dieVCPIX op 0,2% gestaan in November terwyl die hooflyn VPI op 0,1% was.
Die Britse pond het Woensdag tot nog 'n rekordlaagtepunt teen die Euro gedaal, tot 1,0984 Euro, wat sy onlangse swakheid vererger het ná die bekendmaking van nog slegte ekonomiese nuus.
Die swart hoofbestuurder van die MTN-groep, Phuthuma Nhleko, kan dalk R300-miljoen maak uit die groep se oorname van 'n struktuur wat opgerig is om swart eienaarskap van die maatskappy te bevorder.
MTN is van voorneme om die struktuur – bekend as Newshelf – oor te neem en het Maandag aangekondig dat hulle aandele regstreeks aan swart Suid-Afrikaners in 2009 gaan verkoop.
Newshelf besit 13,3 persent aandele in MTN namens sleuteldirekteure en swart personeel. Die markwaarde van die Newshelf-aandeel, wat ses jaar gelede gekoop is, is R24-miljard maar dit het skuld van omtrent R21,8-miljard gehad.
In die ontbondeling sal MTN 'n 6-persentaandeel – wat anders gestel 'n gelykheidseienaarskap van tot 25 persent in MTN Suid-Afrika uitmaak – aan swart lede van die SA publiek en ook swart personeel verkoop.
Die selfoonoperateur sê egter die grootte van die openbare aanbod kan verander "na gelang van markomstandighede en die omvang van herinvestering in die nuwe breëbasisstruktuur deur die Newshelf-begunstigdes."
Die groep sal 'n spesiale dividend van R3,1-miljard aan die 3,200 begunstigdes van Newshelf uitbetaal.
Rajay Ambekar, 'n portefeuljebestuurder by Cadiz American Harvest, sê hy reken elke begunstigde sal omtrent R1-miljoen ontvang.
"Nhleko sal egter met omtrent R300-miljoen wegstap omdat hy 8 persent van Newshelf besit."
Sifiso Dabenwa en Rob Nisbet, MTN se hoofoperasiebestuurder en hooffinansiesbestuurder onderskeidelik, kan elkeen R180-miljoen in hulle sakke steek.
