Morakot het daartoe gelei dat ongeveer 2 m reën oor die naweek geval het voordat dit na China toe aanbeweeg het.
Die hewige reënval het ook gepaardgegaan met winde van tot 119 km/h.
Byna 1 miljoen mense aan die China se ooskus moes hul huise verlaat en ten minste ses mense is dood. Tifoon Morakot het vroeër die Filippyne getref waartydens 22 mense dood is.
Volgens ’n Taiwanse polisiewoordvoerder is 100 mense reeds met militêre helikopters uit die modder gered, maar ongeveer 400 mense is nog vermis.
Een van die mense wat gered is, Lin Tsjien-Sjoeng, het aan die media gesê dat hy glo byna 600 mense is nog vasgekeer.
“Die modderstorting het ’n groot deel van die dorpie, waaronder laerskole en huise, getref. ’n Groot deel van die berg het net bo-op ons geval,” het Tsjien-Sjoeng gesê.
Die dorpie was teen gisteraand nog afgesny van die buitewêreld nadat die modderstorting ook ’n brug wat toegang na die dorpie verleen het, verwoes het. Helikopters is gebruik om die dorpie te bereik.
Die dodetal vir Morakot staan tans op 14. Nog 51 mense, buiten dié in Sjiao Lin, is nog vermis.
Vier mense is ook dood in Zhejiang en een in onderskeidelik Foejian en Jiangxi. Inwoners van Zhejiang het per fiets gery om water en noedels vir inwoners te neem wat deur die ramp gestrand is.
Tifoon Etau het ook gister die westelike kus van Japan getref. Tot dusver is 12 mense dood en 12 ander nog vermis
