Xingwana en haar brouspul die deur gewys

Lulu Xingwana, die omstrede minister van vroue, kinders en gestremdes, en haar hele afvaardiging is Woensdag die deur gewys in die parlement in Kaapstad, het Beeld berig.

Xingwana se departement is in Desember uitstel gegun om terug te rapporteer oor ‘n omkeerstrategie, maar die dokumente wat LP’s veronderstel was om te ontvang ter voorbereiding vir die sessie, is eers Dinsdagaand afgelewer.

Boonop was die verslag ‘n deurmekaarspul, het baie LP’s gesê.

Liezel van der Merwe, IVP-LP, het gesê: “Die dokumente is so deurmekaar ek weet nie of ek kom of gaan nie.”

LP’s is volgens parlementêre reëls veronderstel om sulke dokumente minstens 48 uur voor ‘n sessie te ontvang sodat hulle die nodige vrae kan voorberei en ingeligte besluite kan neem.

Ontstoke LP’s, baie van hulle ANC-lede, het Xingwana en haar afvaardiging teruggestuur om hul brouwerk reg te stel en gevra dat haar departement opgeskort moet word en sy afgedank noet word.

Xingwana het namens haar departement om verskoning gevra, en gevra of sy ‘n voorlopige verslag kan indien.

“Hierdie is onaanvaarbaar, maar die departement het so hard gewerk.”

Die departement het in sy kort bestaan meer as ‘n half miljard rand ontvang en “daar is niks om daarvoor te wys nie, buiten uitspattige partytjies, buitelandse reise en ontwerpersmeubels”, het LP’s gekla.

“Geld wat die departement ontvang het, is vermors en nou gaan dit selfs meer geld kos om dit weer op die been te bring,” het ‘n opposisielid gesê.

Intussen het die minister ook om verskoning gevra vir haar uitlatings oor Afrikaner-mans, wat dié week ‘n hewige reaksie ontlok het.

“Dit het vir my duidelik geword dat my kommentaar sommige lede van ons gemeenskap ontstel het.

“Ek wil, gevolglik, daardie kommentaar terugtrek en onvoorwaardelik om verskoning vra aan hulle,” het sy gesê.

Dié verskoning volg ná Xingwana aan die Australiese Uitsaaikorporasie (ABC) gesê het jong Afrikanermans word grootgemaak om te glo dat hulle vroue en kinders “besit”.

“Jong Afrikanermans word grootgemaak in die Calvinistiese geloof en glo hulle besit ‘n vrou, hulle besit ‘n kind, hulle besit alles, en daarom kan hulle daardie lewe neem, want hulle besit dit,” het sy gesê.

“Ons het ook kulturele verskille in ons eie gemeenskappe waar ons vroue het wat gedwing word om te trou en ons hanteer al daardie sake.”

ABC het ‘n onderhoud met Xingwana gevoer oor die dood van die Paralimpiese kampioen Oscar Pistorius se meisie, Reeva Steenkamp.

Die insetsel, wat Maandag uitgesaai is, fokus op vuurwapengeweld in Suid-Afrika.

“Ek sal hom vra om die waarheid te praat. Ek sal hom vra om vroue te respekteer,” het Xingwana gesê.

“Ek sal hom vra om ontslae te raak van sy vuurwapens. Want ek glo as hy nie vuurwapens in sy huis gehad het nie, sou Reeva Steenkamp vandag gelewe het.”

Xingwana se uitlatings is skerp gekritiseer.

“Hierdie minister het bo enige twyfel bewys dat sy nie geskik is om ‘n amp te hê in ‘n konstitusionele demokrasie nie,” het Jan Bosman, sekretaris van die Afrikanerbond, in ‘n verklaring aangevoer.

Ook AfriForum het Dinsdag gesê hy oorweeg dit om ‘n klagte teen Xingwana by die gelykheidshof te lê oor haar uitlatings.

Isaac Mangena, MRK-woordvoerder, het gesê die kommissie het drie klagtes van mense ontvang wat meen Xingwana se woorde is rassisties en diskriminerend. Die MRK ondersoek die klagtes.

VSA se ambassadeur na SA: ‘n Hollywood-hanswors

Die volgende Amerikaanse ambassadeur na Suid-Afrika sal glo Patrick Gaspard wees. Hy is die uitvoerende direkteur van die Demokratiese Nasionale Komitee, asook voorheen die Direkteur van die Kantoor van Politieke sake in die Withuis (Karl Rove, die berugte ideoloog, se pos gedurende George W. Bush se presidentskap), nasionale politieke direkteur van Barack Obama se 2008 presidensiële veldtog en assistent-personeel direkteur van President Obama se verkiesingsoorgangspan.

Dis ‘n mondvol, maar al die kêrel se postitels help nie met begrip oor wie die man werklik is wat die VSA hierheen gaan stuur nie.

Sy onlangse twiet egter, sal die mens ontbloot. Verlede jaar toe die Amerikaanse Hooggeregshof “Obamacare” in sy waterskeidingbeslissing gered het, het Gaspard self berugtheid verwerf toe hy triomfantelik oor die besluit getwiet het: “Dit is grondwetlik, Tewe!” [“It’s constitutional, Bitches.”] Nie juis gepaste taalgebruik vir sy amp nie.

Gaspard se keuse verteenwoordig die voortsetting van die neiging in die Obama-administrasie om Hollywood-agtige hansworse bó politieke figure en gesoute diplomate vir hierdie soort pos uit te sonder.

Michelle O. het seker nie verniet geskiedenis gemaak om die eerste Amerikaanse presidentsvrou te wees om by die pasafgelope Oscars haar bakkies te wys nie

Gaspard was ook New York se burgemeester, David Dinkins se assistent. Dinkins, natuurlik, was die eerste en enigste swart burgemeester in die laat 1980’s en vroeë 1990’s.

Dinkins se termyn is gekenmerk deur die polariserende rasseboikot van Koreaanse kruideniers in Flatbush en die Crown Heights oproer in 1991. Toe die swart krimineel Lemrick Nelson vrygespreek is weens die moord op Yankel Rosenbaum tydens die oproer het Dinkins die volgende gesê: “Ek het geen twyfel dat die strafregstelsel in hierdie geval regverdig en openlik gehandel het nie.” Hy het waarskynlik nog ‘n bloedige rasse-opstand met sy steun vir die onregverdige beslissing daardeur gesystap.

Gaspard het ook gewerk vir Vermont se goewerneur Howard Dean se onsuksesvolle veldtog vir die Demokratiese presidensiële veldtog in 2004. Daarna het hy Jesse Jackson se 1988 presidensiële bod gesteun wat tot niks gelei het nie.

Gaspard was ook ‘n gemeenskapsorganiseerder vir skoolhervorming in die VSA. Volgens The Washington Post, was Gaspard insgelyks betrokke in die unie-gebaseerde anti-apartheid pogings gedurende die 1980’s.

Gaspard is Haities-Amerikaans en is in 1967 in Zaïre gebore  – nou die Demokratiese Republiek van die Kongo. Sy ouers het daar gewerk en hy het saam met hulle na die VSA as ‘n klein kind gekom. Hy is getroud met twee kinders.

Gaspard was ook ‘n sleutelfiguur in die koördinering van Amerikaanse ramphulpverlening in Haiti wat intussen tot bitter min hulp nòg vooruitgang ná die aardbewing op die eiland gelei het.

Nigerië se president Goodluck Jonathan het ook ervaring van die Amerikaanse model wat Gaspard verteenwoordig.

Swart Amerikaanse sterre soos Jay-Z en Beyoncé het ‘n aantal jare gelede hul voorouers van die vasteland kom ontmoet ter verligting van armoede in Nigerië. Dit blyk dat vermaak die beste medisyne daarvoor is, eerder as iets blywends.

Goodluck Jonathan het glo miljoene uit ‘n armoedefonds betaal om ‘n baie duur hip-hop konsert in Lagos, 600 km ver van die provinsie waaruit die geld kom, te borg.

Miskien het hy gedink dat die publisiteit wat ‘n superster se verskyning in Nigerië sal oplewer, sal ook buitelandse beleggings aanmoedig waar Bono en Madonna so klaaglik misluk het.

Afwesige onderwysers bly miljoene dae weg

Onderwysers wat stokkiesdraai was sowat 7,5 miljoen dae verlede jaar afwesig, het Angie Motshekga, minister van basiese onderwys, gesê.

“Ons het die hoogste afwesigheidsyfer in die Suider-Afrikaanse Ontwikkelingsgemeenskap (SAOG). Ons staan op 19 dae per onderwyser per jaar. ‘n Gemiddeld van 10% nasionaal,” het sy Dinsdag aan joernaliste in die parlement gesê.

Afwesigheid in ander SAOG-lande is gemiddeld nege dae per onderwyser per jaar.

Volgens die departement was daar 392 000 onderwysers in 2012 regoor die land by openbare skole.

Met elke onderwyser wat 19 dae verlede jaar afwesig was, staan dae aantal dae wat hulle afwesig was, op 7 448 000.

Motshekga het gesê daar is “groot kommer” in haar departement oor onderwysers se verantwoordelikhede – dit sluit in om betyds by die skool aan te kom en die dagtaak te voltooi.

Haar departement oorweeg om ‘n elektroniese inklokstelsel in plek te stel om die huidige registers te vervang.

Motshekga het in reaksie op ‘n vraag gesê die afdae wat onderwysers neem, is “pure afwesigheid,” maar het gesê ernstige siektes het ook ‘n rol gespeel in die hoë syfer.

Sy het gesê vervoerprobleme is ook ‘n rede hoekom baie onderwysers laat of afwesig is.

Moslem-moord: Borg geweier

‘n Man wat daarvan aangekla word dat hy ‘n Moslem verlede jaar doodgeslaan het, is in die Krugersdorp-streekhof borgtog geweier.

“Die applikant kon nie aan die hof bewys dat dit in belang van geregtigheid sal wees om hom op borgtog vry te laat nie. Borgtog is dus geweier,” het landdros Reginald Dama tydens Roedolf Viviers se borgtogaansoek gesê.

Viviers (28) en Zayne van Tonder (33) is daarvan aangekla dat hy Muhammad Fayaaz Kazi op 6 Augustus buite ‘n Chicken Licken-kitskosrestaurant in Magaliesburg doodgeslaan het.

Kazi het die mans glo gekonfronteer nadat hulle hom na bewering oor sy baard gespot en hom beledig het.

‘n Geveg het toe uitgebreek, en Kazi het later aan sy beserings in die hospitaal beswyk.

Die aanklagte teen Van Tonder is later teruggetrek en hy is vrygelaat.

Kazi se broers, Mohammed Nuaman (22) en Mohammed Farhan (18) het gesê “prys Allah” toe Dama sy beslissing gemaak het.

Sy weduwee, Sajidah, het in trane uitgebars en vriende en familie in die openbare galery omhels.

Viviers se verhoor sal op 4 Maart in die Johannesburgse hooggeregshof begin.

Tragiese moord tref OP-landdros

Die landdros wat borgtog aan die gestremde atleet Oscar Pistorius toegestaan het, is familie van die vrou wat haar twee kinders vergiftig het en daarna selfmoord gepleeg het.

Hooflanddros Desmond Nair het Dinsdag bevestig dat die vrou, wie se lyk Sondagaand saam met dié van haar seuns in hul huis gevind is, sy niggie is.

Die vrou se broer, Vishal Maharaj, het haar as Anusha Maharaj geïdentifiseer. Die polisie vermoed sy het haar twee kinders vergiftig en daarna het sy op dieselfde manier selfmoord gepleeg.

Volgens die polisie is selfmoordbriewe op die toneel gevind.

Nair het verlede week Pistorius se saak, wat regoor die wêreld opspraak gemaak het, hanteer.

Pistorius word daarvan beskuldig dat hy sy vriendin, Reeva Steenkamp, op Valentynsdag in sy huis doodgeskiet het.

‘Beesvleisprodukte’ in SA donkie, buffel, hoender

Voedselprodukte wat valslik as “beesvleis” gemerk is, word ook in Suid-Afrika verkoop.  ‘n Ondersoek deur wetenskaplikes van die Universiteit van Stellenbosch het aangetoon dat donkie-, bok- en buffelvleis gebruik word ipv bees.

“Die studie het getoon dat enigiets van soja, donkie-, bok- en waterbuffelvleis in 95 (68%) van die 139  maalvleise, hamburgers, deli-vleise, wors en gedroogde vleise wat getoets was, gevind is,” het die universiteit se studie bevind

Die studie, wat gedoen is deur dr. Donna-Maree Cawthorn en prof. Louw Hoffman van die universiteit se departement van veekundige wetenskappe, is in die internasionale Food Control-joernaal gepubliseer.

“Ons studie bevestig dat die verwerkte vleis wat verkeerdelik gemerk is, algemeen in Suid-Afrika is en nie net regulasies oor die etikettering van voedsel oortree nie, maar ook ekonomiese, godsdienstige, etiese en gesondheidsvraagstukke verontagsaam,” het Hoffman gesê.

Hoender en vark word algemeen aangetref in produkte wat nie veronderstel is om dit te bevat nie.

“Donkie, bok en waterbuffel is ook in ‘n aantal van die produkte gevind.”

Verskeie voorvalle is die afgelope ruk in Europa aangemeld waar perdevleis in voedselprodukte wat as beesvleis gemerk is, gevind is.

Perdevleis is in verskeie voedselprodukte soos in hamburgers, lasagne, pastasous, skooletes en selfs hospitaaletes in Europa opgespoor.

Twiet kan jou agter tralies laat beland

Suid-Afrikaners word gewaarsku dat ‘n twiet van net 140 karakters jou agter tralies kan laat beland. Verkeerde boodskappe kan ‘n moontlike tronkstraf van tussen drie en ses maande tot gevolg hê.

Emma Sadleir, ‘n sosiale media prokureur by Webber Wentzel, het gesê dat Twitter en Facebook-gebruikers wat rassistiese of aanstootlike boodskappe pos aangekla kan word van crimen injuria of ‘n klagte kragtens die Wet op Gelykheid in die gesig kan staar.

“Dit is nie ongewoon vir ‘n persoon wat skuldig bevind word van crimen injuria in Suid-Afrika om gevange geneem te word nie,” het Sadleir gesê.

“Ek weet van twee afsonderlike gevalle waarin polisiemanne geroep die ‘k’ woord gebruik het en in beide gevalle, is die persoon gevonnis is tot tronkstraf vir ‘n tydperk van drie tot ses maande.”

Soos enige ander vorm van publikasie, word aanlyn-gebruikers aanspreeklik gehou vir alle kommentaar wat hulle maak op sosiale netwerke, selfs wanneer hulle hertwiet en boodskappe deel.

Sadleir het gesê dat mense wat geraak word deur boodskappe wat na hulle verwys in naam ‘n klag van crimen injuria by ‘n polisiestasie kan lê.

Anonieme gebruikers word nie vrygestel van strafregtelike klagte of klagtes gelê by die Gelykheidshof teen onbillike diskriminasie, teistering en haatspraak nie, het sy gesê.

Dit is omdat dit moontlik is om ‘n hofbevel te kry om ‘n webwerf te dwing om enige inligting soos e-pos of ‘n IP-adres van die anonieme persoon te oorhandig.

Die Suid-Afrikaanse Menseregtekommissie het gesê dat ‘n toenemende aantal klagtes oor aanstootlike gedrag aanlyn ontvang word.

Die meeste klagtes is oor ras, sê SAMRK se Gauteng-bestuurder Chantal Kisoon. Godsdienstig-klagtes het tweede gekom.

“Ons wette is baie duidelik dat ons heeltemal toegelaat word om onsself uit te druk, maar sekere vorme van uitdrukking is verbode en mense het bewus geword van daardie wette,” het sy gesê.

Oscar Pistorius se boek doen beroerd

Die boekverkope van Oscar Pistorius se biografie doen beroerd nadat hy in hegtenis geneem en aangekla is vir die moord op sy vriendin, Reeva Steenkamp.

Navrae deur The Star by boekwinkels in Gauteng het aangedui dat terwyl koerante met artikels oor Pistorius van die rakke vlieg, die media-aandag geen uitwerking het op die verkoop van sy boek, wat in Augustus vrygestel is nie.

Die koerant het berig dat een reaksie was dat dit “in die asblik langs Lance Armstrong gesmyt moet word”.

Kalahari.net adverteer die boek teen ‘n afslagprys op webwerwe wat artikels oor die Pistorius hofsaak plaas. Webwerwe wat daaroor berig word ook fluks gelees.

Exclusive Books by die OR Tambo Internasionale Lughawe het gesê die boek was ‘n treffer verlede jaar ná die Paralimpiese Spele, maar dat dit nie goed verkoop het die afgelope tyd nie.

‘n Bestuurder by ‘n Books Galore-tak, het gesê mense toon geen belangstelling in die aankoop van die boek nie.

By Exclusive Books in Brooklyn Mall, Pretoria, was die reaksie soortgelyk. Christo Kellermann gesê: “Miskien gaan mense wag totdat dit verby is voordat hulle dit koop.”

Nog ‘n boekwinkelbestuurder het gesê daar is “geen ontploffing in die verkope van die boek of ‘n stormloop van kliënte in die plasing van bestellings nie.”

Die koerant het ook berig dat die uitgewers van Sarie en GQ-tydskrifte – op wie se omslae Pistorius verskyn het – gevra het dat hulle tydskrifte van die rakke afgehaal word die dag na Steenkamp se moord.

Oscar Pistorius se tante is reeksmoordenaar-spesialis

“Ek sal nooit reeksmoordenaars vergewe nie, maar ek hulle kan verstaan.” Dit is die woorde van Micki Pistorius. Sy is ‘n moorddeskundige en Oscar Pistorius se tante

Die 52-jarige tante het ses jaar ondervinding in die polisie se ondersoekende sielkunde-eenheid en is ‘n outeur van ‘n boek oor die onderwerp.

Sy kan egter nie geraadpleeg word deur die vervolging nie as gevolg van familiebande.

Die tante van beweerde moordenaar Pistorius is een van Suid-Afrika se bekende kriminoloë

Micki Pistorius was betrokke in meer as 30 reeksmoordenaargevalle en het gehelp om byna 200 speurders in die ondersoek van reeksmoorde op te lei.

In haar boek ‘Catch Me A Killer’ sê dr Pistorius sy beskik oor ekstra-sensoriese magte van persepsie wat sy “cryptesthesia” noem.

Sy het ook al omstrede kommentaar oor moordenaars gelewer: “Reeksmoordenaars is nie monsters nie, hulle is mense met gemartelde siele. Ek sal nooit vergewe wat hulle doen nie, maar ek kan dit verstaan.”

Volgens die polisie het die getremde atleet en sy meisie so hard begin stry in haar laaste ure dat sy bure gehoor het “hulle skree en skree”, berig die Daily Mail.

Oscar ‘n ‘buierige pes’, geen teken van kolf

Cecil Myers, die pa van ‘n vriendin by wie die vermoorde Reeva Steenkamp in Johannesburg gewoon het, het gesê hy het Pistorius as “baie buierig” ervaar en die model het gevoel sy is ingehok, berig die Daily Telegraph.

“Baie gaaf en sjarmant toe hulle begin uitgaan het. En hy het altyd ingekom om hallo te sê. Maar toe hulle begin het om vas uit te gaan, het hy haar net afgelaai en opgelaai.

“Dis nie reg nie. Ek noem dit respek. As jy in ‘n verhouding is en jy laai die “dogter” van die huis op, kom ten minste in en sê hallo.” Na die tweetjies se eerste afspraak het Pistorius “haar nie uitgelos nie,” het mnr Myers gesê.

“Hy het aangehou om haar te verpes, en haar gebel en gebel en gebel. Oscar was haastig en ongeduldig en baie buierig – dit is my indruk van hom.

“Sy het vir my gesê hy druk haar ‘n bietjie in ‘n hoek Sy voel ingehok. Ek het vir haar gesê ek sal met hom praat. Ek het vir hom gesê hy moet homself nie op haar afdwing nie.

“Hy het ingestem, maar sy gesig het vir my gewys wat hy dink: ‘O, hierdie man praat nonsens’.”

Myers beskryf sy woede toe hy oor Reeva se dood gehoor het, en dat dit Pistorius was wat haar doodgemaak het.

“Sy was my meisiekind, en hy het haar vier keer van agter ‘n geslote deur geskiet. Een skoot kon ‘n fout gewees het – maar vier keer,” het hy gesê.

“Ek het ‘n drukkery-onderneming, en ek het groot, geraamde foto’s van Oscar en myself Ek het hulle almal stukkend geslaan. Ek wil nie iets van hom weet nie.

“Mense sal nou wegbly van hom. Vroue ook, hulle sal te bang wees, geen meisie wil haar ‘n gat afgeskiet hê nie. En as my dogter saam met hom wil uitgaan, sal die papaja die spreekwoordelike waaier tref.”

Myers het gesê hy het besluit om met die Britse koerant te praat, want “oral waar jy gaan, is dit net Oscar, Oscar”.

“Maar Reeva was die slagoffer, haar stem moet ook gehoor word. Mense moet weet wat Reeva Steenkamp was,” het hy gesê.

Oscar Pistorius het Reeva Steenkamp by ‘n vriend se verlowingspartytjie in Januarie ontmoet.

Die polisie het Myers, sy dogter, Kim, en sy seun, David, gevra om Steenkamp se liggaam formeel te identifiseer die oggend toe sy vermoor is.

“Ons het na haar gekyk deur ‘n glasvenster Sy was … jy weet … die manier waarop iemand lyk wat geskiet is … Die polisie het probeer om dit makliker vir ons te maak,” het hy gesê.

Hy het nie Steenkamp se beserings verder beskryf nie. Polisie het Sondag berigte ontken dat Pistorius ‘n krieketkolf gebruik het om sy meisie aan te rand voor hy haar geskiet het.

Myers, wat Steenkamp se liggaam geïdentifiseer het, het aan die Daily Telegraph gesê hy is “verras” deur verslae dat sy met ‘n krieketkolf aangerand is.

“Toe ek Reeva geïdentifiseer het, het ek geen aanduiding daarvan gesien nie,” het hy gesê. “Die eerste wat ek daarvan geweet het was toe ek dit gelees het in die koerante. Ek weet nie waar dit vandaan kom nie.”