Kategorie: Suider-Afrika

Adv. George Bizos het aangedui dat hy oudpres. Nelson Mandela se dogters se bewerings van wangedrag teen hom in die hof gaan teenstaan.

Bizos het Dinsdag dokumente by die Johannesburgse hooggeregshof ingedien – nege dae nadat Mandela se dogters, Makaziwe en Zanani die bewerings teen hom gemaak het, het The Star berig.

‘n Verstekvonnis sal teen Bizos, Bally Chuene en Tokyo Sexwale, minister van huisvesting, uitgereik word indien hulle nie dokumente om die saak te betwis, betyds indien nie.

“Ons het op 23 April kennisgewings ingedien dat ons kliënte [die bewerings] gaan teenstaan,” het Lisa Thomas van die regsfirma Norton Rose, wat names hulle optree, aan die koerant gesê.

Thomas het gesê dokumente sal volgende maand ingedien word. Sodra dié dokumente ingedien is, sal ‘n datum vir die verhoor bekend gemaak word.

Mandela se dogters het die hof gevra om ‘n bevel uit te reik om Bizos, Chuene en Sexwale te beveel om hul direkteurskappe in Harmonieux Investment Holding en Magnifique Investment Holding te beëindig.

Die susters beweer die drie het verskeie geskrewe versoeke geweier om te bedank.

Die Wetsontwerp op die Beskerming van inligting is Donderdag deur die parlement met 189 stemme teen 74 en een wat buite stemming gebly het, goedgekeur, het EWN berig.

Pres. Jacob Zuma sal die wet bekragtig, alhoewel regte-organisasies sê daar is steeds ‘n gebrek aan deursigtigheid in die openbare belang.

Murray Hunter van die Right2Know-veldtog het vroeër gesê die publiek is uitgesluit endit sal magshebbers help om korrupsie toe te smeer.

“Indien die wetsontwerp in sy huidige vorm bekragtig word, sal ons regstappe doen en indien nodig, sal ons die konstitusionele hof nader.”

Die waarnemende direkteur-generaal van staatsveiligheid, Dennis Dlomo, het die wetsontwerp verdedig as “gebalanseerd”.

Dr Pieter Mulder sê egter die Vryheidsfront Plus ondersteun opposisie samewerking om die Wetsontwerp na die Konstitusionele Hof te bring.

Mulder is onlangs deur ‘n buitelandse joernalis gevra watter land in Afrika die sterkste opposisie het. Volgens hom het Zimbabwe die sterkste opposisie in Afrika volgens sekere definisies, omdat die MDC 100 setels teenoor die 99 setels van Mugabe se Zanu-PF en 10 sitplekke van Alfred Mutambara se MDC2 het.

Om te bepaal hoe demokratiese ‘n land is, het Robert Dahl in sy boek Political Oppositions and Democracy, na drie kernvrae verwys:

1. Word alle mense toegelaat om te stem?

2. Is die opposisie verteenwoordig in die Parlement na ‘n verkiesing?

3. Kan ‘n opposisie en die publiek hul menings lug en organiseer teen die regering?

Mulder het gewys daarop dat Zimbabwe almal toelaat is om te stem, die opposisie toelaat in die Parlement, asook om te organiseer teen die bestel.

Zimbabwe word nogtans beskou as ondemokraties omdat demokratiese instrumente soos ‘n vrye pers en die beskerming van fluitjieblasers nie bestaan nie.

Mulder het gesê as hierdie instrumente nie werk nie of afgewater word, dan begin die pad na diktatorskap.

Die ANC in die Wes-Kaap het Woensdag gesê swart jeugdiges is reg as hulle sê dat die DA apartheid sal terugbring indien die party aan bewind kom.

Volgens ‘n opname wat Dinsdag vrygestel is, het 54% van swart jeugdiges gesê die DA sal apartheid terugbring indien hulle die verkiesing in 2014 wen.

Altesaam 26% Indiërs, 21% bruinmense en 19% respondente het saamgestem. Altesaam 30 009 mense tussen die ouderdom van 15 en 34 het deelgeneem aan die selfoonopname wat deur die verbruikersmaatskappy Pondering Panda gedoen is.

Van die respondente glo 46% dat die DA apartheid sal terugbring, terwyl 36% nie saamgestem het nie en 18% onseker is.

Op die vraag oor of die ANC-regering omgekeerde apartheid ingestel het, het 45% van die jeugdiges die gedagte verwerp, 40% het saamgestem en 15% was onseker.

“Die wysheid van die jeugdiges is duidelik,” het die ANC in die Wes-Kaap in ‘n verklaring gesê.

“In die Wes-Kaap en munisipaliteite waar hy regeer, het die DA presies dit gedoen.”

Die ANC het gesê swart ondernemings word uitgesluit van regeringskontrakte, wit manlike bestuurders geniet voorkeur vir alle aanstellings en swakker dienste word gelewer in swart en bruin woongebiede.

“Gelukkig is die jeug van vandag meer gesofistikeerd en weet dat ‘n jakkals nooit sy streke los nie,” het Marius Fransman, ANC-voorsitter in die Wes-Kaap, gesê.

“Ons kan nie toelaat dat SEB-Kodes wat nie bestaan nie, bepaal wie lewe en wie sterf nie”, sê Jean Kriek, VF Plus Jeugleier, Gauteng.

Dit volg na aanleiding van die publisering van die gewysigde SEB-kodes deur die minister van Handel en Nywerheid, mnr Rob Davies verlede jaar in die Staatskoerant wat stipuleer dat maatskappye en individue geen SEB-punte sal ontvang vir skenkings aan Nie-Winsgewende Organisasies (NWO’s) wat nie grootliks dienste lewer aan voorheen benadeelde groepe nie.

Volgens Kriek is onherstelbare skade reeds aangerig aan die welstand van die mees weerlose mense.

Na druk van die burgerlike samelewing en ‘n versoek gerig aan mnr Davies deur Adv Anton Alberts, VF Plus LP, in die parlementêre portefeuljekomitee oor handel en nywerheid om die wysigings te heroorweeg, is die voorgestelde SEB-kodes intussen teruggetrek.

“Die koeël is egter deur die kerk. Met die publisering van die gewysigde SEB-kodes het verskeie maatskappye en individue skenkings aan NWO’s gestaak. Hierdie fondse is nou verlore en beïnvloed die dag-tot-dag bestaan van mense wat afhanklik is van NWO-dienste”, sê Kriek.

Die Jakaranda Kinderhuis in Pretoria is ‘n duidelike voorbeeld van ‘n NWO wat deur die publikasie skade gely het. “‘n Skenker het ‘n beloofde R100 000 (honderd duisend rand) weerhou agv die gewysigde Kodes. Karige staatstoelae noodsaak NWO’s om te steun op skenkings vanuit die privaatsektor. ‘n Finansiële verlies van sò aard belemmer die funksionering van die kinderhuis”, het Kriek verder gesê

Die stand van sake het die VF Plus Jeug in Gauteng genoodsaak om ‘n beroep te doen op mnr. Davies om ‘n amptelike ministeriële skrywe te rig aan alle NWO’s om die feite reg te stel. “Ons gaan mnr Davies versoek om skenkers in kennis te stel dat die voorgestelde SEB-kodes van 2012 nie geld nie. Dit sal skenkers weer in staat stel om Jakaranda Kinderhuis te ondersteun soos vroeër”, het Kriek verduidelik.

TopTV se aansoek om pornografie uit te saai is goedgekeur, het Channel24 berig.

Die Onafhanklike Kommunikasie-owerheid van Suid-Afrika (Okosa) het die groenlig gegee. Geen datum is gegee vir wanneer die uitsendings sal begin nie.

“Daar is geen wet wat die vervaardiging en verspreiding van volwasse inhoud in die Republiek verbied nie,” het Okosa gesê.

Okosa het Woensdag aangekondig dat On Digital Media (ODM), wat TopTV besit, se aansoek om drie pornografiese kanale uit te saai, goedgekeur is.

Die Playboy TV, Desire TV en Private Spice-kanale sal tussen 20:00 en 05:00 uitgesaai word.

TopTV, wat al geruime tyd finansiële probleme het, hoop dié kanale kan help om meer intekenare te lok.

 

Die Kovsie-student wat verkrag is, is nie behoorlik behandel by die Pelonomi-hospitaal in Bloemfontein nie. Haar vriend is intussen ontslaan. Die kapers en verkragters is nog op vrye voet, berig Volksblad.

Volksblad het navrae per e-pos gestuur aan die woordvoerder van die Vrystaatse gesondheidsdepartement, Mondli Mvambi, oor beweerde swak diens wat die student by die Tshepong Thuthuzela-sentrum vir onder meer verkragtingslagoffers by die Nasionale Hospitaal gekry het.

Volgens haar is die nodige toetse om forensiese bewyse te versamel eers gedoen nadat sy en haar familie daarop aangedring het. In die proses het heelwat tyd verloop en kon bewysmateriaal verlore gegaan het.

‘n Kapmes is opgetel op die plek waar sy en haar vriend gekaap is, maar polisiebeamptes wou dit nie aanvaar nie.

Die polisie het slegs die kaping geregistreer, maar nog steeds nie die verkragting nie.

Die bende wat vir hulle nagmerrie verantwoordelik is, het na bewering intussen ‘n tweede en derde keer toegeslaan kort nadat die twee gekaap is en die jong vrou daarna verskeie kere verkrag is.

Die polisie het gister bevestig hulle ondersoek ‘n moontlike verband tussen die kaping en verkragting van die student en twee soortgelyke voorvalle van kaping en verkragting wat oor die naweek plaasgevind het.

Die 18-jarige Kovsie se 22-jarige vriend, albei van Bloemfontein, is Donderdagaand in die Bloemfonteinse woonbuurt Vistapark gekaap, en die man vir dood agtergelaat.

Die kapers met die meisie in die gekaapte bakkie gevlug en haar tot Vrydag in die vroeë oggendure verskeie kere verkrag.

 

 

BP sal nagenoeg R5 miljard in Suid-Afrika belê as ‘n gebaar van vertroue in die rigting waarin die land beweeg, het dié energiemaatskappy Dinsdag gesê.

“Met die verbeterende klimaat vir beleggers, veral die stabiliteit in beleid… wat in Suid-Afrika gesien word, het BP besluit om ‘n noemenswaardige belegging te maak tot die voordeel van al die belanghebbendes,” het British Petroleum (BP) se uitvoerende hoof, Iain Conn, aan verslaggewers in Johannesburg gesê.

“Dis vir my ‘n groot plesier om aan te kondig dat BP meer as R5 miljard in Mosambiek en Suid-Afrika gaan belê oor die volgende vyf jaar, beginnende in 2013, wat nuwe aanlegte en infrastruktuuropgradering sal insluit.”

Die belegging sal uit BP se kontantreserwes befonds word. Conn het gesê R800 miljoen sal belê word in Mosambiek, en R4,7 miljard in Suid-Afrika.

Altesaam R2,5 miljard sal belê word in die opgradering van infrastruktuur by die Sapref-raffinadery, die maatskappy se projek saam met Shell in KwaZulu-Natal.

Meer as R1 miljard sal ook belê word in aanlegte in Suid-Afrika en Mosambiek.

Die res van die geld sal in die “kleinhandelnetwerk” belê word.

“Ons vind die vooruitgang bemoedigend wat in Suid-Afrika en Mosambiek gemaak word om ‘n omgewing van sekerheid oor beleid en kontinuïteit vir alle ekonomiese aktiwiteite te skep,” het Conn gesê.

‘n Geraamde 25 000 lede van die onderwysvakbond Sadou sal vandag aan betogings in Pretoria en Kaapstad deelneem. Die vakbond sê hy wil die druk verskerp op die minister van Basiese Onderwys, Angie Motshekga en haar direkteur-generaal Bobby Soobrayan om te bedank.

Die departement en die vakbond kon vroeër nie ooreenstemming bereik oor die wettigheid al dan nie, van die staking nie. Die departement sê onderwysers wat aan die staking deelneem, kan tugstappe in die gesig staar en die reël van geen werk- geen betaling sal geld.

Die Wes-Kaapse minister van Onderwys, Donald Grant het vroeër Sadou se oproep op leerlinge om aan die betoging deel te neem, ten sterkste veroordeel.

Grant sê dit is onverantwoordelik van onderwysers om leerlinge aan te moedig om aan die betoging deel te neem. Hy het gesê leerlinge moet dié oproep ignoreer en skool toe gaan. Grant sê sy departement het maatreëls ingestel om die belange van leerlinge te beskerm.

Die landwye busbestuurderstaking gaan vandag verdere momentum kry. In Kaapstad word verskeie betogings regdeur die Skiereiland beplan waar bestuurders op ‘n verhoging van 18 persent aandring.

Lede van SATAWU en geaffileërde vakbonde het Vrydag ophou werk nadat ‘n dooiepunt in die salaris-onderhandelings bereik is.

Die bestuur bied 6,5 persent aan. Die voorsitter van SATAWU in die Wes-Kaap – Wayne Louw – sê hulle sal met die staking voortgaan totdat daar aan al hul eise voldoen is.

Die mislukking van die regering se herverdelingsprogram van plase aan swart eienaars is opnuut onderstreep met die aankondiging van die departement van landelike ontwikkeling en grondhervorming dat hy beoog om vanjaar 730 van die plase te herkapitaliseer.

Die minister van landelike ontwikkeling en grondhervorming, Gugile Nkwinti, het verlede jaar reeds erken dat 90% van die herverdeelde plase mislukkings is.

Tot dusver het die regering die skuld vir die mislukte program op die boere gepak deur te sê plase is in ‘n swak toestand wanneer swart boere dit oorneem aangesien wit eienaars ophou om daaraan aandag te gee wanneer ‘n geldige grondeis ingestel word.

Mnr. Pieter Groenewald, die Vryheidsfront Plus se woordvoerder oor landelike ontwikkeling en grondhervorming, sê die realiteit is dat die regering weens onbeholpenheid die oordragtydperk laat sloer, en dat banke nie geld aan boere wil leen terwyl daar ‘n eis op die plaas is nie.

“Dit sal noodwendig daartoe lei dat die plaas agteruit sal gaan. Daar is van staatskant ook nie genoeg ondersteuning vir nuwe swart boere om ‘n sukses van hul onderneming te maak nie,” sê mnr. Groenewald.

Die regering het die afgelope twee jaar sowat R826 miljoen uitbetaal aan die herkapitalisering van plase wat misluk het.

Verlede jaar is sowat R550 miljoen bestee teenoor die R276 miljoen van die vorige boekjaar.

“Ja ons steel krag!” Dit was die openlike reaksie van inwoners van die Tswaing gemeenskap tydens ‘n sitting van die Tshwane metroraad se petisiekomitee die afgelope week.

Drie mans wat ‘n petisie namens die gemeenskap aan die raad oorhandig het oor krag en water wat nie aan hulle voorsien word nie, het tydens hierdie sitting openlik aan die petisie komitee erken dat hulle krag onwettig aangelê het en die krag steel.

Die streeksleier van die VF Plus in Pretoria en leier in die raad, Raadslid Philip Van Staden, het in hierdie komitee daarop aangedring dat die metropolisie dadelik hierdie mans in hegtenis moet neem en dat hulle van kriminele oortredings aangekla moet word. “Mnr die voorsitter, raadslede is daar om die eiendom en belange van die stad te beskerm. Krag diefstal is ‘n kriminele oortreding en die VF plus verwag dat hierdie drie mans nou dadelik gearresteer moet word”.

Die ANC voorsitter van die komitee het egter net die drie mans gewaarsku om dadelik die krag te ontkoppel en dat hulle dit nie weer moet waag om met so ‘n petisie voor die raad se komitee te verskyn nie. Hy het genoem dat die komitee weer na die saak sal kyk sodra die krag ontkoppel is.

“Hierdie waarskuwing wat die ANC voorsitter aan die mans gerig het, dui daarop dat diefstal en kriminele aktiwiteite nie ernstig genoeg opgeneem word nie en dat ‘n hou op die hand al straf is wat hulle ooit gaan kry. Dit is jammer dat die ANC so ‘n houding inneem want dit gaan die boodskap regdeur die stad uitstuur dat kragdiefstal en ander kriminele oortredings toegelaat word”, sê Raadslid Philip Van Staden.