Nuus oor die wêreld buite Suider-Afrika
Weke van gietende reën het veroorsaak dat rivier oor hul walle gestoot het in suidelike China waar 1,27 miljoen mense uit hul huise vedryf is en ander gister gedwing is om op dakke te sit in afwagting op verdere reënbuie.
Die vloede het 112 mense in 12 provinsies gedood, het die ministerie van burgerlike sake vandag op sy webtuiste gesê. Siedende riviere het tienduisende huise laat ineenstort, het oeste oor 'n miljoen hektaar van landbougrond beskadig en meer as 12 miljard rand se ekonomiese verliese veroorsaak.
Bestuurders in Nieu-Seeland se grootste stad, Auckland, skep hul eie "passasiers" om verkeersopeenhopings die hoof te bied en in spesiale snelbane te mag ry.
Daar is 'n paar eienaardige kalante wat sulke toertjies uithaal, volgens wat die North Shore-munisipaliteit se verkeershoof Andre Dannhauser aan Reuters vertel.
Sulke ondernemende bestuurders wat gevang word dat hulle die verkeersreëls probeer herinterpreteer, word gewoonlik beboet met NZ$150.
Die verkeerspersoneel wat die foto's van oortreders bestudeer, moet boonop na die vreemdste verklarings vir die fnuikpassasiers luister.
David Miliband het op die BBC-televisie gesê dat mens helderheid oor die sadisme in Zimbabwe moet hê. Hy het verwys na mense wat vermoor word, mense wat gemartel word, mense wat aangerand word, asook inmenging in die verkiesingsproses.
Miliband het gesê dat hy en eerste minister Gordon Brown met die Verenigde Nasies se sekretaris-generaal Ban Ki-moen oor die afgelope twee dae beraadslaag het oor die situasie en oor die behoefte aan meer verkiesingswaarnemers om te verseker dat die opvolgverkiesing nie gekook word nie.
Hy het gehoop vir meer optrede van die VN-veiligheidsraad en 'n beroep op die internasionale ligaam gedoen om meer druk toe te pas. Miliband is egter teleurgesteld dat Suid-Afrika verkies om nie deur die veiligheidsraad te werk nie en eerder verkies om Afrika-oplossings te soek.
Tot 2,7 miljoen kinders in Oeganda word gedwing om gevaarlike kinderarbeid te verrig, volgens dié land se minister vir welsynsake. Een uit drie kinders tussen die ouderdom van 5 en 17 word gedwing om te werk.
Kinderarbeid kom wydverspreid in Oeganda voor waar 2,7 miljoen uit 7,9 miljoen seuns en dogters voortydig begin werk.
Op die Wêrelddag teen kinderarbeid het 'n regeringsamptenaar gesê dat een van die kernoorsake van kinderarbeid MIV/Vigs is, wat byna een miljoen kinders wees gelaat het.
Kinders werk noodgedwonge om hul broers en susters aan die lewe te hou, het die amptenaar verduidelik.
Sekere gemeenskappe verkeer selfs onder die indruk dat verkragting as wettig beskou word, het die hoof van Australië se Oerinwoner-hulpbron en ontwikkelingsdienste gesê.
Navorsers het die inheemse mense uitgevra oor die 30 mees gebruikte Westerse regsterme soos borgtog, pleeg, arrestasie, klag en skuldig.
Die OHOD-verslag het egter bevind dat 95 persent nie in staat was om hul betekenis korrek te eien nie.
Mense het onder andere gedink dat om skuldig te pleit hulle vinniger en sonder tronkstraf deur die hof kry.
President Mwai Kibaki het in 'n verklaring gesê die minister van paaie Kiplaya Kones en die adjunkminister vir binnelandse sake Lorna Laboso is saam met die vlieënier en 'n veiligheidswag gedood.
Die wrak is gevind, maar sonder enige oorlewendes.
Die oorsaak van die ongeluk in 'n verafgeleë gedeelte bekend as Kajonga, wes van die hoofstad Nairobi, is nog nie vasgestel nie. Die vliegtuig was onderweg na die Rift-vallei.
Beide politici was lede van die Oranje Demokratiese Bewegingparty wat president Mwai Kibaki teenstaan.
Meer as 'n honderd passasiers vermoedelik het gesterf toe 'n Soedannese lugdiens passasierstraler in vlamme het gebars na 'n landing op Khartoem se lughawe. Die Airbus-vliegtuig het tweehonderd-en-17 passasiers aan boord gehad.
Volgens getuies wat aan boord die vliegtuig was, is die kaptein weggewys van die lughawe by Khartoem weens slegte weer. Hy het later egter teruggedraai en in 'n sandstorm probeer land.
Lugvaart-owerhede sê die landing was nie normaal nie en 'n enjin op die regtervlerk het aan die brand geslaan. Passasiers is met noodglybane ontruim maar 'n hoeveelheid van hulle is deur gasse en vlamme oorval.
Reddingswerkers poog nog steeds om verkoolde liggame uit die wrak te herwin.
Piyish Chawla en Praveen Kumar het elk vier paaltjies geneem om Pakistan se jaagtog na lopies te stuit andat die Indiese openingskolwers Gautam Gambhir en Virender Sehwag 155 lopies op die telbord geplaas het. Daarmee het Indië 'n ongehoorde 140 lopie-oorwinning in gister se drienasies eendagtoernooi behaal.
Na Indië se telling van 330 vir agt, het Pakistan drie vroeë paaltjies moes afstaan en is vir 190 in 35.4 boulbeurte uitgehaal.
Indië en Pakistan beskik nou oor een wen elk in die toernooi. Bangladesj het die openingswedstryd met 70 lopies teen Pakistan verloor en kom Donderdag teen Indië te staan.
Die VSA gaan ongeveer R80 miljard aan Afghanistan belowe by 'n skenkerskonferensie wat vandeesweek plaasvind, het 'n Amerikaanse amptenaar gister gesê. Die bedrag is egter minder as wat die Withuis van die Kongres wou hê.
Die Amerikaanse minister van buitelandse sake, Condoleezza Rice, sal die aankondiging Donderdag by die konferensie in Parys maak. Daar word verwag dat die skenkerskonferensie R120 miljard sal oplewer, waarvan tweederdes van Amerika afkomstig sal wees.
Ses jaar nadat militêre magte onder Amerikaanse leiding die Taliban-regering van Afghanistan omver gewerp het, verkeer die land steeds in die greep van korrupsie, die dwelmbedryf en daaglikse geweld.
Môre vind daar tussenverkiesings in Kenia plaas wat die vrees laat onstaan het dat hernieude verkiesingsgweld kan uitbreek.
Ses maande gelede het etniese konflik in Kenia tydens die parlementêre verkiesings losgebars met ondersteuners van president Mwai Kibaki se Party van Nasionale Eenheid en eerste minister Raila Odinga se Oranje Demokratiese Beweging wat mekaar doodgemaak en uit hul huise verdryf het.
Ongeveer 1500 mense is dood en honderde duisende is ontwortel deur die verkiesing in Desember. Om die vrede te herstel, is 'n koalisieregering intussen deur internasionale bemiddeling in die land ingestel.
Bill Henriksen by die McMurdo-navorsingstasie sê dat byna 16 500 kondome verlede maand voor die koms van die donker afgelewer is.
Dit sal gratis aan personeellede beskikbaar gemaak word ten einde die moontlike verleentheid te vermy dat hulle dit moet koop.
Gedurende die wintermaande beskik die basis oor slegs 'n kernpersoneel van 125.
Die eerste sonsopkoms sal weer op 20 Augustus plaasvind en die personeel sal in September tot 1 000 toeneem vir die somermaande.
Die verdedigingsekretaris van die VSA, Robert Gates, het ‘n aantal topoffisiere in die Amerikaanse lugmag afgedank nadat kernmissielontstekers per ongeluk na Taiwan verskeep is.
Gates het verklaar dat hy die bedankings van die Lugmagstafhoof generaal Michael Moseley en Lugmagsekretaris Michael Wynne aanvaar het.
Twee verleenthede oor die afgelope jaar het tot die afdankings aanleiding gegee. In die eerste geval is ‘n B-52-bomwerper per abuis met ses kernkopkruisermissiele bewapen en oor die VSA vervoer.
In die ander geval is vier elektriese onstekers vir ballistiese missielkoppe per ongeluk na Taiwan gestuur in plaas van helikopterbatterye.
Gates het gesê dat ‘n interne ondersoek ‘n afname in die Lugmag se kernmissiefokus en –prestasie bevind het.
Volgens Gates is sy besluit om Wynne en Moseley te verwyder gegrond op die bevindings van ‘n ondersoek na die Taiwan-debakel deur admiraal Kirkland Donald.
Die Donald-verslag verteenwoordig geklassifiseerde inligting maar Gates het ‘n verbale opsomming verskaf.
Volgens die Duitse nuustrydskrif Der Spiegel veroorsaak ontwikkelingshulp dat Afrika sterf. As 'n mens kyk na die logika wat deur die
Wêreldvoedsel- en landbouorganisasie van die Verenigde Nasies (VN) gevolg word, is Kenia met sy 32 miljoen inwoners een groot hongersnoodgebied. In hierdie land word naamlik elke jaar meer voedselhulp uitgedeel as in suid-Soedan, waar 'n burgeroorlog woed
Die vraag kan egter gevra word of Kenia werklik so swaar kry. Indien dit wel die geval is, bly daar nie veel hoop oor vir Afrika om in sy eie voedselbehoeftes te voorsien nie. Kenia het naamlik die Viktoriameer, wat op sy beurt Oeganda en Tanzanië aan hulle Keniaanse bure verbind en wat die grootste meer op die vasteland is. Soos in Malawi kan mens wonder hoe dit dan moontlik is dat mense wat langs so 'n groot meer woon aan hongersnood kan ly?
Wat in die weste van Kenia in oorvloed geproduseer word, behoort in die noorde van die land verkoop word te word. Dit sal boere aanmoedig om meer te produseer. As hulle meer verdien, sal belastings styg. Die staat sal dan in staat wees om hierdie ekstra inkomste op die land se gebrekkige infrastruktuur te spandeer. Dit is in elk geval die ideaal.
Die werklikheid sien anders daar uit. Amos Kimunya, die Keniaanse minister van finansies, het onlangs aangekondig dat hy niks meer op infrastruktuur kan spandeer nie, anders sal hy nie die kabinet se salarisse kan bekostig nie. Die Keniaanse kabinet bestaan tans uit 95 lede, wat sowel ministers as adjunkte insluit. Elkeen verdien meer as VS$20 000 per maand.
Die toestand van die strate in die land is verskriklik. Die voedselhulp wat die Weste stuur, neem weke om hulle bestemmings te bereik. Intussen skryf die noodlenigingswerkers dramatiese verslae oor die haglike toestande en vra die Weste om selfs meer geld te skenk. Westerse burgers se beeld van Afrika word deur hierdie verslae en persberigte, wat daarop gebaseer is, gevorm. Sonder hulp van buite gaan die hele Afrika verhonger, is mense buite die vasteland geneig om te dink. Wanneer die hulp egter wel op die vasteland opdaag, ly die klein handelaars die meeste daaronder, want die pryse van broodnodige lewensmiddele daal. Ook die landbouers se produkte is skielik nie veel meer werd nie. Die maklikste is maar om te sorg dat jy ook van die buitelandse voedsel ontvang en dus is daar geen aansporing om te werk nie.
Westerse noodlenigingswerkers is geneig om die droë gebiede in Kenia op te soek. Normaalweg is daar min mense in woestynagtige streke woonagtig, maar dis juis hier, in die noordelike deel van Kenia, waar die werkers putte vir drinkwater grawe. Gou versamel hordes mense om hierdie waterbronne en hulle bring hulle veetroppe saam. Die vee (veral die bokke) vreet binne 'n ommesientjie die yl grassies op. Waar daar vroeër min mense verbygekom het, ontstaan stowwerige dorpies oornag. Meer en meer noodlenigingswerkers word dan benodig om die nuwe intrekkers van kos te voorsien. Die gebied word vinnig oorbevolk en niemand kan meer sonder voedselhulp klaarkom nie.
Oscar Wilde het eenmaal opgemerk dat filantropie die toevlug van ryk mense is wat daarop uit is om hul medemens vies te maak. Wanneer 'n mens na die situasie in Kenia kyk, kan jy nie help om saam te stem nie.
Die Afrikane het natuurlik skuld aan bogenoemde probleem, aangesien hulle dit nie regkry om hulp te weier nie. Dit is wensdenkery om te hoop dat 'n land soos die petrolryke Soedan sy BBP ooit gaan opstoot na dieselfde syfer as byvoorbeeld Mexico (50 maal hoër). Geen Afrikastaatshoof wat sy sout werd is, gaan dit sommer regkry om nee te sê vir buitelandse donasies wat hom in staat gaan stel om reusesokkerstadions op te rig, deftige motors aan te koop en na die buiteland te reis om VN-konferensies saam met ander staatshoofde by te woon nie. Gewoonlik word sulke konferensies gereël om die hongersnoodprobleem in Afrika aan te spreek.
Bitter min grond op die vasteland behoort aan individue, maar is eerder stamme of die staat s’n, wat nog minder aansporing bied vir Afrikane om te boer, voedsel te produseer en welvarend te word. In Namibië (waar Duitse belastinggeld gebruik word om grondhervorming te finansier) en ook in Suid-Afrika bestaan daar wel 'n kommersiële boerderysektor, maar vir hoe lank nog?
Dit is 'n mite dat Afrika tot hongersnood verdoem is. Die grootste deel van die vasteland is yl bevolk en die meeste lande beskik oor 'n klimaat wat bevorderlik is vir landbou. In die digbevolkte Europa werk 'n skamele 3% van die bevolking in die landbousektor en tog produseer hierdie boere groot oorskotte.
Hongersnood in Afrika is die skuld van gewetenlose heersers, wat hulle burgers uitbuit of sinlose oorloë voer. Die Weste behoort meer druk op en geloof in Afrika se vermoë om self reg te kom te plaas, en nie maar net die dosis medisyne elke keer te verhoog nie.
Keniane het gister fees gevier toe Barack Obama die Demokratiese benoemingsverkiesings gewen het. Sommige wil meer hulp aan Afrika hê en Obama word gesien as 'n seun van Kenia. Die genomineerde Amerikaner se Keniaanse familielede beskryf hom as die groot hoop vir Kenia en die Verenigde State.
Obama se stiefouma, Sarah Hussein Obama, sê dit sal goed wees as hy president van die Verenigde State word. Barack, sê sy, sal kan help om skole en hospitale in Kenia te bou, asook om weeskinders te help.
Barack Obama moet via 'n tolk met sy ouma praat aangesien sy nie Engels magtig is nie.
