Abdalla Salem El-Badri, die sekretaris-generaal van OPUL, het gister gewaarsku dat oliepryse onbeperk kan styg in die geval vvan 'n militêre konflik met Iran.
Die groep se ander lede sou nie in staat wees om vir die verlore produksie in te staan nie, het hy gesê.
Iran is die tweede grootste olieproduserende land ter wêreld na Saoedi-Arabië.
Die Internasionale Energie-agentskap, 'n pro-Westerse liggaam, het gewaarsku dat olievoorrade beperk oor die volgende paar jaar beperk mag blyk in weerwil van rekordpryse.
Leiers van die G8 het petroleumverskaffers versoek om produksie en raffinering te verhoog.
Die woorde-oorlog tussen Iran en die Verenigde State het harder geword aangesien Iran gesê het dat die land vir 'n tweede dag missiele getoets het.
Buitelandsesakeminister Condoleezza Rice het vroeër gewaarsku dat die VSA sy bondgenote sou verdedig.
Volgens Iran het die lansering van die Hoot-missiel, wat walvis in Farsi beteken, suksesvol in die Persiese Golf plaasgevind.
Verlede maand het die Israelse lugmag geoefen vir 'n moontlike aanval op Iranese kernfasiliteite.
Die president van die African National Congress Jacob Zuma het in 'n onderhoud met Business Day gesê dat ekonomiese beleid nie onder 'n nuwe regering sal verander nie.
Hy het gesê dat Suid-Afrika 'n afswaai in globale finansiële markte kan weerstaan maar dat plaaslike groei as gevolg daarvan stadiger mag wees.
Die regering het vrese dat 'n resessie op pad is, verwerp.
Beleggers het hul kommer uitgespreek oor toekomstige ekonomiese beleid in Suid-Afrika as Zuma die mag oorneem.
Zuma meen die ANC stem nie saam met die SAKP dat Mbeki behoort te bedank voor die einde van sy termyn nie.
Die Suid-Afrikaanse Weerdiens het gister gewaarsku dat 'n koue naweek vir die grootste deel van die land voorlê.
Sneeu word oor Lesotho gedurende die naweek verwag.
Buie en donderbuie word ná die koue front oor die oostelike helfte van die land verwag.
Koue temperature in Gauteng is nog nie verby nie en temperature van minder as 15 grade Celsius word oor die naweek verwag.
Volgens die weerdiens behoort die storms wat tans die Weskaap teister teen vandag verby te wees.
Buitelanders hou tans 'n sitstaking voor die Durbanse stadsaal.
Hulle maak beswaar teen die plaaslike en provinsiale regering se onvermoë om die krisis op te los.
Sedert verlede week het kerke nie meer geld en kos nie en die eThekwini-munisipaliteit het nou aan buitelanders aan wie hy onderdak gee gesê om alternatiewe akkomodasie te vind.
Die stadsbestuurder Mike Sucliffe blyk nie beskikbaar te wees om die saak aan te spreek nie.
Suid-Afrikaanse burgers het hul minagting teenoor die groep getoon deur hulle reguit aan te sê om na Zimbabwe terug te keer en vir Tsvangirai te gaan stem.
‘n Entoesiastiese hengelaar, mnr. Clive Hunter, is by Alkantstrand in Richardsbaai doodgeskiet nadat hy sy vrou aangesê het om in die see in te hardloop.
Die voorval het kort voor sesuur plaasgevind toe Hunter gemeen het hy en sy vrou behoort op te pak aangesien al die ander hengelaars reeds vertrek het.
Vier Zoeloesprekende mans het uit die bosse gekom en met hulle begin praat. Hunter het bekommerd geraak en vir sy vrou Zelda geskree om in die see in te hardloop. Sy het al langs die strand af na die naaste pier gehardloop om hulp te kry, maar was te laat om haar man te red.
Die aanvallers het die 35-jarige Hunter morsdood in die hart en long geskiet.
Die Zimbabwiese opposisieparty, die MDC, het berigte dat lede van die party opleiding in geweld ontvang, as suiwer propaganda afgemaak.
MDC-woordvoerder Nelson Chamisa, sê die party het homself nog nooit tot geweld gewend nie en dat enige persoon wat dit sou doen, nie langer 'n lid van die party kan wees nie.
Die uitvoerende direkteur van die Raad vir Geesteswetenskaplike Navorsing, Kwandiwe Kondlo, sê egter dat hulle oortuig is dat MDC-lede opleiding ontvang.
Hy sê die geweldskultuur van ZANU-PF het oorgespoel na die MDC.
Die MDA sê verder hulle is nie in die proses om met die regering van Zimbabwe te onderhandel nie.
Die party het gister gesprekke met die regering gevoer maar sê niks substansieels is bespreek nie.
Die leier van die party, Morgan Tsvangira, sê hulle het slegs die voorwaardes neergelê waaronder hulle gewillig sal wees om in onderhandelinge betrokke te raak.
Hy sê geen onderhandelinge is moontlik terwyl die regime van Robert Mugabe oorlog voer teen die MDC en die mense van Zimbabwe nie.
Die MDC sê ten minste 'n honderd van hulle ondersteuners is deur Mugabe se milisie om die lewe gebring tydens die verkiesing.
Alle oë sal vandag by die Verenigde Nasies op Suid-Afrika wees.
Brittanje, die Verenigde State en ander Westerse lande beywer hulle vir verskerpte sanksies teen Zimbabwe.
Stormweer in die Weskaap het 'n ingrypende uitwerking op 'n toenemende aantal mense.
Amptenare sê dat ten minste 38 000 mense tot dusver ontwrig is.
35 000 mense in Kaapstad is gedwing om noodstappe te neem met baie van hulle, veral in informele nedersettings, wat gedwing is om hulle huise te ontruim.
In die Kaapse Wynland en die Sentraal-Karoo is honderde mense deur blitsvloede en stygende vloedwater afgesny.
Owerhede het geskarrel om komberse en voedsel by geteisterde gemeenskappe uit te kry.
Paaie en brûe is in die vloede beskadig en 'n aantal roetes is vir verkeer gesluit.
'n Politieke bakleiery het tussen Duitsland se regerende koalisievennote uitgebreek oor 'n beplande besoek deur senator Obama.
Kanselier Angela Merkel wil nie hê dat Obama 'n toespraak by die Brandenburghek gee nie.
Frank-Walter Steinmeier, die buitelandse minister en visekanselier, stem nie saam nie.
Die burgemeester van Berlyn moet nou besluit of die stad die waarskynlike Demokratiese kandidaat gaan toelaat of nie.
Obama is ongewoon gewild in Duitsland en die kanse is goed dat hy sy toespraak by die monumentale hek sal kan hou.
John F. Kennedy het naby aan die Brandenburghek gestaan toe hy gesê het: Ich bin ein Berliner.
In 1987 het president Ronald Reagan daar vir mnr. Gorbatsjof gevra om die muur af te breek.
Veertien immigrante uit Afrika, waaronder nege kinders, is dood aan hitte-uitputting in 'n poging om die EU vanuit Afrika te bereik.
Die Spaanse nuusagentskap EFE sê die Spaanse kuswag het die ander 35 mense gered.
Aan die begin van die week het veertien Nigeriese immigrante naby die Spaanse kus vedrink toe hul boot in 'n stormagtige see omgeslaan het.
Duisende swartes uit Afrika sterf elke jaar tydens pogings om 'n beter lewe in die EU te bereik.
Spanje se sosialistiese regering is beslis dat almal wat sonder visums aankom, gerepatrieer sal word.
